Taa,

ero yinhîrî tak on wara wîxakn̂e hara,

metata ween̂akn̂e kah yawno.

Tahrunkaxi xakn̂e.

Ero yinhîrî wencekn̂e kah yawno komo mtapotarî.

Yihcirî me anarî wencekn̂e tîyorîre tîmtapotaxmu.

Tuu kan̂e wara ro mak kekn̂e.

On wara kekn̂e owya,

Oona tak amok ha kah yaka.

Ero wa naxe tooto komo amn̂e,

kacho wenpes awya,

kekn̂e owya.

2 Ero wa kacho yentache rma owya,

pum sara,

kah yaw tak wîxakn̂e ekatî me mak.

Iito oyexitaw tak kayaritomo yapon ween̂akn̂e.

Ero po eremaxapu marha ween̂akn̂e.

3 Xaspe warai me Noro ween̂akn̂e,

satonica warai me marha ween̂akn̂e.

Kukawa marha ween̂akn̂e aapo mamhoko.

Esmerawta wara tak weenakn̂e ero hara.

4 Noro yapon mamhoko xakn̂e kayaritomo yapon xa hara yaake tak,

24.

Ero po so xatken̂e tooto kom hara,

24.

Poritomo komo mîkyam xatken̂e.

Tumutwem ke tponoye xatken̂e.

Aroko yaw so marha xatken̂e,

ooru ciixapu yaw.

5 Pepe kacho marha ween̂akn̂e iito oco.

Kayaritomo yaponî rma pepe kekn̂e,

tarai marha kekn̂e emapona.

Yakeno komo mtapotarî marha wencekn̂e iitono.

On warai marha weenakn̂e,

7 weeyu xakn̂e kayaritomo yapon mîtwo,

potuhtoxapu mko.

Kaan Yekatî komo rma mîn xakn̂e weeyu mko.

7 naxe Kaan Yekatî komo.

Noro yipu komo rma mîn weeyu mko.

6 Kayaritomo yeepatai marha ween̂akn̂e n̂ikitho warai hara.

Patiri warai mîn xakn̂e n̂ikitho,

tpar̂ar̂amutwem okre.

Kayaritomo panaw tak ween̂akn̂e hara mîk hak warai komo,

4 mak.

On wara xatken̂e,

mer̂pora ro mak xakn̂e ewru komo kopi.

Yîratari xakn̂e ewru komo mer̂pono pîn.

Yîmkari marha xakn̂e ewru komo mer̂pono pîn hara.

7 Anarmerpa xatken̂e,

on warai me so,

anarî xakn̂e reaw wara,

anarî xakn̂e paaka wara,

anarî xakn̂e tooto yeepatake hara,

anarî xakn̂e yaimo wa hara,

kaikokoro tîtosom wa.

8 Tapoke marha xatken̂e n̂examro yaimo yaporî warai ke.

6 xakn̂e anarî yaporî.

6 marha xakn̂e anarî yaporî hara.

Ero wa xatken̂e ahnoro.

Mer̂pora marha xakn̂e ewru komo kopi,

yupun komo poko ha kî xakn̂e,

aporî makataw so meero.

Ero warai komo mîkyam xatken̂e kopi mîk hak warai komo.

On wara ketken̂e n̂examro,

Kir̂wanî ro Moso.

Kir̂wanî ro Moso.

Kir̂wanî ro Moso.

Kporin komo Moso ponaro kehtopo ro xa.

Kyopono ro komo xa Moso karitî ro.

Pahxanî rma Moso,

oroto rma cehsom marha.

Nasî amn̂e miya roro hara.

Noro yipu Moso okre,

kexe.

Ero wa kexe mîk hak warai komo.

Miya roro ero wa kexe yîtîtmamra ro mak.

Katpanaw kexe,

kosope meero kexe.

9 Ero wa kan̂e komo mîkyam mîn hak warai komo kayaritomo yapon pono ya.

Kir̂wanî ro xa Amoro,

kyopono ro,

kwakren̂e marha Amoro okre,

kexe yîwya emapona roro.

Waipînî ro mak Mîk kayaritomo yapon pono.

Noro yipu ya ero wa kexe.

10 Ero wa ketaw roro poritomo komo tak nutupenwaxe kayaritomo yapon yamrinaka.

Cesewnaposo ro nutupenwaxe 24 kom ha.

Nahwowaxe marha tak Noro poko.

On wara kexe yîwya,

Amna Porinî ro Amoro,

waipînî ro mak,

kexe.

Tarokorî komo marha n̂ir̂mikyaxe Noro yamrinaka.

11 On wara kexe yîwya,

Amna porin xa Amoro.

Miyan yakîhton̂enho rma Amoro.

Awanme ro mak makîhcekn̂e.

Ero ke on wara kapore nas awya,

Kir̂wan xa Amoro ham okre,

amna yopono ro mak,

karitî ro,

kapore xa nas awya,

kexe.

Ero wa kexe 24 poritomo komo kayaritomo yapon pono ya.