On wara wîîkes hara awya so,

awakno komo xe rma ehcoko miya roro.

2 Pawana komo ponaro marha ehcoko.

Ahyaka so mokuche etarî komo enpocoko,

yînahmacoko marha.

Ero wa pawana wakretken̂e anarî komo.

Ancu komo rma mîkyam wakretken̂e twen̂ekarî mak.

Ancu me tî yîhtînopîra xatken̂e.

3 Kahrutopo yawno komo ponaro marha ehcoko.

On wara kacoko,

Kahrutopo yaw oyexitaw na oyakronoman̂e xe thakwa wasî.

Ero ke n̂examro pen marha wakronomesî,

kacoko ha.

Emetanmexapu komo ponaro marha ehcoko.

Oyemetanmekyataw na ooxatî pîn komo oyakronoman̂e xe thakwa wasî.

Ero ke n̂examro marha wakronomesî,

kacoko marha.

Ero wa kacoko.

4 Kir̂wan̂he taxe kipiwataw so.

Kicicme exihra taxe kipici poko kexitaw so.

Kicicme reha taxe kipici pîn poko kexitaw so hara,

kipici yai ro kexitaw so marha kica.

Kicicme xa marha naxe wooxam kom hara ciin̂o yai ro cexitaw so.

5 On wara wîîkesî kemyawno poko hara,

ahce na poko epohkan me ro mak ehcoko.

Cerepore mak ehcoko awemyawno komo poko,

ahyaw so nasî ero poko rma.

On wara kekn̂e Kaan kîwya so,

Anomîra ro mak wasî,

awahsîpînkara marha wasî,

kekn̂e kîwya so.

6 Ero ke on wara marha tîtkexe erasîn me ro mak,

Kporin komo xa nasî oyakronoman̂e me.

Ero ke tooto pona mak erasîra wasî.

Tooto mak mîkyam,

ahce wa ma re owîrîmetu,

tîtkexe mak.

7 Awenîn̂e komo ponaro marha ehcoko,

Kaanî mtapotarî n̂ekatîmyaxe awya so n̂examro ponaro.

Kaan yewetîn̂e me n̂examro exirî ke yaake tak naxe Kaan xîkrî me.

Ero ke Kaan pona enîn̂e me xa ehcoko awenîn̂e komo wa xa marha.

8 On wara nasî Xesus Kristu,

pahxa xakn̂e ero wara rma nasî oroto.

Ero wa xa marha nas amn̂e miya roro.

9 On wara wîîkes hara awya so,

anarmerpan na mencetu apanatanmetopo komo,

anarmenî ro mak na mencetu.

Ero yipu yencetaw awya so ero poko epohkara ro mak men ehcoko.

Wooto poko na apanatanmekyatu so anarimaw,

anahrî komo poko marha.

Kaan ya kwakrecho komo ke xa cecehtopore nasî kropotarî komo.

Kropotarî komo yecehtora ro mak nasî knahrî poko kpanatanmetopo.

Anarî komo ero yipu ponaro mak xatken̂e.

Kir̂wan̂he ciin̂e me exihra rma tko xakn̂e ero wa ehtopo komo.

10 On wara taxe kîwyam Xesus ponarono komo reha,

Xesus pun poko ceseresmaxmu wara taxe.

Ero warahra reha naxe Kaan mîntho yawno pokono komo,

okno pun mak nakn̂iyaxe n̂examro reha Kaan ya tîmsom me.

11 On wara marha nasî Kaan yaka cewomsom komo,

okno paraxkesî kicicme tooto yehtoponho komo yahrutopo me tîmsom.

Paraxkache kamxukuthîrî tak naar̂asî Kaan Yekenî ro yaka.

Yupunthîrî reha narpesî miya pohnîntaka akn̂ipotome iito.

12 Ero ke Xesus marha tî waihyakn̂e pohnîntaw tooto komo yakir̂wamachome tkamxukuthîrî ke rma.

13 Ero ke yîhyaka tîtosom wara cehcerî pohnîntawno yakan wara.

Xesus nîwîrîyakexe tooto komo.

Ero ke Noro yaka tîtosom wara cehcerî.

Noro yanme kîwîrîyakacho komo yînîmn̂e me cehcerî kîwyam hara.

14 Ewto po rma re taxe tanî roowo po kexitaw so ka.

Ehcamnopîn exihra ka nasî kewton komo okwe.

Nasî xa tak amn̂e kewtonî ro komo,

ehcamnopîn tak ha.

Ero ponaro taxe.

15 Ero ke Kaan ya tîmsom pokono me cehcerî kîwyam hara Xesus yakrono ro me kexirî ke.

Kîmtapotacho xa tîmcerî yîwya,

Kir̂wan̂he xa nai Kaan ham okre,

kacho ha.

Kîmtarî komo yeperîrî wara nasî ero wa kacho.

Ero ke ero yipu tîmn̂e me roro cehcerî.

16 Anarî marha nasî Kaan ya knîmrî kom hara.

Kpoyino komo yakronomacho kîwya so,

wakretopo marha kîwya so,

ero yipu nasî Kaan ya tîmsom me.

Tawake xa nasî Kaan kpoko so ero yipu tîmn̂e me kexitaw so.

Ero ke ero yipu tîmtopo poko yîtwen̂ekarîntara ehcoko.

17 Taa,

awenîn̂e komo ewetîcoko roro.

Anarme kan̂e pîn me mak ehcoko yîmtaka so.

Xesus ya n̂esekatîmyaxe amn̂e awakîretoponhîrî komo poko.

Ero ke n̂examro ewetîcoko tahwore ekatîmtome awehtoponhîrî komo Xesus ya.

Ahwora ekatîmyataw awehtoponhîrî komo Xesus ya ahwora marha maxe amyamro hara okwe.

Ero ke ewetîn̂e me ehcoko.

18 Taa,

amna poko n̂he amtapotacoko Kaan yakro.

On wara nas amna,

kicicme cehtopo yîhtînopîra ro mak nas amna.

Kir̂wan̂he mak cexi xe nas amna ahce na poko cexitaw.

Ero ke amna poko amtapotacoko.

19 Kahrutopo yaw wasî tan okwe.

Ero ke opoko cma re mîmtapowaxe yohno n̂he tak omohtome awenso so.

Ero wa amtapotacoko opoko.

20 Cerepore kiin̂e Mîkî Kaan.

Kporin komo yenpakan̂enho marha Mîk,

waihxapunhîrî n̂enpakekn̂e.

On warai Mîk hara Xesus,

oper̂a yosom Mîkî karitî xa.

Noro kamxukutho yanme rma takî kwakrexe so miya roro yîtîhkan me,

kesî tak Kaan kîwya so.

21 Ero ke on wara wîîkes awya so,

kir̂wan̂he ro mak awiri xe so wasî Kaan ya tawake xa tak cehtome apoko so.

Wakreno rin̂e me,

akronomano rin̂e me,

ahworeno rin̂e me,

ero warai me awiri xe so wasî yîwya.

Tîmtapotarî yewetîn̂e me marha awiri xe so wasî yîwya.

Awenporitîka xe so wasî yîwya.

Xesus Kristu yakrono me awexirî ke so mak ero warai me awir̂axe so.

Ero ke Xesus poko tahwotapore nasî miya roro yîtîtmamnî me ro mak.

Amen.

22 Ero wa mak wîîkes awya so oyakno komo.

Ero ponaro men ehcoko apanatanmecho komo owya.

Kawno pîn mak tan okaritan apanatanmecho komo.

23 On wara marha wîîkes awya so,

kakno komo tak nahrunketken̂e Cimocu ha.

Yohno noro mokyataw xiya ohyari,

noro yakro tak kmokyas ow awenso so.

24 Aponaro so xa tî natu meyeno komo,

kacoko awenîn̂e komo ya.

Mîk hak ya kacoko ero wara,

Kaan xîkrî komo ya.

Tan marha naxe Itar̂a pono komo.

Kir̂wan̂he matu iito,

ka xe marha tî natu n̂examro awya so.

25 Awakre xe so wasî Kaan ya.

Amen.