Xuaw Karitan Yihcirî
1 Xuaw
Kaanî Mtapotarî Me Cehsom Pokono
1
On okaritan an̂enîrî komo.
On wara wîîkes awya so,
Kaanî mtapotarî me cehsom pokono tan wekatîmyas awya so.
Pahxa rma xakn̂e Noro akîhtono ritoponho yimaw rma.
Noro yipu mtapotarî amna n̂entai.
Amna n̂enîtho marha Mîk Noro,
cewru ke rma amna n̂een̂e.
Tuhn̂emu rma Mîk,
Noro yamorî amna nahsîy.
Waipîn me kiin̂e Mîk Kaanî mtapotarî me cehsom.
Noro yipu pokono tan amna n̂ekatîmyas awya so.
2 Noro yipu tak n̂esenpoi roowo pono komo ya,
waipîn me kiin̂e komo Mîk ha.
Amna rma tak n̂een̂e,
ero ke tak Noro pokono amna n̂ekatîmyas awya so.
Kîîm komo yawnonho Mîk xakn̂e,
amna ya tak n̂enpoi.
Ero ke tak amna n̂ekatîmyas awya so.
3 Tîn̂enîthîrî rma amna n̂ekatîmyas awya so,
tîn̂entathîrî marha.
Ero yipu n̂ekatîmyas amna awya so Noro re poko tahwore awehtome so amna yakro.
Tahwore nas amna Kîîm komo poko.
Yumumuru Xesus Kristu poko marha.
Ero ke ero yipu tan amna n̂ekatîmyasî ero wa awehtome so amna yakro rma.
4 An̂enîrî komo rma tan amna mewresî tahwore roro awehtîkachome so miya xe xa tak.
Xesus Yakro Tahwore Kehtopo Komo Pokono
5 On wara kekn̂e Xesus Kristu amna ya,
Katpan ken̂arî ro Mîk Kaan.
Awarpan exihra ro mak nasî yîhyaw,
kekn̂e amna ya.
Ero wa kacho tak mahrimesî amna an̂entarî me so hara.
6 On wara tko na tatu anarimaw so,
awarpanaw cetarisom wara na tatu kica.
Noro yipu rma on wara na tîtketu,
Tahwore wasî Kaan poko,
tîtketu.
Ero wa kexitaw so tohnaw ro mak tîtkexe Kaan yakro tahwore kehtopo komo poko.
Tîcemaronwaxe mak kica.
7 Katpan pono ro Mîk Kaan.
Ero ke katpan po roro ketar̂ataw so kîwyam hara kakno komo poko tahwore taxe okre.
Tumumuru kamxukutho ke tak kîkorokexe so Kaan,
Xesus Kristu kamxukutho ke ha.
Ero yipu ke kîkoroketîkexe so okre,
exihra tak ehtome kicicme kehtoponhîrî komo.
8 On wara na tîtketu anarimaw,
Kicicitho ken̂arî pînî ro mak ow,
tîtketu.
Ero wa ketaw kîwya so cesewkukmexe kanme ro so rma kica.
Yaaro kan̂e pîn me ro mak taxe okwe.
9 Kicicme kehtoponhîrî komo yekatîmîche tko kîwya so,
ero yipu tak nîhcamnoyasî Kaan.
Kemîknon̂e pîn me ro mak exirî ke nîhcamnoyasî,
yaaro ciino rin̂e me exirî ke marha.
Kîkoroketîkexe so marha exihra tak ehtome kicictho me kehtoponhiri.
Ero wa kiir̂axe so Kaan.
10 Yikicicintanî ro makî ow ha,
kan̂e me kexitaw so,
Cemarontaxmu Mîk kica,
kan̂e wa mak taxe Kaan poko rma okwe.
Yîmtapotarî ponarono pîn me marha taxe okwe ero wa kan̂e me kexitaw so.
Ero wa taxe okwe.