Xuaw Karitan 2-Nhîrî
2 Xuaw
1
On okaritan an̂enîrî aaci.
Kaan nmen̂ekatho amoro.
Amxîkrî komo n̂enîrî marha tan mewresî.
Kaan mîn yenîn̂e ow ha.
On wara wîîkes awya so,
Aaxe so wasî yaarono ponarono me awexirî ke.
Ow mak pîn aaxe so wasî.
Miyan komo rma aaxe so naxe yaarono yentan̂e komo ahnoro.
2 Kropotaw so nasî yaarono.
Miya roro kîhyaw so nasî eroromerono me.
Ero ke aaxe so nas amna.
3 Awakre xe so wasî Kîîm komo Kaan ya.
On warai ke awakre xe so wasî,
apînîn yaw so cehtopo ke,
ahwokan me awehtopo komo ke marha,
yaarono ponaro awehtopo komo ke marha,
etîxatî me awehtopo komo ke marha.
Ero wa awakre xe so wasî Kîîm komo Kaan ya.
Ero wa xa marha awakre xe so wasî Xesus Kristu ya hara,
Kîîm komo Mumuru ya ha.
Etîxe Ehcoko, Kacho
4 Tahwore xa wîxakn̂e amxîkrî komo yenîche.
Kir̂wan̂he ween̂akn̂e anarî kom okre.
Yaarono yewetîn̂e me ween̂akn̂e,
Kîîm komo ya kpanatanmetopo yewetîn̂e me okre.
5 On wara wîîkes hara awya so aaci,
etîxe cehcerî.
Oroto mak ero wa kacho yentara maxe.
Pahxa rma cencetken̂e yihcitopo n̂ixa ro rma.
6 On wara taxe etîxe kexitaw so,
Kaan ya kpanatanmetopo cewehcaxe.
On wara kacho xa mîn Kaan ya kpanatanmecho,
yihcitopo n̂ixa ro cencetken̂e ero rma.
Etîxe roro ehcoko,
kacho xa mîn ha.
Ero ke ero wa kacho yaw roro rma cehcerî.
Kristu Xatî Pîn Komo Poko Twerî Ehcoko.
7 On wara marha wîîkes awya so,
mer̂pora men naxe yaarono pîn yekatîmn̂e komo kica,
Mîk hak cheka toxapu komo.
On wara kexe noro yipu komo,
Tuhn̂e mokuhra mexe xakn̂e Xesus Kristu,
kexe okwe.
Kewkukman̂e komo xa mîkyam kica,
Kristu xatî pînî ro kom ha.
8 Ero ke noro yipu komo ewetîra ro mak ehcoko.
Ewehcataw awya so n̂etkuresî mak okwe amna ya apanatanmetoponhîrî komo.
Ero ke ewetîra mak cexpore nasî kepethîrî komo yahsîtîkachome tak kîwya so.
9 On wara naxe anarî komo,
Kaan ya kpanatanmetopo yanwekn̂e me naxe.
Kristu ya kakir̂wamacho komo ponarora marha naxe.
Noro yipu komo ropotaw exihra nasî Kaan.
Kristu ya kakir̂wamacho komo ponarono komo ropotaw reha nasî Kîîm komo,
Yumumuru marha.
10 Anarimaw na ahyaka so mokyatu apanatanmekn̂e komo,
Kristu ya kakir̂wamacho poko apanatanmekn̂e pîn komo mak ha.
Noro yipu komo yetarî enpora ehcoko.
Yîmtapotarera marha ehcoko.
11 Noro yipu komo yîmtapotaretaw awya so akronoman̂e me rma maxe kicicme exirî poko kica.
Ero ke yîmtapotarera ehcoko.
Ahyaka So Kmokyas Amn̂e, Kacho
12 Miya rma cma re nas omtapotarî,
onmewrerî cma ha re.
Karita poko tko mewretîkara wasî.
Yarî omoku xe was amn̂e awenso so.
Ero yimaw tak kîmtapowasî awakro awepatai so rma.
Ero wa kesencetaw so amn̂e tahwore xa taxe okre.
13 Tan nas awakno,
Kaanî nmen̂ekatho xa marha.
Noro xîkrî komo tî ketu awya so,
Kir̂wan̂he matu iito?
ketu tî.
Amen.