Cha Barnabas re Cha Sol awirai-a keyiriraiꞌvo Aikoniam
14
Cha Pol re Cha Barnabas kerekepi mataimon Aikoniam tah inia kerenopi oꞌro lotu yei aro Juda veka inia kerepao taim kerekepi mataimon Antiok. Yah awirai ya Biapako inia keyiriraiꞌvo, tah awirai vemona korao riva kokokore naiy aro Juda puru pako yah yei aro beya kiave Juda ero kebilip. 2 Kope aro Juda ovu beya kebilip, ruru kepeiy rovoru aro bombiam beya kiave Juda tah ova kereiroro roiy aro bombiam ve kebilip-e. 3 Korao veka tah Cha Pol re Cha Barnabas beya kereriri po awirai ya Biapako neyiriraiꞌvo vai, yah kerekepiki vova ve mataimon Aikoniam. Yah Biapako kupuana karoiy tah mirakol maramaraꞌa kereparepare. Biapako ao emo kararerare vora noriritai aro bombiam veka awirai vemona, emo awaka. 4 Toh aro bombiam koka vo mataimon pako vemona kiavetari ku riyempin. Ovu keropi piꞌiy Juda, kope yei ovu keropi piꞌiy aposel. 5 Yah kope aro Juda awei aro beya kiave Juda ero, awirai-a chirai minia piꞌiy aro biꞌiy yei vora nepao poiy toro Cha Pol re Cha Barnabas. Kepao akairi nepuna yah neteiy Cha Pol re Cha Barnabas yah nepieiy nererapi. 6 Toh kope Cha Pol re Cha Barnabas awirai vemona kere rivo tah kerepopuki peiy kerenopi mataimon riyempin vo distrik Likonia. Yah keriute kerenopi mataimon Listra re mataimon Derbe, awere boko ovu kerinia kakuke ri mataimon riyempin vemona, 7 yah awirai neman ya God-a inia keyiriraiꞌvo bo vemona.Cha Pol re Cha Barnabas kerekepi mataimon Listra re mataimon Derbe
8 Kope mataimon Listra, bia kom taipo raꞌa kakeiy. Bia vemona emo, kom ya keiya taipo taim moꞌo va koavia. Yah beya kasave kaute vai. 9 Kakei yah teve katete ro awirai ya Cha Pol. Yah kope Cha Pol ine katororu keiya yah kayara veka, bia kom taipo vemo kabilip tah kuiniari naneman varu. 10 Yah Cha Pol kairiaki tah kairai roa veka, “Nama variko yah naromi kom riyempin mema!” Yake bia emo kapuko karoi nake yah kautute. 11 Taim aro bombiam koka kekepi ao vemona Cha Pol karao emo keyara yah kiepi poko yei Likonia yah chirai veka, “Boh god-a keparo pimi veka beyo!” 12 Tah Cha Barnabas emo awoꞌo kepinaka veka god Sus kope Cha Pol kepinaka veka god Hermes.a Ku vo korao veka, Cha Pol bia ya awirai-a kanoi ro cha. 13 Oꞌro lotu ya god Sus ve kwinia upoꞌo kakuke ri kamo vo rei vo mataimon pako vemona. Yah kope pris vo oꞌro lotu ya god Sus emo, kanoi bulmakau aka ovu kako yei yah plaua ovu ketaikeke minia karuna kakai. Yah kakai kamo vo rei vo mataimon vemona emo vora awei aro bombiam-a ofa nepao poa Cha Pol re Cha Barnabas. 14 Yah kope taim Cha Pol re Cha Barnabas awirai vo ao vemona kepao ve kererivo, keriapuko toro tah noreka yei kere roropub tah kere parara kerenopi romoi aro bombiam prumo yah keyepi veka, 15 “Aro raꞌai, koraka rope tah ao vemona kopao? Mepi minia bio kanapo, veka mopu. Mepi awirai neman-a kepiko kepikape popu yah kepirai va ao taipo vemona nopepereki yah nopu rovoruka piya varu God ve kakei tare, yah lotu nopao poa. God vemona ya unake uteno, meꞌri yah nao yah ao koka kerinia emo kararerare. 16 Titja God-a kariꞌin aro bombiam koka kiute po pasin yei veku. 17 Toh beya kakei rokire reiy beyo vai. Kariritai veka karere roiy revo, yah karao aꞌ kwai koraro uteno nake yah akorom prumo kerekore kere neman. Yah akorom prumo neman neman-a karopu tah riꞌi mopu koneman yah oꞌto kotepu.” 18 Aro bombiam koka kepere poiy va ofa nepao poiy. Toh yei kere revapana keiy va beya ofa nepao poiy vai.
19 Kope pa aro Juda ovu kekape mataimon Antiok re mataimon Aikoniam yah ruru-a kepeiy rovoru aro bombiam. Yah akairi kepuna tah keprupi kereyieya Cha Pol yah kiavia kerinrin kenopi upuoꞌo vo mataimon vemona, kepitoro veka karai veꞌen. 20 Toh kope taim aro kebilip poa Jisas emo kekape keropi kioro papiya, kavariko yah kanoi varu mataimon ve kepieya emo. Yah kope uri, Cha Pol re Cha Barnabas mataimon vemona kerepepeu yah kerenopi mataimon Derbe.
Cha Pol re Cha Barnabas awirai kupuana keyirai poiy aro bombiam va nebilip pova Jisas
21 Yah awirai neman ya Biapako keyiriraiꞌvo mataimon Derbe tah awirai vemo korao aro bombiam prumo kebilip. Yah kerenopi varu mataimon Listra, Aikoniam yah Antiok.c 22 Tah awirai kupuana keyirai poiy disaipel veka, “Nopu bilip, noropi kupuana. Boh kemao nenomi kingdom ya God, va nemute mo rara voro nai prumo kerinia ero wo.” 23 Cha Pol re Cha Barnabas beyo pin-a kere mompe vora nenopi poiy cha, vora nenopi popore oꞌro lotu moike moike rere boko moike moike. Yah akorom-a kekepi yao yah beten-a kepao piꞌiy yah kepereiyki poa eno ya Biapako, bia emo yei veku kesave kebilip pova.
Cha Pol re Cha Barnabas kerenopi varu mataimon Antiok kwinia provins Siria
24 Tah kope kerenopi romore boko koka vo provins Pisidia konoi yah kererepiki provins Pamfilia. 25 Kope taim awirai neman ya Biapako keyiriraiꞌvo veꞌen mataimon Perga, yah kope kereparo mataimon Atalia. 26 Kope mataimon Atalia emo kerepepeu yah sip-a kereko kerenopi varu mataimon Antiok. Emo kerenopi varu bo voro Kristen-a beten-a kepao poiy tah kepereiyki poa eno ya God va namarimari roiy, yah boꞌo vemona nerepao. Yah mare boꞌo vemona kerepao veꞌen yah kope kerenopi varu Antiok. 27 Taim kerekape veꞌen, yah kope kereipiy aro bombiam vo sios kekape yah keopokeu minia. Yah awirai-a keyirai poiy rore ao koka God-a kararerare eno peꞌe yei, yah keyirai poiy veka, “God-a kamo karurikire roiy aro bombiam voro beya kiave Juda tah kebilip.” 28 Yah kerekepiki piꞌiy aro ve kebilip emo yah umo keremaomaoki naiy.