Xesus Ya Kakir̂wamacho Ponarono Me Xa Cesenpopore Nasî
2
Taa,
on wara wîîkes hara awya okopuci,
iitono komo panatanmeko kir̂wan̂he kehtopo komo poko,
Kaanî mtapotarî yaw roro kehtopo komo poko.
2 On wara kasko poritomo komo ya,
Apa komo,
on wara ehcoko,
takîhso cesehtînosom me ehcoko,
etaporen me marha Kaan poko,
ahce na poko wakpamtîkan me marha ehcoko.
Yaarono pîn poko apanatanmekn̂e komo ponarora ro mak ehcoko.
Etîxatî me marha ehcoko.
Ahce na yînîmn̂e me marha ehcoko ahwokan me,
kasko yîwya so.
Ero wa kasko poritomo komo ya.
3 Nocwakomo me cehsom komo marha panatanmeko hara.
On wara kasko yîwya so hara,
Yeme komo,
Kaan ponarono me xa esenpocoko ahce poko na awexitaw so.
Tapota yakîhtora marha ehcoko tooto komo pokono.
Kawaxiyem pokono ro me exihra marha ehcoko.
Kir̂wan poko panatanmekno rin̂e me marha ehcoko,
kasko yîwya so.
4 On wara marha kasko yîwya so,
emasî me cehsom komo panatanmecoko hara.
On wara kacoko noro yipu komo ya,
Okopuci komo,
Aan̂o xatî me ehcoko,
amxîkrî komo xatî me marha,
kacoko emasî men komo ya.
5 On wara marha kacoko emasî men komo ya,
Takîhsom me ehcoko,
tweeno me marha.
Amîn komo yahworen̂e me roro marha ehcoko.
Kir̂wan me marha ehcoko.
Aan̂o komo yewetîn̂e me marha ehcoko.
Ero wa ehcoko Kaanî mtapotarî yîwîrîyakara ro mak ehtome so tooto komo apoyero so,
kacoko emasî me cehsom komo ya,
kasko nocwakomo me cehsom komo ya.
Ero wa n̂examro panatanmecoko,
kasko yîwya so.
6 Kar̂pamxan komo marha panatanmeko.
On wara kasko yîwya so,
Oyakno komo,
on wara ehcoko amyamro hara,
Takîhso cesehtînosom me ehcoko,
kasko.
7 Amoro marha okopuci kir̂wan̂he esenpoko yîwya so apoko pohnîmtome so anpanatanmekrî komo.
Panatanmekno riyataw awya Kaanî mtapotarî yaw roro mak men panatanmekno cirko.
Awetaporecho mera marha panatanmekno cirko,
yaarono pîn pona etowîn me ro mak esko.
8 Takîhso marha amtapotakî,
Kicicitho nîmtapowasî,
kacho mera.
Ero wa amtapotakî yîhyapamtome mak awanwekn̂e komo,
awîrîyakacho yîhtînopîra cexirî ke.
9 Tooto yanton komo marha panatanmeko.
On wara kasko yîwya so hara,
Ai oyakno komo,
on wara ehcoko amyamro,
awosom komo men ewetîcoko.
Ahce poko na awexitaw so kir̂wan̂he mak ehcoko tawake ehtome so apoko.
Yîmtayar̂man̂e pîn me marha ehcoko.
10 Awosom komo yemyawno poko en̂epamra marha ehcoko.
Kir̂wan̂he mak ehcoko roro,
Kemîknon̂e pîn mîk ham,
kachome apoko so.
Ero wa awexitaw so tpoxwe tak menpexe Kaanî mtapotarî,
kakir̂waman̂e komo mtapotarî ha.
Ahce na poko awexitaw so ero wa ehcoko,
kasko tooto yanton komo ya.
Kpanatanmetopo Komo Rma Mîn Kaan Ya Kwakrecho Komo
11 Taa,
Kaan ya kwakrecho komo tak ceen̂axe.
Miyan komo rma n̂een̂axe roowo poko hakno komo.
Kakir̂wamacho komo ke kwakretken̂e so okre.
12 Kpanatanmetopo me rma tko nasî Kaan ya kwakrecho komo.
On wara kan̂e wara nasî kîwya so,
Kaan ponarora awehtoponhîrî komo tîpînînkapore tak nasî,
awepokachonhîrî komo ponarora marha tak ehcoko.
Takîhso cesehtînosom me mak ehcoko roro,
kir̂wan me marha ehcoko roro,
Kaan ponarono me marha ehcoko roro,
kan̂e wara nasî kîwya so.
Ero wa kan̂e wara nasî Kaan ya kwakrecho komo kîwya so.
13 Ero wa kesî kîwya so Xesus Kristu momokrî poko ka kexitaw so.
Kakir̂waman̂e Mîk Xesus Kristu.
Kaanî rma Mîk ha,
kyopono ro xa ha.
Kir̂wanî ro me mak Noro n̂epatakesî amn̂e oona roowo pona.
Ero ke Noro mohtopo ponaro taxe.
14 Noro rma n̂etwaikapekn̂e kanme so okwe.
Kepethîrî komo me waihyakn̂e kicicme kehtoponhîrî komo yanton mera tak kehtome so.
Kaan yanwekn̂e me ro makî tîxatken̂e okwe,
ero ke waihyakn̂e kakir̂wamachome so.
Noro xa marha tak kakir̂wametîkexe so hara.
Tîyananî ro me tak kiir̂axe so,
kir̂wan̂he ciino rin̂e me marha.
Ero wa kiitome so n̂etwaikapekn̂e Xesus.
15 Ero ke ero yipu men ekatîmko iitono komo ya.
Ahworeno marha cirko Kaan poko.
Kicicme exitaw so yîtwermano cirko.
Cewetîsom me xa kasko.
Noro pîntho me awencetaw yîwya so,
Pîra ha men,
ponaro kehtopo xa tan wekatîmyas awya so,
kasko xa matko yîwya so.
Ero wa kasko yîwya so.