On okaritan an̂enîrî komo.

Pawru ow ha.

Siwpanu yakro amna mewresî,

Cimocu yakro marha.

Tesaronika pono komo amyamro Kaan xîkrî komo,

Kîîm komo xîkrî ha.

Kporin komo Xesus Kristu yakrono ro marha amyamro.

On wara wîîkes awya so,

awakronoma xe so wasî Kîîm komo Kaan ya.

Ahwokan me marha awiri xe so wasî yîwya.

Ero wa awiri xe so wasî Kporin komo Xesus Kristu ya hara.

2 On wara nas amna apoko so,

emapona roro amna nîmtapowasî apoko so Kaan yakro amna yîmtapowataw.

Kir̂wan̂he xa mai ham Apa,

n̂examro makir̂wame ham okre,

kes amna apoko so.

3 On wara marha amna kesî Kîîm komo Kaan ya apoko so,

Mîn hak poko n̂ekaricexe n̂examro Apa okre apona enîrî ke mak.

Tpoyino komo yakronomarî poko n̂ekaricexe tpokaxi ro etîxatî me cexirî ke so marha.

Kporin komo Xesus Kristu mohtopo ponaro marha naxe.

Ero ke cemetanmetopo komo yînîmn̂e me naxe okre Apa,

kes amna apoko so.

Ero wa amna nîmtapowasî roro Kîîm komo Kaan yakro.

4 Amna yakno komo amyamro okwe.

Kaan nmen̂ekatho mîkyam,

kes amna apoko so.

Ero ke ero wara amna nîmtapowasî apoko so.

5 On wara mîxatken̂e pahxa amna mokuche acheka so,

yaarono me xa mencetken̂e amna mtapotarî Kaan ya kakir̂wamacho komo yekatîmtopo.

Tapota me kyam mak entara ro mak mîxatken̂e.

Awakir̂wamacho me so xa mencetken̂e,

Kir̂wanî ro Yekatî mtapotarî me xa.

Kir̂wan̂he marha amna n̂esenpekn̂e awya so tîmtapotarî ponaro xa tak awehtome so.

Ero ke yaaro xa ekatîmn̂e me amna mencetken̂e.

Ero wa amna mencetken̂e.

6 Amna npanatanmekrî me tak mîxatken̂e,

Kporin komo npanatanmekrî me marha.

Ero wa mîxatken̂e awesemetanmekyataw so rma.

Kaanî mtapotarî yewetîrî ke mak awya so miya xe xa awemetanmekyatken̂e so okwe aaxatî pîn komo.

Kir̂wanî ro Yekatî tko awahworetken̂e so.

7 Ero ke awara xa marha cexi xe xatken̂e anarî kom hara Kristu pona enîn̂e komo.

Ero wa xatken̂e Maseton̂a pono komo,

Akaia pono komo marha.

8 Awanme so rma Kporin komo mtapotarî n̂esencesî miya so rma.

Maseton̂a pono komo n̂encexe,

Akaia pono komo marha,

mîn hak pono komo marha.

Ero wa Kaan pona enîn̂e me awehtopo komo n̂encexe tanhamyan komo rma okre.

Ero ke kir̂wan̂he awehtopo komo yekatîmra rma nas amna yîwya so pahxa rma entarî ke.

9 N̂examro xa matko ero wa awehtopo komo n̂ekatîmyaxe.

On wara mîxatken̂e,

Kaan pona xa tak meen̂atken̂e ahyaka so amna mokyataw.

Mik hak warai me ciixaputho pona ka meen̂atken̂e,

noro yiputho tak mahsîpînketken̂e Kaan yewetîn̂e me tak awehtome so hara okre.

Noro xa Mîkî karitî,

yaarono xa.

Noro yipu pona tak meenatken̂e.

10 Kah yai Yumumuru mohtopo ponaro marha tak maxe.

Kaan n̂enpakatho Mîk Yumumuru waixapu komo chewnonho,

Xesusu rma.

Noro rma tak kukurunpexe so amn̂e Kaanî rwonîmtopo me xa enmayataw tak.

Noro mohtopo ponaro tak maxe.

Ero wa awehtopo komo n̂ekatîmyaxe tanhamyan komo amna ya.