On okaritan an̂enîrî komo.

Xutas ow ha,

Xesus Kristu yanton ha.

Ciaku yakno ow ha.

Kaan nan̂ikîtho amyamro,

Kîîm komo Kaan nakir̂wamatho kom ha.

Akurunpexe so Noro Xesus Kristu yakrono me awexirî ke so.

Ero warai komo amyamro.

An̂enîrî komo tan mewresî.

2 On wara exi xe wasî Kaan apoko so,

apînîn yaw so xa exi xe wasî.

Ahwokan me awiri xe so marha wasî yîwya.

Aaxatî me xa cehtopo yenpo xe marha was awya so.

Ero wa exi xe wasî Kaan apoko so.

3 On wara wîîkes awya so oyakno komo,

kokon̂oro mak okaritan mewre xe wîxakn̂e an̂enîrî komo.

Kakir̂wamacho komo pokono mewre xe wîxakn̂e.

Ero yinhîrî tko anarî wîhtînoi hara onmewrerî,

atwermacho komo tak.

Ero ke on wara ka xe was hara awya so,

Xesus ya kakir̂wamacho cma re n̂ekatîmyakn̂e Kaan tîmxîkrî komo ya.

Ero ke ero ponaro men ehcoko etowîn me ro mak,

kacoko awakno komo ya,

ka xe wasî.

Ero ke ero pokono xa tan mewresî an̂enîrî komo.

4 On wara tî mat okwe,

acheka so tî mohce anarmen komo,

Kaan ponarono pîn kom ha tî okwe.

En̂epa me makî tî mohce.

On wara kan̂e komo tî mîkyam kica,

Kwakren̂e mak Mîk Kaan,

kakronoman̂e marha.

Ero ke awanme ro so mak ehcoko kicicitho pokono me rma,

kan̂e komo mîkyam kica.

Kporin komo Kaan yanwekn̂e komo mîkyam okwe,

Kporin komo Xesus Kristu yanwekn̂e marha okwe.

Pahxa rma noro yipu komo yemetanmecho pokono mewrepekn̂e Kaan.

Ero warai komo mokyatken̂e acheka so okwe.

5 Ero ke on wara wîîkes awya so,

an̂entathîrî komo rma tan wekatîmyasî xa hara awya so.

Pahxa kporin pen komo tî naar̂akn̂e Kaan Exitu poi,

emetanmekn̂enhîrî komo yai.

Ero yinhîrî tko tî Kaan nanwekyatken̂e hara okwe n̂examro,

yînarîthîrî komo rma.

Ero ke n̂examro pen takî tî waihkekn̂e Kaan.

6 Ero wa xa marha tî xakn̂e Kaan ancu komo poko hara.

Kir̂wan̂he ka xatken̂e ancu komo ahnoro.

Kaan yanton me ka xatken̂e.

Amn̂e tak Kaan yewetî xera takî tî xatken̂e hara okwe anarî komo.

Cekenî ro komo yai takî tî cetken̂e okwe.

Ero ke n̂examro pen tak n̂imiyakn̂e Kaan kuripara warai ke,

etawotonî ro ke.

Awarpanawno me xa n̂imiyakn̂e en̂ekachome amn̂e.

Amn̂e tak en̂ekano ritopo po kicicitho komo Kaan n̂en̂ekesî kopi ahnoro.

Ero yimaw n̂examro pen n̂en̂ekesî.

Ero wa Kaan nasî ancu pen komo poko.

7 Ero wa xa marha tî xatken̂e Sotoma pononho pen kom hara,

Komoha pononho pen komo marha,

yîmîtwono pen komo marha.

N̂examro pen tî nakn̂iyakn̂e Kaan wehto ke oco,

eseikanî ro ke mak oco.

Kicicitho pokono ro me mak tî xatken̂e.

Cipici pîn poko xatken̂e,

anarmen poko marha tî xatken̂e kica.

Ero ke tî n̂examro pen nakn̂iyakn̂e Kaan.

Ero wara n̂examro pen waihkekn̂e twerî tak kehtome so kîwyam hara.

8 On wara marha naxe n̂examro,

ahce na poko wosowaxe kica.

Tupun komo rma nîwîrîmexe okwe.

Kayaritomo komo nanwekyaxe.

Yukurumîkno komo nîwîrîyakexe marha kopi.

Ero wa naxe kopi.

9 Ero warahra reha tko xakn̂e Mikew,

ancu komo kayaritomon ha.

On wara tî xakn̂e noro,

Moises pen yokoputho poyero tî n̂eseseyukyatken̂e Ciabu yakro.

On wara makî tî kekn̂e Mikew Ciabu ya,

Kaanî rma aweiyasî,

kekn̂e mak noro Ciabu ya.

Twerî makî tî nîmtapowakn̂e noro yakro.

10 Ero warahra ro makî tko naxe acheka so mohxapu komo.

Camkî mak naxe yukurumîkno komo poko.

Noro yipu komo rma tko nîwîrîyakexe ro mak kopi.

Camkîra rma re naxe ahce wa na tupun komo ciitopo poko,

xaparitho komo wara mak kica.

Ero yipu poko n̂etwîrîmetîkexe ro makî tko kica.

11 Tîhcamnosom komo mak mîkyam okwe.

Kain pen wara mak naxe kica,

Baraw pen wara marha.

Kicicime tî xakn̂e Baraw pen puranta xe cexirî ke.

Ero wa xa marha naxe acheka so mohxapu kom hara.

Expon me ro mak naxe puranta xe.

Kore pen wa xa marha naxe.

Tpanatanmekn̂e komo yanwekn̂e me tî xatken̂e Kore pen komo.

Ero poyero tî n̂ehcamnoyatken̂e okwe.

Ero wa xa marha naxe acheka so mohxapu kom hara.

N̂ehcamnoyaxe n̂examro pen Kore pen komo wa xa marha.

12 Kicicitho komo ro mak mîkyam okwe.

Awakro so rma re n̂eseresmexe etîxatî me awehtopo komo ponaro aweseresmetaw so.

Erasîra ro mak n̂eseresmexe awakro so.

Asmuren̂e komo me makî tko naxe okwe.

Tmaxmitacho komo ponaro mak naxe,

anarî komo ponarora mak okwe.

Tuuna yewru warai mak mîkyam tmohsom ken̂arî pîn warai mak okwe,

ocowo narîrî warai mak okwe.

Weewe warai marha mîkyam epetantho warai,

epetatopo yimawno warai rma okwe.

Asakî ro waixapu thakwa mîkyam okwe.

Aawaixapu wara naxe.

Yimicin mohkaxapu wa marha naxe okwe.

Ero wa naxe okwe.

13 Yamarataka warai marha mîkyam okwe,

tuuna imo kwawno warai ha.

Cekahximaxmu wara mak naxe,

kicicme cehtopo komo yukumton̂e wara mak kica.

Xir̂ko warai marha mîkyam,

miya ro mak twaimamsom warai okwe.

Awarpan chew ro mak naxe amn̂e kopi,

cîkînînîhno chew ro mak ha.

Iito tak naxe eroromero thakwa okwe.

Ero wa naxe acheka so mohxapu kom ha.

14 Enoke pen rma tî noro yipu komo n̂ekatîmyakn̂e pahxa.

Ataw yepamtho pen komo n̂ehretawnometken̂e 7 ro,

Enoke me cewruso ro tak.

On wara tî kekn̂e noro pen,

Kporin komo tak men mokyas amn̂e.

Tînakir̂wamathîrî komo n̂ekyasî mer̂pono pîn komo,

10,000 komo,

10,000 komo xa hara,

miya rma.

Ero wa mokyasî Kporin komo.

15 Ero yimaw kicicitho komo n̂epemesî ahnoro.

On wara kesî tponarono pîn komo ya,

Oyewetîra ro mak mîxatken̂e okwe.

Kicicme ro mak mîxatken̂e okwe.

Kicicitho me mîmtapowatken̂e kica opoko ooxera awexirî ke so,

kesî yîwya so,

kekn̂e tî Enoke pen noro yipu komo poko.

16 On warai marha mîkyam acheka so mohxapu komo,

yîwîrîyakano rin̂e komo mîkyam,

erepotan komo marha.

Ahce na poko cepohketaw so ero poko rma naxe kica.

Ow xa kir̂wan,

kan̂e mîkyam anarî komo yopono me cesenpotome so.

Kir̂wan amoro okre,

ketu rma anarimaw so anarî komo ya twakrecho komo ponaro cexirî ke so.

Ero wa naxe kica.

17 On wara ehcoko amyamro reha oyakno komo,

Kporin komo Xesus Kristu nantomatho komo mtapotarî ponaro ehcoko.

18 On wara ketken̂e awya so,

Amn̂e eromanhîrî kaamo pahnoke exitaw Kaan poko cetaporesom komo tak men mokyaxe acheka so.

On wara naxe n̂examro,

mîn hak poko cepohkaxmu me naxe kica.

Kaan n̂ewyomatho poko rma n̂epohkexe kica.

19 On wara marha naxe kica,

tupun komo mak n̂ewehcaxe kica.

Twarahra cesehtînosom komo yakro esenmekîra naxe kica.

Kaan Yekatî exihra ro mak nasî yîropotaw so okwe.

Ero warai komo men mokyaxe amn̂e acheka so,

ketken̂e awya so.

Ero wa ketken̂e awya so noro yipu komo poko.

20 Ero ke on wara ehcoko amyamro reha oyakno komo.

Xesus ya kakir̂wamacho komo ponarono me maxe okre,

Kaanî mtapotarî ponarono me ha.

Ero ke ero yipu poko ehcamhokatîkacoko n̂he.

Kaan yakro marha amtapotacoko Kir̂wanî ro Yekatî yanme ha.

21 On wara marha ehcoko,

aaxe so Kaan yehtopo ponaro ehcoko.

On wara marha kacoko,

Kîpînîn yawno xa Mîk Kporin komo Xesus Kristu.

Ero ke waipîn me xa tak kiir̂axe so amn̂e,

kacoko ha.

Ero wa kacoko amyamro reha.

22 Anarî komo pînîn yaw ehcoko.

On wara kacoko noro yipu komo poko,

Kicicitho komo warahra reha naxe n̂examro,

kacoko poko so.

23 Anarî komo naxe hara kicicitho pokono komo rma re okwe.

Noro yipu komo yanîmn̂e wara ehcoko rma,

wehto chei anîmn̂e wara ha.

Twerî rma tko ehcoko kicicme ehtoponhîrî komo poko.

Poonotho wara mak nasî ero wa ehtoponhîrî komo,

yupun yanme esmurexapu wara.

Ero ke ero wa ehtoponhîrî komo xera ro mak ehcoko.

Ero wa ehcoko anarî komo poko.

24-25 Taa,

on warai xa Mîk ha Kaan,

ehn̂anî ro mak Mîk ha awecetotopo komo poko.

Ehrokan me awir̂axe so.

Kicicitho ken̂ehra ro mak awenpexe so amn̂e Kaan ya,

kir̂wanî ro ya.

Tawake xa tak nasî awenpetaw so.

Ero wa nasî Kaan,

kakir̂waman̂e kom ha.

Noro mak nasî takîhso.

Ero ke Noro poko tahwotapore nasî.

Kir̂wanî ro xa Amoro ham Apa okre,

kapore nasî.

Kayaritomo ro xa Amoro ham,

cewetîsom xa Amoro,

karitî xa,

kapore marha nasî yîwya.

Ero wara roro kapore nasî Kaan ya miya roro yîtîhkan me ro mak.

Ero wa kan̂e me awexi xe so wasî.

Amen.