Taa,

on wara wîîkes hara awya,

poritomo komo eihra ro mak esko.

Kir̂wan̂he mak panatanmeko.

Aamo ya ketawno wara rma kasko yîwya so.

Awecenarîno komo reha panatanmeko awakno komo ya ketawno wara hara.

2 Nocwakomo me cehsom komo panatanmeko anocwan komo ya ketawno wa hara.

Emasî komo ya kasko awepeka komo ya ketawno wa hara.

Tweeno me mak panatanmeko emasî me cehsom komo.

3 Iin̂o waihxapu komo ponaro marha esko.

Wakren̂e me esko iyanamnî me exitaw so mak.

4 Tîmxîkye tko na natu anarî komo,

iin̂o waihxapu komo,

tpake marha na natu.

Noro yipu komo exitaw n̂examro xa cepamnopore nasî cokori tîhyawno komo yakronomacho poko.

Tîîm komo ya twakretoponhîrî komo poko cesepanpore rma nasî.

Kîîm komo wakrecho kir̂wan̂he nasî Kaan ya,

knocwan komo wakrecho marha.

5 Epamthîrî exihra ro makî tko exitaw iin̂o waihxapu Kaan pona mak tak n̂een̂asî.

Noro yakro nîmtapowasî roro yiixe cehtopo poko,

ahce na poko marha.

Kosope nîmtapowasî,

katpanaw marha.

Ero wa nasî epamthîrî exihra exirî ke thakwa.

6 On wara tko nasî wooxam cesewakomaxmu ro,

waihxapu wa mak nas okwe waipîn me rma cexitaw.

7 Ero yipu poko men panatanmeko iitono komo,

etanwekpon me kasko yîwya so.

Ero wa men ehcoko,

Kicicitho mîkyam kica,

kacho mera ro mak awehtome so,

kasko yîwya so.

8 Anarî komo na tîyanan komo wakrera ro mak na nat okwe,

tîhyawno komo rma na wakrera.

Kicicme xa naxe okwe noro yipu komo.

Kicicme rma re naxe Kaan pona enîn̂e pîn komo.

Tîyanan komo wakren̂e pîn komo reha naxe kicicme xa tak.

Kaanî mtapotarî yanwekn̂e me ro mak naxe kica noro yipu komo.

9-10 Iin̂o waihxapu komo yanan exihra exitaw so,

karita yaka noro yipu komo yosotî tmewrepore nasî Kaan xîkrî komo nwakrerî me.

Nocwakomo me cehsom komo yosotî mak tmewrepore nasî.

60 cimn̂ipu xawyaka mak exitaw ewrutoponhîrî noro yipu yosotî mewrera cexpore nasî.

Kir̂wan̂he cehsom komo yosotî mak tmewrepore nasî,

on wara cehsomînhîrî komo yosot ha,

cewn̂an ke ciin̂oyemînhîrî komo,

rikomo pormamnon̂enho komo,

pawana yetarî yenpon̂enho komo,

Kaan xîkrî komo tarî korokan̂enho marha,

cesemetanmesom komo yakronoman̂enho komo marha.

Noro yipu komo yosotî mak tmewrepore nasî,

kir̂wan mîk wooxam okre,

kacho yosotî komo mak ha.

Ero wa yîhtînoko tmewresom komo.

11 Emasî me cehsom komo yosotî mewrera esko.

Tweeno pîn me na natu amn̂e kica,

Kristu xatî pîn me marha okwe.

Ero wa cexitaw so ciin̂o xe tak na nat hara.

12 Kicicitho mîkyam okwe,

kacho me mak naxe okwe.

Ero wa naxe tîmtapotachonhîrî komo yaw roro exihra cexirî ke so,

yaaro xa ketken̂e kir̂wan̂he cehtopo komo poko,

ero wa kacho yaw roro exihra naxe okwe.

13 Nuwun̂waxe mak tak noro yipu komo okwe.

Cetarisom me mak naxe okwe tpoyino komo yaka anarî yaka,

anarî yaka,

ero wara.

Tooto poko tîmtapotaxmu me marha naxe okwe.

Ewrucpeno rin̂e me marha naxe okwe,

tapota yakpan̂e me marha naxe kica.

Ekatîmnî ro yekatîmn̂e me mak naxe okwe.

14 Ero ke in̂onta xe so mak wasî emasî me cehsom komo n̂he,

iin̂o waihxapu kom ha.

Yîmxîta xe marha wasî,

takîhso tîhyawno komo yenîn̂e me marha exi xe wasî.

Ero wa exi xe so wasî etwîrîyakamexpon me ro mak tak cehtome so Kîîxatî pînî ro ya.

15 Ero wara rma tko naxe anarî komo okwe.

Satanas pona tak n̂etowyatken̂e kica Kaan ponarononho komo rma okwe.

16 Ero ke on wara kapore nasî wooxam komo ya Kaan pona enîn̂e me exitaw so,

Ayanan exitaw iin̂o waihxapu,

akronomacoko amyamro rma,

kapore nasî yîwya so.

Iyanamnî ro komo ya makî reha cekampore nasî Kaan purantan,

Noro yipu komo yecenarî rma ehtome.

17 Taa,

Kaan mîn yenîn̂e komo poko kîmtapowas hara.

Takîhso xa exitaw so noro yipu komo Kaan mîn yenîrî poko mer̂pora n̂he tîmpore nasî yîwya so puranta.

Kaanî mtapotarî yekatîmn̂e me marha naxe anarî komo,

Kaan mîn yenîn̂e komo rma,

panatanmekno rin̂e me marha naxe anarî kom hara.

Noro yipu komo ya xa tîmpore nasî puranta anarî komo yopo.

18 Ero yipu poko rma wa kesî Kaan Karitan.

On wara kesî,

Awoh komo na mapicketu paaka puruma yîpîpîtîkacho poko.

Ero poko apicketaw potmira ehcoko.

Nahpe rma ciki ka tînapikrî poi rma,

kesî.

Cepemapore men nasî cetapickaxmu komo,

kesî marha Kaan Karitan.

Ero wa kesî Kaan Karitan.

19 Anarimaw na kicicme Kaan mîn yenîn̂e yehtopo mence okwe.

1 mak exitaw ponanîmton̂e,

en̂ekara rma esko.

2 exitaw iito re ekatîmn̂e,

3 exitaw anarimaw,

ero wicakno komo exitaw en̂ekacoko tak ha.

20 Yaaro xa yîhtînoyataw awya so kicicme ehtopo,

noro yîtwermakî yakentaka.

Ero wa yîtwermakî panatachome so tak anarî kom hara.

21 Ero wa men esko kicicme ehxapu komo poko watohnî me ro mak.

Moso makî reha wîtwermesî.

Yiixe oyehtopo reha mîkro.

Ero ke n̂expe mak noro yîtwerman me,

kahra ro mak esko.

Kaan n̂entarî me ero wa wîîkes awya,

Kporin komo Xesus Kristu n̂entarî me marha.

Ancu komo n̂entarî me marha wîîkesî,

Kaan nmen̂ekatho komo mîkyam ancu komo,

noro yipu n̂entarî me ha.

Etîme re mak en̂ekacoko kicicme ehxapu komo.

22 Kaan mîn yenîn̂e me ciisom yîhtînoyataw awya erekamra mak cirko.

Kicicitho pokono komo yakronoman̂e me exihra ro mak esko.

Kicicitho me ecirpora ro mak esko.

Ero wara esko.

23 Taa,

kar̂pera awehtopo poko kîmtapowas hara awakro.

Emapona tî n̂erewa awethîrî oko.

Emapona tî mamotoya okwe.

Tuuna yeen̂e mak amoro ha.

Ero ke uupa yukun marha tak erko cik ha re awehci me tak.

24 Anarmerpa nasî kicicme cehsom komo yehtopo,

Anarî komo yehtopo n̂esenpesî kir̂wantawno wara.

En̂ekan̂e komo rma n̂encexe ponanîmtoxapu yan̂ikîra rma ka exitaw so.

Anarî komo reha pîra nasî.

Esenpon me makî ka nasî kicicme ehtopo komo reha.

Amn̂e mak ero yipu komo yehtopo n̂esencesî pahkî exiche.

25 Ero wa xa marha nasî kir̂wan̂he kehtopo kom hara.

Miyan komo n̂enîrî me rma nasî kir̂wan̂he anarî komo yehtopo anarimaw.

Anarimaw xa hara esenpon me rma ka nasî kir̂wan̂he anarî komo yehtopo hara.

N̂esehtînomexpesî rma tko amn̂e kir̂wan̂he ehtopo komo eyamnî me ro mak ha.

Ero wa nasî kehtopo komo.