Kaan n̂enpotho on Xesus Kristu ya.

On wara kekn̂e yîwya,

On wara ciino tak wiir̂as amn̂e ecmamra rma.

Ero ke ero yipu wenpesî awya oyanton komo ya tak enpotome awya hara,

kekn̂e tî.

Ero wa kekn̂e Kaan Xesus Kristu ya.

Ero ke tak n̂enpekn̂e yîwya.

Amn̂e tak Noro makîrha n̂enpekn̂e Xuaw ya hara.

Ancu mak n̂en̂epekn̂e Xuaw ya enpon̂e.

Ero wa Xesus Kristu n̂enpekn̂e yîwya tîn̂enîthîrî rma,

ekatîmtome miyan komo ya rma.

2 Ero ke tîn̂enîthîrî yaw roro tak mewrekn̂e Xuaw kn̂enîrî komo me.

Kaanî mtapotarî rma mîn mewrekn̂e,

Xesus Kristu mtapotarî marha.

Ahnoro tîn̂enîthîrî mewrekn̂e.

3 Ero ke encoko roro on Xesus mtapotachonho.

Entacoko roro marha.

An̂ewetîrî komo me marha yîhtînocoko roro.

Ero wa awexitaw so tawake xa maxe okre.

N̂epahnokesî tak ero wa ciino ritopo Kaan ya.

Ero ke ponaro men ehcoko.

4 Taa,

Xuaw ow ha.

On wara wîîkes awya so,

Kaan xîkrî komo n̂enîrî tan mewresî,

Asia pono komo n̂enîrî.

7 ewto pono komo amyamro.

On wara wîîkes awya so,

awakronoma xe so wasî Kaan ya.

Ahwokan me awiri xe so marha wasî yîwya.

Pahxanî ro mak Mîk Kaan ero wa awin̂e kom ha.

Nasî rma oroto.

Amn̂e nas hara miya rorono me ha.

Noro yipu Mîk Kaan.

Kaan yaponî ro mîtwo naxe kirwan komo yekat hara,

7 ha.

Noro yipu komo ya marha awakronoma xe so wasî.

Ahwokan me awiri xe so marha wasî yîwya so.

5 Ero wa xa marha awiri xe so wasî Xesus Kristu ya hara.

On warai Mîk Xesus Kristu,

cemarontara ro mak ekatîmn̂e Mîkî.

Pakaxapu marha Mîkî waixapu komo chewnonho.

Yihcirî me pakekn̂e Noro anarî komo poturme.

Roowo pono kayaritomon komo yantoman̂e marha Mîk ha.

Kîîxe so xakn̂e Noro.

Ero ke tkamxukuthîrî ke rma kîkoroketken̂e so kicicme kehtoponhîrî komo yîhcamnotome tak.

6 Kayaritomo me marha kiir̂atken̂e so.

Kaan ya tîmsom pokono me marha kiir̂atken̂e so,

Tîîm ya tîmsom pokono me ha.

Ero wa kiir̂atken̂e so Xesus Kristu.

Ero ke on wara kapore nasî yîwya,

Kir̂wan̂he xa mai ham okre,

kayaritomo ro xa Amoro ham okre.

Miya roro ero wa kes amna awya yîtîhkan me ro mak.

Amen,

kapore marha nasî.

Ero wa kapore nasî Xesus Kristu ya.

7 Noro rma mokyas amn̂e.

Kaapu smun ke tponoye mokyasî.

Miyan komo rma Noro n̂een̂axe ero yimaw,

amowon̂enhîrî komo meero.

Enîche tak nîwracexe thakwa n̂examro.

Ahnoro tribu komo nîwracexe Noro yenîrî ke tak ha.

Ero wa xa naxe Xesus mokyataw amn̂e.

Noro moku xe was ow okwe,

ero ke,

Amoko rma,

wîîkes awya Apa.

Amen,

wîîkesî marha awya.

8 On wara kesî Kporin komo,

n̂esekatîmyasî kîwya so,

Awpa kacho Ow ha,

omeka kacho marha Ow.

Apoturu komo xa Ow ha,

amapitawno komo marha,

kesî.

Oroto Noro nasî waipîn me,

xakn̂e rma pahxa,

nasî rma amn̂e miya roro.

Karitî ro xa Mîk Noro anarî komo yopono ha,

Noro rma ero wa kesî.

9 Taa,

Xuaw ow ha,

awakno komo rma.

Awara so xa marha cesemetanmesom me was okwe.

Pahkî ka tînîmyaxe kesemetanmetopo komo kayaritomo me xa Kaan yesenpotopo momokrî poko kexirî ke so.

On wara wîxakn̂e,

ciwya po wîxakn̂e,

Patmos po.

Kaanî mtapotarî yekatîmrî poyero mak owya oyen̂epetken̂e thakwa iina,

Xesus Kristu poko owya ekatîmrî poyero ha.

10 Ero ke iito thakwa wîxakn̂e.

Kaan Yekatî ken̂e xa wîxakn̂e iito oyexitaw Kporin komo kamon po.

Wosowatawno wara wîxakn̂e ero yimaw.

Ero wa oyexitaw tooto mtapotarî warai tak wencekn̂e omkai.

Kar̂pe xa kekn̂e raatî yeceyatawno waro ro mak oko.

11 On wara kekn̂e owya,

Awpa kacho Ow ha,

omeka kacho marha Ow.

Apoturu komo xa Ow ha,

amapitawno komo marha.

On̂enporî tak meen̂as amn̂e.

An̂enîthîrî tak mewreko karita yaka.

Mewretîkache awya arpoko Kaan xîkrî komo yaka,

Asia pono komo yaka.

On pono komo naxe iito Asia po,

Epesu pono komo,

Esmina pono komo,

Pehkamu pono komo,

Ciacira pono komo,

Sahtes pono komo,

Piratewpia pono komo,

Rawciseia pono komo,

ero warai pono komo naxe iito.

N̂examro yaka arpoko amn̂e akaritan,

an̂enîthîrî yekatîmtopo ha,

kekn̂e owya.

12 Ero wa kacho yentache owya kesewkor̂mekn̂e oyakro tîmtapotaxmu yentome.

Oyesewkor̂mache weeyu tak ween̂akn̂e yaake,

7 ha.

Ooru ciixapu mîn xakn̂e weeyu mko.

Tapoye so xakn̂e,

cecehke so marha xakn̂e.

Ero wa xakn̂e weeyu mko.

13 Iito marha ween̂akn̂e Tooto me Ewruxapu warai weeyu mko rakataw.

Kaw xakn̂e Noro ponon yîhtarî pona roro.

Tawrutamxi marha xakn̂e aan̂apotun ke,

ooru kahxapu ke.

14 On wara marha xakn̂e Noro.

Tumutwe ro mak xakn̂e yîhpoci.

Yîhtîpîrî marha xakn̂e tumutwe.

Oper̂a poci tumutwe nasî ero wa xakn̂e.

Tumutwe ro mak xakn̂e,

n̂eepe wa mak.

Tîroromutwe xakn̂e ewru hara wehto wara ro mak oco.

15 Rataw wa mak xakn̂e yîhtarî hara.

Kir̂wanhe ro mak nasî rataw wehto pona yusmunkaxapu.

Ero wa yusmunkaxapu wara xakn̂e okre yîhtarî.

On wara xakn̂e yîmtapotarî,

kar̂pe xa kekn̂e kopi kahxi imo wara ro mak,

mer̂pono pîn wara.

16 On wara marha xakn̂e Noro,

kar̂me xir̂ko nahsîyakn̂e cemyaw,

7.

Yîmtai tak n̂epatakekn̂e kacipara imo warai,

tîyokem oko,

ececokan iyorî.

Eepatarî xakn̂e tîroroye ro mak oco.

Kaamo wa mak xakn̂e oco Noro yeepatarî,

kamarakatawno wara ro mak.

Ero wa xakn̂e.

17 Noro yenîche tak owya kesewnapekn̂e ro mak amrinaka.

Waixapu wa mak wîxakn̂e.

Omotayasîyakn̂e tak Noro kar̂me.

On wara kekn̂e owya,

Erasîra esko.

Apoturu komo Ow ha,

amapitawno komo marha,

kekn̂e owya.

18 Waipînî ro marha Ow ha.

Kwaihyakn̂e rma re.

Kpakekn̂e hara tko.

Miya roro tak wasî kar̂pe.

Amen.

Oyemyaw nasî wehto imo yewkacho,

awaitopo komo yewkacho marha,

kekn̂e owya.

19 On wara marha kekn̂e owya,

An̂enîthîrî tak mewreko,

oroto menwo ero.

Nai marha on̂enporî xa hara,

ero wa xa naxe tooto komo oroto,

ero wa tak naxe hara amn̂e,

kacho.

Ero yipu marha mewreko enîche tak awya,

kekn̂e owya.

20 On wara marha wîîkes awya,

oyemyaw 7 xir̂ko menwo,

kaari yaw.

7 weeyu mko marha menwo ooru ke tapoyem hara.

Camkî na mai ero yipu poko.

Ero ke wekatîmyas awya.

Ancu kuknon mîn xir̂ko,

Kaan mîn yenîn̂e komo kuknon ha.

On wara nasî weeyu hara an̂enîthîrî,

Kaan xîkrî komo kuknon mîn hara.

Anarî pono komo kuknon me nasî anarî weeyu,

anarî pono komo kuknon me nas hara anarî hara,

7 mko cirihtîkaxi ro weeyu mko.

Ero wa kekn̂e owya Tooto warai.