On okaritan an̂enîrî komo.

Pawru ow ha.

Cimocu yakro amna mewresî.

Xesus Kristu yanton mak amna.

Piripos pono komo amyamro.

Kaan xîkrî komo amyamro,

Kristu Xesus yakrono ro kom ha.

An̂enîrî komo on amna mewresî,

Kaan mîn yenîn̂e komo n̂enîrî marha,

ciakonu komo n̂enîrî marha.

2 On wara wîîkes awya so,

Kaan ya awakromoma xe so wasî Kîîm komo ya ha.

Ahwokan me awiri xe so marha wasî yîwya.

Kporin komo Xesus Kristu ya marha ero wa awiri xe so wasî.

3 On wara marha wîîkesî apoko so Kaan ya,

ponaro oyehtopo ya,

Kir̂wan̂he xa n̂examro makir̂wame ham okre Apa,

wîîkesî.

Emapona ero wara wîîkesî yîwya,

ahtînopuche roro so owya.

4 Awakronomacho komo poko marha kîmtapowasî roro.

Tahwore kîmtapowasî ero poko.

5 Oyakronoman̂e komo amyamro Xesus ya kakir̂wamacho yekatîmrî poko.

Mehxa ro rma ow makronometken̂e roro Xesus yahsîtoponho n̂ixa ro rma awya so.

Ero ke kir̂wan̂he xa mai ham Apa,

wîîkesî.

6 Pahxa rma awakir̂wamacho komo n̂ihciyakn̂e Kaan.

Ero ke on wara wîîkesî Noro poko,

N̂examro yakir̂wamen̂enho Mîkî Kaan ham.

Ero ke Noro rma tak miya roro n̂examro nakir̂wametîkes amn̂e Xesus Kristu mohtopo pona roro,

wîîkesî.

7 Yaaro rma ero wa awitopo komo ponaro wasî tîpîn̂e xa awexirî ke so owya.

Oropotawno wara xa maxe okwe.

Ow makronomexe apomixapu rma,

ero ke owara xa marha maxe Kaan nakronomarî me.

Xesus ya kakir̂wamacho marha mekatîmyaxe owara xa marha.

Amtayar̂aman̂e komo ya rma mekatîmyaxe iyopono me.

Awewetîn̂e komo marha mahworexe ero poko rma.

Ero yipu mekatîmyaxe owara xa marha.

Ero ke owara xa marha Kaan nakronomarî me maxe amyamro hara.

8 Yaaro xa tan ero wa wîîkes awya so,

Kaan n̂entarî me rma xa.

Aaxe so ro mak wasî.

Aaxe so nasî Xesus Kristu ero wa xa marha was ow hara aaxe so.

9 On wara marha wîîkesî Kaan ya apoko so,

Etîxatî me xa tak n̂examro ciitîkakî Apa.

Ahce na poko n̂examro yîhcamhokakî marha.

Yuhnari yîhtînon̂e me marha n̂examro cirko,

wîîkesî marha yîwya.

10 On wara marha wîîkesî yîwya,

Kir̂wanî mko men̂ekan̂e me marha n̂examro cirko Apa.

Yaarono me marha cirko.

Kicicitho mîkyam kica,

kacho pîn me marha cirko.

Ero wa n̂examro cirko miya roro Kristu mohtopo pona roro,

wîîkesî apoko so.

11 Kir̂wan̂he ehtopo komo ke cepetaxmu wa xa n̂examro cirko,

Xesus Kristu xa nasî epetanmekn̂e komo.

Eperîrî ken̂e exitaw so,

Kir̂wan̂he xa Kaan nai ham okre,

kexe tak tooto komo,

wîîkesî.

Ero wa wîîkesî Kaan ya apoko so.

12 On wara marha wîîkes awya so,

kesekatîmyasî tan.

Tan wasî kahrutopo yaw.

Okwe kahra rma tko wasî ero wara oyehtopo poko.

Kristu ya kakir̂wamacho komo xa matko n̂esekaiporetîkesî miya so n̂he okre tan oyexirî ke kahrutopo yaw.

13 Miyan komo rma tak n̂encexe oyahrutopo.

Sowtatu komo meero n̂encexe.

Kristu yakrono me exirî poyero mak Pawru pen nahruce ham okwe,

kacho n̂encexe.

14 Ero ke erasîra tak Kaanî mtapotarî n̂ekatîmyaxe kakno komo yaake okre.

N̂ekatîmyatken̂e rma ha re ka cerahso mak okwe.

Oyahrutopo yentarî ke tak erasîn me n̂ekatîmyaxe okre.

15 Ooxera rma tko naxe anarî komo okwe ekatîmn̂e komo rma.

Tpohn̂em me naxe okwe,

oyoponka xe mak naxe okwe Kristu pokono yekatîmrî poko.

Anarî komo reha n̂ekatîmyaxe ekatîm xe cexirî ke so mak.

16-17 On wara reha naxe tpohn̂em me cehsom komo.

Ow xa kir̂wan̂he ekatîmn̂e,

karî ke mak Kristu pokono n̂ekatîmyaxe.

Kaan xatî wara mak n̂ekatîmyaxe,

yaarono mera mak okwe.

Oyahwokamexpotîka xe mak naxe kahrutopo yaw oyexitaw rma.

Ero warahra reha naxe ooxatî komo.

Ooxe cexirî ke so mak Kristu pokono n̂ekatîmyaxe.

Kristu ya kakir̂wamacho yekatîmn̂e ro me ohtînoyaxe.

Ero ke ekatîmn̂e me xa marha cexi xe so naxe n̂examro hara okre.

18 On wara mak wîîkes ow,

tohnaw n̂ekatîmyaxe anarî komo.

Yaarono me n̂ekatîmyaxe anarî kom hara.

Ahnoro rma tko Kristu pokono yekatîmn̂e me naxe okre.

Ero ke tahwore wasî.

Miya roro kahwowasî ero yipu yekatîmtopo poko.

Ero wa wasî.

19 Kahrutopo yaw thakwa wasî.

Oyahrunkacho ponaro rma tko wasî.

Opoko mîmtapowaxe amyamro.

Xesus Kristu Yekatî marha nasî tan oyakronoman̂e me.

Ero ke,

Kepatakesî tak ha amn̂e,

wîîkesî.

20 On wara oyexi xe ro mak wasî cerewre,

kir̂wanî ro me Kristu yenpo xe wasî.

Yîhyapamnî me mak ero warai me enpo xe wasî,

yîkrîpîn me marha.

Opun ke rma enpo xe wasî waipîra ka oyexitaw,

owaihîrî ke meero anarimaw.

21 On wara mak wasî waipîra ka oyexitaw,

Kristu mak nasî ponaro xa oyehtopo me.

Owaiyataw reha kir̂wan̂he xa tak was okre.

22 Opun yaw rma ka oyexitaw kekaricesî rma Kristu yanme.

Cepetaxmu wara wasî ero wara oyekaritorî ke.

Ahce wa katî oyexi xe wai?

wîîkesî rma tko.

23 Yarpa thakwa mak wîhtînoyasî.

Miya owto xe cma re wasî Kristu yaka.

Tawake rma re wasî tan,

yîhyawno warahra tko okwe.

Tawake xa tak wasî yîhyaw oyexitaw okre.

24 Opun yaw rma ka wai ham,

wîîkesî rma tko.

Oponarono me kîhtînoyaxe so amyamro,

aweceton̂e komo me rma oyexi xe mat ham.

25 Ero wa tanî rma wai ham roowo po awakîren̂e me oyehtome.

Kahworexe so marha amn̂e Kaan pona entome xa tak awya so.

Ero yipu poko oyehtome waipîra ka wai ham.

26 Tahwore tak maxe amn̂e omokuche awenso so.

On wara mîîkexe,

Kir̂wan̂he nai Xesus Kristu ham okre.

Pawru nahrunkai haram kîhyaka so mohtome hara,

mîîkexe tak ahyaka so omokuche.

27 On wara mak awexi xe so wasî,

Kristu ya kakir̂wamacho komo ponarono me xa awesenpo xe so wasî.

Ero wa awexi xe so wasî omokyataw awenso so,

mokuhra rma oyexitaw marha.

On wara awehtopo komo yenta xe wasî,

Ahwokan me ro mak naxe n̂examro okre.

Ero re ponaro marha naxe Kristu ya kakir̂wamacho komo yekatîmrî ponaro mak ha,

kacho yenta xe was okre.

28 Erasîn me marha awexi xe so was aaxatî pîn komo pona.

Ero wa awexitaw so on wara tak kexe n̂examro,

Kaan xa Mîk n̂examro nukurunpe ham kopi.

Ero ke kîw pen tak yînar̂marî me tat hara kopi,

kexe.

Ero wa kexe aaxatî pîn komo erasîn me awexitaw so.

29 On warai ke awakretken̂e so Kaan Kristu yehtopo yenpon̂e me awehtome so,

Kristu pona enîn̂e me awir̂atken̂e so okre.

Cesemetanmesom me marha awir̂atkekn̂e so hara Kristu xatî me xa tak awesenpotome so.

Ero warai me awir̂atken̂e so awakrecho me so.

30 Pahxa kicicitho poko oyetar̂macho meen̂atken̂e.

Oroto rma ero poko oyetar̂macho mencexe.

Ero wara rma tak metar̂metu ham amyamro.

Ero wa wîîkesî.