Tooto Yanton Komo Panatanmetopo
6
Taa,
on wara wîîkes hara awya okopuci,
tooto yanton komo marha panatanmeko.
Awosom komo ponaro men ehcoko,
an̂ewetîrî komo me encoko,
kasko yîwya so.
Ero wa enîhra awexitaw so Kaan yosotî nîwîrîyakexe anarî komo kica awanme so.
Kaan ya kpanatanmetopo marha nîwîrîyakexe.
Ero wa exihra ehtome so awosom komo ponaro xa ehcoko,
kasko yîwya so.
2 Xesus pona enîn̂e me exitaw awosom komo noro yipu ponaro rma ehcoko,
kasko marha yîwya so.
Oyakno mak mîkro.
Ero ke ewetîra wasî,
kahra ro mak ehcoko.
Noro yipu komo yewetîn̂e me xa matko ehcoko Kaan pona enîn̂e me exirî ke so,
tîpîn̂em me exirî ke so marha Kaan ya,
kasko yîwya so.
Ero yipu poko men panatanmeko iitono komo,
tooto yanton kom ha.
Kporin Komo Mtapotarî Yanwekn̂e Komo Yai Etowko
3 Taa,
anarme kan̂e me exitaw iito apanatanmekn̂e komo,
on wara yîhtînoko noro yipu komo,
yaarono yanwekn̂e me yîhtînoko,
Kporin komo Xesus Kristu mtapotarî yanwekn̂e me rma kica.
Kaanî mtapotarî yaw roro panatanmekno rin̂e mera mak naxe okwe.
4 On warai komo marha mîkyam noro yipu komo,
cehcoyoponkaxmu komo mîkyam kica,
camkîno komo rma okwe.
On wara kacho xa mîn kîmtapotarî yaro ketaw,
kexe.
Ero wa n̂eseseyukyaxe ero pîntho poko mak kica.
Kicicme kiin̂e mîn okwe noro yipu komo mtapotarî.
Kyopono komo xatî pîn me kiiraxe so,
cetanwesom me marha,
yîwîrîyakano rin̂e me marha,
kicicitho mîkro owya,
kan̂e me marha.
Ero warai me kiir̂axe so kica noro yipu komo mtapotarî.
5 On wara marha naxe anarî komo ero poyero,
cetanwesom me ro mak naxe kicicitho ponaro cexirî ke so.
Yaarono ponarono pînî ro mak mîkyam.
On wara kan̂e mîkyam,
Kaan yewetîn̂e me kexitaw mer̂pora n̂he tahsîyasî kupurantan okre,
kan̂e komo kica.
Ero wa kan̂e komo mîkyam kica.
Ero ke noro yipu komo yakrono mera ro mak esko.
Kicicme Cehtîkexe Kica Puranta Poko Kepohketaw So
6 Kaan ponaro xa cexpore nasî,
cerepore cexpore marha nasî.
Ero wa kexitaw so cepethîkem yahsîn̂e wara rma taxe okre,
mer̂pono pîn yahsîn̂e wara.
7 On wara tîxatken̂e kewruyataw so,
Ahce na ekîhra ro mak tîxatken̂e oona roowo pona.
Ero wa xa marha taxe kwaihyataw so hara,
arîhra ro mak taxe kemyawno komo.
8 Ero ke cerepore mak cehcerî tînahke kexitaw so,
tponoye kexitaw so marha.
9 Tupurantan komo yepamnopu xe ro makî tko naxe anarî komo kica.
Ero wa cexirî komo ke kicicitho poko n̂epohkexe kica.
Xiika yawno wara mak naxe okwe.
Mîn hak poko n̂epohkexe ero pîntho poko mak kica,
cemetanmetopo komo poko rma okwe.
Kwaihkan̂e komo mak mîn ero yipu okwe,
yîwîrîmacho komo mak ha.
Ero wa naxe tupurantan yepamno xatî komo.
10 On wara nasî puranta ponaro xa kehtopo,
kicicitho pokono me kiitîkan̂e me nasî kica,
anarmerpan pokono me.
Ero wara rma naxe anarî komo okwe,
tupurantan komo xe ro mak n̂ehtîkexe.
Ero ke Kaanî mtapotarî ponarora tak n̂ehtîkexe okwe.
Tahwokacho ke ceparaxkaxmu wa marha naxe oko.
Ero wa naxe puranta xatî me cehsom kom okwe.
Karitî Me Awehtopo Ponaro Esko Miya Xe N̂he
11 Ero ke ero warahra reha esko amoro Cimocu.
Kaan yantonî ro amoro.
Ero ke cemahcisom wa mak esko puranta poko awepokacho yai.
Kir̂wan me awehtopo poko xa matko epohkakî,
Kaan wara awehtopo poko marha,
Kaan pona enîn̂e me awehtopo poko marha,
etîxatî me awehtopo poko marha,
ahwokan me awehtopo poko marha,
tawakem me awehtopo poko marha.
Ero wa awehtopo poko reha epohkakî amoro.
12 On wara marha esko,
kicicitho poko cetar̂maxmu me marha esko.
Kaan pona enîn̂e me esko ero yipu yopono me awehtome.
Waipînî ro me awehtopo ponaro esko miya xe n̂he.
Ero warai me awitome awan̂ikyakn̂e Kaan,
waipînî ro me ha.
Kir̂wan̂he esekatîmxapu marha amoro mer̂pono pîn komo n̂entarî me.
Ero ke ero yipu poko esko.
13-14 Ero wa men esko,
wîîkes awya.
Kaan n̂entarî me tan wîîkesî,
waipîn me ciino rin̂e n̂entarî me ha.
Kristu Xesus n̂entarî me marha tan wîîkes awya.
Kir̂wan̂he xa Poncu Piratus ya n̂esekatîmyakn̂e,
Noro n̂entarî me tan wîîkes ero wara.
On wara marha wîîkesî,
anarme exihra ro mak esko.
Kicicme mas okwe,
kacho mera ro mak.
Ero wa esko miya roro Xesus Kristu mohtopo pona roro.
15 Mokyasî rma Noro amn̂e,
Mohtopo me tak nas oroto,
ketaw tak Kaan ya.
On warai Mîkî Kaan,
Noro mak Mîk kayaritomo xa,
kir̂wanî ro xa.
Kayaritomo komo kayaritomon xa Mîk ha,
yîxawyakan komo kayaritomon marha,
ero warai Mîkî kaan.
Noro rma ero wa kesî amn̂e Kristu mohtopo poko.
16 On warai marha Mîk Kaan,
waipînî ro mak Mîk ha.
Weeyu imo pono marha Mîk ha.
Ero pona tohnî ro thakwa kîwyam weeyu imo pona.
Kaan mak nasî ero po.
Noro yenîn̂enho exihra ro mak nasî tooto.
Esenpon me mak nasî tooto ya.
Ero ke on wara kapore nasî yîwya,
Amna yopono ro xa Amoro Apa,
takîhsom xa.
Karitî ro mak Amoro,
kapore nasî yîwya.
Ero wa kapore nasî Kaan ya miya roro.
Yaaro wîîkesî ero wara.
Cemyawnoyem Komo Panatanmetopo Xa Hara
17 On wara marha wîîkes awya,
cemyawnoyem komo panatanmeko iito,
roowo pono ro ke cemyawnoyem kom ha.
On wara kasko yîwya so,
Ehcoyoponkara men ehcoko.
Apurantan komo pona enîhra marha ehcoko.
Cehcamnosom mak mîn puranta.
Ero ke Kaan pona mak encoko.
Kwakren̂e xa Mîk Kaan.
Miyanî mko rma nîmyasî kîwya so tahwore n̂he kehtome so,
kasko yîwya so.
18 On wara marha kasko yîwya so,
emyawnomnî komo yakronoman̂e me ehcoko.
Awemyawnonhîrî poi rma tîmcoko yiixe ehtopo komo.
Cesemetanmesom wakren̂e me marha ehcoko.
Ero wa awexitaw so cemyawnoyem me xa tak maxe kir̂wan̂he awehtopo ke rma okre.
19 Kah yawno marha mepamnoyaxe,
amn̂e anahsîrî komo.
Ero ke ero wa ehcoko waipinî ro me awehtopo komo ponaro xa awehtome so,
kasko yîwya so.
Ero wa kasko cemyawnoyem komo ya.
Kaanî Mtapotarî Yekatîmrî Ponaro Xa Esko
20-21 On wara wîîkes hara awya Cimocu,
tîmtapotarî yekatîmn̂e me awir̂akn̂e Kaan.
Ero ke ero wa awehtopo men ahsîpînkara esko.
Kaan warahra tîmtapotaxmu komo tko na natu iito amn̂e.
Tohnawno poko mak na nîmtapowatu.
Mîn hak poko ehcamhokaxapu amna.
Camkî mak maxe amyamro reha,
ketu marha na.
Ero pîntho poko ehcamhokaxapu mak ha tko mîkyam okwe.
Ero yipu poko cehcamhokarî ke so anarmen ponaro tak naxe okwe,
Xesus pona cenpore nasî,
kacho ponarora ro mak.
Ero ke noro yipu komo yentan̂e pîn me ro mak esko.
Taa,
Kaan ya awakronoma xe wasî.
Ero wa mak wîîkes awya.
Amen.