3
Taa,
on wara wîîkes hara awya,
okopuci,
kayaritomo yewetîtopo poko marha panatanmeko iitono komo.
On wara kasko yîwya so,
Kayaritomo komo men ewetîcoko,
kayaritomo maywen komo marha.
Kir̂wan poko awantometaw so ero poko rma ehcoko.
2 Yîwîrîyakano cirihra ro mak ehcoko.
Kein̂e pîn me marha ehcoko.
Tawakem me xa matko ehcoko.
Anarî komo xawyakan me marha esehtînocoko miyan komo xawyakan me rma,
kasko marha yîwya so.
Kaan Makî Cma Kakir̂wametken̂e So Kicicithonhîrî Komo Rma
3 Pahxa kîwyamu rma tîxatken̂e kicicme.
Tohnaw cesehtînoyatken̂e kica,
esewetîra marha tîxatken̂e,
yaarono pîn cewehcatken̂e,
mîn hak poko cepohketken̂e marha,
cesewakometken̂e marha,
emetanmekno ritopo ponaro marha tîxatken̂e,
kyopono komo xatî pîn me tîxatken̂e,
yîrwonpora marha tîxatken̂e,
kpoyino komo xatî pîn me marha.
Ero wara tîxatken̂e kica.
4 Noro yipu komo ya rma tko Kaan n̂enpekn̂e kwakren̂e kom hara okre.
Kakir̂waman̂e komo rma Mîk n̂enpekn̂e kîîxe so cexirî ke.
Noro tak kakir̂wametken̂e so.
5 Kîpînîn yaw so cexirî ke mak kakir̂wametken̂e so,
kir̂wan̂he kehtoponhîrî komo yanmera ro mak ha.
Kewrunoketken̂e so xa hara kicicme kehtoponhîrî yaw roro exihra tak kehtome.
Kropotarî komo korokekn̂e kewrunoketaw so rma.
Ewruxan wara rma kiir̂atken̂e so Kir̂wanî ro Yekatî.
6 Kewrunokache so Kir̂wanî ro Yekatî marha tak Kaan n̂iir̂akn̂e kropotaka so.
Xoo kan̂e wara ro mak Kir̂wanî ro Yekatî n̂iir̂akn̂e kpona so.
Xesus Kristu yakrono me kexirî ke so mak ero wa kiir̂atken̂e so,
kakir̂waman̂e komo yakrono me kexirî ke so ha.
7 Ero wa kir̂wan me kiir̂atken̂e so Kaan kwakretopo me mak.
Tîmxîkrî me marha kiir̂atken̂e so.
Ero ke waipînî ro me ciisom me tak taxe.
Citu Panatanmetopo Yîtîhkacho
8 Taa,
ero wa wîîkes awya,
awemîknotopo pîn omtapotarî.
Ero ke ekatîmko roro Kaan pona enîn̂e komo ya.
On wara kasko yîwya so,
Kaan yewetîn̂e komo amyamro.
Ero ke akronomano ritopo ponaro xa ehcoko,
wakreno ritopo ponaro marha.
Ero wa ehcoko miya roro,
kasko yîwya so.
Ero wara exitaw so akîhreno rin̂e me tak naxe,
ahworeno rin̂e me marha.
9 On wara marha wîîkes awya,
ero pîntho poko eseseyukyataw so anarî komo,
akro so esentara ro mak esko amoro.
Kporin pen komo yosotî poko na n̂eseseyukyatu anarî komo,
Moises pen nmewretho poko marha na n̂eseseyukyatu.
Ero wa exitaw so esentara ro mak esko akro so.
Tohnaw men n̂eseseyukyatu ero yipu poko.
Kakîhren̂e pînî ro mak mîn kica.
10-11 Anarme kan̂e komo na nai iito,
kpanatanmetopo yaw rorono pîn.
Noro yipu komo yîtwermakî.
Awewetîra exitaw yîtwermakî xa hara.
Awewetîra rma exitaw asakî ro yîtwermache porohkakî tak ha.
Yaarono yaknaman̂e me nai kica,
kicicitho pokono ro mak.
Kicicitho me rma n̂esehtînoyasî noro yipu tîropotaw rma.
Wara rma nasî anarme kan̂e me okwe.
12 Taa,
on wara wîîkes hara awya,
Atemas wen̂epesî yarî amn̂e ahyaka.
Anarimaw Cikiku na wen̂epe.
Noro yenîche awya amoro tak amoko ohyaka.
Nikopori po was ero yimaw.
Cwotu wenatkes iito.
13 Senas nai iito ahyaw,
en̂ekano rin̂e.
Aporu marha tî nai ahyaw.
Anarî komo cheka tîto xe so tî natu,
ero ke akronomakî yohno totohme so.
14 Kakno komo panatanmeko n̂he meye ro.
On wara kasko yîwya so,
Akronomano rin̂e me roro men ehcoko takrono xe xa exitaw anarî komo.
Ero wa awexitaw so epetantho warahra maxe,
kasko yîwya so.
15 Aponaro tî natu oyakrono komo tan.
Kir̂wan̂he mai iito?
ketu awya.
Ero wa xa marha kasko iitono komo ya.
Kîîxatî komo me naxe Kaanî mtapotarî ponaro cexirî ke so ha.
Aponaro so tî natu Pawru kom ha,
kasko yîwya so.
Taa,
awakre xe so wasî Kaan ya.
Ero wa mak wîîkes awya.
Amen.