On okaritan an̂enîrî komo.

Petru ow ha Xesus Kristu nantomatho.

Miya so etakpaxapu komo amyamro.

Pontu pono komo chewno amyamro,

Karasia pono komo chewno marha,

Kapatosia pono komo chewno marha,

Asia pono komo chewno marha,

Bitin̂a pono komo chewno marha.

Ero warai komo chewno amyamro.

2 Kîîm komo Kaan nmen̂ekatho amyamro.

Pahxa rma ahtînoyatken̂e so Noro tîmxîkrî me.

Ero ke awakir̂wametken̂e so Kir̂wanî ro Yekatî ke cewetîtome awya so.

Xesus Kristu kamxukutho ke marha awakir̂wametken̂e so.

Taa,

on wara wîîkes hara awya so,

awakronoma xe so wasî Kaan ya.

Ahwokan me marha awiri xe so wasî yîwya.

Ero wa awiri xe so xa wasî,

miya xe xa takî.

3 On wara marha wîîkes awya so,

Kir̂wan̂he xa mai ham okre,

kapore roro nasî Kaan ya.

Kporin komo Xesus Kristu Yîîm Mîkî,

Noro ya ero wa kapore nasî.

Kîpînîn yawno ro xa Mîk Noro.

Ero ke tîmxîkrî me xa tak kiir̂atken̂e so,

ewruxapu wara rma.

Waipîn me marha kiir̂atken̂e so.

Xesus Kristu pakarî ke mak ero wa kiir̂atken̂e so.

4 On wara marha kiir̂axe so Kaan,

kemyawno komo nîmcesî kah yaw,

kîwya so tîmsom amn̂e.

Atpînî ro mak mîn ha kemyawno,

etwîrîman marha,

ehcamnopîn marha.

Ero yipu Kaan nîmcesî kîwya so tîmsom.

5 Tanî rma ka awexitaw so akurunpexe so Kaan kar̂pe cexirî ke.

Noro pona enîrî ke awya so akurunpexe so.

Amn̂e tak kir̂wanî ro me awir̂axe so eromanhîrî yimaw.

6 Ero wa awitopo komo ponaro awexirî ke so mahwowaxe xa tak okre.

Mesemetanmekyaxe tko ka okwe.

Anarmerpan me rma thakwa nasî awesemetanmetopo komo.

Yohno makî tko maxe ero wa mesemetanmekyaxe.

7 On wara Kaan awir̂axe so,

wehto pona tukuisom wara rma awir̂axe so ooru yukuitopo wara.

Ero wa awir̂axe so tponaro xa awehtopo komo yesenpotome,

anarî ponarora awehtopo kom ha.

Cehcamnosomtho makî tko mîn ooru.

Amyamro xa matko tîpîn̂e xa maxe Kaan ya ooru yopo ro mak.

Ero wa maxe Kaan pona enîn̂e me awexirî ke so.

Noro pona enîn̂e me awexitaw so cesemetanmesomu rma kir̂wan̂he Noro yehtopo menpexe tooto komo ya.

Ero ke nahwowaxe amne Kaan poko Xesus Kristu mokuche tak.

Takîhsom xa Mîk Kaan ham,

kir̂wanî ro xa ham,

kexe tak.

Ero wa nahwowaxe amn̂e Xesus Kristu mokuche tak.

8 Noro yenîhra rma ka maxe amyamro.

Yiixe rma tko maxe,

enîhnî xe rma.

Noro ponaro xa maxe enîhra awexitaw so rma ka.

Ero ke Noro poko mahwocetîkexe ro mak okre ekatîmrî yopo.

Kir̂wanî ro me Xesus mîhtînoyaxe.

9 Noro pona enîrî ke awya so aropotarî komo tak nakir̂wamekn̂e.

Ero ke tahwore xa tak maxe okre.

Ero wa maxe Kaan ya awakir̂wamacho komo poko.

10 Ero wa awitopo komo rma tî n̂ekatîmyatken̂e weronomano rin̂enho pen komo,

awakir̂wamacho komo rma tî n̂ekatîmyatken̂e pahxa rma.

Amn̂e akir̂wamano n̂iir̂asî Kaan,

ketken̂e.

Camkî tko tî xatken̂e tîn̂ekatîmrî komo poko rma.

Ahce warai poko xa wa nîîke Kaan,

Wakreno wiir̂as amn̂e,

kacho ha?

ketken̂e tî.

N̂eserepoketken̂e ro mak ero wa kacho poko,

ero ke Kaan Karitan n̂een̂atken̂e roro,

yuhnarino poko xa n̂esehtînoyatken̂e akir̂wamano ritopo poko cehcamhokachome so.

11 Kristu Yekatî rma xakn̂e yîropotaw so.

Ero yipu yekatîmn̂e me n̂examro pen n̂iir̂akn̂e.

On wara tî kekn̂e yîwya so,

Amn̂e tak Noro pen n̂emetanmekyaxe tooto komo okwe.

Ero yinhîrî kir̂wanî ro me tak n̂esenpesî Noro rma hara,

kekn̂e yîwya so.

On wara tko tî ketkene ero yipu poko,

Ahce wa Kristu n̂iir̂atu kopi?

ketken̂e tî.

Ahcemaw xa Noro mokya ha?

ketken̂e marha tî.

Kir̂wantaw xa tî entatîka xe xatken̂e ahce wa na Kristu yehtopo.

12 On wara tko tî Kaan kekn̂e yîwya so,

An̂enîrî pîn komo mak mekatîmyaxe.

Anarî komo n̂enîrî me mak mekatîmyaxe,

kekn̂e tî.

Ero wa kekne Kaan yîwya so kakir̂wamacho poko.

Ero ke n̂examro pen n̂enîrî me exihra rma xakn̂e,

an̂en̂iri komo me xa matko xakne.

Amyamro tak mencexe yîn̂ekatîmthîrî kom ha.

Kakir̂wamacho yekatîmn̂e komo tak n̂ekatîmyaxe awya so.

Kir̂wanî ro Yekatî yanme ekatîmn̂e komo rma mîkyam.

Kah yai en̂epexapu Mîk Kir̂wanî ro Yekatî.

Noro yanme rma kakir̂wamacho komo n̂ekatîmyaxe awya so.

Ero poko cehcamhoka xe rma tî natu ancu komo meero.

13 Ero ke awakir̂wamacho ponaro xa men ehcoko,

takîhso marha esehtînocoko.

Xesus Kristu ya awakrecho komo ponaro xa ehcoko miya roro.

Noro yesenpoche owakresî xa tak Kaan,

kacoko.

14 Kaan yewetîn̂e me xa tak ehcoko.

Tîîm n̂ewehca rikomo,

ero wara rma Kaan ewetîcoko.

Awehtoponhîrî komo ewetîra tak ehcoko.

Pahxa kicicitho xe roro mak mîxatken̂e kica.

Camkî awexirî ke so mak Kaan poko ero wa mîxatken̂e.

Ero ke ero warahra tak ehcoko.

Kicicitho xera tak ehcoko.

15 Kaan tak awan̂ikyatken̂e so tîmxîkrî me.

Kir̂wanî ro xa Mîk awan̂ikn̂e komo.

Ero ke kir̂wanî ro me xa marha ehcoko amyamro hara.

Ahce na poko awexitaw so kir̂wan̂he ehcoko.

16 Ero yipu poko rma kesî Kaan Karitan.

On wara kesî,

Kir̂wanî ro mak Ow ha.

Ero ke kir̂wanî ro me xa marha ehcoko amyamro hara owara xa marha,

kesî.

Ero ke ero wa kacho yaw roro ehcoko.

17 Kîîm komo Mîkî Kaan,

Noro yakro rma mîmtapowaxe.

On warai Mîkî Kîîm komo,

kukurunanîn̂e pîn mak Mîkî.

Poko kehtopo komo nukuknomesî,

ero yaw roro rma kepemachome so.

Ero ke twerî ehcoko Kaan poko.

Miya roro ero wa ehcoko roowo po awenmacho komo yecenarî.

18 On wara mak mîxatken̂e pahxa kica,

ero pîntho ponaro mak mîxatken̂e.

Aporin pen komo poyero ero wa mîxatken̂e.

Kaan takî tko awehtoponhîrî komo n̂epemekn̂e awowtome so tak.

Prata ke mak epemara xakn̂e,

ooru ke marha epemara xakne.

Cehcamnosom makî reha mîn prata komo,

ooru kom ha.

19 Kristu kamxukutho ke makî reha n̂epemekn̂e awehtoponhîrî komo tîpîn̂em ke xa tak.

Oper̂a xîkrî warai me mak xakn̂e Kristu twaihkaxmu me.

Kir̂wan̂he ro mak xakn̂e Noro kicicitho ken̂ehra ro mak.

Noro yipu kamxukutho ke rma awehtoponhîrî komo n̂epemekn̂e Kaan.

20 Pahxa rma tî Kristu nîhtînoyakn̂e Kaan twaihkaxmu me.

Roowo mapatan cirihra rma ka cexitaw ero warai me tî nîhtînoyakn̂e.

Noro yenpora tko ka xakn̂e.

Kokon̂oro n̂he mak tak Noro n̂enpoi awehtoponhîrî komo yepeman̂e me.

21 Ero ke Kaan pona tak meen̂axe.

Noro rma Kristu n̂enpakekn̂e,

kyopono ro me marha tak n̂iir̂akn̂e.

Ero wa Kristu n̂iir̂akn̂e Kaan tponaro xa tak awehtome so.

Oyenpakesî tak Kaan amn̂e,

kachome marha awya so ero wa n̂iir̂akn̂e.

Ero wa Kaan pona meen̂axe.

22 On wara wîîkes hara awya so,

aropotarî komo tak makir̂wamapetken̂e Kaan ya yaarono yewetîrî ke awya so,

Kaanî mtapotarî yewetîrî ke ha.

Kaan Yekatî rma ero yipu yewetîn̂e me awir̂atken̂e so.

Ero ke tak awakno komo xatî me tak maxe,

yiixatî me xa tak okre.

Ero ke etîxatî me ro mak tak ciicoko aropotarî komo,

ahce na xatî me awehtopo ke esman me ro mak.

23 On wara marha awir̂atken̂e so Kaan,

tîmxîkrî me tak awewrunoketken̂e so.

Cehcamnosomtho ke awewrunokara xakn̂e.

Ehcamnopînî ro ke xa ero wara awir̂atken̂e so,

tîmtapotarî ke.

Karitî ro mîn Kaanî mtapotarî,

waipîn ha.

Ero yipu ke rma tîmxîkrî me awiratkene so.

24 Peen yepemrutun warai mak tooto komo ahnoro,

yohnono kyam mak.

Kir̂wan̂he rma cma re ka n̂esenpesî peen yepemrutun.

Ero yinhîrî peen tak waihyasî.

Epemrutunthîrî tak n̂emarakesî.

Ero wa nasî peen yepemrutuntho.

25 Ehcamnopîn me reha nasî Kporin komo mtapotarî.

Ero yipu rma amna n̂ekatîmyakn̂e awya so,

Kaan ya awakir̂wamacho kom ha.

Ero wa nasî Kaanî mtapotarî.