Sahces Pono Komo Yakanînho Karita
3
Ero yinhîrî tak anarî hara mewrepekn̂e owya karita.
On wara kekn̂e,
Sahces pono komo yancun yakan tak mewreko,
Kaan xîkrî komo yenîn̂e yakan ha.
On wara kacho mewreko,
Oyakno komo,
Sahces pono komo amyamro.
Kaan yekatî komo yantoman̂e Owî,
7 komo yantoman̂e.
7 xir̂ko yosom marha Ow ha.
On wara wîîkes awya so,
Kicicme n̂he awehtopo komo ween̂asî.
On wara maxe,
waipîn me mekaiwaxe cma ha re.
Twaihso tko maxe okwe.
2 Ero ke apakacoko n̂he tak Kaan poko.
Naxe rma re iitono komo asakî mak omtapotarî ponarono komo.
Waiporono wara naxe anarî komo okwe.
Ero ke n̂examro ahworecoko kar̂pe tak ehtome so.
Kir̂wan̂he ciino rin̂e me maxe ha re,
Kaan yewetîtîkara tko maxe okwe.
3 Omtapotarî cma re mencetken̂e,
mewehcatken̂e marha okre.
Ero ke ero ponaro rma ehcoko etowîn me ro makî.
Wara mak oyewetîn̂e me awehtoponhîrî komo poxunkacoko.
Oponarora awexitaw so rma ahyaka so men kmokyas amn̂e cen̂epan̂em wara.
Kekatkexe so mak okwe.
Oroto xa tak mokyasî,
kahra ro mak maxe.
4 Anarî komo rma tko naxe ha re tponon komo yusmuren̂e pîn komo.
Ero wa naxe asak mak iitono komo Sahces pono komo.
Amn̂e tak tumutwem namruyaxe hara n̂examro tponon kom hara.
Oyakrono me roro tak naxe n̂examro kir̂wan̂he cexirî ke so.
Ero wa naxe anarî kom okre apoyino komo.
5 On wara marha wîîkes awya so,
kicicitho yewetîn̂e pîn me awexitaw so tumutwem tak wîmyasî aponon komo.
Awosotî komo yickara marha wasî okaritan yaw mewrexapu.
Waipîn me cehsom komo yosotî mîn okaritan yaw mewrexapu.
Ero yipu yickara wasî.
Oyakrono xa moxam,
wîîkesî xa matko Apapa ya amn̂e apoko so.
Apapa yancun komo ya marha wîîkesî ero wara.
Ero wa wasî apoko so kicicitho yopono me awexitaw so,
kacho mewreko,
kekn̂e owya.
Ero wa kacho mewrepekn̂e owya Sahces pono komo yakan hara.
6 Ero wa kesî Kaan Yekatî Kaan xîkrî komo ya.
Ero ke men entacoko entan̂e me awexitaw so,
kekn̂e.
Ero wa kekn̂e owya Tooto warai.
Piratewpia Pono Komo Yakan Hara Karita
7 Ero yinhîrî anarî hara mewrepekn̂e owya karita.
On wara kekn̂e owya,
Piratewpia pono komo yancun yakan tak mewreko hara,
Kaan xîkrî komo yenîn̂e yakan ha.
On wara kacho mewreko,
Oyakno komo,
Piratewpia pono komo amyamro.
Kirwanî ro Owî,
yaarono ponarono mtapotarî xa.
Tapi mîn yewkacho yosom marha Owî.
Metata yahrunkache owya ahrun me ro mak nasî.
Ahruche hara owya ahrunkan me ro mak nas hara.
On wara wîîkes awya so,
8 Kir̂wanhe awehtopo komo ween̂asî.
Metata wahrunkai awesamarî komo potawno.
Ahrunî ro me mak nas hara.
Kar̂pe so rma ciki re keen̂axe so,
omtapotarî ponarono me okre.
Xesus yakrono pînî ro mak ow,
kan̂e pîn me marha keen̂axe so.
9 On wara naxe anarî komo,
ahyawno komo,
Satanas pokono komo yesenmetopo nasî iito okwe.
Xutew amna,
kexe iina cesenmesom komo kica.
Xutew pînî ro makî tko mîkyam.
Cemaronwaxe mak kica.
On wara tak wiir̂asî noro yipu komo amn̂e,
awamrinaka so ceremaxmu me wiir̂asî.
On wara tak kexe,
Kir̂wan̂he xa Kaan nai ham.
Yiixe Noro yehtopo kom ham mîkyam,
kexe tak apoko so.
Ero wa kexe amn̂e oyanme.
10 Omtapotarî yewetîn̂e amyamro okre.
Ahce wa so na awexiche so ahwokatîkara rma ehcoko,
kachonho owya mewehcatken̂e.
Ero ke kukurunpexe so tak amn̂e emetanmekno riyataw owya amn̂e.
Ahnoro roowo pono komo wemetanmekyasî yukukmachome so,
Ero wa nat ham tîropotaw so,
kachome owya.
Amyamro reha cemetanmesom me exihra maxe ero yimaw akurunperî ke so owya.
11 Yohno men kmokyasî yarî.
Ero ke omtapotarî ponaro men ehcoko,
mencetken̂e ero ponaro rma.
Ponarora awexitaw so awarokothîrî komo tak men nahsîyaxe okwe anarî komo.
12 On wara marha wîîkes awya so,
kicicitho yewetîn̂e pîn me awexitaw so on wara tak kiir̂axe so,
Apapa mîn mapatan warai me tak kiir̂axe so.
Iitono ro me tak maxe Apapa mîn yaw anana tohnî me ro mak.
Ponaro oyehtopo ro mak Mîk Apapa.
Noro yipu yosotî tak mewresî apoko so.
Noro yewton yosotî marha mewresî apoko so.
Xerusarenî rma mîn Apapa yewton,
anarî hara Xerusaren,
Xerusarentho warai pîn tak ha.
Kah yai tak Apapa n̂enîhcesî.
Ero yipu yosotî rma mewresî apoko so.
Oyosotî marha mewresî apoko so,
oyosotîtho pîn tak.
Ero wa kiir̂axe so amn̂e kicicitho yewetîra awexitaw so,
kacho mewreko,
kekn̂e.
Ero wa kacho mewrepekn̂e owya Piratewpia pono komo yakan ha.
13 Ero wa kesî Kaan Yekatî Kaan xîkrî komo ya.
Ero ke men entacoko entan̂e me awexitaw so,
kekn̂e owya.
Rawciseia Pono Komo Yakan Hara Karita
14 Ero yinhîrî anarî hara mewrepekn̂e owya karita.
On wara kekn̂e owya,
Rawciseia pono komo yancun yakan tak mewreko hara,
Kaan xîkrî komo yenîn̂e yakan ha.
On wara kacho mewreko,
Oyakno komo,
Rawciseia pono komo amyamro.
On warai mtapotarî tan,
Amen kacho mtapotarî.
Ahce wa so na awehtopo komo yekatîmn̂e roro Mîk watohnî me ro mak.
Yaaro xa ekatîmn̂e marha Mîk,
poturme Kaan nakîhtotho marha.
Noro yipu on wara kes awya so,
15 Anarme awehtopo komo ween̂as okwe.
On wara keen̂axe so,
twotme xa exihra nasî aropotarî komo,
ocoro exihra marha nas okwe.
Ocorono wara exi xe wasî aropotarî komo.
Ero warahra exitaw twotme xa matko exi xe wasî.
16 Ocoro exihra rma tko nasî aropotarî komo,
twotme exihra marha nasî.
Ero wa awehtopo komo kicicme nas owya kica.
Ero ke karîrkexe so mak kica omtai.
17 On wara tko mîîkexe,
Cemyawnoyem xa amna okre.
Mer̂pono pîn amna nahsîye cemyawno,
mîîkexe.
Camkî rma tko maxe okwe ahce wa na awehtopo komo poko rma.
Tîwîrîyakaxmu me xa matko maxe okwe.
Okwe kacho me marha maxe.
Emyawnomnî me marha thakwa maxe.
Ewuhnî wa marha maxe.
Ponomnî wa marha maxe okwe.
Ero wa maxe okwe.
18 Ero ke on wara wîîkes awya so,
ooru tak aponcoko ohyai epethîrî pona.
Ooru nukuyaxe ero pokono ro komo wehto yepona yusmunthîrî yar̂machome,
ero wa yusmunkaxapu aponcoko.
Ero yipu aponcoko ohyai cemyawnoi xa tak awehtome so.
Aponon komo marha aponcoko tumutwem tak okre.
Amrucoko marha tak ponomnî wara esenpora awehtome so,
yîhyapamra tak awehtome so ha.
Awewru komo marha ehcemacoko kewru yehci ke kir̂wan̂he entome tak awya so.
19 On warai Ow,
yiixe oyehtopo komo yîtwerman̂e Ow.
Kicicme exitaw so panaresî.
Ero ke men omtapotarî ponaro xa ehcoko.
Kicicme awehtoponhîrî komo marha tak poxunkacoko.
Ero wa xa ehcoko.
20 Aropotarî komo potaw men wasî.
Aropotarî metatan komo poko knei knei knei kan̂e wa wasî oyewomtome.
Omtapotarî yencetaw awya so aropotarî komo tak ahrunkacoko oyewomtom ahyaka so.
Aropotaw so oyexitaw tak keseresmesî awakro so.
Oyakro marha meseresmexe amyamro hara.
Ero wa maxe aropotarî komo yahrunkache ohyaka.
21 On wara kiir̂axe so kicicitho yewetîn̂e pîn me awexitaw so,
oyakrono me keremanmekyaxe so oyapon pona,
kayaritomo me oyesenpotopo pona.
Ero wa xa marha wehxe Ow hara,
kicicitho yewetîn̂e pîn me oyexirî ke Apapa yakro keremai Noro yapon pona,
kayaritomo me Noro yesenpotopo pona.
Ero wa kiir̂axe so kicicitho yewetîn̂e pîn me awexitaw so,
kacho mewreko,
kekn̂e.
Ero wa kacho mewrepekn̂e owya Rawciseia pono komo yakan hara.
22 Ero wa kesî Kaan Yekatî Kaan xîkrî komo ya.
Ero ke men entacoko Noro yentan̂e me awexitaw so.