On okaritan an̂enîrî kom hara.

Pawru ow ha.

Siwpanu yakro amna mewresî,

Cimocu yakro marha.

Ero wa nas amna on mewren̂e.

Tesaronika pono komo amyamro,

Kaan xîkrî komo,

Kîîm komo xîkrî kom ha.

Kporin komo Xesus Kristu yakrono ro komo marha amyamro.

Noro yipu komo amyamro.

2 Awakronoma xe so wasî Kîîm komo Kaan ya.

Ahwokan me marha awiri xe so wasî yîwya.

Ero wa awiri xe so wasî Kporin komo Xesus Kristu ya marha.

3 Emapona roro amna nîmtapowasî Kaan yakro apoko so oyakno komo.

On wara amna kesî yîwya,

Kir̂wan̂he xa mai ham Apa.

N̂examro makir̂wame ham okre,

kes amna apoko so.

Yaaro amna nîîke ham ero wa apoko so.

Kaan pona enîn̂e me ro makî tî mehtîketu okre.

Awakrono komo xatî me marha tî mehtîketu.

Ero ke ero wa kes amna apoko so.

4 Ero ke miyan komo ya rma awekatîmyaxe so amna,

Kaan xîkrî komo ya.

Kir̂wan̂he naxe Tesaronika pono komo okre,

kes amna yîwya so.

On wara naxe cemetanmetopo komo nînîmyaxe tahwokamexpotopo komo marha nînîmyaxe.

Ahnoro ero yipu mko nînîmyaxe ahwokan me,

Kaan pona enîhkan̂e pîn me marha,

kes amna apoko so,

kes amna apoko so.

Ero wa awekatîmyaxe so amna.

5 Ero wa awemetanmekrî ke so aaxatî pîn komo ya takîhso Kaan yehtopo n̂esenpesî.

N̂examro pen tak n̂emetanmekyasî ro mak amn̂e Noro.

Yaaro rma n̂emetanmekyas ha.

Amyamro reha Noro maywen me maxe amn̂e awemetanmetopo komo yînîmrî ke awya so.

6 Yaaro rma awemetanmekn̂enhîrî pen komo n̂emetanmekyasî Kaan amn̂e.

Awepantopo komo rma mîn emetanmetopo yîwya.

7 Cerepore tak maxe amyamro reha emetanmexapunhîrî.

Amna yakro rma merepowaxe.

Ero wa maxe Kporin komo Xesus mokyataw hara.

Kaan yancun komo yakro tî mokya,

karitî komo yakro.

8 Ero yimaw tak Kaan ponarono pîn komo nakn̂iyasî Noro oco.

Mararî yecakyatawno wara ro mak n̂ecakyaxe n̂examro.

Kporin komo Xesus ya kakir̂wamacho komo yanwekn̂enho komo mîkyam ero wa naxe okwe.

9 Eroromero twaihsom me tak naxe n̂examro pen okwe.

Kporin komo yaka tohnî me ro mak naxe okwe.

Karitî me Noro yehtopo yenîn̂e pîn me marha naxe okwe.

Cenporem xa mîn karitî me Noro yehtopo.

Ero yipu yenîn̂e pîn me thakwa naxe.

Ero wa awemetanmekn̂enhîrî komo n̂emetanmekyasî Xesus amn̂e tmokyataw hara.

10 Kir̂wanî ro me esenposo mokyasî.

Ero wa n̂esenpesî tînakir̂wamathîrî komo ya,

tpona enîn̂e komo ya ha.

N̂examro yahwotacho me xa wa n̂esenpesî.

Awya so marha n̂esenpesî amna n̂ekatîmîtho yewetîn̂e me awexirî ke so.

11 Ero ke amna nîmtapowasî roro Kaan yakro apoko so.

On wara kes amna,

Apa kah yawno,

n̂examro mahsîyakn̂e amxîkrî me.

Ero ke kir̂wan̂he cma re n̂examro miitîkesî amxîkrî warai me xa tak ehtome so.

Kar̂pe awexirî ke ero wa cma re miirasî,

apona enîrî ke so,

kes amna apoko so.

12 Ero wa nîmtapowas amna apoko so kir̂wan̂he xa tak Kporin komo Xesus Kristu yosotî yekaiporetome tak miyan komo n̂entarî me.

Amyamro marha mesekaiporexe Xesus warai me rma awesenporî ke so okre.

Ero wa awehtome so apoko so amna nîmtapowasî awakir̂wamatîkacho komo poko.

Ero wa awakir̂wamexe so Kaan awakretopo komo me mak.

Ero wa awir̂axe so.