2
On wara wîîkes hara awya so,
Kaan yakro omtapotacho wekatîmyasî awya so.
Apoko so kîmtapowasî.
Kekaricesî ro mak apoko so omtapotacho poko.
Ero wa xa marha kîmtapowasî Rawciseia pono komo poko hara cerewre xa marha.
Mîk hak poko kîmtapowasî,
oyenîn̂enho pîn komo poko meero.
2 On wara wîîkes omtapowataw,
N̂examro cma re mahwores Apa.
Tpoyino komo xatî me marha cma re miir̂asî.
Apoko rma n̂examro yîhcamhokatîkakî,
wîîkesî.
Ero wa wîîkesî Kaan ya apoko so,
Rawciseia pono komo poko marha.
Ero wa awiri xe so wasî yîwya takîhso awehtome so Noro poko,
Yaaro xa ham,
ero warai Mîkî Kaan okre,
kachome marha awya so.
Ero wa awexitaw so cepethîkem yahsîn̂e wara xa maxe okre.
Pahxa entanînhîrî rma mîn Kaan pokono.
Kîîm komo pokono mîn,
Kristu pokono marha.
Kîwya so tak Kaan n̂ekatîmyas okre.
Ero poko awehcamhokatîka xe so wasî.
3 On wara kehtopo mko nasî Kristu yaw,
miyan poko rma takîhso kehtopo,
mîn hak poko camkîra kehtopo marha.
Cepethîkem warai xa mîn ero yipu.
Yîhyaw eyamxapu wara rma nasî.
Ero ke Noro poko awehcamhokacho komo poko kîmtapowasî Kaan yakro.
4 On wara marha wîîkes awya so,
naxe men okwe anato apanatanmekn̂e komo.
Noro yipu komo men awewkukmexe so okwe kpohkan̂e me tîmtapotarî ke okwe.
Kir̂wan komo wara rma nîmtapowaxe kica.
Ero ke Kristu poko kpanatanmekyaxe so noro yipu komo yewetîra ro mak awehtome so.
5 Mooxe thakwa was ahyai so.
Ahyaw so rma tko was ha ekatî me mak.
Takîhso awehtopo komo ween̂as okre.
Kristu pona enîn̂e me awehtopo komo marha ween̂asî,
etowîn me awehtopo komo okre.
Ero wa awexirî ke so tahwore wasî.
6 Ero ke on wara wîîkes awya so,
Kporin komo Xesus Kristu tak mahsîyatken̂e.
Ero ke Noro yewetîn̂e me roro ehcoko.
7 Noro ponaro xa ehcoko roowo cheka cimicintaxmu wara rma.
Mîîmo cicir̂axe mapata pona ero wara marha ehcoko hara Kristu poko.
Apanatanmetoponhîrî komo yaw roro mak ehcoko.
Tahwore ehcoko ero poko.
Kir̂wan̂he xa mai ham apa,
kacoko roro marha.
Ero wa xa ehcoko.
8 Twerî men ehcoko anarmen poko apanatanmekn̂e komo poko.
Awahsîyaxe so men okwe tîmtapotarî mak.
Yuhnarino poko rma re nîmtapowaxe.
Tohnaw mak kexe okwe.
Awewkukmexe so mak okwe.
Pahxan pen komo mtapotachonho yaw roro mak apanatanmekyaxe so noro yipu komo okwe.
Censom poko mak nîmtapowaxe roowo pono komo mtapotarî yaw roro mak.
Kristu poko xa apanatanmekîra ro mak naxe okwe.
Ero ke yîmtapotarî komo entara ro mak ehcoko.
9 On wara nasî Kaan,
kar̂pe nasî kyopo so.
Kir̂wan̂he marha nasî kyopo so.
Takîhso marha nasî kyopo so.
Ero wa Noro yehtopo rma nasî Kristu yaw hara.
Kaanî rma Mîkî Kristu,
tuhn̂emu rma.
Noro yaw rma nasî ahnoro Kaan yehtopo.
10 Ero ke kir̂wan̂he awehtopo komo nasî aropotaw so Kristu yakrono ro me awexirî ke so.
Ahce warai komo na kirwanhe kehtopo,
ahnoro rma tak nasî aropotaw so.
On warai Mîk Kristu,
kayaritomo komo kayaritomon xa Mîk yîtîhkathîrî xa.
Yukurumîkno komo kayaritomon meero marha Mîkî.
Noro yipu yakrono me maxe okre.
11 Etanpikaxapu komo wara marha maxe noro yakrono ro me awexirî ke so hara.
Tooto yamorî ken̂arî pîn mîn awetanpikacho komo.
Kicicme apun komo yehtoponho tko Kristu nowyakn̂e.
Ero ke tak awehtoponhîrî komo yewetîn̂e pîn me tak maxe ha.
12 Kristu yakro roowo cheka ahruxapunhîrî wa tak mîxatken̂e awemicataw so.
Noro yakro enpakaxapunhîrî wa marha tak mîxatken̂e hara Kaan ponaro awexirî ke so.
N̂ekaricekn̂e ro mak Kristu yenpakacho poko.
Ero wa Noro yehtopo ponaro awexirî ke so enpakaxapu wa xa marha maxe amyamro hara.
13 On wara ka mîxatken̂e pahxa,
waixapu wa ka mîxatken̂e aropotaw so kicicitho me awexirî ke so.
Anpikan wara marha ka mîxatken̂e awehtoponhîrî komo yewetîrî ke awya so.
Noro yipu komo rma awenpaketken̂e so Kaan okre.
Kristu yakro rma awenpaketken̂e so.
Awya so tanwetoponhîrî tak nîhcamnoyakn̂e okre.
14 Mewrexapunhîrî tak n̂ickekn̂e,
On yewetîra awexitaw so mîwaiyaxe okwe,
kachonho ha.
Kwaihkan̂e me mak mîn xakn̂e okwe ero wa kachonho.
Kaanî tko n̂ickekn̂e.
Weewe tpanaxkem poko woon̂e wa xakn̂e.
15 On wara marha xakn̂e Kristu twaihîrî ke,
Satanas nukurunkekn̂e,
worokyam marha.
Kayaritomo mera tak n̂examro n̂iir̂akn̂e.
Ero wa n̂iir̂akn̂e twaihîrî ke rma.
Mîk hak wero ro rma nar̂mekn̂e.
Ero wa nar̂mekn̂e.
Ero Pîntho Ponarora Ro Mak Ehcoko
16 Ero ke awîrîyakan̂e komo exitaw,
ponarora mak ehcoko.
Anahrî komo poko na awîrîyaketu so anarimaw,
awotî komo poko marha,
awokru komo poko marha.
Anarme na awen̂atu so Xutew komo yahwotacho yimawno poko,
nuun̂i yepatakacho yimawno poko anarimaw,
kepokaretopo yimawno poko hara na.
Ero yipu poko awîrîyaketaw so ponarora mak ehcoko.
17 Kristu mohtopo kuknon me makî ka xakn̂e ero yipu mko.
Ero wa nasî Kristu amn̂e,
kachonho mak ha.
Kristu mokrî ke tak.
Noro poko xa tak taxe okre,
yukuknon pokohra tak ha.
18 On wara naxe anato apanatanmekn̂e komo,
awewkukma xe so mak naxe okwe Kaan ya awepemacho komo yahsîra awehtome so amn̂e.
Ero ke noro yipu komo entara ro mak men ehcoko.
On wara kexe kica,
Kupun komo cemetanmekpore nasî,
kexe.
Ancu komo poko tahwotapore marha nasî Kaan pokono wara rma,
kexe marha kica.
Tîn̂enîthîrî pîn komo ponaro marha naxe kica.
Takîhsom ow ha,
kexe tohnaw ro mak kica.
Tanme ro mak n̂esehtînoyaxe ero wara kica.
Ero ke noro yipu komo mtapotarî ponarora ro mak ehcoko.
19 Kîhtîpîrî ponarora ro mak naxe okwe.
Kristu pun me taxe kîwyam.
On wara nasî kupun komo,
cetahsîsîknoso thakwa nasî kyochîrî yewru ke so,
kimicin komo ke marha.
Ero yipu karihton̂e me nasî kîhtîpîrî,
aan̂e me marha.
Kristu rma Mîk kîhtîpîrî komo.
Ero ke Noro yanme rma kîkaricexe so Kaan,
kakîhrexe so marha.
20 Pahxa mîxatken̂e roowo pono komo mtapotarî ponaro mak.
Kristu yakro takî tko mîwaiyatken̂e.
Ero wa awairî ke so tak roowo pono ro pîn me tak maxe.
Ero ke ahce kacho roowo pono wara rma matu?
Ero pîntho poko atwermacho komo mencexe okwe roowo pono ro wara rma.
21 Mîn hak poko atwermexe so roowo pono ro komo.
Ahsîra ro mak ehcoko kopi,
kexe ahce na poko.
Emehra ro mak ehcoko kopi,
kexe ahce na poko hara.
Apehra ro mak ehcoko kopi,
ahsîra marha ehcoko,
kexe anarî poko hara.
22 Cehcamnosom mak mîn ero yipu mko.
Tooto mtapotarî makî reha mîn ero poko atwermacho komo.
23 Takîhsom wara rma re mesenpexe ero yipu ponaro awexitaw so,
tohnaw ro mak okwe.
Kaan pokono wara rma maxe awanme ro so mak kica.
Akpîntho mak ow ha,
kan̂e wara rma re mesenpexe,
Apun komo memetanmekyatu anarimaw.
Kirwanhe oritopo mîn okre,
mîîkexe tohnaw ro mak okwe.
Kicicme kehtoponhîrî komo yar̂man̂e pînî ro mak mîn ero yipu ponaro kehtopo komo.
Ero wara men yîhtînocoko.