Kaan Yosotî Mewresî Ancu Kaan Maywen Komo Pewo
7
Ero yinhîrî tak 4 ancu komo ween̂akn̂e hara.
Cececetoso xatken̂e roowo po.
Anarî n̂ecececekn̂e resce n̂ixa.
Anarî n̂ecececekn̂e oesce n̂ixa hara.
Anarî n̂ecececekn̂e hara suu n̂ixa hara.
Anarî n̂ecececekn̂e hara nohce n̂ixa hara.
Ero wa so n̂ecececetken̂e ancu komo.
Ocowo yîtîtmamnon̂e komo mîkyam xatken̂e.
Mehxa mehxa warai nîtîtmamnoyatken̂e ocowo.
Ero ke apepemra ro mak tak xakn̂e roowo pore,
tuuna imo ratari marha.
Weewe komo pona meero apepemra xakn̂e.
2 Emetanmekno rin̂e me tî Kaan n̂iir̂akn̂e n̂examro 4 ancu komo.
Roowo pono komo yemetanmekn̂e me tak ehcoko,
tuuna imo kwawno komo yemetanmekn̂e me marha ehcoko,
kekn̂e tî yîwya so.
Ero yinhîrî anarî tak ween̂e xa hara ancu,
resce n̂ixa nawomyakn̂e.
Noro yemyaw xakn̂e Kaan yosotî mewretopo,
waipînî ro yosotî mewretopo ha.
3 On wara tak kekn̂e noro hara 4 komo ya,
Ahri men kapu,
roowo ka emetanmekîra ehcoko.
Tuuna imo kwawno komo marha ka emetanmekîra ehcoko,
weewe komo yakn̂ipîra marha ka ehcoko.
Kaan yosotî ka amna mewresî Noro maywen komo pewo.
Ero wa mewreche mak amna ya emetanmekno tak miir̂axe,
kekn̂e tak.
Kar̂pe kekn̂e ero wara.
4 Ero yimaw tak pewo mewrexapu komo kuknomacho wencekn̂e,
iyakenon komo kuknomacho ha.
Mer̂pono pîn mîkyam xatken̂e mewrexapu komo,
144.000 tî xatken̂e.
Ixaw Yana tribun komo mak mewretken̂e.
5-8 On warai komo pewo so Kaan yosotî mewretken̂e,
Xuta tribun poyino komo 12.000,
Huben tribun poyino komo 12.000,
Kace tribun poyino komo 12.000,
Ase tribun poyino komo 12.000,
Nahtari tribun poyino komo 12.000,
Manases tribun poyino komo 12.000,
Simeaw tribun poyino komo 12.000,
Repi tribun poyino komo 12.000,
Isaka tribun poyino komo 12.000,
Seburon tribun poyino komo 12.000,
Xose tribun poyino komo 12.000,
Bencamin tribun poyino komo 12.000.
Ero wicakno komo Kaan yosotî mewretken̂e pewo so.
Kah Yaka Toxapu Komo Pokono, Emetanmexapunhîrî Komo Pokono Ha
9 Ero yinhîrî anarî komo tak ween̂akn̂e hara iito tooto komo.
Mer̂pono pîn komo ro mak mîkyam xatken̂e yukuknomarî yopono ro mak.
Mîk hak rowon pono komo mîkyam xatken̂e.
Mîk hak tribun komo,
mîk hak yana komo,
mîn hak yaro tîmtapotaxmu komo marha mîkyam xatken̂e.
Ero warai komo mîkyam xatken̂e iito.
Iito re xatken̂e,
kayaritomo yapon yeepatai n̂ecececetken̂e,
Oper̂a Xîkrî yeepatai marha.
Tumutwem ke tponoye so xatken̂e,
kuum yarî warai ke cemyarke so marha.
Ero wa so xatken̂e.
10 N̂examro tak nîmtapowatken̂e.
On wara ketken̂e,
Kakir̂waman̂e ro Mîk Kaan,
ponaro kehtopo komo.
Kayaritomo yapon po ceremaxmu Mîkî Noro nasî kakir̂waman̂e ro me.
Oper̂a Xîkrî yakro rma kakir̂waman̂e me nasî,
ketken̂e.
Kar̂pe ro mak ketken̂e.
11 Ancu komo marha xatken̂e iito ahnoro ro mak.
Cececetoso marha xatken̂e n̂examro kayaritomo yaponî mkai,
eepatai marha.
Tmamriso ro mak xatken̂e cececetoso.
Iito marha xatken̂e poritomo kom hara,
mîk hak warai komo marha,
4 kom ha.
N̂examro mkai mak xatken̂e ancu komo.
Ero warai komo ween̂akn̂e.
Ahnoro tak nutupenwatken̂e kayaritomo yamrinaka,
n̂esewnapetken̂e mak.
Ero wa so tak Kaan poko nahwowatken̂e.
12 On wara ketken̂e,
Amen!
On wara kes amna Kaan poko,
ponaro amna yehtopo poko,
Yiixe xa kehtopo komo Mîk Noro.
Kir̂wanî ro xa Mîk okre,
takîhso cesehtînosom marha.
Kir̂wanî ro me cesekaiporesom Mîkî,
kes amna.
Karitî xa Mîk ha,
kesî marha amna Noro poko.
Miya roro mak ero wa kes amna yîtîhkan me ro mak.
Amen,
ketken̂e Kaan poko.
13 Ero yinhîrî anarî tak mokyakn̂e ohyaka poritomo,
24 komo poyino.
On wara kekn̂e owya,
Ahce warai komo moxam awya,
tumutwem ke tponoyem kom ha?
Ahn̂i xa mohxapu komo moxam awya?
kekn̂e owya.
14 Cesemetanmesomînhîrî komo moxam,
kekn̂e owya.
Emetanmekno n̂iitîkekn̂e ro mak Kaan.
Ero ke ahnoro roowo pono komo n̂esemetanmekyatken̂e.
Ero yimaw cesemetanmesomînhîrî komo moxam.
Tponon komo tak koroketken̂e Oper̂a Xîkrî kamxukru ke.
Tumutwe cehso ro koroketken̂e okre.
15 Ero ke Kaan yapon mîtwono me tak naxe miya roro,
Noro yanton me roro naxe yîmîn yaw.
Noro ya n̂etantomapexe katpanaw,
kosope marha.
Noro tak nasî yîchewno ro me,
aapo pono ha.
16 Ero ke rooma poko exihra ro mak tak naxe n̂examro,
wokumra exihra marha naxe.
Kaamo yipikara marha tak nasî.
Ero wa xa marha nasî wehto hara n̂examro yipikara.
17 Enîn̂e me tak nasî Oper̂a Xîkrî.
Tok n̂eenasî opera yosom,
ero wara rma n̂examro yenîn̂e me nasî kayaritomo yapon yeretawno.
Noro xa nasî enîn̂e me.
Tuuna pîtho kwaka tak naar̂asî wokpachome,
waipîn me kiin̂e kwaka xa okre.
Ewyokuthîrî komo marha tak Kaan n̂icketîkesî.
Ero wa tak n̂examro n̂iir̂asî,
kekn̂e owya.
Ero wa kekn̂e poritomo,
24 poyino.