On okaritan an̂enîrî komo.

Pawru ow ha,

Xesus Kristu nantomatho.

Kaan yanme oyantomekn̂e.

Kakno komo Cimocu,

owî,

ero wa nas amna on mewren̂e an̂enîrî komo.

2 Kaan nakir̂wamatho komo amyamro,

Korosu pono kom ha.

Kaan ponarono komo amyamro,

anarî pona etowînî ro kom ha.

Ero warai komo amyamro.

On wara awiri xe so wasî Kaan ya,

awakronoma xe so wasî yîwya.

Ahwokan me awiri xe so marha wasî yîwya.

Ero wa awiri xe so wasî Kaan ya,

Kîîm komo ya ha.

Kporin komo Xesus Kristu ya marha ero wa awiri xe so wasî.

3 On wara wîîkes awya so,

emapona roro amna nîmtapowasî Kaan yakro apoko so.

On wara amna kesî,

Kir̂wan̂he xa mai ham Apa okre.

N̂examro makronome ham okre,

kes amna.

Emapona roro ero wa kes amna apoko so Kaan yakro tîmtapowataw.

4 Ero wa amna nîmtapowasî apoko so kir̂wan̂he awehtopo komo yentarî ke.

Xesus Kristu pona enîn̂e komo xa mîkyam okre,

kacho amna n̂entai,

Kaan xîkrî komo xatî marha mîkyam okre,

kacho marha.

Ero wa awehtopo komo amna n̂entai.

5 Ero wa maxe awakno komo poko on wara kacho ponaro awexirî ke so,

Amne kah yaw kakir̂wamatîkacho nas okre,

kacho.

Ero pokono mencetken̂e pahxa Xesus ya kakir̂wamacho yencetaw rma awya so.

Yaarono xa mîn mencetken̂e Xesus ya kakir̂wamacho.

6 Ahyaka so rma tî cetken̂e Kaanî mtapotarî yekatîmn̂e komo.

Ahnoro roowo poko hakno komo cheka marha cetken̂e.

Ero ke yîmtapotarî yentarî ke yîwya so cepetaxmu wara nasî yîchew so,

roowo poko hakno komo chew.

Achew so marha ero wa nasî.

Yaarono me xa mencetken̂e ham Kaan ya kwakrecho pokono.

Ero ke cepetaxmu wara xakn̂e mehxaro rma entache xa ka awya so.

Ero wara rma n̂eperwasî roro oroto okre.

7 Epapras n̂ekatîmyakn̂e ham awya so.

Tîpîn̂em xa mîk Epapras amna ya.

Kaan yanton marha mîkî amna yakrono rma.

Ahwokara apanatanmekn̂e komo mîk ha Kristu mtapotarî poko.

8 Noro marha awekatîmyatken̂e so amna ya hara.

Etîxatî komo mîkyam okre.

Kaan Yekatî yanme rma ero wa etîxe naxe,

kekn̂e amna ya apoko so.

Ero wa kekn̂e noro.

9 Ero ke ero wa awehtopo komo yentarî ke apoko so nîmtapowasî roro amna apoko so.

Yîtîhkara amna nîmtapowasî.

On wara kes amna Kaan ya,

Apa kah yawno,

On wara cma re Korosu pono komo miir̂asî,

Ero wa xa kexi xe nai Kaan,

kacho yîhtînon̂e me roro xa cirko.

Yuhnari yîhtînon̂e me xa cirko ero wa kacho poko.

Kaan Yekatî ponarono me xa cirko.

Ero wa xa n̂examro cirko,

kes amna apoko so.

10 On wara marha amna kesî apoko so,

Apa,

amxîkrî mexan me n̂examro cirko,

an̂enîrî mexan me xa ha.

Ahce na pokono me n̂examro cirko,

kir̂wan pokono me ha.

Ero wa cirko cepetaxmu wara.

Kir̂wan̂he awehtopo poko n̂examro yîhcamhokatîkakî n̂he marha.

Ero wa n̂examro cirko,

kes amna Kaan ya apoko so.

11 On wara marha kes amna apoko so,

Kar̂pe xa n̂examro cirko Apa.

Kar̂pe xa masî Amoro ero wa xa marha n̂examro cirko hara.

Kir̂wan mîn kar̂pe awehtopo.

Ero ke n̂examro karihtoko ahwokan me ro mak tak ehtome so.

Esemetanmekyataw so ahwokan me rma cirko.

Tahwore xa matko cirko ero wa exitaw so.

Ero wa ehtome so n̂examro karihtoko Apa,

kes amna apoko so.

12 On wara marha amna kesî Kaan ya,

Kir̂wan̂he xa mai ham Apa okre.

Amna makronome ham okre.

Anakir̂wamathîrî komo makronomesî katpanawno kom ha.

N̂examro yakrono me xa marha amna miir̂akn̂e anakronomarî me hara,

kes amna Kaan ya.

13 Ero wa kiir̂atken̂e so Kaan.

Awarpan chewnonho thakwa kîwyam katpan pona tohnî me thakwa.

Noro yipu rma kahsîyatken̂e so.

Katpanawno me tak kiir̂atken̂e so hara.

Tumumuru maywen me marha kiir̂atken̂e so,

yiixe xa cehtopo maywen me ha.

14 Noro rma kepemetken̂e so tkamxukuthîrî ke rma.

Ero ke kicicme kehtoponhîrî komo tak nîhcamnoyakn̂e Kaan.

Ero wa kiir̂atken̂e so okre.

15 Taa,

Kaan Mumuru pokono tan wekatîmtîkesî n̂he awya so.

On warai Mîk Noro Mumuru,

Kaan warai xa Mîk ha.

Enîhnî ro Mîkî Kaan,

Noro warai xa marha yumumuru.

Poturme ewruxapu Mîk Noro,

ahce na yakîhtonaw ewruxapu ha.

16 Yîwya rma Kaan nakîhtopekn̂e miyan komo rma.

Kah yawno komo nakîhtopekn̂e yîwya,

roowo pono komo marha.

Censom komo nakîhtopekn̂e yîwya,

enîhnî komo marha.

Kayaritomo komo marha nakîhtopekn̂e yîwya yukurumîkno komo,

yîxawyakan komo marha.

Ahnoro mak Kaan nakîhtopekn̂e Tumumuru ya akîhtoxapu yosom me ehtome.

17 Pahxan Mîk Kaan Mumuru,

akîhtoxapu komo yexihnawno ro mak ha.

Noro rma tak nasî akîhtoxapu yecehton̂e me.

Miyanî mko rma n̂ecehcesî ewakrokara ehtome.

Noro yipu Mîk Kaan Mumuru.

18 On wara tak taxe kîwyam Kaan xîkrî komo Yumumuru pun me rma taxe.

Kîhtîpîrî komo me tak nasî Noro hara.

Kpotuthîrî komo Mîk Noro,

yihcirî me tpakarî ke waixapu pen komo chewnonho.

Ero wa tpakarî ke kyopono me nasî.

Noro yanton mak kîwyam.

19 Miya rma nai ahce wa na Kaan yehtopo,

kar̂pe nai,

takîhso marha nai,

kîîxatî me marha nai.

Ero wa nasî Yîîm.

Ero wa xa marha Tumumuru ciri xe xakn̂e hara.

Ero ke ero wara n̂iir̂akn̂e.

20 Yumumuru waihîrî ke tîîxatî me tak kiir̂atken̂e so Kaan,

tîîxatî pînînhîrî komo rma.

Tpanaxkem po waihyakn̂e,

ero ke noro kamxukutho yanme takî tîîxatî me n̂iir̂akn̂e tînakîtothîrî ahnoro roowo pono mko,

kah yawno mko meero marha.

21-22 Kaan xatî pînînhîrî thakwa amyamro.

Kicicitho pokono me awexirî ke so mak ero wa mîxatken̂e.

Noro yipunhîrî rma tko tîîxatî me Kaan awir̂atken̂e so hara.

Xesus waihkapekn̂e tîîxatî me awitome so Noro pun yanme.

Amn̂e tak kir̂wanî ro me tak awir̂axe so Kaan kah yaka awatome so cewton pona tak ha.

Kicicme rma cik maxe kica,

kacho mera ro mak maxe yîwya ero yimaw.

23 Ero wa awir̂axe so Kristu Noro pona enîn̂e me awexitaw so miya roro.

Apohana,

kir̂wan̂he ma re kiir̂atu so Kaan amn̂e Kristu pona enîn̂e me kexitaw so mak,

kahra ro mak awexitaw so ero wa awir̂axe so.

An̂entathîrî komo rma mîn Kristu ya kakir̂wamacho.

Miyan komo n̂entatho marha mîn roowo poko hakno komo n̂entatho ha.

Noro ya kakir̂wamacho yekatîmn̂e me ciixapu ow ha,

Pawru ha.

24 Kesemetanmekyasî rma tko tan kir̂wan̂he awitome so rma.

Kristu yesemetanmetoponho yakwenho rma tan opun yemetanmetopo ha.

Ero ke tahwore rma wasî oyesemetanmekyataw rma.

Miyanî rma wînîmyasî cerewrem Kristu pun me cehsom komo yakronomachome,

Kaan xîkrî komo yakronomachome ha.

25-26 Kaan yanton mak ow ha,

Noro mtapotarî yekatîmn̂e me ciixapu.

Awya so rma ekatîmn̂e me oriyakn̂e,

ekatîmnînhîrî yekatîmn̂e meero.

Pahxan pen komo reha entara ro makî tî ka xatken̂e ero yipu.

Oroto mak tak Kaan n̂ekatîmyasî tînakir̂wamathîrî komo ya.

27 Noro yipu komo ya tak entanînhîrî yekatîm xe xakn̂e,

Kir̂wan̂he xa tak Xenciu komo n̂iir̂asî Kaan,

kacho ha.

Kir̂wanî ro mak mîn okre ero wa kacho.

Ero ke cepethîkem ke wakrexapu wara tak maxe amyamro,

Xenciu komo rma.

Ero wa maxe Kristu exirî ke aropotaw so.

Kir̂wan̂he ro mak awir̂axe so Noro amn̂e.

28 Ero ke Noro pokono xa n̂ekatîmyas amna awya so.

Atwermexe so marha amna kicicitho poko.

Kir̂wan̂he awehtopo komo poko apanatanmekyaxe so marha.

Awakîrexe so amna kicicitho ken̂ehra ro mak awehtome so.

Ero wa tak maxe amn̂e Kristu Xesus yakrono ro me awexirî xe so.

29 Ero ke awakîretopo komo poko kekaricetîkesî ro mak.

Kaanî rma tko n̂ekaricesî oropotaw.

Ero ke ero wa kekaricesî awakîretopo komo poko.