On poko wîîkes hara awya so,

pahxa xatken̂e tohnawno poko weronomano rin̂e komo kica.

Kporin pen komo chew rma xatken̂e okwe.

Ero wa xa marha naxe amn̂e achew so hara,

tohnawno poko apanatanmekn̂e komo naxe hara kica.

On wara naxe noro yipu komo,

kir̂wan pokono wara rma re apanatanmekyaxe so awîrîmacho komo poko ha tko kica.

Kporin komo rma nanwekyaxe kopi cepeman̂enhîrî komo rma.

Ero wara cexirî ke so twaihkacho komo yan̂ikn̂e wara rma naxe kopi.

Yohno rma Kaan waihkesî noro yipu pen komo.

Ero wa naxe okwe.

2 Mer̂pora rma tko naxe yîmtapotarî yewetîn̂e komo.

Cetwîrîmacho poko mak naxe okwe tpanatanmekn̂e komo poyero.

Ero wa exirî ke so yaarono tak nîwîrîyakexe tooto komo okwe Kaanî mtapotarî.

Ero wa ma tai ke kica Kaanî mtapotarî yewehcataw kîwya so,

kexe okwe noro yipu komo yenîche.

3 On wara marha naxe n̂examro amn̂e anarmen poko apanatanmekn̂e komo,

puranta xe mak naxe kica.

Ero ke takîhsom wa xa apanatanmekyaxe tohnawno poko mak kica.

Ero wa exirî komo poyero tîhcamnosom me naxe okwe.

Pahxa rma n̂examro nîhtînoyakn̂e Kaan tîhcamnosom me okwe.

Tîwînsom wara exihra ro mak nasî waihkacho komo,

waihkesî rma wa ha Kaan okwe.

Ero wa nasî Kaan n̂examro poko.

4 On wara tî xatken̂e ancu komo,

kicicme tî xatken̂e,

anarî komo mak.

Noro yipu komo pînîn yawra so ro makî tî xakn̂e Kaan okwe.

Ewtarî imo yaka tî nar̂mekn̂e oco awarpanî cheka ro mak.

Iito rma thakwa naxe cimiso Kaan n̂en̂ekarî me.

5 Pahxa roowo pononho pen komo pînîn yawra marha tî xakn̂e Kaan.

Noe pen komo makî tî nukurunpekn̂e,

8 makî tî.

Kir̂wanî ro me cehcerî,

kan̂enho tî mîk xakn̂e Noe pen tpoyino komo n̂entarî me.

Kaan ponarora rma tî xatken̂e n̂examro kica.

Ero ke ahnoro roowo pono pen komo takî tî n̂enoritîketken̂e yukmarî imo ke okwe.

Noe pen komo reha nukukrunpekn̂e.

Ero wa xakn̂e Kaan.

6 Sotoma pono pen komo reha tî nakn̂iyakn̂e wemronho me cehso ro okwe.

Komoha pono pen komo marha ero wa n̂iir̂akn̂e.

Ero wa n̂exaro pen nîhcamnoyakn̂e hara Kaan tponarono pîn komo weronomachome ha.

7 Roo penî tko tî nukurunpekn̂e Kaan.

Kir̂wan tî mîk xakn̂e noro reha.

On wara tî xakn̂e noro pen,

nahwokekn̂e ro makî tî iitono komo poko,

kicicitho me ro mak exirî ke so okwe.

8 Kir̂wan̂he rma re xakn̂e Roo pen,

noro yipu komo chewno rma.

Kicicme tîmîtwono komo yehtopo tî n̂een̂akn̂e enmar̂atîxera.

Kicicme yîmtapotarî komo marha tî n̂encekn̂e roro.

Ero ke tî nahwokekn̂e n̂examro poko.

Ero wa tî xakn̂e Roo pen.

Ero ke noro penî reha nukurunpekn̂e Kaan.

Ero wa Roo pen yukurunpen̂e me xakn̂e,

Noe pen kurunpen̂e me marha.

9 Noro yipu Mîkî Kaan,

ehn̂anî ro mak Mîk tponarono komo yukurunperî poko.

Kicicitho komo chew exitaw so rma nukurunpesî ehn̂ara ro mak.

Ehn̂ara marha nasî Kaan kicicitho komo yemetanmetopo poko hara.

Noro yipu komo pen nahruyasî cemetanmesom me.

En̂ekano ritopo po tak n̂examro n̂en̂ekes amn̂e.

Ero wa nasî Kaan.

10 On wara naxe anarî komo kicicitho kom ha,

tupun komo yewetîn̂e me naxe kica,

kicicitho poko cepohkaxmu me ha.

Tantoman̂e komo yîwîrîyakan̂e me marha naxe kica,

camra ro mak tîmtapotaxmu me marha.

Oyanme ro mak wehsî,

kan̂e me marha naxe.

Yukurumîkno komo yîwîrîyakan̂e me marha naxe erasîra rma kopi.

Ero ke Kaan n̂en̂ekarî me xa tak naxe noro yipu komo,

anarî komo yopono me.

11 Ero warahra reha naxe ancu komo reha.

Karitî rma re mîkyam tooto komo yopo.

Twerî rma tko naxe yukurumîkno komo poko.

Kicicme yîmtapotara ro mak naxe noro yipu komo poko Kporin komo n̂entarî me.

Ero wa naxe ancu komo reha.

12 Kicicme ro mak nîmtapowaxe tupun yewetîn̂e komo reha,

camkî cehtopo komo poko rma nîmtapowaxe kica.

Twaihkaxmu me mak naxe noro yipu komo,

wooto komo wara rma.

Akpîn me mak nasî wooto komo,

noro pîntho me mak.

Twosom me thakwa mak n̂ewruyasî,

twaihkaxmu me mak okwe.

Ero wa xa marha naxe tupun yewetîn̂e kom hara.

Wooto wa xa marha naxe cehcamnosom me hara okwe.

N̂ehcamnoyaxe ro mak okwe.

13 Kicicme cehtoponhîrî komo yepetho thakwa nahsîyaxe amn̂e.

On wara mak naxe n̂examro,

wara ro mak kan̂e me naxe katpanaw rma kica.

Tpoxwe nasî yîwya so wara ro mak kacho komo yîwya so.

Erek wara naxe apoko so,

wayam kamxukru wara marha kica.

Kir̂wan̂he nas okre on wara kehtopo,

kexe.

Noro yipu komo rma mokyaxe awakro so eseresmax hara kica.

N̂ewakpamnoyaxe mak cesewkukmacho komo poko rma kica.

14 Wooxam yentîkan̂e mak mîkyam kica.

N̂eexi tak ha kicicitho poko oyehtopo,

kan̂e pîn thakwa mîkyam kica.

Apehceme cepohkaxmu komo pohkan̂e marha mîkyam kicicitho poko.

Puranta yepamnotopo poko ehcamhokaxapu me marha naxe tîropotaw so kica.

Kaan nîwîrîmarî me cehsom komo mak mîkyam okwe.

Noro yipu komo mîkyam okwe.

15 On wara marha xatken̂e kica noro yipu komo,

Kaanî mtapotarî ka n̂ewehcatken̂e kir̂wan̂he kehtopo pokono.

N̂etowyatken̂e takî tko anarmen pona okwe.

Baraw Beor pen wara tak xatken̂e kica.

On wara tî xakn̂e noro pen,

puranta xe ro makî tî xakn̂e kica.

Kicicme cehtoponhîrî yepetho xe rma tî xakn̂e kica.

16 Noro pen takî tî n̂eiyakn̂e iyoku rma buhu.

Tosomu rma tî n̂eiyakn̂e kicicme exirî poyero.

Yîmtapotanî ro cma re mîk buhu.

Nîmtapowakn̂e tko tî tooto wa kopi.

Weronomano rin̂e rma mîk xakn̂e Baraw.

Buhu rma tko noro n̂eeyakn̂e anarme ro mak exirî ke.

Ero wara tî xakn̂e Baraw pen.

17 Kicicme ro mak naxe noro pen warai kom okwe.

Nakwatho wara mak naxe okwe,

apaitîkaxapu wara.

Kaapu smun warai marha mîkyam,

ocowo imo narîrî warai mak okwe.

Ero warai mîkyam okwe.

Ero ke awarpan chewno me thakwa naxe amn̂e okwe.

Eken komo nîmcesî Kaan awarpanawno ro mak okwe.

Iito thakwa wa naxe amn̂e eroromero.

18 On wara kexe n̂examro kicicitho poko cexitaw so,

Kir̂wan tan okre.

Yukukmakî xe ka,

kexe tohnawno poko ro mak kica.

Ero wa pohkano n̂iir̂axe kica yiixe kupun yehtopo poko.

Kicicitho komo yakrononho komo tak natu cetowso yîhyai so okre.

Noro yipu komo pohkexe xa hara okwe kicicitho pokono komo.

19 On wara marha kexe tooto komo ya,

Onî yipu poko awexitaw so awanme rono me xa tak maxe okre,

anto mera ro mak tak maxe,

kexe.

Ero wa kan̂e komo rma tko kicicitho yanton me thakwa naxe okwe.

On wara naxe cetar̂maxmu komo,

tar̂man̂enhîrî komo yanton me naxe.

Ero ke ero wara rma naxe ero wa kan̂e komo.

Kicicme cehtopo komo yanton me thakwa naxe okwe.

20 Ero ke on wara naxe ero wa etowxapu komo,

Kporin komo Xesus Kristu rma re ka nîhtînoyatken̂e,

kakir̂waman̂e kom ha.

Noro yîhtînorî ke tak kicicitho yanton mera ka xatken̂e roowo pono kica.

Ero yipunhîrî rma tko etamxixapu wa tak naxe hara okwe kicicitho poko xa hara.

Kicicme ehtoponhîrî komo tak nasî ar̂man̂e komo me hara okwe.

Ero ke kicicme xa tak n̂ehtîkexe.

Kicicme rma re xatken̂e pahxa Kporin komo Xesus Kristu yîhtînopîra ka cexitaw so.

Kicicme ro mak tak n̂ehtîkexe cetowrî ke so tak hara.

21 Wara n̂he re n̂ehcerî kir̂wanî ro me kehtopo yentara ro mak cexitaw so ketaw ha re.

Xesus pona encoko awakir̂wamachome so,

kacho ka n̂encetken̂e Kaan ya kpanatanmetopo komo.

Entara cexitaw so ketaw ha re wara n̂he n̂ehcerî.

N̂encetken̂e rma tko.

Ewetî xera ro mak xatken̂e okwe.

Ero ke tîwîrîmaxmu me ro mak tak naxe okwe.

22 Yaaro ketken̂e ham takîhsom pen komo.

On wara tî ketken̂e,

Twenarîthîrî rma nahyasî xa hara xapari kica.

Kuuxi tîpîche apacakrî cheka cesî ehmamaxi hara kica,

ketken̂e tî.

Ero wa kacho yaw roro rma wa naxe n̂examro okwe,

kicicitho pona etîramaxapu kom ha.

Ero wa naxe.