Ciaku Karitan
Ciaku
1
On okaritan an̂enîrî komo.
Ciaku ow ha.
Kaan yanton mak ow ha,
Kporin komo Xesus Kristu yanton marha.
Ixaw Yana komo amyamro.
12 tribun me cehsom komo amyamro,
miya so etakpaxapu komo.
Kir̂wan̂he matu?
Tahwore Rma Ehcoko Awesemetanmekyataw So
2 On wara wîîkes awya so oyakno komo,
anarmerpanî mko nai kesenmetanmetopo.
Ero ke ahce warai ke na awesemetanmekyataw so on wara mak kacoko,
Kir̂wan̂he oritopo rma tan oyesenmetanmetopo,
ero ke tahwore rma wasî,
kacoko.
3 Kir̂wan̂he awin̂e komo rma mîn awesemetanmetopo komo,
ahwokan me awin̂e kom ha.
4 Ero ke ahwokan me ro mak ehcoko miya roro kir̂wan̂he xa tak awehtome so,
wara makno mera ro mak awehtome so ha.
Ero wa ehcoko.
5 Ahce na poko camkî awexitaw so awakîretopo komo poko tak amtapotacoko Kaan yakro.
Ero yimaw awakîrexe so takî.
Kakîhren̂e komo xa Mîk Kaan okre.
Ahce kacho camkî mai kica?
kan̂e pînî ro mak Mîk kîwya so.
6 Ero poko amtapowataw so amtapotarî komo yeyuhtopo ponaro xa ehcoko.
Oyakîre na mîn ha anarimaw mak,
kahra ro mak ehcoko.
Kaan yanwekrî me rma amtapowataw so tuuna imo yewcokocokon wa mak maxe kica,
ocowo narîrî wa makî.
7 Ero ke ero wara awexitaw so ahce na tîmîhra ro mak men nasî Kporin komo awya so okwe.
8 On wara naxe ero wara cehsom komo,
yarpa cesehtînosom me mak naxe okwe.
Ahce wa na ka yîhtînoyataw,
anarme tak nîhtînoyat hara amn̂e.
Ero wa naxe okwe.
9 On wara wîîkes hara awya so oyakno komo,
emyawnomnî me kexitaw tahwore rma cexpore nasî.
On wara mak kapore nasî,
Takîhsom me rma oyenpesî Kaan amn̂e okre,
kapore nasî.
10 Cemyawnoyem me kexitaw reha on wara kapore nas hara,
Emyawnomnî me rma na Kaan oriya amn̂e.
Tahwore rma tko wasî ero wa oriyataw,
kapore nasî.
Yohno cehcamnosom me mak naxe cemyawnoyem pen komo,
peen yepemrutuntho wa mak ha.
11 On wara nasî peen,
pahxaxaro ka nasî cepemrutwe.
Ero yinhîrî waihyasî thakwa takî epemrutunthîrî ocoro ehtîkache kaamo.
N̂emarakesî tak okwe cenporemînhîrî.
Ero wa xa marha n̂ehcamnoyaxe cemyawnoyem pen kom hara.
Cemyawno yepamnotopo komo poko cexitaw so rma n̂ehcamnoyaxe okwe.
Ero wa naxe cemyawnoyem komo.
12 On wara marha wîîkes awya so,
mesemetanmekyatu rma na anarimaw.
Ero wa awexitaw so tawake rma cexpore nasî.
Ero yipu yînîmyataw awya so Kaanî nwakrerî me xa tak maxe amn̂e okre.
Awarokorî komo warai tak nîmyas awya so karitî me xa awehtoponhîrî komo yepetho.
Ero yipu wîmyas amn̂e ooxatî komo ya,
kekn̂e Kporin komo,
ero ke tak nîmyasî.
Kicicitho Poko Kukukman̂e Pîn Mîkî Kaan
13 Kicicitho poko awepoketaw so,
Kaanî rma na opohkamexpe kicicitho poko,
kahra ro mak ehcoko.
Kicicitho poko epohkanî ro mak Mîkî Kaan.
Ero yipu poko marha kpohkamexpora ro mak nas hara.
14 Awanme ro so kyam mak mepohkexe kicicitho poko okwe.
Ahce na xe awehtopo komo rma nasî ahxikn̂e komo wa kica.
15 On wara taxe okwe kicicitho poko kepohketaw so,
cewehcatu tak na kica.
Ero ke kepohkacho xîkrî wa nasî ero yewetîtopo hara kîwya so.
Taa,
kicicitho yewetîn̂e me roro kexitaw so hara kwaihkacho tak nasî ero wa kehtopo komo xîkrî wara hara.
Ero wa thakwa nasî kicicitho yewetîtopo kîwya so okwe.
16 Ero ke oyakno komo esewkukmara ro mak men ehcoko.
17 Kwakrecho komo tahsîyaxe yîîxe xa kehtopo komo,
kir̂wan komo okre.
Ero yipu yahsîyataw kîwya so,
Apapa nîmîtho mak on ha,
kah yai yîn̂ekpothîrî,
kapore nasî.
Katpan ciin̂e Mîk Kaan.
Iito roro mak cesehtînosom marha Mîk anarmerpa esehtînopîn me ro mak.
Anarmerpa esehtînoyataw ketaw ha re kawarparen̂e me makî re nas okwe.
Ero warahra ro mak nasî Kaan,
kawarparen̂e pîn me ro mak ha.
18 On wara marha xakn̂e Noro kpoko so,
tîmxîkrî me kewrunoketken̂e so.
Tanme ro mak ero wa kiir̂atken̂e so tîmtapotarî ke mak.
Yaarono xa mîn yîmtapotarî.
Mer̂pora nasî Kaan nakîhtotho komo.
Yîmxîkrî komo reha kîwyam yînakîtothîrî komo potuthîrî warai.
Ero warai me kiir̂atken̂e so.
19 Ero ke on wara wîîkes hara awya so,
oyakno komo cik amyamro okwe.
On wara ehcoko tooto komo yakro amtapowataw so,
yohno so entan̂e me mak ehcoko.
Yamoro keyukn̂e me marha ehcoko,
yamoro cetîrwonmesom me marha ehcoko.
20 Tooto komo na natu cetîrwonîmsom me anarimaw.
Kir̂wan̂he kiin̂e pînî ro mak ero wa ehtopo komo kica.
Kir̂wanî ro me nasî Kaan.
Noro warai me kiin̂e pînî ro mak mîn kîrwonîmtopo.
21 Ero ke tusmuyem warai me awehtoponhîrî komo tak ahsîpînkacoko.
Mer̂pora na nai kicicme awehtoponhîrî komo.
On wara xa kacoko,
Kaan mak ehn̂an me oriyasî kir̂wan̂he oyehtopo poko.
Noro mtapotarî mak nasî oropotarî yakir̂waman̂e me,
kacoko.
Naatî wara nasî Kaanî mtapotarî aropotaka so ciixapu wara.
Ero ke ero wa kacoko.
Kaanî Mtapotarî Yentan̂e Me Mak Exihra Ehcoko, Ewetîn̂e Me Marha Ehcoko
22 On wara xa ehcoko,
Kaanî mtapotarî yewetîn̂e me xa ehcoko.
Entan̂e me mak exihra ehcoko.
Entan̂e me mak awexitaw so camkî mak maxe kicicme awehtopo komo poko rma okwe.
23 Kaanî mtapotarî yentan̂e me roro natu anarî komo.
Ewetîn̂e pîn me tko na natu okwe.
Ero wa exitaw so kanapa yaka cesensom wara mak naxe.
24 N̂esen̂atu rma ha re kapu.
Ero yinhîrî cet hara.
Yohno rma na tîn̂enîthîrî kkomo nîhcamnoyat hara.
Ahce warai me kyam kesenwo,
ketu mak.
25 Ero wa xa marha nasî Kaan ya kpanatanmetopo komo yentopo hara kîwya so,
kanapa yaka kesentopo wa nasî.
Kir̂wanî ro xa mîn Kaan ya kpanatanmetopo komo.
Kîmhokan̂e wara nas ha.
Encetaw awya so yîhcamnopîra tak ehcoko,
ewetîcoko xa matko.
Ero wa awexitaw so awakronomexe so tak Kaan ahce na poko awexitaw so.
26 On wara na matu anarimaw,
Kaan pokono ow ha,
mîîketu cma re.
Miyan poko rma tko na mîmtapowatu twerîhra ro mak kica.
Ero wa awexitaw so mesewkukmexe mak aropotawno komo poko rma okwe.
Tohnaw ro mak Kaan pokono me mesehtînoyaxe.
27 On wara xa cexpore nasî,
yîmîhnî komo twakrepore nasî,
iin̂o waixapu komo marha.
Tooto poko pohnîmra marha cexpore nasî,
kicicme ehtopo komo poko pohnîmra.
Ero wara awexitaw so on wara kesî Kîîm komo Kaan apoko so,
Yaarono me xa opoko nasî moso okre,
kicicitho pokono pîn me ha,
kesî.
Ero ke ero wa cexpore nasî.