Kah Yawno Ponaro Mak Ehcoko
3
Taa,
on wara wîîkes hara awya so,
on warai amyamro,
Kristu yakro enpakaxapu amyamro.
Oroto tak meye nasî Noro kah yaw hara.
Kaan panaw nasî kaari n̂ixa.
Ero ke tîpîn̂e xa tak encoko iitono mko.
2 Iitono ponaro tak ehcoko,
kah yawno ponaro.
Roowo pono ponarono me xa exihra ro mak ehcoko.
3 Kristu yakrono ro me awexirî ke so Noro yakro rma mîwaiyatken̂e.
Pakekn̂e marha tak Noro.
Ero ke kah yaw tak nasî Kaan yaw.
Amyamro marha mîpaketken̂e Noro yakro rma.
Ero ke Kristu warai me awehtopo komo nasî ceyamso Kaan yaw,
kecehton̂e yaw.
4 Ahce warai me nai Kristu,
ero warai me xa marha taxe kîwyam hara kropotaw so exirî ke Noro.
Pahxaro tak Kristu mokyataw hara kir̂wanî ro me tak n̂esenpesî.
Ero yimaw amyamro marha kir̂wanî ro me mesenpexe hara Noro yakro.
5 Mîn hak xatî me nasî apun komo roowo po awexirî ke so.
Ero yipu xe apun komo yehtopo waihkan̂e wara makî tko ehcoko.
On wara nai apun komo,
apici pîn pokono me cexi xe nai,
kicicitho pokono me cexi xe nai,
mîn hak poko cepohkaxmu me marha nai apun kica.
Ahce wa na awexi xe so marha maxe apun komo yanme,
kicicme awexi xe so ha.
Expora marha maxe awemyawno komo xe.
Ciixaputho pokono wara rma maxe kica expora awexitaw so awemyawno komo xe.
Ero wa maxe.
6 Ero wa exirî komo poyero Kaan nîrwonasî anarî komo poko.
Kaan yanwekn̂e komo mîkyam,
poko yîrwonîmtopo komo.
7 N̂examro wa xa marha ka mîxatken̂e pahxa amyamro hara.
Kicicitho pokono me mak mîxatken̂e kica.
8 Ero warahra tak ehcoko oroto.
Arwonthîrî komo tak ahsîpînkacoko,
apoyino komo yeitoponho marha,
ahce na yerewtotoponho marha awya so,
Kaan yîwîrîyakacho marha awya so,
kicicitho poko amtapotachonhîrî komo marha.
Ero wa awehtoponhîrî komo tak ahsîpînkatîkacoko ahnoro rma.
9 Cemarontara marha ehcoko apoyino komo yakro amtapowataw so.
Ero wa awehtoponhîrî komo tak mîpînînketken̂e,
10 Anarme akîhtoxapu tak amyamro.
Ero wa awehtopo komo yamrun̂e wara tak mîxatken̂e hara.
Ero ke kir̂wan poko cesehtînosom me tak maxe okre.
Awakîton̂enhîrî komo wara tak mesehtînoyaxe okre.
Ero ke acemaronthîrî komo ar̂macoko.
Ero wa ehcoko ha.
11 Kaan wara cesehtînosom me kexirî ke so tak anarî komo yopono me kehtopo komo ponarora tak taxe.
Kreku xa owi reha,
Xutewtho makî reha amoro,
kahra tak taxe.
Anpikaxapu reha ow ha,
anpikantho makî reha amoro,
kahra marha taxe.
Camkînotho makî reha amoro,
Sita komo warai mak ha na,
kahra marha taxe.
Oyanme ro mak cetapickaxmu reha ow ha.
Antonanotho makî reha amoro.
Owî reha anto pîn,
kahra marha taxe.
Kristu ke tîropotawnoyem komo re kîwyam etîme re,
Kaan xîkrî me kexirî ke so.
12 On warai komo xa amyamro,
Kaan nmen̂ekatho komo re amyamro,
yînakir̂wamathîrî kom ha.
Tîpîn̂e xa awen̂axe so Kaan.
Ero ke apoyino komo pînîn yawno me xa ehcoko,
wakren̂e me marha ehcoko.
Iyopono me esehtînopîra ro mak ehcoko,
tîrwonpore marha ehcoko,
awemetanmetopo komo yînîmn̂e me marha ehcoko.
13 Awemetanmekn̂e wara apoyino yeen̂ataw awya so yînîmcoko mak.
Awemetanmetoponhîrî yîwya yîhcamnocoko mak.
Ero wa xa marha xakn̂e Kristu apoko so hara,
ahce wa na awehtoponhîrî komo nîhcamnoyakn̂e Noro hara.
Ero ke Noro wa xa marha ehcoko amyamro hara.
14 Etîxatî me awehtopo komo yamrun̂e wara xa ehcoko.
Ero wa awexitaw so kir̂wan̂he xa tak maxe okre.
15 Kaan ponaro awexirî ke so cerepore roro ehcoko.
Ero wa awehtopo komo nasî aweceton̂e komo me,
kicicme awehtoponhîrî komo pokono pîn me.
Ero wara awehtome so awan̂ikyatken̂e so Kaan.
Cewn̂an me rma kexi xe nai Noro.
Owî cma mîwakrew okre,
kan̂e me marha ehcoko Kaan ya,
tooto komo ya marha.
16 Kristu mtapotacho ponaro marha ehcoko.
Awakîrexe so Noro mtapotacho ero ponaro xa awexitaw so.
On wara marha ehcoko,
waano ke epanatanmecoko awakno komo yakro,
etahworecoko marha ahce wa na awehtopo komo poko.
Kaan Karitan yawno aacoko waano,
an̂irithîrî komo marha aacoko anarimaw.
Ahnoro Kaan pokono aacoko,
Noro Yekatî yanme ciixapu.
Kaan n̂entarî me rma aacoko,
Noro ya kakronomacho komo ponarono me xa.
17 Ahce na poko awexitaw so,
Kporin komo Xesus yakrono ro ow ha,
kacoko.
Ahce na poko amtapowataw so marha ero wa kacoko.
Noro yakrono me awexirî ke so mak kir̂wan̂he ehcoko.
On wara kacoko marha,
Amna mîwakrei ham Apa okre Xesus yakrono me amna miire okre,
kacoko roro Kîîm komo Kaan ya.
Ero wa xa kacoko.
Takîhso Ehcoko Etpoko
18 Taa,
wooxam komo,
on wara wîîkes awya so hara,
aan̂o komo ewetîcoko Kporin komo yanton me awexirî ke so.
19 Kîrkom hara,
awya so makîrha tan wîîkes hara,
apici komo xe ehcoko.
Eihra ro mak ehcoko,
wîîkesî.
20 Rikomo kom hara,
awya so makîrha tan wîîkes hara,
aamo komo men ewetîcoko,
anocwan komo marha.
Ahce na poko ketaw awya so ewetîcoko.
Tawake xa tak nasî Kporin komo apoko so ero wa awexitaw so.
21 Yîîm kom hara,
awya so makîrha tan wîîkes hara,
amxîkrî komo yîwîrîyakara ro mak ehcoko,
ein̂e me roro exihra marha ehcoko.
Ero wa awexitaw so amxîkrî komo men nahwokexe okwe.
Ero ke ero warahra ehcoko.
22 Tooto yanton komo,
awya so makîrha tan wîîkes hara,
apun komo yosom mîkyam awantoman̂e komo.
Ero ke ewetîcoko ahce na poko awantometaw so.
Awosom komo awen̂ataw so mak kir̂wan̂he cetapickaxmu me exihra ehcoko.
Noro men mokyasî kosom komo.
Kir̂wan̂he tak ketapickesî,
kan̂e pîn me mak ehcoko.
Miya roro kir̂wan̂he etapickacoko.
Kaan xa oyen̂asî,
kacoko mak kir̂wan̂he roro awetapickachome so.
23 Ahce na poko awexitaw so tahwore mak ehcoko.
Kporin komo yanme mak ekaritocoko ero poko.
Tooto yanme mak ekaritora ehcoko.
24 Oyepemesî tak amn̂e Kporin komo cemyawno ke rma,
kacoko mak.
Kporin komo xa Mîk awantoman̂e komo,
Kristu ha.
Noro rma awepemexe so.
25 Kicicme awexitaw so reha ero wa awehtoponhîrî yepetho nîmyas hara awya so okwe.
Watono cirihra ro mak nasî Kaan epemano riyataw.
Ero wa men nas ha.