On okaritan an̂enîrî komo.

Ebrew komo amyamro.

On wara wîîkes awya so,

on wara tî xakn̂e Kaan pahxa,

tîmtapotarî tî n̂ekatîmyakn̂e weronomano rin̂e komo ya.

Tîn̂entathîrî komo takî tî n̂ekatîmyatken̂e n̂examro kporin pen komo ya hara.

Emapona tî Kaan nîmtapowakn̂e.

Anarimaw so tî ancu n̂en̂epekn̂e tîmtapotarî yekatîmn̂e,

anarimaw wehto chewno me tî nîmtapowakn̂e hara,

anarmerpa makî tî nîmtapowakn̂e.

Ero wa tî ka Kaan nîmmtapowakn̂e.

2 Kokon̂oro tak Tumumuru ya n̂ekatîmyakn̂e hara tîmtapotarî yîn̂ekatîmrî me hara kîwya so.

On wara xakn̂e Kaan Noro poko,

ahnoro akîhtoxapu yosom me n̂iir̂akn̂e.

Noro ya marha ahce na nakîhtopekn̂e ahnoro.

Xir̂ko mko nakîhtopekn̂e yîwya,

kaamo marha,

nuun̂i marha,

ero warai komo ahnoro nakîhtopekn̂e yîwya.

Ero wa Kaan Tumumuru n̂iir̂akn̂e.

3 On warai Mîk Yumumuru,

cewroromutwem ro mak Mîk oco.

Ero wa cexirî ke kir̂wanî ro me Kaan yenpon̂e me nasî.

Kaan warai xa Mîk Yumumuru,

anarî me exihnî ro makî.

Mîn hak yecehton̂e marha Mîk ahnoro.

Tîmtapotarî ke mak n̂ecehcesî.

Karitî xa mîn yîmtapotarî.

Ero warai Mîk Kaan Mumuru.

Noro yipu rma n̂etîmyakn̂e kîkorokan̂e me kicicme kehtoponhîrî komo yîhcamnotome tak.

Noro mak ero wa n̂etîmyakn̂e cewn̂e.

Ero wa cexiche tak n̂eremekn̂e Kaan panaka kaari n̂ixa.

Kayaritomo ro xa Mîkî Kaan.

Noro yipu panaka n̂eremekn̂e kah yaw.

Ero wa xakn̂e Kaan Mumuru.

4 Ancu komo yopono ro rma Mîk.

Kaan mumuru ro xa Mîk.

Ero ke Kir̂wanî ro me marha nasî Noro yosotî,

ancu komo yosotî yopo xa.

Noro yipu Mîkî Kaan Mumuru.

5 On wara tî Kaan kekn̂e Tumumuru ya,

Omumuru Amoro okopuci.

Oroto kiirî Omumuru me,

kekn̂e yîwya.

On wara marha kekn̂e Noro poko,

Noro yîîm me was amn̂e.

Omumuru me marha nasî Noro hara.

Ero wa nas amna amn̂e,

kekn̂e Tumumuru poko.

Ero wa ma re kekn̂e Kaan ancu komo ya?

Pîra ro mak.

6 Tumumuru poko xa makî tî nîmtapowakn̂e ero wara.

Poturme ewruxapu Mîk Yumumuru.

Noro yen̂epetaw oona roowo pona on wara tî kekn̂e Kaan yancun komo ya,

On wara men kacoko amyamro ahnoro,

Oporin Amoro,

kacoko Noro ya,

kekn̂e tî.

Ero wa tî kekn̂e Tumumuru yen̂epetaw roowo pona.

7 On wara makî reha tî kekn̂e Kaan ancu komo poko reha,

Ekatî me mak ancu komo nakîhcesî Noro tanton kom ha.

Wehto me marha nakîhcesî tînantomarî kom ha.

Ero wa kekn̂e Kaan ancu komo poko.

8 Tumumuru ya reha on wara kesî Kaan,

Kaanî rma Amoro.

Kayaritomo me tak wa masî miya roro yîtîhkan me ro mak.

Kir̂wanî ro me awehtopo nasî awemyaw kayaritomo yamoyin warai me.

9 Kir̂wanî ro me awexi xatî xa Amoro.

Kicicme awexi xatî pînî ro mak Amoro.

Ero ke Kaan awahworekn̂e,

ponaro awehtopo rma.

Ahkapetopo warai ke rma awahworekn̂e.

Tahwore rma re naxe awakrono komo.

Tahwore xa tak masî Amoro reha,

kesî.

Ero wa kesî Kaan Tumumuru ya.

10 On wara marha kesî Kaan Tumumuru ya,

Tooto porin Amoro.

Miyan komo rma makîhcekn̂e pahxa.

Ero yimaw roowo mapatan miir̂akn̂e Amoro.

Kaapu mko marha makîhcekn̂e awamorî ke rma.

11 Ero yipu rma tko n̂ehcamnoyasî.

Ehcamnopîra reha mas Amoro.

On wara marha nasî anakîtothîrî mko,

natîhyasî poonotho wara rma.

12 On wara miir̂as amn̂e,

kpononthîrî mohkache tamomiyasî ero wa xa marha anakîtothîrî mko mamomiyas amn̂e.

Anarme tak makîhces hara.

Ero wa nasî anakîtothîrî amn̂e.

Ero warahra reha mas Amoro.

Atpîn me ro mak mas Amoro,

ehcamnopîn me marha.

Enatîn me ro mak nasî cimn̂ipu mko waipîra awehtopo,

kesî Tumumuru ya.

13 On wara katî kekn̂e Kaan ancu komo ya,

Oona ka erematamko omîtkoso kaari n̂ixa?

Aaxatî pîn komo ka war̂metîkesî.

Anapikrî me kr̂a tak wiir̂asî,

kekn̂e katî ancu komo ya?

Pîra ro mak.

Tumumuru ya mak xa ero wa kekn̂e.

14 On warai makî reha mîkyam ancu komo,

ekatî komo mak mîkyam,

Kaan nantomarî kom ha.

Tînakir̂wamarî komo yakronoman̂e me n̂en̂epesî.

Ero warai mak mîkyam ancu komo.