Ero yinhîrî tak on warai marha ween̂akn̂e kah yawno kom hara,

kayaritomo yapon pono yemyaw xakn̂e karita.

Kaari ke nahsîyakn̂e.

Yîratai mewrexapu mîn xakn̂e karita,

yîmkai mewrexapu marha.

Tamomiso tko xakn̂e enîrî yarohra thakwa okwe.

Tahkoromaxi marha xakn̂e okwe ahrunkarî yarohra,

7 xakn̂e ahkoromacho mko.

Ero wa xakn̂e karita.

2 Iito marha ween̂akn̂e ancu,

karitî ro.

On wara kekn̂e,

Onoke xa nai on karita yahrunkan̂e?

Kir̂wanî ro mîkro ha,

kacho mak ahrunkan̂e me nasî,

ahkoromacho yown̂e me marha,

kekn̂e.

3 Exihra rma tko xakn̂e okwe karita yahrunkan̂e.

Kah yawno exihra xakn̂e,

roowo pono exihra marha xakn̂e,

yuhnawno exihra marha xakn̂e.

Ahtono ma re kirwanî ro mîkro ha,

kacho,

karita yahrunkan̂e,

yaw tak entome?

ketken̂e mak iitono komo.

Exihra ro mak xakn̂e okwe.

4 Ero ke kîwracekn̂e ro mak okwe.

Kir̂wan mîkro ha,

kacho exihra ro mak xakn̂e okwe karita yahrunkan̂e,

mewrexapu yenîn̂e me cehsom ha.

Ero ke thakwa kîwracekn̂e.

5 Ero yimaw rma tko on wara kekn̂e hara owya anarî,

poritomo,

Oyakno,

kekn̂e owya,

yîwratara esko.

Enko xe kapu,

Mîkro rma reaw.

Xuta pen yepamtho Mîkro,

Tapi pen yepamtho xa.

Kicicitho yar̂man̂enho Mîkro.

Ero ke Noro xa nasî karita yahrunkan̂e me,

ahkoromachonhîrî yown̂e me ha,

kekn̂e tak owya.

Ero wa kekn̂e poritomo owya.

6 Ero yinhîrî Oper̂a Xîkrî tak ween̂akn̂e iito.

Kayaritomo yapon yeretaw rma n̂ececekn̂e on̂enîtho komo chew.

Mîk hak warai komo chew rma xakn̂e,

poritomo komo chew marha.

Iito tak ween̂akn̂e.

Waihkaxapunhîrî wara rma ween̂akn̂e Noro Oper̂a Xîkrî.

Tmeretke xakn̂e,

7 xakn̂e meretîrî.

7 marha xakn̂e ewru hara.

Naxe 7 Kaan yekatî komo,

roowo poko hakî Kaan n̂en̂eperî komo.

Noro yipu komo rma mîn xakn̂e ewru mko.

7 Taa,

Noro tak cekn̂e,

kayaritomo yapon pono yaka.

Noro yemyai tak nahsîyakn̂e karita,

kaari ke ahsîxapunhîrî.

8 Ero wa ahsîche rma Oper̂a Xîkrî ya Noro mamakan me rma tak nutupenwatken̂e mîk hak warai komo,

4 kom ha.

Poritomo komo marha nutupenwatken̂e 24 kom ha.

On wara xatken̂e poritomo komo,

yîratîn komo xakn̂e tîyorkaxmu.

Tutum marha xakn̂e emyaw so,

ooru ciixapu.

Ero warai ke cemyarke so xatken̂e poritomo komo.

Tutum yaw xakn̂e kotoporem.

Kaan xîkrî komo mtapotacho mîn xakn̂e kotoporem,

Kaan yakro yîmtapotacho kom ha.

Ero yipu xakn̂e poritomo komo yemyaw so.

9 Ero yimaw tak n̂ewanometken̂e n̂examro.

On wara ketken̂e waano me,

Kir̂wanî ro Amoro ham okre,

Karita yahsîn̂e me cehsom.

Ahkoromacho yown̂e me mai ham.

Metwaikapekn̂e tooto komo ya okwe.

Akamxukuthîrî pona rma tak amna maponukyakn̂e Kaan xîkrî me.

Mîk hak tribun komo poyinonho amna mahsîyakn̂e.

Mîk hak yaro tîmtapotaxmu marha amna mahsîyakn̂e.

Mîk hak yana amna mahsîyakn̂e,

mîk hak maywen marha amna mahsîyakn̂e.

10 Kayaritomo me so amna miire okre anahsîthîrî ha.

Kaan ya tîmsom pokono me marha amna miire.

Ero wa amna miire.

Roowo pono komo tak miire amna maywen me,

ketken̂e.

Ero wa ketken̂e Oper̂a Xîkrî ya waano me.

11 Ero yinhîrî tak ancu komo makîrha ween̂akn̂e hara.

Kayaritomo yapon mamhoko xatken̂e cececetoso.

Mer̂pono pînî ro mak mîkyam xatken̂e ancu kom ha.

Yukuknomarî yopo ro mak xatken̂e comota yarî wara mak okyo.

Mîk hak warai komo marha xatken̂e iito.

Poritomo komo marha xatken̂e iito.

Ero warai komo ween̂akn̂e iito.

N̂examro tak nîmtapowatken̂e on̂entarî me.

Kar̂pe ro mak ketken̂e.

12 On wara ketken̂e,

Kir̂wan xa Moso Oper̂a Xîkrî okre waihkaxapunhîrî ha.

Ero ke yaaro rma Noro n̂iir̂asî Kaan kayaritomo me.

N̂emyarîcesî marha cepethîkem ke,

takîhso marha n̂iir̂asî,

kn̂ewetîrî me marha.

Cekaiporesom me marha Noro n̂iir̂asî,

kir̂wanî ro me marha,

Kaanî nwakrerî me marha.

Yaaro rma ero warai me Kaan n̂iir̂asî Oper̂a Xîkrî,

ketken̂e n̂examro mer̂pono pîn komo.

13 Ero yinhîrî miyan komo mtapotarî rma tak wencekn̂e ahnoro.

Kah yawno komo mtapotarî,

roowo pono komo mtapotarî,

yuhnawno komo mtapotarî,

tuuna imo kwawno komo mtapotarî,

weyuntawno komo mtapotarî meero marha,

noro yipu komo mtapotarî wencekn̂e.

On wara ketken̂e,

On wara kes amna kayaritomo yapon pono ya,

Oper̂a Xîkrî ya marha,

Kir̂wanî ro xa amyamro,

takîhsom amyamro,

cekaiporesom me marha,

ceweiposom me marha,

cewetîsom me marha,

ero wa xa maxe okre,

kes amna apoko so.

Miya roro ero wa kes amna awya so yîtîhkan me ro mak,

ketken̂e.

14 Ero yipu yentache,

Amen,

ketken̂e tak mîk hak warai komo,

4 kom ha.

Poritomo komo tak nutupenwatken̂e,

24 komo.

Cesewnaposo ro nutupenwatken̂e.

Ero wa tak nahwowatken̂e waipînî ro poko.

Miya roro nasî waipînî ro me yîtîhkan me,

noro yipu poko nahwowatken̂e ha.

Ero wa so xatken̂e owero ro.