Tîmxîkrî Me Kiir̂atken̂e So Kaan
3
On wara marha wîîkes awya so,
kîîxe ro mak nai ham Kîîm komo okre,
tîtkexe.
Enko xe,
Tîmxîkrî me kiir̂atken̂e so okre.
Kaan xîkrî me kîhtînopîra tko naxe roowo pono ro komo.
Ero wara rma tî xatken̂e Xesus poko hara.
Kaan Mumuru me yîhtînopîra tî xatken̂e.
Ero ke Kaan xîkrî me kîhtînopîra so naxe hara okwe.
2 Kaan xîkrî me rma tko taxe oroto oyakno komo.
Kenporitîkara rma tko ka nasî Kaan.
Ahce wa tak na tatu amn̂e kenporitîkache,
yîhtînopîra ka taxe.
On wara mak tîtkexe,
Amn̂e Xesus mokuche hara Noro wara rma tak taxe okre.
Tuhn̂e nasî Noro,
yupunu rma xa ceen̂axe ero yimaw.
Ero ke Noro wa xa marha tak taxe,
Xesus wara rma tak okre,
tîtkexe.
Ero wa tîhtînoyaxe kenporitîkacho komo.
3 On wara taxe Xesus mohtopo ponaro kexitaw so,
kicicme kehtoponhîrî komo tak tahsîpînkexe.
Kicicitho ken̂arî pînî ro mak Mîk Xesus,
tmohsom ha.
Ero ke ero yipu tahsîpînkexe Noro wa xa marha kehtome so,
kicicitho ken̂ehra xa marha.
Kicicme Roro Exihra Taxe Kaan Xîkrî Komo
4 Kicicme kexitaw so kpanatanmetopo yanwekn̂e me wa taxe.
Kpanatanmetopo yanwetopo rma mîn kicicme kehtopo kom ha.
5 Xesusu tko mokyakn̂e oona kicicme kehtoponhîrî komo yîhcamnoso.
Kicicme exihnî ro mak Mîk Xesus.
Ero wa kacho rma mencexe.
6 Ero ke Noro ponaro ro kexitaw so kicicme roro exihra taxe.
Kicicme roro kexitaw so rma Xesus yenîn̂e pîn me mak taxe.
Noro poko takîhso exihra ro mak taxe okwe.
Ero wa taxe.
7 On wara wîîkes awya so okopuci komo,
esewkukmapora men ehcoko tooto komo ya kir̂wan̂he kehtopo poko.
Kir̂wan̂he roro kexitaw,
Kir̂wan mîk ha,
Xesus warai rma,
kacho me tasî.
8 Anarî komo reha naxe kicicme roro kica.
Ciabu yanme ero wa naxe.
Kicicme cehsom ro mîk Ciabu.
Mehxa ro rma kicicme xakn̂e.
Kicicme ciino rin̂e mîk Ciabu.
Ero wa ciino ritoponho yîramamnon̂e me mokyakn̂e Kaan Mumuru.
9 On wara taxe Kaan xîkrî me ewruxapu komo reha,
kicicme roro exihra taxe.
Kaan xîkrî me cewruyatken̂e.
Kaan n̂iritho marha nasî kropotaw so.
Ero ke kicicme roro exihnî me taxe.
10 On wara tîtkexe tooto komo poko,
Kir̂wan̂he roro exitaw so,
Kaan xîkrî mîk ham,
tîtkexe noro yipu komo poko.
Kir̂wan̂he roro exihra exitaw so reha,
Kaan xîkrî pîn mîkro ham,
tîtkexe.
Ero wa xa marha tîtkexe takno xatî pîn poko hara,
Kaan xîkrî pîn mîk ham okwe,
tîtkexe.
Waipîn Me Ciixapu Ow Ham, Tîtkexe Kakno Komo Xe Kexitaw So
11 On wara kacho rma mencetken̂e apanatanmetopo komo,
Etîxe ehcoko,
kacho.
Pahxa rma mencetken̂e yihcitopo n̂ixa ro.
12 Kain pen warahra ehcoko.
Kicicitho ro yanme cehsom mîk xakn̂e noro pen.
Taknonhîrî pen n̂etapekn̂e okwe.
Ahce wa cexirî ke n̂etapekn̂e awya so?
Kicicitho me xakn̂e.
Aknonhîrî penî reha tî xakn̂e kir̂wan̂he.
Ero ke tî n̂etapekn̂e okwe.
Ero wa tî xakn̂e Kain pen okwe.
13 Ero ke on wara wîîkes awya so,
oyakno komo,
eserepokara ro mak ehcoko aaxera so exitaw so roowo pono ro komo.
14 Twaihsomînhîrî kîwyam okwe,
waipîn me tak taxe hara okre.
Ero warai ow ham,
tîtkexe kakno komo xe kexiri ke so.
On wara tko naxe takno xatî pîn komo,
twaihsom ro me rma naxe okwe.
15 Takno xatî pîn me naxe anarî komo okwe.
Tooto waparî me ehtopo rma mîn ero wa ehtopo komo okwe.
On wara naxe tooto waparî me cehsom komo okwe,
waipîn me cehtopo komo ken̂ehra ro mak naxe okwe.
Ero wa naxe.
16 Etîxatî me kehtopo xa mîn ham,
tîtkexe Xesus waihtoponho yentarî ke.
Kîpînîn ke so n̂etwaikapekn̂e Noro okwe.
Ero ke on wara cexpore nasî,
Kristu wa xa marha cetwaikapopore nasî kakno komo pînîn ke hara.
17 On wara naxe anarî komo,
cemyawnoi so xa naxe.
Noro yipu komo rma n̂een̂axe takno komo emyawnomra ro mak okwe.
Wara rma yîpînîn yaw so exihra naxe,
wakrera ro mak naxe okwe.
Ahce wa thakwa re etîxatî me Kaan yehtopo nai noro yipu komo ropotaw?
Pîra ro mak okwe.
18 On wara marha wîîkes awya so okopuci komo,
Etîxatî ow ha,
kan̂e me mak exihra cehcerî.
Yaaro xa matko etîxatî me cehcerî,
kir̂wan̂he ciino rin̂e me ha.
19 Ero wa kexirî ke so tak,
yaarono me wai ham,
Kaan xîkrî me xa,
tîtkexe.
Ero ke Kaan pona erasîra ro mak taxe.
20 Pîra rma tko na,
Kaan xîkrî pînî rma na ow.
Kicicme rma na wai okwe Kaan ya,
tîtketu na anarimaw kropotaw so.
Kaan xa tko nasî kropotarî komo yopono me.
Miyan yîhtînon̂e rma Mîk Noro.
Ero ke eserepokan me mak cexpore nasî.
21 Kicicme rma tko na wai yîwya kopi,
kahra kexitaw so.
Kaan pona erasîn me ro mak taxe.
22 On wara marha nasî Kaan kpoko so,
yiixe kehtopo nîmyasî.
On xe cma re was Apa,
ketaw ahce na poko ero yipu rma nîmyasî kîwya so.
Ero wa nasî tîmtapotachonhîrî yewetîn̂e me kexirî ke so,
kir̂wan̂he kehtopo komo yenîrî ke marha.
Ero wa yiixe kehtopo komo nîmyasî.
23 On wara kesî Kaan kpanatanmetopo komo me,
Omumuru Xesus Kristu yosotî pona xa encoko.
Etîxatî me marha ehcoko,
kesî.
Ero wa Kaan kpanatanmekyatken̂e so.
24 On wara taxe Noro ya kpanatanmetopo yewetîn̂e me kexitaw so,
Kristu yakrono ro me taxe.
Kropotaw so marha nasî Noro hara.
Ahce wa kexirî ke so,
Kristu nai ham oropotaw,
tîtketu?
Noro Yekatî nasî kropotaw so yînmîthîrî ha.
Ero ke,
Kristu nai ham oropotaw,
tîtkexe.