Naxe Okwe Kicicitho Komo, Ekatî Kom Ha
4
On wara marha wîîkes awya so oyakno komo,
mîk hak yekatî komo mtapotarî ewetîra ehcoko.
Yaake naxe okwe tohnawno poko weronomano rin̂e komo kica.
Miya so ro mak n̂etakpayaxe ero warai komo roowo pono komo chere.
Ero ke weronomano rin̂e komo yekatî ka yîhtînocoko.
Kaan yanme tîmtapotaxmu komo mak men̂ekacoko an̂ewetîrî komo me.
2 On wara kan̂e komo mak naxe Kaan Yekatî yanmen me,
Tuhn̂e xa mokye Xesus Kristu oona,
kan̂e komo mak ero warai me naxe.
Ahnoro ero wa kan̂e komo naxe Kaan yanmen me okre.
3 Ero wa kahra reha naxe anarî komo,
anarî ro yekatî yanmen kom ha.
Tuhn̂em me mokye Xesus Kristu,
kahra ro mak naxe okwe.
Ero ke on wara kacoko noro yipu komo poko,
Kaan yanmen pîn mîkyam ham,
kacoko.
Kristu xatî pînî ro yekatî yanmen xa matko mîkyam,
kacoko.
Noro yipu komo mohtopo rma mencetken̂e pahxa.
Oroto rma men naxe ero warai komo roowo po kica.
4 Kaan xîkrî komo amyamro,
okopuci komo.
Ero ke iyopono komo me maxe.
Ero wara maxe roowo pono yopono ro me exirî ke aropotawno komo.
5 Roowo pono ro xîkrî makî reha mîkyam,
Kristu xatî pîn kom ha.
Ero ke roowo pono komo wa xa marha nîmtapowaxe.
Yîmtapotarî komo marha n̂encexe roowo pono ro kom hara.
6 Kaan xîkrî komo reha kîwyam.
Ero ke Kaan ponarono komo kencexe so.
Kaan xîkrî pîn komo reha kentara so thakwa naxe.
Ero wa exirî ke so on wara tîtkexe,
Yaarono yekatî ponarono komo mîkyam ham,
tîtkexe kentan̂e komo poko reha.
Yaarono yekatî ponarono pîn komo mîkyam haram,
tîtkexe kentan̂e pîn komo poko reha.
Ero wa tîtkexe.
Etîxe Ehcoko
7 Taa,
on wara wîîkes hara awya so oyakno komo,
etîxe cehcerî.
Kaan nîmîtho mîn etîxe kehtopo komo.
Etîxe kexitaw so Kaan xîkrî me ewruxapu me taxe,
Kaanî ponarono me marha taxe.
Ero wa taxe etîxe kexitaw so.
8 Etîxera exitaw so tooto komo Kaan yîhtînopîra ro mak naxe okwe.
Etîxatî me kehtopo rma Mîk Kaan,
Noro ro.
9 On wara xa kîîxe so cehtopo n̂enpekn̂e Kaan kîwya so,
Tumumuru ro xa n̂en̂epekn̂e oona roowo pona cewn̂anî rma.
Waipîn me kiin̂e me n̂en̂epekn̂e.
Ero wa xa kîîxe so cehtopo n̂enpekn̂e Kaan.
10 Etîxatî ro me kehtopo xa mîn ero wa kîîxe ehtopo.
Ero warai pînî rma Kaan xe kehtopo reha.
Kîîxe Kaan yehtopo xa matko mîn etîxatî me kehtopo xa.
Enko xe,
Tumumuru rma Noro n̂en̂epekn̂e oona waihtome kicicme kehtoponhîrî komo yepetho me.
11 Ero wa xakn̂e Kaan,
oyakno komo,
kîîxe ro mak xakn̂e okre.
Ero ke etîxe xa marha cehcerî kîwyam hara.
12 Kaan yenîn̂enho exihra ro mak nasî tooto ha.
Noro rma tko nasî kropotaw so etîxe kexitaw so.
Etîxatî me cehtopo rma n̂iir̂asî kropotaka so.
Etîxatî me xa tak kiitîkexe so okre.
13 On wara marha tîtkexe,
Kaan yakrono ow ham,
oropotawno marha Mîk haram,
tîtkexe.
Ero wa tîtkexe Cekatî tîmrî ke kîwya so.
14 Tumumuru n̂en̂epekn̂e Kîîm komo oona kîcheka so,
kes amna.
Kakir̂waman̂e komo me n̂en̂epekn̂e miyan komo yakir̂waman̂e me rma,
kesî marha amna.
Ero wa kes amna Noro yenîrî ke rma.
15 On wara kan̂e me cexpore nasî,
Kaan Mumuru xa Mîk ham Xesus,
kan̂e me.
Ero wa kan̂e me kexitaw so kropotawno ro me nasî Kaan.
Kaan yakrono ro me marha taxe kîwyam hara.
16 Ero wara taxe kîîxatî ro me Kaan yehtopo yentarî ke.
Entache,
Yaaro ham okre,
tîtketken̂e.
Noro yipu Mîk Kaan,
etîxatî me kehtopo rma Mîk ha.
Ero ke etîxatî me roro kexitaw so Kaan yakrono ro me taxe.
Kropotawno ro me marha nasî Noro hara.
Ero wa taxe.
17 Etîxatî me kiitîkan̂e me nasî Kaan.
Ero ke ero wa kexirî ke so tak erasîra tak taxe amn̂e kicicitho komo yen̂ekacho po.
Tan roowo po kexitaw so Xesus warai me rma taxe ha re.
Ero ke erasîra taxe.
18 Ero wa taxe etîxe kexitaw so,
erasîn me mak taxe.
Etîxatî me kehtîketaw so ero wa kehtopo komo rma nasî kerahtîmtoponhîrî komo yen̂epen̂e me okre.
Cerewrem mîn kerahtîmtopo komo kica.
Keraswataw so rma etîxatî me ehtîkara rma taxe okwe.
19 On wara xakn̂e Kaan,
pahxa rma kîîxe so xakn̂e,
etîxera kexitaw so ha kapu.
Kîîxe so exirî ke mak etîxatî me tak taxe kîwyam hara.
20 On wara kexe anarî komo,
Kaan xe was okre,
kexe.
Noro yipu komo rma tko takno komo xera rma naxe hara okwe.
Cemaro mak mîn kica,
Kaan xe wasî,
kacho yîwya so.
Kakno komo xera exitaw so tîn̂enîthîrî komo rma,
ahce wa thakwa ma re Kaan xe nat hara tîn̂enîtorî kom hara?
Pîra thakwa okwe.
21 Ero poko rma kpanatanmekyatken̂e so Xesus.
Kaan xe awexitaw so awakno komo xe marha ehcoko,
kekn̂e kîwya so.
Ero wa kekn̂e.