Taa,

tupurantayem komo,

awya so wîîkes hara,

awratacoko,

okwe,

okwe,

kacoko ro mak.

Mesemetanmekyaxe xa tak amn̂e okwe.

2 Natîhyasî thakwa awemyawnonhîrî komo.

Apononthîrî komo marha nawkes okwe mahcaru warai.

3 Twekaxi marha nas apurantanthîrî komo exepeyutho,

ooru,

prata kom ha.

Ero yipu n̂een̂axe amn̂e apoyino komo wekaxaputho.

Kicicme awehtopo komo yekatîmn̂e me nasî yîwya so.

Wekachonhîrî yanme marha apunthîrî komo macesî,

wehto ke ecahxapu wara hara.

Ero wa men maxe amn̂e okwe.

Eromanhîrî me enmarî pahnoke rma awemyawno komo mepamnoyaxe tukuhkaw cehso ro.

4 On wara marha maxe okwe,

anapickarî komo yepemara rma maxe okwe,

anatîrî yeperîrî yenmekn̂e kom ha.

Kepemexe so amn̂e,

mîîkexe rma ha re,

memîknoyaxe mak okwe.

Ero ke nîwracexe thakwa okwe n̂examro anapickathîrî komo.

Yîwratarî komo tak men n̂encesî Kporin komo,

kantoman̂e ro komo.

5 On wara marha maxe,

roowo po awexitaw so ha ka mesewakrexe mak kica.

Awemyawno komo mepamnoyaxe ro mak.

Tupurukresom wara miir̂axe aropotarî komo.

Tok nupurukresî paaka yosom waihkachome,

ero wara rma nasî aropotarî komo awaitome so mak tak okwe.

6 Kir̂wanî ro komo marha mekance kicicitho warai me,

mîwaikace meero okwe.

Esewyomara rma n̂ehce noro yipu pen komo.

Ero wa wîîkes awya so,

cemyawnoyem komo amyamro.

7 Taa,

on wara wîîkes awya so hara oyakno komo,

Kporin komo momohcoko rma ka ahwokan me.

Ero wa naxe tînatkem komo,

tînatîrî yepetacho ka momokyasî pahkî.

On wara kexe,

Ahri ka tuuna mokope naatî yatîkrecho.

Yihcirî me tmohsom ka mokope.

Mahyaw tmohsom marha mokope,

kexe makî ka.

Ero wara kexe tînatkem komo.

8 Ero wa xa marha ehcoko amyamro hara,

ahwokan me ro mak ehcoko.

Pahnoke tak men nasî Kporin komo mohtopo.

9 Etpoko yîmtapotara marha ehcoko oyakno komo.

Etpoko amtapowataw so Kaan men awen̂ekexe so amn̂e ero poko.

Moro to tak men nasî awen̂ekan̂e komo kopi,

ametatawno wa tak ha.

Ero ke men etpoko yîmtapotara ehcoko.

10 On wara ehcoko oyakno komo,

weronomano rin̂e pen komo yehtoponho yîhtînocoko,

Kporin komo mtapotarî n̂ekatîmyatken̂e,

n̂examro pen yehtoponho kom ha.

Cemetanmetopo komo thakwa tî nînîmyatken̂e n̂examro.

Pahkî ro makî tî nînîmyatken̂e ahwokan me rma.

11 Kaan nwakretho me tîhtînoyaxe ero yipu yînîmn̂enho pen komo.

Ero wa tî xakn̂e Xoo pen.

Noro yehtoponho rma mencexe,

on wara ehtoponhîrî ha,

ahwokara rma tî xakn̂e cesemetanmekyataw xa.

Esemetoponhirî mahyaw kir̂wan̂he tak noro pen n̂iir̂akn̂e hara Kporin komo.

Ero wa ehtoponhîrî mencexe.

Kîpînîn yawno xa Mîk Kporin kom ham okre.

Okwe okwe,

kan̂e me xa nasî kpoko so.

Noro yipu Mîk Kporin kom ha.

12 On wara kacho ponaro xa tak ehcoko,

oyakno komo,

yaarono me xa amtapotarî komo yewetmexpotopo etacira ro mak ehcoko.

Kaapu etacira ehcoko ero yipu me,

roowo etacira marha ehcoko.

Ahce na komo etacira ro mak ehcoko amtapotarî komo yewetmexpotopo me.

Yaaro mak amtapotacoko.

Pîra,

ketaw awya so yaaro mak kacoko.

Nhnk,

ketaw hara awya so yaaro marha kacoko.

Amtapotarî komo yewetîmexpotopo yetahcataw rma awya so Kaan men awen̂eketu so kopi.

13 Taa,

on wara marha wîîkes awya so,

anarimaw so mesemetanmekyaxe.

Ero wa awexitaw so Kaan yakro tak amtapotacoko.

Tahwore awexitaw so anarimaw hara ewanomacoko Kaan poko.

14 Awamotoyataw so Kaan mîn yenîn̂e komo tak an̂ihcoko Kaan yakro yîmtapotachome so apoko so.

Ahkapexe so marha tak Kporin komo yosotî yanme rma.

15 Kaan pona enîn̂e me xa yîmtapowataw so tamotosom komo poko Kaan tak nakir̂wames hara amotoxapunhîrî komo.

Kar̂pe tak noro yipunhîrî n̂iir̂as hara Kporin komo.

Kicicitho poko ehxapunhîrî me exitaw marha,

Kaan tak nîhcamnoyasî ero wa ehtoponhîrî.

16 Kicicme awehtoponhîrî komo marha ekatîmcoko awakno komo ya.

Etpoko marha amtapotacoko Kaan yakro kar̂pen komo poko kir̂wan̂he tak ehtome so hara.

On wara nasî Kaan takro kîmtapotacho poko,

kir̂wan komo nakronomesî xa yaaro yîmtapowataw so,

cerewre xa ketaw.

17 Ahce wa xakn̂e Erias pen?

Tooto mak mîk xakn̂e noro pen kwarai komo rma.

Noro yipu rma tî nîmtapowakn̂e cerewre Kaan yakro.

Tuuna cma re ka ekmexpora mas Apa,

kekn̂e tî.

Ero ke mokuhra takî tî xakn̂e tuuna.

3 cimn̂ipu tî mokuhra xakn̂e,

6 nuun̂i xa hara tî.

Ero wa tî mokuhra xakn̂e tuuna ero yimaw.

18 Amn̂e takî tî nîmtapowakn̂e xa hara Erias tuuna mohtopo poko hara.

Yîmtapotache tuuna takî tî mokyakn̂e hara.

Mararî takî tî natîkwakn̂e hara.

Ero wa tî xakn̂e Erias pen.

19 Taa,

on wara wîîkes hara awya so oyakno komo,

on wara na nai apoyino komo anarimaw,

yaarono yaw rorono rma na n̂etowya okwe.

Noro yipu yakro tîmtapotapore nasî yaarono yaw roro yîhtînotome hara.

20 Ero wa amtapowataw so anarme yîhtînon̂e yaknaman̂e me tak maxe okre.

Ero wa aknametaw awya so waipîn me noro yipunhîrî miir̂axe twaihsomînhîrî rma.

Emapona kicicme ehxapunhîrî yehtoponho marha meymyaxe kir̂wnhe ehtome hara.

Ero wa mak wîîkes awya so oyakno komo.