Xuaw Karitan 3-Înhîrî
3 Xuaw
Yaarono Yewetîn̂e Mîk, Kacho Wencesî Apoko
1
On okaritan an̂enîrî oyakno.
Kaan mîn yenîn̂e ow,
Kaiu amoro.
On wara wîîkes awya oyakno,
aaxe wasî yaarono ponaro awexirî ke.
2 Kaan yakro kîmtapowasî apoko oyakno.
On wara wîîkesî yîwya,
Apa kah yawno,
kir̂wan̂he nas oyakno.
Kar̂pe nasî noro yekatî.
Ero ke kar̂pe xa marha cma re miir̂asî yupun hara ekatî wa xa marha.
Ehn̂ara marha cma re noro miir̂asî emyarîrî poko,
wîîkesî Kaan ya apoko.
3 Kokon̂oro tak kakno komo mohce oona.
N̂examro awekatîmyatken̂e.
Kir̂wan mîk Kaiu,
ketken̂e.
Yaarono ponarono mak mîkî,
yaarono yewetîn̂e marha,
ketken̂e apoko.
Ero ke tahwore xa wehxe ero wa awehtopo yentarî ke.
4 On wara was ow,
tahwore xa wasî omxîkrî komo yehtopo yentache owya.
Yaarono n̂ewehcaxe okre amxîkrî komo,
kacho yencetaw owya tawake wasî.
Ero wa xa wasî.
Xesus Ya Kakir̂wamacho Yekatîmn̂e Komo Twakrepore Nasî
5 On wara tî mai oyakno,
kir̂wan̂he awehtopo wencesî.
Kir̂wan̂he tî mai iitono komo poko.
Miya roro tî ero wa mai.
Wakreno tî miir̂a,
akronomano marha tî miir̂a.
Ero wa tî mai kakno komo poko,
pawana komo poko marha.
6 Ero wa awehtopo komo n̂ekatîmyatken̂e anwakrethîrî komo rma.
Kaan xîkrî komo ya n̂ekatîmyatken̂e tantono komo ya.
Ero ke ero warai komo akronomakî xa hara amn̂e.
Ahyawnonhîrî komo cetaw tooto cheka akronomakî,
wakreko marha.
Ero wa cirpore nasî Kaan yanton me exirî ke so.
7 Mîk hak cheka cexe Xesus ya kakir̂wamacho komo yekatîmso mak.
Xenciu komo reha noro yipu komo wakrera naxe.
8 Ero ke ero wa tîtosom komo twakrepore nasî,
takronomapore marha nasî.
Ero wa kexitaw so yaarono yekatîmn̂e wara rma taxe okre.
Ero wa taxe.
Amna Mtapotarî Yenta Xera Tî Nai Okwe Ciotrepes
9 On wara wîîkes hara awya,
pahxa rma okaritan mewrekn̂e iitono komo n̂enîrî,
Kaan xîkrî komo n̂enîrî.
Amna mtapotarî yenta xera ro makî tko tî nai Ciotrepes.
Poturme cexi xe tî nai noro kica.
Ero ke amna mtapotarî yenta xera tî nai okwe.
10 On wara tî nai noro amna poko,
kicicme makî tî nîmtapowa kica amna poko.
Kaanî mtapotarî yekatîmso tîtosom komo xera marha tî nai okwe.
Tîhyaka mokuche so n̂en̂epe makî tî kica.
Wakrera ro makî tî nai.
N̂examro wakre xe awexitaw so,
Pîra kica,
nîîke tî awya so.
Noro yipu komo tî porohke okwe,
tîtosom komo wakre xatî pen kom ha.
Ero wa tî nai noro okwe amna poko,
Kaanî mtapotarî yekatîmso tîtosom komo poko marha.
Ero ke iina omokyataw noro wen̂ekesî.
11 Ero ke on wara wîîkes awya oyakno,
kicicitho komo poko pohnîmra ro mak esko.
Kir̂wan komo poko mak apohnîmko.
Kir̂wan̂he ciino rin̂e komo reha yîhtînocoko Kaan xîkrî me.
Kicicme ciino rin̂e komo reha naxe Kaan yenîn̂e pîn me ro mak okwe.
12 Kir̂wan̂he wencesî Temetriu yehtopo reha.
Kir̂wan̂he noro n̂ekaiwasî miya rma.
Yaarono ponaro makî tî nai okre.
Amna meero ero wa kesî noro poko.
Yaaro ham mîîkexe amna mtapotarî poko.
Awenso Kmokyas Amn̂e
13 Taa,
miya rma nasî omtapotarî onmewrerî ha an̂enîrî.
Mewretîka xera tko wasî karita poko.
14 Yohno cma re kmokyas awenso so.
Ero yimaw awakro tak kîmtapowasî awepataw xa tak.
Taa,
ahwokan me awexi xe wasî.
On wara marha wîîkes awya,
tantono komo tî natu aponaro.
Kir̂wan̂he mai iito?
ketu tî awya.
Amoro hara iitono komo ya marha kasko.
Xuaw tî nai aponaro so,
kasko.
Osotî komo poko so etacko ero wa ketaw yîwya so.
Ero wa mak wîîkes awya oyakno.