Cha Pol karereu mataimon Atens yah kanoi mataimon Korin
18
Yah kope Cha Pol mataimon Atens emo karereu yah kanoi mataimon Korin.
2 Kope boko vemona,
bia Juda rava kavakakeiya awoꞌo ya Cha Akwila.
Bia vemona Cha Akwila emo,
boko ya provins Pontus.
Umo ovu kerenoriki veꞌen ke,
ya re om ya Kwa Prisila kerekepi kantri Itali yah kope kerepepeu tah kerekape kerekepi mataimon Korin.
Ku korao veka,
Cha Sisar Klodius emo awirai kupuana kairai naiy aro Juda maomao va nepepeu mataimon pako Rom yah nenopi boko raꞌa.
Kope Cha Pol kanoi kayarai.
3 Bia vemona Cha Akwila re om ya Kwa Prisila,
oꞌro sel-a kere parepare keresave revo veka ya Cha Pol inia karao emo.
Korao veka tah Cha Pol kakeiy riꞌiy yah bova karao riꞌiy minia.
4 Kope de koka vo Sabat,
Cha Pol inia kanoi oꞌro lotu yei Juda yah ava kairai riꞌiy.
Cha Pol karao vora riva nokokore naiy aro Juda tah yei Grik va nebilip pova Jisas.
5 Kope Cha Sailas re Cha Timoti provins Masedonia kerepepeu yah kerekape nereyaraka Cha Pol.
Yah taim vemona,
Cha Pol karoiy ro bo moikera vemo pon karao tah kairai roiy aro Juda veka Jisas,
ya Krais.
6 Toh yei aro Juda emo awirai ya Cha Pol kioniy tah piakepari poa.
Korao veka tah Cha Pol amoꞌo kerinia noreka ya ero kairere nare kere vere.
Ao vemona karao vora noriritai veka pasin yei kepao ero,
God-a beya karerero vai.
Yah kope kairai roiy veka,
“Boh ao taipo rava norerekare ripu pa,
nai ero mopu veku beya nena vai.
Yah nena va nanenepu nanon niꞌiy aro voro beya kiave Juda vai.”
7 Yah kope Cha Pol oꞌro lotu yei Juda emo karereu yah kanoi kakeiy riya Cha Titius Jastus.
Oꞌro ya bia emo kwinia kakuke ri oꞌro lotu.
Tah ya beya Juda vai,
toh ya lotu pon inia karao roa God.
8 Hetman vo oꞌro lotu yei Juda emo,
awoꞌo ya Cha Krispus.
Kope taim vemona,
ya tah yei aro koka kekepi piya oꞌro ya vemo,
kebilip pova Biapako.
Yah aro bombiam prumo kekepi mataimon Korin emo awirai ya Cha Pol kerivo tah kebilip yah baptais-a keko.
9 Kope roro raꞌa,
Biapako kakai ava kairai roa Cha Pol veka kayoyo.
Taim vemona,
Biapako kairai roa veka,
“Beya nama riri vai,
mema awirai-a namairiraiꞌvo nanom tah beya ro-a nama pikim vai.
10 Ku vo korao veka,
nena va nakeni nima tah beya kuiniari bio rava narerekema yah narao roma toro vai.
Aro bombiam prumo kekepi mataimon vemona God-a kamompe yei veꞌen kiave aro bilip.”
11 Korao veka tah Cha Pol kakeiki mataimon Korin konoi kuiniari veka ainini moikera tah ura 6-pla yah awirai ya God-a kairiraiꞌvo roiy.
12 Toh taim vemona,
Cha Galio kakei veka gavana vo provins Akaia.
Yah aro Juda keopokeu piꞌiy minia yah kiavia Cha Pol yah keko ya kenopi kot.
13 Yah chirai veka,
“Bia vemona inia karoporeiy aro koka va beya pava nepekeu lo memi Juda vai.
Tah yei inia pava kepekeu pasin maraꞌa taim lotu kepao poa God.”
14 Kope taim Cha Pol karao awirai ya nairai,
yah Cha Galio kairai roiy Juda veka,
“Boh mopu Juda kot-a nepia pao bio raꞌa uvo kapana o ao taipo rava narao kuiniari va kot mopu nana rivo.
15 Toh kokape kopu oukoku pore awirai yah awoꞌo tah lo mopu veku.
Mopu veku nopopokeu yah nopu stretim.
Nena beya kuiniari kot rere ao vemona nana rivo vai.”
16 Korao veka tah Cha Galio karirikeiki kenopi upoꞌo.
17 Yah kiavia Cha Sostenes,
hetman vo oꞌro lotu yei Juda.
Tah kepieiya upoꞌo vo oꞌro kot.
Toh Cha Galio beya ava raꞌa karao rou ao vemona kepao emo vai.
Cha Apolos kanoi kakeiy riya Cha Akwila re Kwa Prisila.
18 Cha Pol baunke kakei umo koprumoki naka mataimon Korin.
Yah kope karereiy Kristen vo mataimon Korin yah kanoi kakeiy mataimon Senkria vora sip-a nako nanoiy distrik Siria.
Yah taim kakei mataimon Senkria,
chapeꞌe ya kepiaꞌoro.
Ku vo korao veka,
titja promis-a rava karao roa God.
Yah kope chapeꞌe kepiaꞌoro vora noriritao veka taim vo promis yah kobaunki.
Yah kope sip-a raꞌa kako yah kanoi distrik Siria.
Kwa Prisila re Cha Akwila minia kerenopi pova.
19 Yah keparara kenopi mataimon Efesus,
tah Cha Pol karereiya Cha Akwila re Kwa Prisila boko vemona.
Yah kanoi oꞌro lotu are yei Juda tah awei ava kairiraiꞌvo konoi kokai.
20 Yah kope chirai poa nakeiki riꞌiy popo,
tah ya kairai bauni.
21 Kope taim karao nanoi,
yah kairai roiy veka,
“Nena va nakane varu boh God-a veku narere rona va nakane.”
Yah kope mataimon Efesus emo karereu yah sip-a kako yah kanoi.
22 Taim kanoi kareiki mataimon Sisaria,
yah kakoi nake tah kanoi mataimon pako Jerusalem yah ova korova roiy Kristen yah kope kararo mataimon Antiok.
23 Cha Pol kakeikire popo mataimon Antiok yah kope mataimon vemona karereu tah kararo boko memeꞌme vo provins Galesia yah Frigia vora nalpim yei Kristen nebilip yah neropi kupuana.
Cha Pol awirai-a kairiraiꞌvo Efesus
24 Taim Cha Pol kakeiy mataimon pako Jerusalem re mataimon Antiok,
Juda raꞌa awoꞌo ya Cha Apolos kakai kakeiy mataimon Efesus.
Boko ya,
Aleksandria kwinia kantri Isip.
Bia emo ya kasave rere revo awirai kerinia Buk ya God.
Yah taim ava inia nairai,
aro koka keperepo revo va awirai ya nerivo.
25 Cha Apolos emo,
skul-a kako ro awirai ya Biapako tah ova inia korova revo taim ava kairai roiy aro bombiam koka rore ao prumo Jisas-a kararerare.
Yah taim inia ava kairai roiy ro awirai ya Jisas,
kasave ao aka kairai roiy.
Toh bia emo ya skul vo baptais pon kako riya Cha Jon Baptais.
26 Kope kanoi oꞌro lotu yei Juda yah ava kairiraiꞌvo tah beya kariri vai.
Yah kope taim Cha Akwila re Kwa Prisila awirai ya kererivo,
tah keripia kanoi roiy oꞌro yei yah keyirai poa revo ro awirai vo Rara ya God.
27 Kope taim Cha Apolos karao nanoi provins Akaia,
yah aro Kristen vo mataimon Efesus emo ruru awaka kepoa yah kanoi.
Yah pas-a raꞌa kepeꞌe chirai poiy Kristen vo provins Akaia vora neko ya yah neore papiya.
Yah taim Cha Apolos kakai provins Akaia,
kalpim yei revo aro vemona.
Tah God-a kamarimari roiy yah kebilip pova Jisas.
28 Kope awei aro Juda ketove tove ine yei aro bombiam koka.
Ao vemona karao emo,
ero korao veka,
ao vemona aro Juda kepao emo,
beya pa korekeiya God vai.
Yah kope awirai kwinia Buk ya God ero,
kairai roiy vora noriritai veka,
Jisas ya Krais,
bia emo God-a kamompe vora nako yei varu aro bombiam ya.