Piremon Yakanînho, Pawru Karitan
Piremon
1
On okaritan an̂enîrî.
Pawru ow ha.
Kristu Xesus nahrupotho ow ha.
Cimocu yakro amna mewresî on an̂enîrî.
Amna yakno Piremon amoro okwe.
Amna yakro cekaritosom marha amoro.
2 Apia n̂enîrî marha tan amna mewresî.
Amna yepeka okwe mîk Apia yiixe amna yehtopo.
Akipu n̂enîrî marha tan amna mewresî.
Amna yakrono mîk Akipu,
sowtatu warai me cetar̂maxmu.
Amîn yaka cesenmesom komo n̂enîrî marha tan amna mewresî.
3 Awakronoma xe so wasî Kîîm komo Kaan ya.
Ahwokan me marha awiri xe so wasî yîwya.
Kporin komo Xesus Kristu ya marha ero wa awiri xe so wasî.
Kir̂wan̂he Piremon Yehtopo Pokono
4 On wara wasî oyakno,
Kaan yakro omtapowataw roro apoko marha kîmtapowasî.
Kir̂wan̂he mai ham Apa okre,
Piremon makronome ham,
wîîkesî yîwya.
5 Kir̂wan̂he awehtopo wencesî oyakno.
Kaan nakir̂wamatho komo xatî xa mîkro Piremon,
kacho wences apoko.
Kporin komo Xesus pona enîn̂e marha mîkro,
kacho marha wencesî.
Ero wa awehtopo wences okre.
6 Ero ke on wara wîîkesî Kaan ya apoko,
Apona enîn̂e xa mîk ham Piremon,
Apa.
Ero wa cehtopo n̂ekatîmyasî mîk hak ya.
Ero ke yîmtapotarî yewetîn̂e me xa cirko entan̂e komo.
Noro wa xa marha oyexi xe wasî,
kan̂e me cirko kir̂wan̂he ehtopo yenîrî ke,
wîîkesî Kaan ya.
7 Ero ke tahwore xa nas amna awekaci yentarî ke oyakno.
Etîxatî me nai ham Piremon okre,
kacho amna n̂encesî.
Kir̂wan̂he ro mak amna n̂encesî ero wa awehtopo.
Kaan nakir̂wamatho komo yahworen̂e me marha tî mai.
Ero wa amna n̂encesî awehtopo.
Ero ke tahwore nas amna.
Onesimu Ahsîko Hara Awakno Me Takî
8 Taa,
on poko wîîkes awya,
Kristu nantomatho me oyexirî ke yîkrîpîra kîmtapowas ha re awakro.
9 Aaxatî me rma tko tan kîmtapowasî awakro,
On wara cma re cexpore nasî,
wîîkesî mak.
Poritomotho tak owî,
Xesus Kristu nahrupotho ha.
Ero warai ow ha,
Pawru ha.
Ero ke kîmtapowas awakro.
10 On poko wîîkesî,
Tanî nasî Onesimu ohyaw.
Omumuru warai xa moso.
Noro yewrunokan̂e wara rma wîxakn̂e.
Tanî rma oyexitaw tapomiso ero wa wîxakn̂e.
11 Awewetîn̂e pîn me makî ka xakn̂e ham okwe.
Ero warahra tak nas oroto.
Awewetîn̂e me tak nas oroto okre,
oyewetîn̂e me marha tak nasî.
12 Ero ke wen̂epes hara ahyaka.
Yîpînîn yaw xa oyehtopo xa moso wen̂epes ahyaka.
Ero ke kir̂wan̂he mak ahsîko hara awanton me hara.
13 Tan thakwa wasî kahrutopo yaw.
Kristu ya kakir̂wamacho yekatîmrî poyero mak wasî tan.
Ero ke,
Tanî mak esko okopuci oyakronoman̂e me,
ka xe cma re wîxakn̂e Onesimu ya.
Tan cexitaw ketaw ha re Piremon noro rma re oyakronomesî.
Ero ke noro yemtaka cma re ow makronomes amoro,
ka xe cma re wîxakn̂e yîwya.
14 Ero wa kahra tko wîxakn̂e yîwya amtapotarî yentara oyexirî ke.
Awanmenkera ahsî xera wîxakn̂e awantonînhîrî.
Awanme exitaw ketaw ha re wahsîrî rma ha re.
15 On wara wîîkesî noro yemahcitopo poko,
yohno mak na cekn̂e ahyai ahywano me cehtome xa hara eroromero tak ha.
16 On wara tak kahra cma re masî yîwya,
Oyanton mak amoro,
kahra.
Oyantonî rma re amoro,
oyakno cik meero amoro okwe,
mîîkesî cma re tak yîwya.
Oyakno me marha nasî yîpînîn yaw xa oyehtopo okwe.
Miya xe xa yîpînîn yaw awehtopo me nasî awanton me exirî ke.
Kporin komo yakrono ro me exirî ke marha.
Ero wa exirî ke yîpînîn yaw awehtopo me xa tak nasî.
17 Ahce wa kyam mîîke owya iina owtoche ahyaka?
Mîmoko oyakno okwe,
mîîke ha na owya.
Ero ke ero wa xa marha kasko moso ya hara On̂esimu ya iina toche.
18 Ahce wa na moso awir̂akn̂e ahyaw ka cexitaw.
Awemetanmekyakn̂e ha na anarimaw.
Awemyawnonhîrî poko na n̂en̂epanakn̂e anarimaw.
Ero wa noro yehtoponho yîhtînoyataw awya akaritan tak mewreko ohyakan.
Oyemyawnonho naare okwe.
Ero cma re mepemesî noro yemtaka,
kacho mewreko ohyakan.
Owî rma tak wepemesî awemetanmechonhîrî yîwya.
19 Ero wa kacho tan mewresî ow Pawru ha,
oyamorî ke rma.
On wara tko kahra was awya,
Oyanton me tak esko amoro awakir̂wamachonhîrî yekatîmtoponho yepetho me,
kahra was awya.
20 Ero wa mak wîîkes awya oyakno.
Ero ke cma re moso mahsîyas hara oyahworetome hara awya.
Tahwore rma wasî Kporin komo yewetîn̂e me ahtînorî ke owya.
Ero ke ow ahworeko xa hara.
21 Oyewetîn̂e me rma xa kîhtînoyasî.
Miya xe xa rma moso mîwakresî omtapotacho yopo,
wîîkesî xa matko.
Ero ke ero wa kacho tan mewresî an̂enîrî.
22 Taa,
on wara marha wîîkes awya,
oyetarî cma re meen̂asî iina omokuchen.
Kmokya rma na yarî ahyaka so amn̂e.
Opoko rma mîmtapowaxe Kaan yakro oyahrunkacho poko ahyaka so omohtome tak ha.
Ero ke oyahrunkacho ponaro rma wasî.
23 Taa,
tanî nas Epapras.
Oyenmayipu moso kahrutopo yawno xa marha thakwa.
Kristu Xesus yakrono ro me cexirî poyero ahruxapu marha moso.
Noro tî nai aponaro.
24 Mahkus marha tî nai aponaro,
Aristaku marha,
Temas marha,
Rukas marha,
ero wa xa naxe aponarono komo.
Kaanî mtapotarî yekatîmrî pokono marha moxam oyakro.
25 Taa,
kir̂wan̂he awekatî ciri xe wasî Kporin komo Xesus Kristu ya.
Ero wa mak wîîkes awya oyakno.