Sios-a keopokeu mataimon pako Jerusalem
15
Beyo ovu kekape Judia yah keparo mataimon Antiok skul-a kepoiy Kristen tah chirai poiy veka,
“Mopu va tava nopuoro veka lo ya Cha Moses kwirai ero,
boh ao vemona beya nopao,
God-a beya kuiniari nako mopu varu vai.”
2 Awirai vemona korao tah Cha Pol re Cha Barnabas awirai pako keyirai konoi kokai wararoiy.
Korao veka tah Kristen-a kemompe yei Cha Pol re Cha Barnabas awei disaipel ovu,
va nekope mataimon pako Jerusalem va neyarai aposel ovu awei hetman ro awirai vemona.
3 Aro bombiam vo sios-a kesalim yei kenopi distrik Fonisia re Samaria.
Taim kiute kenopi distrik riyempin vemona,
ava chirai poiy disaipel umumoka rore boko prumo,
chirai poiy aro beya kiave Juda ero kebilip pova Jisas.
Yah disaipel awirai vemona kerivo yah oꞌto koteiy poaka.
4 Yah taim kererepiki mataimon pako Jerusalem,
aro bombiam vo sios awei aposel yah yei hetman oꞌto va koteiy roiy poaka.
Yah ao koka God-a karao roiy eno peꞌe yei ero,
keyirai poiy.
5 Toh kope ovu yei Farisi kesave kebilip ero,
kevereko tah chirai veka,
“Aro beya kiave Juda ero,
va pa nepekeu lo ya Cha Moses yah tava nioro veka lo-a kwirai ero.”
6 Yah aposel awei hetman-a kekape keopokeu minia va awirai vemona niriraiꞌvo.
7 Awirai-a chirai konoi kokai veꞌen,
yah kope Cha Pita kavariko nake tah kairai roiy veka,
“Aro raꞌai,
titja aka,
mopu kopu yara veꞌen veka God-a kamompe nena veꞌen,
va awirai neman ya nanairiraiꞌvo nonoi roiy aro beya kiave Juda va nerivo yah nebilip.
8 God-a riꞌi yei aro bombiam koka kapirikeu veni.
Emo kariritami veka karere roiy revo.
Korao veka tah,
God-a Holi Spirit-a karoiy veka memi karomi emo.
9 Beya pasin raꞌa tirin karao romi tah yei pasin raꞌa tirin karao roiy vai.
Rara vo vemona kebilip pova God pon tah ao taipere kapereuki reiy yah kekepi keniniu ri ine ya.
10 Toh korao veka rope tah mopu kopao nopu traim ya God?
Mopu nai-a inia koperetai tom yei disaipel veka aro apo memi titja,
tah memi minia beya kuiniari nai vemona nemiko vai.
11 Toh kemi bilip veka Biapako Jisas-a kamarimari romi tah kako memi varu,
yah yei aro beya kiave Juda minia kako yei.”
12 Yah kope aro koka keopokeu emo,
rova kepikimki tah ava kerivo poa Cha Pol re Cha Barnabas.
Ava keyirai poiy pore mirakol ipipo God-a kupuana karoiy tah kerepao romoi aro beya kiave Juda ero.
13 Taim awirai-a keyirai veꞌen,
Cha Jems kavariko yah kairai veka,
“Aro raꞌai nena,
nopu rivo pona.
14 Cha Saimon kairai romi veka,
titja God-a kanoi riꞌiy aro beya kiave Juda vora nariritai veka karere roiy revo ovu yei.
Yah ovu kako yei vora narao nekepi veka aro ya veku.
15 Awirai yei profet-a korao ri minia veka kepeꞌe kwirai veka,
16 ‘Nena Biapako,
kope pa va nakane varu nanao aro noꞌo ya Cha Devit nevereko varu.
Kepao veka oꞌro tora korei yah kokorari veꞌen.
Nena va nakane varu oꞌro vemona nanao noneman yah notare varu.
17 Aro koka vo meꞌri vemona va niore nana
tah yei aro koka beya kiave Juda kanamompe yei veꞌen veka aro nena,
va niore nana.
Biapako awirai vemona kairai yah mare ao vemona inia karao kerekamap.a
18 Yah ao vemona beyo kesave veꞌen titja.
19 “Korao veka tah ruru nena Cha Jems,
kanairai veka,
‘Memi beya nai-a nemoiy aro beya kiave Juda inia kebilip tah pava kepekeya God ero vai.
20 Toh va pas-a nemeꞌe nonoi roiy tah nemirai moiy veka,
beya akorom voro kesave ofa kepao poiy god giaman ero nepa vai,
yah pasin pamuk-a beya nepao,
aome poko kepeiy vove,
tah bei yei aome noo kerinia ero beya nepa vai.’
21 Titja aka awirai ya Cha Moses inia chiriraiꞌvo rore mataimon koka kokai kuiniari mare,
tah kope de koka vo Sabat,
awirai vemona chiriraiꞌvo poiy oꞌro lotu yei Juda.”
Kaunsil pas-a kepeꞌe konoi roiy aro beya kiave Juda
22 Korao veka tah aposel awei aro biꞌiy yah yei aro bombiam koka vo sios awirai-a chirai minia va ovu yei veku nesalim yei nenopi pova Cha Pol re Cha Barnabas nenopi mataimon Antiok.
Yah Cha Judas kemompe awoꞌo ya raꞌa kepinaka veka Cha Barsabas,
yah ya Cha Sailas.
Bia riyempin vemona inia kerenopi poiy cha aro kebilip ero.
23 Yah pas vemona kepoiy kereko kerenopi.
Yah awirai kwinia pas emo kwirai veka,
“Memi aposel yah yei aro biꞌiy memi raꞌai mopu aka.
Memi pas vemona kemeꞌe mopu aro beya kopave Juda tah kopu bilip pova God yah kokepi mataimon Antiok tah boko koka vo provins Siria re Silisia.
24 Kemirivo veꞌen veka aro memi ovu kenopi kepao kopu ririko toro po awirai yei tah ruru-a kepu rovoru.
Aro vemona memi beya kemirai moiy tah kenopi awirai voro chirai vai.
25 Korao veka tah ava kemirai minia yah beyo ovu kemi mompe tah kemi salim yei kenopi poiy kura riyempin memi kemi save kemere moiy revo ero,
Cha Pol re Cha Barnabas va nenopi pipu.
26 Bia riyempin vemona kereropi kupuana po awoꞌo ya Biapako memi Jisas Krais tah beya kereriri va nererapi vai.
27 Yah kope Cha Judas re Cha Sailas kemi mompe va nerenopi pova Cha Pol re Barnabas vora awirai-a nereyirai revo roꞌo yei veka kemeꞌe kwinia pas ero.
28 Emo korao veka,
Holi Spirit-a kokei rimi tah awirai-a kemirai minia veka,
beya nai koka va nemopu nopu poiy va.
Korao veka tah mopu va nopekeu pon pasin vemona.
29 Mopu akorom voro ofa keparepare poiy god giaman ero beya nopa vai,
yah pasin pamuk-a beya nopao tah aome poko kepeiy vove,
tah aome noo kerinia bei rere ero beya nopa vai.
Pasin neman pon nopao yah nopaveyareki pasin taipere yah va nokepi revo.
Awirai vo yake.”
30 Yah kope kesalim yei keparo mataimon Antiok,
yah keipiy aro bombiam vo sios-a kekape keopokeu minia tah pas vemona kepoiy.
31 Aro vo sios-a pas-a keritim tah ova koroiy veka awirai vemona kupuana koroiy.
32 Cha Judas re Cha Sailas emo yei profet tah awirai prumo keyiriraiꞌvo yah riꞌi kokokore naiy tah kere alpim yei vora neropi kupuana.
33-34 Cha Judas re Cha Sailas kerekepiki piꞌiy mentan mentan mataimon Antiok yah kope kesalim yei kerekape varu nao riꞌi mariri tah kerenopi varu riꞌiy aro voro kesalim yei kekape ero.b
35 Cha Pol re Cha Barnabas beya mataimon Antiok-a kerepepeu bereren vai,
boho va kerepao piꞌiy aro ovu yah skul-a kepoiy aro bombiam tah awirai ya Biapako chiriraiꞌvo.
Cha Pol re Cha Barnabas keretove tove tah beya boho kerepao minia vai
36 Kerekepiki mentan mentan yah Cha Pol kairai roa Cha Barnabas veka,
“Va nepi nopi varu yah nepi yarai aro raꞌai kekepi popore mataimon voro titja awirai ya Biapako kepiriraiꞌvo poiy ero.
Kekepi revo o bauni.”
37 Yah Cha Barnabas karao nako ya Cha Jon Mak nanoi roiy.
38 Toh Cha Pol konia beya karere rova Cha Mak nanoi roiy minia vai.
Emo korao veka,
titja aka Cha Jon Mak karereiy taim kekepi boho va kepao minia provins Pamfilia.
39 Keretove tove po awirai vemona konoi yah keyavetari tah boho va beya kerepao minia vai.
Cha Barnabas kako ya Cha Jon Mak kanoi rova yah sip-a kereko yah kerenopi ailan Saiprus.
40 Yah kope Cha Pol kako ya Cha Sailas kanoi rova tah aro bombiam vo oꞌro lotu eno keperetai yah ketere poa Biapako naore rariꞌiy revo yah kepiꞌin kerenopi.
41 Cha Pol re Cha Sailas kerenopi provins Siria re provins Silisia va Cha Pol kupuana naroiy aro bombiam vo oꞌro lotu vora neropi kupuana yah boho ya Biapako nepao.