On okaritan oyakno komo,

an̂enîrî kom hara.

Simaw Petru ow ha,

Xesus Kristu nantomatho ha.

Kaan pona enîn̂e komo amyamro amna wa xa marha.

Tpoxwe xa nasî Kaan pona entopo kîwya so.

Kaanî rma awir̂atken̂e so tpona enîn̂e me kir̂wan̂he xa cexirî ke.

Xesus Kristu marha ero warai me awir̂atken̂e so,

kakir̂waman̂e kom ha.

An̂enîrî komo tan mewresî.

2 On warai me maxe,

Kaan yîhtînon̂e me maxe okre,

Kporin komo Xesus Kristu yîhtînon̂e me marha.

Ero wa awexirî ke so awakronoma xe so wasî Kaan ya,

ahwokan me awexi xe so marha wasî.

3 Kariti ro Mîk Xesus Kristu,

Kaan Mîk ha.

Ero wa cexirî ke miyan ke rma kwakretken̂e so.

Waipîn me kiiratken̂e so,

cewetîn̂e me marha kiir̂atken̂e so.

Ero wa kirirî ke so on warai mko nîmyakn̂e kîwya so,

kicitho yopono me roro kehtopo,

takîhso roro kehtopo,

cerepore roro kehtopo,

tahwore roro kehtopo,

tponaro ro kehtopo komo,

kir̂wan poko roro kehtopo komo,

miya rma nasî ero warai mko yînîmîthîrî.

Tîhtînorî ke kîwya so ero yipu nîmyakn̂e.

Kan̂ikn̂enhîrî Mîk.

Kir̂wanî ro me cexirî ke kan̂ikyatken̂e so,

kakronoman̂e ro me cexiri ke marha.

4 Ero warai me cexirî ke marha tîmtapotarî mewrepekn̂e kn̂enîrî komo me.

On wara kacho mewrepekn̂e,

Kwakrexe so amn̂e kir̂wanî ro ke xa,

tpoxwem ke xa okre,

kacho mewrepekn̂e.

Mîn hak pokono mewrepekn̂e kn̂enîrî komo me.

Ero wa kacho mko ponaro awexitaw so Kaan wara xa tak mehtîkexe aropotaw so.

Akurunpexe so marha Noro roowo pono ro komo warahra tak awehtome so.

Kokem wa mak naxe kica noro yipu komo kicicitho poko cepohkarî ke so mak.

5 Ero wa exirî ke so on wara kacoko,

N̂examro wara oyexi xera ro mak wasî,

kacoko.

Cekaritosom wara ehcoko kir̂wan̂he awehtopo komo poko.

Kaan pona enîn̂e komo rma re amyamro.

Ero ke kir̂wan pokono me marha tak ehcoko hara.

Kir̂wan pokono me ehxapu tak mîn hak poko ehcamhokacoko hara.

6 Mîn hak poko ehcamhokaxapu me awexitaw so,

awanme ro so cehsom me mak exihra ehcoko hara,

awesehtînotopo komo yantoman̂e me marha.

Ero wa awexitaw so pokahnî me ro mak tak ehcoko hara.

Ero wa awexitaw so Kaan wara awehtopo komo ponarono me ehcoko hara.

7 Kaan wara awehtopo komo ponarono me awexitaw so tak cetwakresom me tak ehcoko hara awakno komo wakren̂e wara rma.

Ero wa ehxapu etîxatî me tak ehcoko hara.

Ero warai me tak ehtîkacoko miya xe xa.

8 Ero warai me xa awehtîketaw so cehn̂axmutho me exihra tak maxe,

epetantho me exihra marha maxe.

Ero wa maxe Kporin komo Xesus Kristu yîhtînorî ke awya so.

9 On wara tko naxe ero wara ehtîkara cehsom komo,

cewxîrîtîno wa mak naxe okwe,

ewuhnî warai me ro mak okwe.

Twen̂ekarî mak naxe okwe korokaxapu me cehtoponhîrî komo poko.

Kicicme oyehtoponho nîhcamnoi Xesus,

kahra tak naxe okwe.

10 Ero ke on wara kacho ponaro xa ehcoko oyakno komo,

Kaan nan̂ikîtho xa ow ha,

yînmen̂ekathîrî xa ha,

kacho ponaro tak ha.

Ero wa kacho ponaro xa awexitaw so epîrkan me ro mak tak maxe.

11 On wara marha tak maxe,

kah yaka awtoche so tak amn̂e tawake xa tak nasî Kporin komo Xesus Kristu apoko so.

Oyewton pona tak mîmoko okre okopuci,

eroromerono me tak mai ham omaywen me,

kesî tak awya so ero yimaw.

Kakir̂waman̂e komo Mîk ero wa kesî awya so.

12 Ero yipu wekatîmyasî roro awya so yîtwen̂ekarîntara awehtome so.

Wekatîmyasî xa hara awya so amn̂e emapona roro.

An̂entathîrî komo rma mîn.

Ero wa kacho ponarono rma amyamro.

Yaarono ma re mîn?

kahra ro mak maxe.

13 Yaaro ero yipu wekatîmyasî awya so ponaro xa awehtome so.

Mîîmo waraî mak opun,

roonatho wara makî.

Ero yipu yawno wara ka wasî.

Ero wa oyexitaw ka wekatîmyasî roro awya so ponaro xa awehtome so.

14 Pahnoke tak wa nasî omîntho yahsîpînkacho.

Ero wara rma kekn̂e owya Kporin komo Xesus Kristu.

15 Kir̂wan̂he awehtîkacho komo ponaro xa awexi xe so wasî miya roro owaipuche meero.

Ero ke emapona roro kpanatanmekyaxe so ero yipu poko.

Ero wa wasî.

16 Taa,

on wara marha wîîkes awya so,

pahxa Xesus yehtoponho n̂ekatîmyakn̂e amna awya so.

On wara kekn̂e amna awya so,

Karitî xa Mîk Kporin komo Xesus Kristu.

Amn̂e tak Noro mokyas hara roowo pona hara,

kekn̂e amna.

Ero wa kacho yakîhtora ro mak xakn̂e amna tohnaw,

tpoxwe entachome awya so.

Pîra ro mak.

Amna rma Noro n̂een̂akn̂e,

kayaritomo me cehsom xa.

17 Amna ya rma Noro n̂enpekn̂e Kîîm komo Kaan,

kyopono me xa n̂enpekn̂e,

cewroromutwem me marha.

Kaan weyuru chewno amna n̂encekn̂e kir̂wanî ro mtapotarî.

On wara kekn̂e Xesus poko,

Omumuru ro cik Moso okwe.

Tawake xa wasî Moso poko,

kekn̂e.

18 Amna rma xa ero wa kacho n̂encekn̂e kah yawno mtapotarî.

Îh po xakn̂e amna Xesus yakro Kaan yesenpotopo ro po.

Ero yimaw amna n̂encekn̂e.

Ero wa amna xakn̂e.

19 Kaanî mtapotarî marha nasî kîhyaw so tmewreso.

Ponaro xa kehtopo komo mîn,

îh po amna n̂enîtho yopono me.

Weeyu xe taxe kosope ketar̂ataw so ero wa xa marha yînmewrethîrî komo ponaro cexpore nasî.

Amn̂e n̂enmayasî xa tak,

kwakwaru marha n̂esenpesî aropotaw so.

Ero ke miya roro yînmewrethîrî ponaro cexpore nasî,

ero yimawno pona roro.

20 On wara xa yîhtînocoko yihcirî me,

tanme ro so mak Kaan Karitan mewrera ro mak xatken̂e mewren̂e komo.

21 Tooto yanme mak mewrera xatken̂e kweronoman̂enhîrî pen komo.

Tooto rma re mîkyam xatken̂e,

Kaan ponarono komo mak ha tko,

kir̂wanî ro kom ha.

Kir̂wanî ro Yekatî mak mewrepekn̂e yîwya so.

Ero wa Kaan Karitan mewretken̂e pahxan pen komo.