Epesu Pono Komo Yakan Karita
2
Taa,
on wara kekn̂e hara Noro owya,
Karita tak mewreko Epesu pono komo yancun yakan,
Kaan xîkrî komo yenîn̂e yakan ha.
On wara kacho mewreko,
Oyakno komo,
Epesu pono komo amyamro.
Kar̂me xir̂ko yahsîn̂e mtapotarî tan,
7 yahsîn̂e mtapotarî ha.
Weeyu chere n̂etar̂asî,
ooru ke tapoyemu mko chere.
Noro yipu on wara kes awya so,
2 Kir̂wanhe awehtopo komo rma re ween̂asî.
On wara maxe,
mekaricexe roro kir̂wan poko,
N̂ex ha,
kpoka tak okwe,
kahra rma maxe pahkî.
Kicicitho komo yentan̂e pînî ro mak amyamro.
Xesus nantomatho amna ha,
ketken̂e acheka mohxapu komo.
Noro yipu komo meenatken̂e mak ha ka yaarono pînî tko na mîkyam,
kachome awya so.
Kicicme tak mîhtînoyatken̂e.
Cemarontaxmu komo mîkyam ham,
mîîketken̂e tak.
3 Ahwokara marha mîxatken̂e okre.
Awesemetanmetopo komo mînîmyaxe pahkî.
Oyosotî yanme marha mekaricexe okre pokahra.
4 Kicicme awehtopo komo rma tko ween̂as ha re.
Pahxa oyahsîche rma ka ooxe xa mîxatken̂e.
Oroto tak ooxe rma cik maxe wara mak tak okwe.
5 Kir̂wan̂he awehtoponhîrî komo yîhtînocoko hara.
Wara mak awehtopo komo tak poxunkacoko hara.
Yihcirî me oyahsîche rma kir̂wan̂he ow mewehcatken̂e okre.
Ero ke ero wa xa marha ehcoko hara.
Wara mak awexitaw so rma yohno kmokyas ha men aweyuru komo wece.
Ahyai so tak waar̂as okwe.
6 Kir̂wan̂he rma tko re maxe.
On wara maxe,
kicicme ro mak meen̂at ham Nikorata komo.
Ow meero marha kicicme ro mak ween̂asî n̂examro.
Ero wa mak wîîkes awya so Epesu pono komo amyamro,
kacho mewreko,
kekn̂e.
Ero wa kekn̂e owya.
7 Ero wa kesî Kaan Yekatî Kaan xîkrî komo ya.
Ero ke men n̂entacowpe entan̂e me cehsom komo.
Kicicitho yewetîn̂e pîn me awexitaw so wîmyasî onatîrî yeperîrî awya so anahrî komo me.
Waipîn me awin̂e komo rma mîn onatîrî yeperîrî,
Kaan yeken pono ro yeperîrî ha,
kekn̂e owya.
Ero wa kekn̂e tooto warai owya.
Esmina Pono Komo Yakan Hara Karita
8 Ero yinhîrî tak on wara kekn̂e owya,
Taa,
anarî tak mewreko xa hara karita,
Esmina pono komo yancun yakan,
Kaan xîkrî komo yenîn̂e yakan ha.
On wara kacho mewreko,
Oyakno komo,
Esmina pono komo amyamro,
Apoturu komo mtapotarî tan,
amapitawno komo marha Mîkî.
Waihyakn̂e,
pakekn̂e hara Noro mtapotarî rma tan ha.
On wara kesî Noro awya so,
9 Kir̂wan̂he awehtopo komo ween̂asî.
Awesemetanmetopo komo marha ween̂asî,
emyawnomra awehtopo komo marha.
Cemyawnoye rma tko maxe okre.
Ahyaw so naxe Kaan yîwîrîyakan̂e komo kica.
Kicicme ro mak nîmtapowaxe kica Kaan poko.
Xutew ro xa amna,
kan̂e komo mîkyam.
Xutew pînî ro mak mexe mîkyam.
Satanas mîn yaka cesenmesom komo mak kica noro yipu komo.
10 Amn̂e tak mesemetanmekyaxe xa hara okwe.
Ero yipu pona tko erasîra ehcoko.
Kahrutopo yaka awahruyaxe so rma ha re Ciabu.
Akukmacho komo rma tko mîn awahrutopo komo.
10 kaamo mesemetanmekyaxe thakwa okwe.
Opona enîn̂e me roro tko ehcoko miya roro.
Awaika xe exitaw so meero opona enîn̂e me rma ehcoko.
Ero wara awexitaw so awarokorî komo tak wîmyas awya so.
Waipîn me ro mak awitopo komo rma mîn awarokorî kom ha,
kacho mewreko.
Ero wa kacho mewreko Esmina pono komo yakan.
11 Ero wa kesî Kaan Yekatî Kaan xîkrî komo ya.
Ero ke men entacoko entan̂e me awexitaw so.
Waipin me maxe kicicitho yewetîn̂e pîn me awexitaw so.
Mîwaiyaxe rma re.
Ero ponanî tko nas hara tooto komo waihtopo komo xa tak ha.
Ero yipu tak awaikan̂e pîn me tak nasî,
kekn̂e hara owya.
Ero wa kekn̂e.
Pehkamu Pono Komo Yakanînho Tan Hara Karita
12 Ero yinhîrî anarî xa hara mewrepekn̂e owya karita,
on wara kekn̂e,
Pehkamu pono komo yancun yakan tak mewreko hara,
Kaan xîkrî komo yenîn̂e yakan ha.
On wara kacho mewreko,
Oyakno komo,
Pehkamu pono komo amyamro.
Kacipara imo yosomu mtapotarî tan.
Tîyokem xa mîn kacipara imo ececokan ha.
Ero yipu yosom on wara kes awya so,
13 Kir̂wan̂he awehtopo komo rma re ween̂asî.
Awewton komo marha ween̂asî.
Iito marha nasî Satanas yapon,
kayaritomo yapon warai.
Xesus ponarono xa amna,
kan̂e me rma maxe okre.
Ancipas pen waihketken̂e iitono komo okwe,
Xesus ponarono xa ow ha,
karî ke yîwya.
Achew so rma noro pen waihketken̂e okwe.
Satanasî rma iito n̂enmayasî amitwo so okwe.
Wara rma Xesus xatî me mesekatîmyatken̂e ero yimaw rma.
Kakir̂waman̂e pîn Mîk Xesus,
kahra ro mak mîxatken̂e okre ero yimaw meero.
Kir̂wan̂he nasî ero wa awehtopo komo.
14 Kicicme rma tko re keen̂axe so.
Asakî mak nasî kicicme awehtopo komo,
on warai,
Anarmen poko apanatanmekn̂e komo rma naxe okwe ahyaw so.
Baraw pen wara apanatanmekyaxe so n̂examro okwe.
Barake pen panatanmekyakn̂e noro Ixaw Yana komo yîhrokacho poko.
On wara kasko Ixaw Yana komo ya yîhrokachome so,
kekn̂e yîwya,
Mokuhra mat amna yakro eseresmaxi okre.
On ha wooto ciixaputho ya tîmxapunhîrî,
kasko yîwya so.
Moxam wooxam okre tweeno pîn komo,
kasko marha yîwya so,
kekn̂e tî yîwya.
Ero wa Barake pen panatanmekyakn̂e Baraw pen Ixaw Yana komo kiciciretopo poko kica.
Noro pen wa xa marha naxe kica apanatanmekn̂e kom hara.
15 Achew so marha naxe Nikoraita komo mtapotarî ponarono kom hara kica.
Kicicme ro mak nasî n̂examro mtapotarî owya.
16 Noro yipu komo ponaro awehtopo komo poxunkacoko tak men okwe.
Poxunkara awexitaw so ponan̂e rma men kmokyasî ahyaka so.
Omokuche ketar̂mesî ero wa apanatanmekn̂enhîrî komo yakro.
Okaciparanî imo ke ar̂mano wiir̂asî,
omtai cepatakaxmu ke rma,
wîîkesî awya so.
Ero wa kacho mewreko Pehkamu pono komo yakan.
17 Ero wa kesî Kaan Yekatî Kaan xîkrî komo ya.
Ero ke men entacoko entan̂e me awexitaw so.
Kicicitho yewetîn̂e pîn me awexitaw so awru komo tak wîmyas awya so maana,
enîhnî ro.
Toopuci marha wîmyas awya so tumutwem.
Ero poko nasî tmewreso awosotî komo yaxan ha.
Toopuci yahsîn̂e makî reha nîhtînoyasî tosotî,
toopuci poko mewrexapu.
Anarî komo reha yîhtînopîra naxe.
Ero yipu wîmyas awya so kicicitho yewetîn̂e pîn me awexitaw so,
kekn̂e hara owya.
Ero wa kekn̂e.
Ciacira Pono Komo Yakanînho Hara Karita
18 Ero yinhîrî anarî xa hara mewrepekn̂e owya karita.
On wara kekn̂e owya,
Ciacira pono komo yancun yakan mewreko hara,
Kaan xîkrî komo yenîn̂ yakan ha.
On wara kacho mewreko,
Oyakno komo,
Ciacira pono komo amyamro.
Kaan Mumuru mtapotarî tan.
Wehto wara mak nasî Noro yewru.
Rataw wara marha nasî yîhtarî hara akir̂wamaxapu wara xa okre.
Noro yipu on wara kes awya so,
19 Kir̂wanhe awehtopo komo rma re ween̂asî.
Etîxe awehtopo komo ween̂asî,
akronomano rin̂e me awehtopo komo marha,
opona enîn̂e me awehtopo komo marha,
pokahnî me awehtopo komo marha.
Ero wa awehtopo komo ween̂asî.
Pahxa cemyarke mîxatken̂e ha re kir̂wan̂he ciino ritopo poko amn̂e xa so mak.
Oroto cemyarke nhe tak maxe emapona roro kir̂wan̂he ciino rirî poko okre.
20 Kicicme rma tko keen̂axe so ha re.
On wara mak nasî kicicme awehtopo komo,
Kicicitho wooxam nasî achew so,
Xesabew ha.
Noro yipu rma porohkara maxe okwe.
Weronomano rin̂e ow ha,
kesî noro tohnaw ro mak kica.
Kicicitho poko omaywen komo panatanmekyasî.
Apici pîn komo poko rma ehcoko,
kesî kica yîwya so.
Mîk hak warai me ciixaputho ya tîmxapunhîrî rma ahcoko erewsî,
kesî marha kica yîwya so.
Ero wa omaywen komo panatanmekyasî kica noro,
Xesabew.
21 Kîîrî pokono mîk noro,
mîk hak pokono kica.
Ahri ka poxunkape ero wa cehtoponhîrî,
wîîkekn̂e mak ha ka noro poko.
Poxunkara rma tko xakn̂e okwe.
22 Ero ke tak men okohme tak noro wiir̂asî amn̂e kuywa pono me mak okwe.
Noro pokononho komo marha wemetanmekyasî.
Wemetanmekyasî ro mak okwe.
Ero wa xa men n̂examro pen wemetanmekyasî cehtoponhîrî komo poxunkara exitaw so.
23 Noro xîkîtho komo marha tak waihkes waihkano ritopo ro ke okwe.
Ero wa waihkano riche owya on wara tak kexe Kaan xîkrî komo ahnoro,
Kropotarî komo yenîn̂e xa Mîk ham,
kexe tak opoko.
Kesehtînotopo yentan̂e marha Mîk,
kexe marha opoko.
Ero wa tak kexe opoko.
Noro yipu xa Ow ha.
Ero ke ahce na poko awehtoponhîrî komo yepetho men wîmyas awya so,
amn̂e.
Kir̂wan̂he ciino ritoponho yepetho wîmyasî,
kicicme awehtopo komo yepetho marha.
24 Taa,
Xesabew yewetîn̂e pîn komo amyamro awya so wîîkesî on wara hara,
Satanas poko panatanmekno n̂iitîkekn̂e noro kica,
ero yipu yentan̂e pîn mak amyamro okre.
Ero ke apanatanmekîra xa hara ka wasî.
Anarî komo Ciacira pono komo ya marha ero wa wiikesi,
ahnoro Xesabew yewetîn̂e pîn komo ya.
25 An̂entathîrî komo ponaro rma tko ehcoko miya roro omohtopo pona roro.
26 On wara naxe anarî komo,
kicicitho yewetîn̂e pîn me naxe okre.
Oyanme ciino ritopo ponaro marha naxe miya roro twaihtopo komo pona roro.
Ero wa exitaw so mîn hak rowon pono komo kayaritomon me wiir̂asî.
27 On wara kesî Kaan Karitan,
Noro watman nasî pehu ciixapu.
Mîn hak pono komo kayaritomon me nasî.
N̂examro pen nar̂mesî ro mak tahrem yakuhrapetawno wa,
kesî.
Ero wa ciino rin̂e me oriyakn̂e Apapa,
ero wa ciino rin̂e me xa marha kiiraxe so kicicitho yopono me awexitaw so.
28 Kwakwarî marha wîmyasî yîwya so.
Ero wa wiirasî noro yipu komo.
Ero wa kacho mewreko Ciacira pono komo yakan hara,
kekn̂e owya tooto warai.
29 Ero wa kesî Kaan Yekatî Kaan xîkrî komo ya.
Ero ke entacoko entan̂e me awexitaw so,
kekn̂e hara owya tooto warai.
Ero wa kekn̂e.