Ero yinhîrî tak on wara xakn̂e oper̂a xîkrî owero ro,

karita yahkoromachonho tak mohkekn̂e.

Yihcirî makî ka mohkekn̂e 7 poyinonho rma.

Mohkache tak nîmtapowakn̂e mîk hak warai komo poyino,

Amok ha enso,

kekn̂e.

Kar̂pe ro mak kekn̂e tarai wara ro mak oko.

2 Ero yipu yentache owya kawaru tak ween̂akn̂e tumutwem.

Yîmkaw cekn̂e krapa ke cemyarkem.

Kayaritomo yarokorî nîmyatken̂e iitono komo yîwya.

Miya so tak cekn̂e noro kawaru mkaw rma.

Waapa me cekn̂e,

tooto pen yar̂maxi.

Noro yipu ween̂akn̂e.

3 Ero yinhîrî 2-înhîrî tak mohkekn̂e hara karita yahkoromachonho.

Mohkache anarî makîrha tak nîmtapowakn̂e mîk hak warai me cehsom hara,

2-inhiri tak hara.

Amok ha enso,

kekn̂e.

4 Ero wa kache anarî tak mokyakn̂e hara kawaru cucurem xa tak oco.

Noro mkawno ya tak kacipara imo nîmyatken̂e iitono komo.

On wara ketken̂e yîwya,

Etoko tak etîxatî pîn me roowo pono komo ciiso.

Etpona cerahsom me ro mak n̂examro cirko,

ketken̂e yîwya.

Ero ke ero wa ciino riso tak cekn̂e noro hara.

5 Ero yinhîrî anarî tak mohkekn̂e hara karita yahkoromachonho,

3-nhîrî ha.

Mohkache anarî tak nîmtapowakn̂e hara mîk hak warai me cehsom 3-înhîrî tak.

Amoko ha enso,

kekn̂e noro hara.

Ero wa kache tak ween̂akn̂e anarî hara kawaru,

cicwiyem tak.

Noro mkawno yemyaw xakn̂e ahce na yawsîn yukuknomacho.

6 Ero yimaw iitono mtapotarî wencekn̂e,

mîk hak warai komo chewno mîk nîmtapowakn̂e.

On wara kekn̂e,

Cepethîke xa tak nas okwe puruma.

1 tenar̂u nasî 1 ritru wicakno yepetho okwe.

Cepethîke marha nasî sepata hara,

1 tenar̂u nasî 2 ritru wicakno yepetho okwe.

N̂expe rma asetona katî,

uupa yukun marha,

kekn̂e.

7 Ero yinhîrî anarî tak mohkekn̂e hara Oper̂a Xîkrî,

karita yahkoromachonho,

4-nhîrî tak hara.

Mohkache tak anarî nîmtapowakn̂e hara mîk hak warai me cehsom,

3-înhîrî tak.

Amok ha enso,

kekn̂e noro hara.

8 Ero wa kache tak iito ween̂akn̂e anarî hara kawaru xamahno tak.

Kwaihkan̂e,

tî mîk xakn̂e noro yipu mkawno yosotî.

Noro wenari ro cekn̂e anarî hara.

Wehto imo tî mîk xakn̂e noro yosot hara.

On wara kekn̂e Kaan yîwya so hara,

Roowo pono komo waihkan̂e me tak ehcoko.

Waapa ke waihkacoko,

rooma ke marha,

eper̂a ke marha.

Tmayan̂em komo ya marha tak waihkapocoko hara,

comota pono ya.

Ero warai ke tooto waihkacoko mer̂pono pîn pen.

1 kwahtu wicakî yakenon waihkacoko,

kekn̂e.

Ero wa tak kekn̂e Kaan yîwya so asak hakno komo ya,

kawaru mkawno komo ya ha.

9 Ero yinhîrî anarî tak mohkekn̂e hara Oper̂a Xîkrî,

karita yahkoromachonho xa hara,

5-nhîrî.

Mohkache tak aapo tak ween̂akn̂e iito,

Kaan ya tîmsom yakn̂itopo.

Ero makataw tak ween̂akn̂e tooto komo yekatî.

Kaanî mtapotarî yekatîmrî poyero waihkaxapunhîrî mîkyam xatken̂e,

Xesus ponarono ow ha,

karî poyero rma okwe.

10 On wara tak ketken̂e n̂examro ero yimaw,

Apa,

kir̂wanî ro mak Amoro.

Yaarono marha Amoro.

Ero ke ahcemaw xa amna mepanîya ha?

Ahcemaw xa roowo pono komo mar̂me amna waihkan̂enho kom ha?

ketken̂e Kaan ya.

Kar̂pe ro mak ketken̂e.

11 Ero yimaw tak n̂examro pononmekn̂e Kaan.

Kawno nîmyakn̂e yîwya so poono,

tumutwem.

On wara kekn̂e yîwya so,

Epokarecoko rma ha ka.

Omaywenînho komo rma ka naxe iito rma roowo po ha ka,

awakrononhîrî komo rma.

Awaknonhîrî komo marha naxe iito rma ka.

Twaihkaxmu xa marha mîkyam awara so xa marha.

Ero ke ahri ka waihtîkacowpe n̂examro hara.

Ero yimaw tak kepanîyaxe so tak,

kekn̂e Kaan yîwya so.

Ero wa kekn̂e.

12 Ero yinhîrî anarî tak mohkekn̂e hara Oper̂a Xîkrî,

karita yahkoromachonho,

6-nhîrî ha.

Mohkache tak roowo pen n̂esewsîyakn̂e hara.

N̂esewsîyakn̂e ro mak kopi.

Kaamo marha tak n̂ewxîrîyakn̂e cicwiye cehso ro.

Kumixitho wa mak tak n̂esenpekn̂e,

kabra pocitho kahxapu wa.

Nuun̂i marha tak nucwakn̂e hara.

Kamxuku wa mak xakn̂e cucure.

13 Xir̂ko marha n̂epîrkekn̂e kah yai,

roowo pona roro n̂epîrkekn̂e,

mer̂pono pîn kopi.

Piiku yeperîrî n̂emarakesî maxkunthîrî kar̂pe ocowonataw,

ero wa xir̂ko pen n̂epîrkekn̂e okyo roowo pona.

14 Kaapu pen marha n̂etamomiyakn̂e karita wa.

Miya tak cekn̂e anana kopi.

Îh pen marha n̂esewyetakekn̂e anana.

Ciwya mko marha n̂esewyetakekn̂e anana hara.

Ahnoro mak cekn̂e okwe.

Cekenhîrî to exihra tak xakn̂e îh pen,

ciwya pen marha.

Ero wa xakn̂e kopi.

15 Ero yimaw tak n̂eraswatken̂e ro mak tooto pen komo,

on warai komo,

roowo pono kayaritomon komo,

enîno rin̂e komo marha,

sowtatu yantoman̂e komo marha,

yukurumîkno komo marha,

tooto yanton komo marha,

tanme ro cetapickaxmu komo marha,

n̂eraswatken̂e ro mak noro yipu komo ahnoro.

Ero ke ewtarî yaka so n̂eseyamyatken̂e.

Îh pona so marha cetken̂e toh yaka eseyamso.

16 Îîpî tak nan̂ikyatken̂e n̂examro.

Toopu marha nan̂ikyatken̂e.

Amok ha îîpî,

amok ha toopu,

ketken̂e.

Amna po kr̂a tak epîrkak ha.

Ero wa amna eyamko.

Amna men n̂een̂asî kayaritomo yapon pono kopi.

Noro tak nîrwonasî amna poko,

Oper̂a Xîkrî marha nîrwonasî amna poko kopi.

17 Noro yîrwonîmtopo xa tak n̂enmapu ham kopi.

Onoke thakwa re yîrwonîmtopo nînîmya?

ketken̂e.

Ero wa ketken̂e tooto komo ero yimaw.