Kîîm Komo Yaw Nasî Kpoko So Tîmtapotaxmu, Kicicme Kexichen
2
On wara marha wîîkes awya so okopuci komo,
kicicme exihra ro mak awehtome so on mewresî.
Kicicme rma tko awexitaw so,
nasî rma kpoko so tîmtapotaxmu,
Xesus Kristu rma.
Kir̂wan Mîk Noro.
Kicicme kexiche so na Kîîm komo yakro nîmtapowasî kpoko so.
On wara kesî,
Oyakrono rma mîk ha,
kesî.
Ero wa kan̂e me roro nasî Noro kpoko so.
2 Noro rma n̂epemekn̂e kicicme kehtoponhîrî komo.
Kehtoponhîrî komo mak epemara xakn̂e.
Miyan komo yehtoponho rma n̂epemekn̂e roowo poko hakno komo yehtoponho ha.
Ero warai komo n̂epemekn̂e.
Kaan Yîhtînon̂e Ow Ham, Kacho Pokono
3 On wara marha wîîkes awya so,
Kaan ya kpanatanmetopo komo yewetîn̂e me kexitaw so,
Kaan yîhtînon̂e ow ham,
tîtkexe.
4 Takîhsom ow okre Kaan poko,
ketaw kîwya so,
yîmtapotarî yewetîn̂e pînî rma,
tîcemaronwaxe mak okwe.
Yaarono exihra ro mak nasî kropotaw so okwe kîmtapotarî ha.
5 Kaan yewetîn̂e me kexitaw so reha Kaan xe xa tak cehtîkexe okre.
Xesus yakrono ro ow ham,
tîtkexe marha.
6 Xesus yakrono ro ow ha,
ketaw kîwya so,
Xesus wara rma cexpore nasî.
Kir̂wan̂he xakn̂e Xesus tanî cexitaw roowo po.
Ero ke Noro wa xa marha cexpore nasî.
Ero wa cexpore nasî.
Kakno Komo Xe Ehcoko
7 On wara marha wîîkes awya so oyakno komo,
apanatanmetopo komo tan mewresî an̂enîrî komo.
Pahxa rma an̂entathîrî komo tan mewresî.
Oroto mak cencexe ero yipu,
kacho pîn ha.
Yihcirî me mencetken̂e ero wa kacho xa hara tan mewresî.
8 Anarî xa hara tko mewresî apanatanmecho kom hara.
Yaarono xa tan mewresî.
Ero yaw rorono me rma xakn̂e Xesus,
amyamro marha ero yaw roro maxe.
Awarpanînhîrî yehcamnorî ke tak kpanatanmetopo komo n̂esenpesî,
yaarono xa.
Enmayatawno wara rma nasî,
katpape tak nasî ero yipu ke.
Ero ke on mewresî,
anarî hara kpanatanmetopo ha.
9 Katpan pono ow ha okre,
kan̂e me na natu anarî komo.
Takno komo xatî pîn me rma tko nat okwe,
awarpanawno me rma mexe naxe ero wa kan̂e komo.
10 Kakno komo xe kexitaw so reha katpan pono me tak taxe ha.
Kehrokacho komo pona tohra taxe.
11 Takno komo xera exitaw so reha anarî komo awarpanawno me thakwa naxe okwe.
Cesamarî komo yenîn̂e pîn wara thakwa naxe.
Ewuhnî wa marha naxe okwe awarpan chewno me cexirî ke so okwe.
Ero wa thakwa naxe takno xatî pîn komo.
12 Taa,
on wara maxe okopuci komo,
rikomo komo,
kicicme awehtopo komo Kaan nîhcamnoyakn̂e Xesus yanan me awexirî ke so mak.
Ero ke tak on mewresî an̂enîrî komo.
13 Yîîm kom hara,
awya so makîrha tan wîîkesî,
Pahxanî ro Mîk Xesus,
roowo yakîhtotoponho n̂ixa rono rma.
Ero warai me Noro mîhtînoyaxe amyamro.
Ero ke an̂enîrî komo meero tan mewresî.
Kar̂pamxan kom hara,
awya so makîrha wîîkes hara.
Kicicitho ro yar̂man̂enho amyamro.
Ero ke an̂enîrî komo meero tan mewresî.
Okopuci komo,
on wara marha wîîkesî hara awya so,
rikomo komo ya,
Kîîm komo Mîkî Kaan ha,
kan̂e komo amyamro.
Ero wa awexirî ke so an̂enîrî komo meero tan mewresî.
14 Yîîm komo,
on wara rma wîîkesî xa hara awya so,
pahxanî ro Mîk Xesus,
roowo yakîhtotoponho n̂ixa rono rma.
Ero warai me Noro yîhtînon̂e komo amyamro.
Ero ke an̂enîrî komo tan mewresî.
Kar̂pamxan komo,
awya so wîîkesî xa hara.
Karitî komo amyamro okre.
Kaanî mtapotarî ponaro xa maxe.
Kicicitho ro yar̂man̂enho marha amyamro.
Ero ke an̂enîrî komo tan mewresî.
Ero warai komo n̂enîrî tan mewresî.
Roowo Pono Ro Poko Epohkara Ehcoko
15 Taa,
on wara marha wîîkes awya so,
roowo po awehtopo komo pînîn yaw exihra ro mak ehcoko.
Ahce na pînîn yawra marha ehcoko roowo pono pînîn yawra.
Ero yipu pînîn yaw awexitaw so Kîîm komo xatî pîn me thakwa maxe okwe.
16 On wara mak naxe roowo pono pînîn yaw cehsom komo,
mîn hak poko n̂epohkexe.
Tupun komo yanme n̂epohkexe.
Cewru komo yanme marha n̂epohkexe,
cenporem poko.
Opoyino komo yopono ow ha,
kacho ponaro marha naxe okwe.
Ero wa mak naxe okwe roowo pono pînîn yawno komo.
Roowo pono komo yanme mak ero wa naxe,
Kîîm komo yanmera ro mak okwe.
Ero ke tantono ro pînîn yawra ro mak ehcoko.
17 Roowo pen tak n̂ehcamnoyas amn̂e okwe.
Yiipononhîrî poko kepohkacho marha n̂ehcamnoyasî.
Ero wara nasî tantono ro reha.
Kaan yanme cehsom komo reha naxe ehcamnopîn me ro mak.
Ero wa nasî.
Kristu Ow Ha, Kan̂e Komo N̂epamce Kica
18 Taa,
on wara wîîkes hara awya so okopuci komo,
pahnoke tak nasî roowo yehcamnotopo.
On wara kacho mencetken̂e,
Kristu xatî pînî ro tak mokyas amn̂e,
kacho mencetken̂e.
Naxe rma tko oroto noro yipu komo yaake kîchew so.
Ero ke pahnoke tak tîhtînoyaxe roowo yehcamnotopo ha.
19 Kakrononhîrî komo rma mîkyam noro yipu komo.
Kakro so exihra tak naxe okwe,
kwarai pîn me cexirî ke so mak.
Kwarai me cexitaw so ketaw ha re kakro so rma naxe ha re.
N̂etowyatken̂e rma okwe kakrono pîn me exirî komo yesenpotome tak kîwya so.
20 On warai komo reha amyamro Kir̂wanî ro Yekatî nîhkapetho amyamro okre.
Ero ke tak miyan komo poko rma takîhsom me maxe.
21 Okaritan mewrera wasî ahyakan komo yaarono yentan̂e pîn me awexirî ke so.
Pîra,
yaarono yentan̂e me awexirî ke so xa matko on mewresî an̂enîrî kom ha.
Yaarono rma na tan ha,
kan̂e pînî ro mak amyamro cemaro poko.
Ero wa awexirî ke so marha on mewresî an̂enîrî komo.
22 Onoke warai komo xa cemarontaxmu me xa natu awya so?
On wara kan̂e komo xa cemarontaxmu me naxe,
Kristu pîn mexe Mîk Xesus,
kan̂e komo.
Kristu yanwekn̂e me naxe kica ero wa kan̂e komo,
Yîîm yanwekn̂e me marha.
Ero wa exirî ke so,
Kristu xatî pînî ro mîkyam ham okwe,
tîtkexe noro yipu komo poko.
23 On wara men naxe okwe,
Kaan Mumuru pîn Mîk Xesus,
kan̂e komo,
Kîîm komo exihra nasî noro yipu komo ropotaw okwe.
On wara kan̂e me naxe anarî kom hara,
Kaan Mumuru xa Mîk ham Xesus,
kan̂e me naxe.
Ero wa kan̂e me exitaw so Kîîm komo nasî yîropotaw so.
24 Pahxa ka mencetken̂e Kaanî mtapotarî.
Ero ponaro rma men ehcoko.
Ero ponaro rma awexitaw so Kaan Mumuru yakrono ro me maxe etowîn me ro mak.
Yîîm yakrono ro me marha maxe.
25 Pahxa marha nîmtapowakn̂e Kaan kn̂entarî komo me.
On wara kekn̂e kîwya so,
Yaaro xa tan wîîkes awya so,
Waipîn me tak kiir̂axe so amn̂e miya rorono me tak,
kekn̂e.
26 Taa,
Ero wa kacho tan mewresî aweronomacho komo awewkukma xatî komo exirî ke.
27 Kaan Yekatî nîhkapetho rma amyamro.
Aropotaw roro so nasî Noro.
Ero ke eserepokara ehcoko apanatanmekn̂e exihra exitaw.
Noro rma apanatanmekyaxe so miyan poko rma.
Yaarono poko mak apanatanmekyaxe so,
tohnawno pîn poko ha.
On wara apanatanmekyaxe so,
Xesus ponaro xa ehcoko,
kes awya so.
Ero ke Noro yanme rma Xesus ponarono me ro maxe.
28 Ero wa xa marha wîîkes ow hara awya so okopuci komo,
Xesus ponaro ro xa ehcoko.
Ero wa ehcoko yîhyapamra ro mak amna yehtome amn̂e Xesus mokyataw.
Ahce wa na natu kopi,
ka xera ro mak nas amna apoko so ero yimaw.
29 Kir̂wan̂î ro xa Mîk Kaan,
kan̂e komo amyamro okre.
Ero ke kir̂wan komo yeen̂ataw awya so on wara kacoko,
Kaan xîkrî mîkyam ham,
kacoko noro yipu komo poko.
Ero wa kacoko.