Cha Timoti kanoi rova Cha Pol re Cha Sailas
16
Cha Pol re Cha Sailas kereparo varu mataimon Derbe yah kope kerenopi mataimon Listra.
Kope mataimon vemona,
disaipel raꞌa kakei awoꞌo ya Cha Timoti.
Moꞌo ya vo bia Juda bom tah kobilip rova Jisas.
Toh kope aka ya Cha Timoti,
ya bia Grik.
2 Aro yei inia kebilip po awirai ya God kekepi mataimon Listra re Aikoniam emo awoꞌo ya Cha Timoti inia kiavoko revo nake.
3 Cha Pol karere rova Cha Timoti va nanoi rova.
Yah kope Cha Pol tava keriaoro Cha Timoti.
Ku vo korao veka,
aro Juda beya kuiniari nepiꞌin bio voro beya tava kaoroa ero,
nanoi tempel are vai.
Toh aro Juda koka kekepi bo vemona kesave veꞌen veka,
aka ya Cha Timoti ya bia Grik.
4 Yah inia kenopi popore mataimon tah inia ava chirirai poiy Kristen.
Chirai poiy va pa nepekeu awirai voro yei aposel awei aro biꞌiy vo mataimon pako Jerusalem ketiti veꞌen moike ero.
5 Korao veka tah aro bombiam koka vo sios keropi kupuana po bilip tah pava kepekeu awirai ya Biapako.
Yah umumoka namba yei inia kokoi kopakoki vovake.
God-a ine keiya rovoru Cha Pol yah kayaraka bia raꞌa vo provins Masedonia veka ao yoyo
6 Cha Pol re Cha Sailas yah Cha Timoti kiute kenopi romore distrik Frigia re Galesia.
Yah kope Holi Spirit veku korao rariꞌiy va beya nenopi awirai ya God-a niriraiꞌvo provins Esia vai.
7 Taim kenopi kerepiki distrik Misia tah kepao neparo provins Bitinia,
toh vo Spirit ya Jisas-a rara kotire rariꞌiy vora beya nenopi boꞌo vemona vai.
8 Yah kope distrik Misia emo kepepeu yah keparo Troas.
9 Tah kope roro,
Cha Pol ao raꞌa kayara veka ao yoyo.
Kayaraka bia raꞌa vo provins Masedonia karoiy yah inia katere naka veka,
“Mema va nao-a namavetari yah nakame provins Masedonia yah namailpim memi.”
10 Taim Cha Pol ao vemona kayara veꞌen,
yah kope bererenki rara memib kemore nana va nenomi Masedonia.
Kemi yara veꞌen veka God-a veku kairimi vora awirai neman ya nemirai moiy.
Mataimon Filipai Kwa Lidia riva korovoru yah kobilip
11 Kope sip-a kemiko mataimon Troas yah kenomi ailan Samotres.
Tah kope uri raꞌa vova kemi parara kenomi mataimon Neapolis.
12 Yah boko vemona kememeu yah kope kenomi Filipai tah kekemiki miꞌiy umo ovu vova.
Mataimon vemona,
emo mataimon pako vo provins Masedonia tah kesave pa kepekeu lo koka ya gavman vo Rom.
13 Yah kope umo vo Sabat,
kenomi upuoꞌo vo kamo vo rei vo mataimon pako vemona yah boꞌo yei beyo kesave beten-a kepao ero kemore nao,
kakuke ri pi va prea nemao.
Yah kope bo vemona emo kemi wakakere aro bom ovu tah kekemi ava kemirai mire.
14 Tah moike rere aro bom vemona kerekeri awirai-a kererivo romi emo,
awoꞌo vo Kwa Lidia.
Bia emo vo inia aimino biriri korarerare tah aro bombiam koka kepere pore va nebaim.
Bia bom vemona,
kokei Filipai toh kope boko vou Taiataira,
tah kosave lotu korao roa God.
Yah Biapako riꞌi karurovoru tah teve kotete revo awirai Cha Pol kairai emo.
15 Taim Kwa Lidia awere aro vo inia kerekeri ri minia ero kerebaptais veꞌen,
yah kwirai romi veka,
“Boh nopu yara veka kenbilip nova revo Biapako,
kope kuiniari nokape nokepi pini oꞌro neni.”
Kokei inia kwirai korami,
yake kemi roromoki awirai vo yah kenomi mo oꞌro vou.
Cha Pol re Cha Sailas kerekepi kalabus
16 Roraꞌa,
kemute kenomi bo vo beten-a inia kemao,
tah wokmeri kanapo raꞌa kosave boꞌo korao roiy aro ovu kokai kovakakemi rara.
Bia vemona spirit taipo kakei riu.
Tah awirai-a inia kwiriraiꞌvo rore ao voro va nerekare pa ero.
Yah taim boꞌo vemona inia korao,
aro koka mani ipipo inia kebaim vo tah mani vemona konoi roiy varu aro voronaro bova korao roiy ero.
The Conversion of the Jailer (Aposel 16:16-40)
17 Kope bia bom vemona kute romi minia aro kenomi mova Cha Pol-e,
tah inia kwei yah kwirai veka,
“Aro vemona yei wokman ya God Nake Aka.
Tah awirai inia chirai popu ro rara vo va God-a nako mopu varu.”
18 Ao vemona inia korao kwarara umo prumo yah Cha Pol ova konia rou tah karovoruka ri bia emo yah kairai roa spirit taipo veka emo.
“Mare kanairai noma ro awoꞌo ya Jisas Krais,
namemeki yah namaute.”
Yah bererenki spirit taipo vemona karereu.
19 Kope taim aro bos vo bia bom vemona keyara veka rara yei mani neko vova yah kobaun,
tah kiavia Cha Pol re Cha Sailas yah keraipai kenopi kerekepi maket va kot-a nepei pao piꞌiy aro biꞌiy vo lo.
20 Yah keko ya Cha Pol re Cha Sailas kenopi piꞌiy ine yei majistret tah kot-a kepeiy pao veka,
“Bia riyempin vemona emo yei Juda tah nai-a kepomi.
Tah ava kerepao beya koneman ri ine yei aro bombiam vo mataimon memi vai.
21 Tah pasin kere taipere ri kastam memi Rom,
inia kere piritaiy aro bombiam.”
22 Aro bombiam koka minia keroropoiki tah awirai-a kevitikei bia riyempin vemona.
Kope jas-a chirai poiy soldia noreka ketaitai peiy yah titi va kepieiy.
23 Yah taim inia kepieiy konoi vovake tah kepao poiy toro,
yah kope jas-a keko yei kenopi kepereiroki kalabus.
Yah awirai kupuana chirai poa bia vemona inia oꞌro kalabus-a kaore rari emo va naore rariꞌiy revo.
24 Bia emo inia oꞌro kalabus-a kaore rari emo awirai yei jas-a karivo,
yah kako yei kenopi karerei roki rum mentanaka raꞌa kwinia are kuro vo oꞌro kalabus vemona.
Yah kom yei katroro nao palang-a kupuana.
25 Kope nieko kopanaki,
Cha Pol re Cha Sailas beten-a kerepao yah monrai-a kerepao poa God,
tah yei aro kalabus ovu inia kerivo poiy.
26 Yah kope bererenki,
niantakeri pako rava koirere tah oꞌro kalabus vemona koirere,
yah kamo koka vo oꞌro kalabus vemo kereruriki.
Yah sen yei aro kalabus koka kererarito.
27 Yah taim bia vemona oꞌro kalabus-a inia kaore rari emo kavariko tah kayara veka kamo koka vo oꞌro kalabus emo kereruri,
tah karitoro veka aro kalabus koka yah kiutute veni.
Korao veka tah bainat ya veku kakoka yah karao veku narira reka yah narai.
28 Toh kope Cha Pol kaiyki roa veka,
“Beya bainat-a namarira reka mema veku vai!
Baunke ve kekem emo.”
29 Yah bia emo oꞌro kalabus-a inia kaore rari emo kairiy va lait-a konekape poa.
Yah kavariko tah kaprara bereren kakai are yah karei karereꞌre kakuke riya Cha Pol re Cha Sailas.
30 Yah kope kako yei bia riyempin kerenopi upuoꞌo tah katere roiy veka,
“Bia biꞌiy riyempin,
toh arape va nanao tah va God-a nako nena varu?”
31 Yah kope keyirai poa veka,
“Mema va nama bilip mova Biapako Jisas awei aro kekepi pima ero,
yah God-a va nako mopu varu.”
32 Yah awirai ya Biapako keyirai poa awei aro ya kekepi oꞌro ya.
33 Yah taim vemona,
bia vemo oꞌro kalabus-a inia kaore rari emo,
kako yei kanoi auka vemona kepieiy emo piva kareiniri.
Yah kope bererenki ya awei aro ya baptais-a keko.
34 Yah kako ya Cha Pol re Cha Sailas kerenopi pova oꞌro ya yah akorom-a karao roiy.
Yah ova korova revo,
ku vo korao veka,
ya veku yah om awei me ya kebilip pova revo God.
35 Yah roronai,
majistret-a kesalim yei plisman-a kenopi chirai poa bia ya oꞌro kalabus-a inia kaore rari emo va narokoreria Cha Pol re Cha Sailas nerenopi.
36 Yah kope bia vemona oꞌro kalabus-a kaore rari emo,
kanoi kairai roa Cha Pol veka,
“Majistret-a chirai veka kuiniari nana rokoneripu noropu nopi.
Korao veka tah kuiniari noropu nopi nao riꞌi mariri.”
37 Toh kope Cha Pol kairai roiy plisman-a veka,
“Mepi beya ao taipo rava kepipao tah kepiepi ine yei aro bombiam vai.
Tah kot mepi minia beya kerivo popi vai.
Mepi bia kantri Rom.c
Kiavepi kepere rokipe veꞌen kalabus tah mare kepao nerokoperipiki nepi nopi kakana vai?
Va nobaun poaka!
Nonopi yah nopirai poiy yei va veku nekape neko mepi nepi nopi upuoꞌo.”
38 Yake ofisa awirai vemona keko kenopi chirai poiy majistret.
Yah taim majistret-a kerivo veka Cha Pol re Cha Sailas yei aro Rom,
tah kope keriri toro.
39 Kope majistret-a keko yei kenopi va awei awirai-a niriraiꞌvo tah keko yei kenopi upuoꞌo yah chirai poiy va mataimon vemona nerepepeu yah nerenopi.
40 Kope taim Cha Pol re Cha Sailas oꞌro kalabus-a kerepepeu yah kerekape upuoꞌo,
yah kerenopi oꞌro vo Kwa Lidia.
Yah oꞌro vemona,
keyarai Kristen ovu yah awirai kupuana ovu keyirai poiy vora neropi kupuana.
Yah kope kerepepei yah kerenopi.