On okaritan xa hara okopuci,

an̂enîrî hara.

Pawru ow ha,

Xesus Kristu nantomatho ha.

Kaan yanme mak oyantomekn̂e.

On wara kacho poko oyantomekn̂e,

Kristu Xesus pona een̂ataw awya so waipîn me ro mak tak awir̂axe so,

kacho poko.

2 Cimocu amoro,

omumuru cik okwe.

Awakronoma xe wasî Kîîm komo Kaan ya,

Apînîn yaw exi xe marha wasî.

Ahwokan me awiri xe marha wasî yîwya.

Ero wa xa marha awiri xe wasî Kporin komo Xesus Kristu ya hara.

3 Emapona kîmtapowasî Kaan yakro apoko.

Kosope kîmtapowasî,

katpanaw marha.

On wara wîîkesî Kaan ya,

Kir̂wan̂he xa mai ham Apa okre.

Cimocu mîkarice roro ham okre,

wîîkesî yîwya.

On warai ow,

Kaan yewetîn̂e ow pahxanînhîrî rma.

Ero wa xa marha xakn̂e apapa pen,

oporin pen komo marha.

N̂examro pen wara xa marha Kaan wewehcas ow hara.

Kicicme oyehtopo exihra wîhtînoyasî.

Noro yipu rma ow kîmtapowasî apoko.

4 Awenî xe xa was okwe.

Awratachonhîrî ponaro rma wasî.

Tahwore xa tak was amn̂e awenîche hara owya.

5 Kaan pona enîn̂e me awehtopo ponaro rma wasî okopuci.

Yaaro xa Kaan pona n̂een̂asî noro,

wîîkes apoko.

Ero wa xa marha xakn̂e anoci pen hara,

Roice pen.

Ero wa xa marha tak nas anocwan hara,

Ewnisi.

N̂examro wa xa marha tak nasî Cimocu hara,

wîîkesî tak apoko.

Ero wa wîîkes apoko.

6 Ero ke on wara wîîkes awya,

awya Kaan nîmîtho ponaro men esko,

wîîkesî.

Awakrekn̂e Kaan tîmtapotarî yekatîmn̂e me awitopo ke.

Tpoxwe ekatîmn̂e me awir̂akn̂e ameretîyasîrî ke owya.

Ero ke ero poko xa tak ehtîkakî.

7 Cekatî rma Kaan n̂iir̂akn̂e kropotaka so.

Cerahsom me kiin̂e pîn Mîk ha.

Karitî me kiin̂e xa matko Mîkî,

etîxatî me kiin̂e marha.

Takîhso cesehtînosom me kiin̂e marha Mîkî.

Ero wa kiin̂e Mîkî Kaan Yekatî.

8 Ero ke yîhyapamnî me ro mak ekatîmko Kporin komo mtapotarî.

Pawru npanatanmekrî ow ha,

kasko marha yîhyapamra.

Kporin komo nahrupotho ow ha.

Amoro marha na mesemetanmekya amn̂e Kaan ya kakir̂wamacho yekatîmrî poyero awya.

Kaanî rma tko akaricesî ero yipu chew rma.

9 Kakir̂waman̂e Mîk Kaan.

Kan̂ikn̂enhîrî marha Mîk tînakir̂wamarî me.

Kir̂wan̂he kehtopo komo yanmera ro mak kan̂ikyatken̂e so.

Tanme ro mak kîhtînoyatken̂e so.

On wara kekn̂e kpoko so,

N̂examro tak wakir̂wames amn̂e wakretopo komo me mak.

Kristu Xesus yanme ero wa wiir̂asî,

kekn̂e.

Pahxa rma ero wa kekn̂e kpoko so,

roowo yakîhtonaw rma.

10 Ero wa twakrecho komo yentara thakwa xatken̂e pahxan pen komo reha.

Kîwyamu reha tak cencexe Xesus Kristu mokrî ke tak.

Kakir̂waman̂e Mîk Noro mokyakn̂e.

Kakir̂wamacho tak cencexe kîwyamu reha.

Ero yipu yanme kwaihtopo komo tak nar̂mekn̂e Noro waipîn me tak kiitome so hara okre.

Kîkaricexe roro so marha okre.

Ero wa kakir̂wamacho komo cencexe.

11 Ero yipu yekatîmn̂e me ciixapu ow.

Yînantomathîrî ow ha,

Xenciu komo panatanmekn̂e me xa oriyakn̂e.

12 Ero warai me oyexirî poyero mak cemetanmesom me was okwe.

Okwe okwe,

kahra rma tko wasî.

Xesus pona xa ween̂akn̂e.

Kemîknon̂e pîn me ro mak Noro wîhtînoyasî.

Ero ke waipînî ro me kiir̂asî,

kacho ponaro wasî.

Ero yipu yîhcamnon̂e pîn me ro mak wîhtînoyasî Xesus.

Ero ke miya roro okurunpen̂e Mîk ham,

wîîkesî.

Miya roro okurunpesî tmohtopo me enmacho pona roro,

wîîkesî.

Ero wara was ow.

13 On wara wîîkes hara awya okopuci,

Awya on̂ekatîmîtho ponaro men esko.

Yaarono xa mîn on̂ekatîmîtho,

Kaan pona enîn̂e me kiitopo,

etîxe kiitopo marha.

Kristu Xesus yakrono ro me kexirî ke so ero warai me kiiraxe so.

Ero ke ero wa xa marha anarî komo panatanmeko hara.

14 Kir̂wanî ro ke awakrekn̂e Kaan.

Ero ke yînmîthîrî yahsîpînkan̂e pîn me ro mak esko.

Kir̂wanî ro Yekatî rma awakronomesî ero wa awehtome,

kropotawno komo rma.

15 Taa,

on wara wîîkes hara awya,

Asia pono komo yehtoponho mence.

Onomtîketken̂e n̂examro ahnoro okwe.

Pixeru thakwa onomyakn̂e,

Ermoxenes marha,

ahnoro anarî komo marha.

Ero wa onomtîketken̂e okwe.

16 N̂examro warahra tko xakn̂e Onesiporu.

Ero ke noro pînîn yaw Kporin komo yexi xe wasi.

Yîhyawno komo pînîn yaw meero exi xe wasî.

Oyakronoman̂enho mîk noro okre.

Emapona roro mokyakn̂e oyenso.

Tmokuche roro oyahworekn̂e okre.

Pawru yakrono me oyesenpo xera wasî kuripara ke cimiso exirî ke kopi,

kahra ro mak xakn̂e.

17 Oyepor̂akn̂e ro mak Homa pona tmokuche.

Pahkî n̂he oyeporîche oyen̂akn̂e tak.

18 Pahxa oyakronomekn̂e marha noro Epesu po oyexitaw.

Mîn hak poko oyakronomekn̂e awero ro rma.

Ero ke Kporin komo mohtopo me enmayataw amn̂e noro pînîn yaw exi xe xa wasî.

Ero wa exi xe wasî Noro Onesiporu poko.