Aro ovu ketere poa Jisas bia nape kupuana kaoroa
(Matyu 21.23-27; Mak 11.27-33)
20
Umo raꞌa,
taim Jisas-a kakei tempel are skul-a karao roiy aro bombiam,
yah awirai neman ya God minia inia kairai roiy.
Yah yei aro bikpris vo tempel,
saveman vo lo awei aro biꞌiy kekape piya Jisas.
2 Yah kirai poa,
“Namairai momi,
bia nape kupuana ero karoma?
Toh kupuana ero kamako rope,
tah ao vemona kamareꞌmare?”
3 Yah kope Jisas-a kairai roiy veka,
“Nena minia va ao raꞌa nana tere nopu,
yah kope nopirai pona.
4 Taim Cha Jon Baptais aro bombiam-a kabaptaisim yei,
ao vemona koraro heven o kokai riꞌiy aro vo meꞌri?”
5 Yah yei veku ava chiriraiꞌvo veka,
“Boh nemirai veka,
‘Ao vemona koraro heven,’
va kope natere romi veka,
‘Toh korao veka rope tah beya kopu bilipim ya vai?’
6 Kope boh nemirai moa veka,
‘Ao emo yei aro vo meꞌri,’
aro koka va akairi netemi,
ku vo koraka,
kebilip veka Cha Jon Baptais-e,
ya profet.”
7 Yah kope kirai poa Jisas veka,
“Beya kemi yara vai,
ao vemona Cha Jon Baptais kako riya bia nape tah baptais-a karoi aro bombiam.”
8 Kope Jisas-a kairai roiy veka,
“Korao veka tah nena minia beya nanairai nopu nova bia nape kupuana vemo karona tah boꞌo vemona kanao.”
Awirai bokis yei beyo boꞌo kepao erora
(Matyu 21.33-46; Mak 12.1-12)
9 Kope Jisas-a awirai bokis raꞌa kairai roiy aro bombiam veka,
“Bia raꞌa erora wain-a karao.
Yah erora wain vemona karoiy eno peꞌe yei aro ovu vora boꞌo bisnis-a nepiapao,
tah ya veku kanoi boko rarapaki yah kakei koiperuko naka.
10 Kope taim vo aꞌai wain-a aka keriave yah kepao nepu,
kasalim ya wokboi raꞌa kanoi riꞌiy aro vemo boꞌo bisnis-a kepiapao ve,
vora wain aka pina nepoa.
Toh kope yei aro vemona erora wain-a keore papi vemo,
kepieya yah kesalim ya kanoi eno kanapo.
11 Kope aka vo erora vemona,
kairai roa wokboi raꞌa vova kanoi.
Bia emo minia kepieya yah kepao reka koyova yah kesalim ya kanoi eno kanapo.
12 Kope kasalim ya bia namba 3 kanoi vova tah ya minia kepieya konoi ine karatoro yah kepurupi kanoi upuoꞌo.
13 “Yah aka vo erora wain-a kairai veka,
‘Toh nena va arape nanao?
Va nana salim ya ma biam nena veku nanoi.
Ma nena ve,
kanere nova revo.
Tara kuiniari awirai-a nerivo poa vai.’
14 “Toh kope aro erora wain-a keore papiꞌi ve,
kepirikeiya ma ya kakai ye yah yei veku awirai-a chiriraiꞌvo veka,
‘Bia vemona va ao koka ya aka ya naruna.
Va nemieya naraiyi,
yah ao prumo vemo va nemiko naꞌao.’
15 Yah keavia kepurupi kanoi erora upuoꞌo yah kepieya karai.
“Yah kope aka vo erora vemona va arape narao roiy beyo vemona erora keore papiꞌi ve?
16 Aka vo erora va nakai yah beyo vemona erora keore papiꞌi vemo va nayeiy neviri.
Yah erora wain-e,
va naroiy aro ovu vova neore papiꞌi.”
Kope beyo awirai emo kerivo tah chirai veka,
“Baun poaka!
Ao vemona beya norao veka ero vai.”
17 Kope Jisas-a ine katororu keꞌeiy yah katere roiy veka,
“Toh korao vekarope tah awirai emo kepeꞌe kwinia buk ya God kwirai veka,
‘Akairi vemona,
aro yei oꞌro kepare pare emo,
keoniy poꞌo
tah kepitoro veka,
akairi emo kotaipo,
kope pa,
koraka,
akairi emo koneman poaka vora oꞌro noawo kupuana?’a
18 Aro bombiam nebururuta akairi vemona,
va netaritari mememe.
Kope boh bio raꞌa akairi emo noraro norei yah nuiniataka,
va natamtam poaka.”
19 Yei saveman vo lo awei aro bikpris vo tempel,
mare aka rara inia keore nana vora niavia Jisas.
Ku vo karao veka,
keyara veꞌen veka Jisas-a awirai bokis emo kairai roiy.
Toh keriri poiy aro bombiam.
Takis-a kepoa Cha Sisar
(Matyu 22.15-22; Mak 12.13-17)
20 Yei saveman vo lo awei aro bikpris ine chore papiya revo Jisas yah kirai poiy beyo ovu kekape teve keteteiya.
Aro vemona teve keteteiya emo,
keropo peiya veka,
kepere poꞌo revo awirai ya.
Teve keteteiya revo Jisas,
boh avenari awirai taipo rava nairai,
va neperiakipe poa eno peꞌe ya gavana vora kot-a neyarao.
21 Yah ketere poa veka,
“Mah Tikse,
memi kemi yara veka awirai re skul mema kamoiy beyo ro,
koniniu poaka.
Mema inia awirai moike raꞌa pon inia kamairai moiy aro yei awoꞌo ipipo keko awei aro mererai.
Yah skul mema inia kamao moiy ero,
pava korikeu pasin awaka ya God.
22 Toh mema kama yara veka roꞌo,
takis-a va nemoa Cha Sisar o bauni?”
23 Kope Jisas kayarai veni veka keropo peiya.
Yah kairai roiy veka,
24 “Mani rava nopiritana.
Toh cha re awoꞌo ya bia nape koporoke mani voronaro?”
Yah kirai poa veka,
“Awoꞌo re cha ya Cha Sisar.”
25 Yah kairai roiy,
“Boh ao ero ya Cha Sisar,
nopoa varu Cha Sisar.
Kope boh ao ya God,
nopoa God.”
26 Yah taim kakei riꞌiy aro bombiam,
beya kuiniari awirai roporere nirai poa vai.
Keririkope toro poꞌo awirai vemona kairai roiy emo,
tah rova kepikimkipe.
Awirai yei aro viri kope nevereko varu re awirai vo marit
(Matyu 22.3-33; Mak 12.18-27)
27 Kope ovu yei Sadyusi,b
kekape piya Jisas.
Aro emo awirai yei inia kirai veka,
beyo keviri veꞌen,
beya kuiniari nevereko varu vai.
28 Yah ketere poa Jisas veka,
“Mah Tikse,
Cha Moses awirai rava kareꞌe romi veka,
‘Boh bia raꞌa om-a nako tah meva beya naru,
yah narai kanapo,
kope raꞌai ya raꞌa va om ya ve nako,
vora meva naru roa raꞌai ya karai emo.’c
29 Titja,
aro raꞌai 7-pla kekepi.
Raꞌai anai yei om-a kako yah karai kanapo,
beya meva karu vai.
30 Raꞌai raꞌa kainia takao anai ye,
minia bia bom vemona kako.
31 Kope raꞌai rorarora ve kainiataiyo raꞌai riyempin-e,
minia bia bom vemona kako.
Kepao pon veka konoi kuiniari revo raꞌai 7-pla,
toh beya meva kepu vai,
keviri kanapo.
32 Yah kope pa,
bia bom vemona minia korai.
33 Kope taim aro bombiam keviri veꞌen emo,
kope nevereko varu,
bia bom vemona va noave om ya bia nape?”
Korao veka,
yei aro raꞌai 7-pla,
bia bom vemona keko vo koave om yei.
34 Kope Jisas-a kairai roiy veka,
“Aro bombiam vo taim mare wo,
aro bom am-a kererunaiy tah kope yei biam-a om kepunare.
35 Toh kope aro bombiam God-a veku kairai kuiniari nevereko varu yah nekepi piya taim inia kokai pa ro,
aro vemona beya kuiniari am om-a nepunare vai.
36 Ku vo koraka beya kuiniari neviri vova vai.
Yei kekepi veka ensel ya God.
God-a veku karao kevereko varu matmat,
tah kekepi veka me ya.
37 Cha Moses minia kariritami veka,
beyo keviri veꞌen ero,
kope inia keverekope varu matmat.
Awirai vo aikera kobiririta aꞌai tarema ero,
kwirai veka,
‘Biapako kakei God ya Cha Abraham,
Cha Aisak re Cha Jekop.’d
38 Emo koriritami veka,
God vemona,
beya ya God yei aro viri vai,
bauni.
Ya God yei aro kekepi tare.
Ri ine ya,
aro olgeta kapirikeiy kekepi tare.”
39 Kope saveman ovu vo lo awirai emo kerivo poa Jisas,
tah kirai poa veka,
“Mah Tikse,
awirai mema ero,
koneman.”
40 Keriri tah beya raꞌa yei tare katere roa vova vai.
Krais ya ma ya bia nape
(Matyu 22.41–23.7; Mak 12.35-40)
41 Kope Jisas-a kairai roiy veka,
“Korao veka rope tah inia kirai veka,
‘Krais ya ma ya King Devit?’e
42 Buk Sam,
King Devit veku kairai veka,
‘Biapako kairai roa Biapako nena veka,
“Mema nakemi eno paraꞌa awaka nena,
43 nonoi nuiniari taim aro birua mema nanaiy
nekepi rokope kapeꞌe mema.” ’f
44 Yah King Devit veku kairinaka Krais veka ‘Biapako’ ya.
Toh koraka rope tah Krais emo,
va kope nakei veka ma ya King Devit?”
Aro saveman vo lo inia pasin taipo inia kepao
(Matyu 23.1-36; Mak 12.38-40; Luk 11.37-54)
45 Aro bombiam koka baunke kekepi awirai ya Jisas-a kerivo,
yah kope kairai roiy disaipel ya veka,
46 “Mopu ine nopore papiꞌiy revo saveman vo lo.
Aro emo kepere poꞌo revo aimino ririvag nepikoko yah niute nanare.
Kepere poiy revo beyo eno nepeparaiyo bo vo maket.
Raꞌa vo minia,
kepere poꞌo revo sia namba wan kerinia oꞌro lotu yei Juda,
na bo vo akorom ipipo inia kepao ve.
47 Aro emo,
inia beten tuꞌu ririva kepao vora neyarai veka yei keneman revo,
tah raꞌa minia keropopere aro bom voro am rere keviri pere ero,
yah ao vo oꞌro rere kepuna pere kanapo.
Aro veka vemona,
kope taim vo kot,
va nai pako aka neko.”