On okaritan an̂enîrî komo.

Pawru ow ha.

Xesus Kristu nantomatho ow ha.

Kaan yanme oyantomekn̂e Noro.

Epesu pono komo amyamro,

Kaan xîkrî komo,

Xesus Kristu ponarono kom ha.

Ero warai komo amyamro.

Ero ke an̂enîrî komo tan mewresî.

2 Awakronoma xe so wasî Kîîm komo Kaan ya ha.

Ahwokan me awiri xe so marha wasî yîwya.

Ero wa xa marha awiri xe so wasî Kporin komo Xesus Kristu ya hara.

Ero wa awin̂e komo me exi xe so wasî.

3 Taa,

Kaan ya kiitopo komo poko tan kîmtapowasî.

Kir̂wan̂he xa mai ham Apa,

wîîkesî Kaan ya.

Kporin komo Xesus Kristu yîîm Mîk Kaan.

Ponaro Noro yehtopo marha Mîk ha.

Noro xa kwakretken̂e so kah yawno ke miyan komo ke rma okre.

Kekatî komo wakrecho xa mîn nîmyakn̂e kîwya so.

Ero wa kwakretken̂e so Kristu yakrono me kexirî ke so.

4 Pahxa rma kîhtînoyatken̂e so Kaan roowo yakîhtonaw rma ha ka.

On wara kekn̂e kpoko so,

N̂examro wahsîyas amn̂e omxîkrî me Xesus Kristu yakrono me exirî ke so.

Kir̂wanî ro me xa wiir̂asî,

Kicicitho mîkyam kica,

kacho mera ro mak.

Ero wa on̂irirî me n̂examro wahsîyasî,

kekn̂e kpoko so.

5 Ero yimaw rma kmen̂eketken̂e so tîmxîkrî me Xesus Kristu yakrono me kexirî ke so marha.

Tîmîtwono me xa ciisom me kîhtînoyatken̂e tanme ro mak.

Tpoxwe nîhtînoyakn̂e ero warai me kiitopo komo.

6 Kîîxe so cexirî ke mak tînwakrerî me kîhtînoyatken̂e so.

Kristu yanme mak ero wa kiir̂atken̂e so,

yiixe cehtopo ro yanme ha.

Ero wa kwakretopo komo nîhtînoyakn̂e kir̂wan̂he xa cehtopo poko keserepokacho me so,

Kwakren̂e xa Amoro ham Apa okre,

kachome tak kîwya so.

7 Kaan n̂epematho kîwyam.

Xesus kamxukutho pona xa kahsîyatken̂e so.

Ero wa kahsîrî ke so tak Noro rma nîhcamnoyasî kicicme kehtopo kom hara.

Kwakren̂e ro me cexirî ke mak ero wa kiir̂axe so.

8 On warai ke marha kwakrexe so,

yuhnari yîhtînon̂e me kiir̂axe so,

takîhso cesehtînosom me marha.

Miya xe xa tak ero warai me kiir̂axe so.

9-10 Pahxa rma ero wa kiitopo komo nîhtînoyakn̂e Kaan.

Ekatîmra ro makî ka xakn̂e pahxan pen komo ya.

Oroto tak ero wa cesehtînotopo n̂ekatîmyasî kîwya so.

Tanme ro mak tînîhtînorî n̂ekatîmyasî.

On wara marha Noro nîhtînoyakn̂e pahxa,

Kristu yakrono ro me tak wiir̂as amn̂e tooto komo ahnoro mak.

Tooto pîn marha wiir̂asî Noro yakrono me.

Kah yawno komo,

roowo pono komo marha,

ahnoro mak wiir̂asî Noro yakrono me.

Noro mak tak nasî cewn̂e ecehtono rin̂e me,

kekn̂e Kaan kpoko so.

Amn̂e makî tko ero wa ciino ritopo me ehtîkache mak ero wara ciino wiir̂asî,

kekn̂e.

Ero wa tînîhtînorî tak n̂ekatîmtîkesî Kaan kîwya so.

11 Taa,

Kristu yakrono ro me ciixapu xa kîwyam.

Ero ke Noro yemyawno yahsîn̂e me taxe.

Pahxa rma ero wara kiitopo komo nîhtînoyakn̂e Kaan.

Yaaro xa ero wara kîhtînoyatken̂e so towhnî me ro mak.

Miyanî mko ciin̂e rma Mîk Kaan ahnoro mak.

Tanme ro mak ciino rin̂e Mîk cesehtînotopo yaw roro mak.

12 Amna marha nîhtînoyakn̂e Kaan,

yihcirî me Xesus pona enîn̂e kom ha.

Kir̂wan̂he xa cehtopo yenpon̂e me amna ciri xe xakn̂e.

Ero ke ero wa ciisom me amna nîhtînoyakn̂e Noro.

13 Ero wa xa marha tak awir̂atken̂e so amyamro hara Kristu pona enîn̂e me hara.

Yaarono mîn mencetken̂e,

Kaan ya kakir̂wamacho kom okre.

Entache awya so Xesus pona tak meen̂atken̂e.

Noro pona enîrî ke tak awya so Kaan xîkrî me awehtopo komo kuknon tak Kaan n̂iir̂akn̂e aropotaka so.

Kir̂wanî ro Yekatî rma Mîk Kaan xîkrî me kehtopo komo kuknon ha.

Pahxa rma ekaiporexapu Mîk Kir̂wanî ro Yekatî.

Noro nasî Kaan xîkrî me awehtopo kuknon me.

14 Kupun komo yakir̂wamatîkara ka nasî Kaan pahxa epemaxapu rma.

Wara rma kupun komo yakir̂wamatîkacho ponaro rma taxe Noro Yekatî exirî ke kropotaw so.

Kakir̂wamatîkache so tak amn̂e kir̂wan̂he ro mak Kaan yehtopo yenpon̂e me taxe okre.

Ero wa taxe.

15 Taa,

on wara wîîkes hara awya so,

kir̂wan̂he wencesî awehtopo komo.

Kporin komo Xesus pona n̂een̂axe okre Epesu pono komo.

Kaan xîkrî komo xatî me marha naxe,

kacho wences.

Ero wa awehtopo komo wencesî.

16 Ero ke Kaan yakro kîmtapowasî roro apoko so.

On wara wîîkesî yîwya,

Apa,

kir̂wan̂he n̂examro miir̂akn̂e ham okre,

wîîkesî.

Emapona roro ero wara wîîkesî apoko so.

Ero wa apoko so kîmtapowasî apoko so.

17 Ponaro oyehtopo Mîk Noro,

kacho Mîkî Kaan Kporin komo Xesus Kristu ya.

Kîîm komo marha Mîk ha,

kir̂wanî ro xa.

Noro yakro kîmtapowasî apoko so.

On wara wîîkesî yîwya,

Apa,

takîhso cesehtinosom me n̂examro cirko.

Apoko rma yîhcamhokakî,

Ero wara Mîkî Kaan ham,

kachome so tak,

wîîkesî.

18 On wara marha wîîkesî apoko so,

Cewkem me tak n̂examro cirko Apa apoko.

On wara kan̂e me n̂examro cirko,

Yaaro xa kan̂ikyaxe so Kaan tîmxîkrî me,

kan̂e me.

Tîpîn̂e xa Kaan keen̂axe so,

tînakir̂wamathîrî komo,

cepethîkem me xa okre.

Kir̂wan me xa keen̂axe so,

kan̂e me marha n̂examro cirko,

wîîkesî marha apoko so.

19-20 On wara marha wîîkesî Kaan ya apoko so,

Amxîkrî komo karihton̂e me marha esenpoko yîwya so Xesus ponarono komo ya.

Pahxa Xesus karihcekn̂e ero wa xa marha n̂examro karihtoko hara.

Kar̂pe xa cehtopo n̂enpekn̂e Kaan Kristu yenpakarî ke waixapu komo chewnonho.

Enpakache tak naar̂akn̂e kah yaka.

Iito tak n̂eremanmekyakn̂e tîmîtkoso kaari n̂ixa.

21 Anarî komo yopono me Kristu n̂iir̂akn̂e yukurumîkno komo yopono me,

karitî komo yopono me marha,

roowo yahsîn̂e komo yopono me marha.

Ero warai komo yopono me Kristu n̂iir̂akn̂e Kaan.

Ero wa cirirî ke tak twerî mak tak Kristu cetahcaxe.

Kayaritomo komo rma re naxe twerî cetacisom me.

Yaake naxe yukurumîkno komo,

karitî komo marha.

Ero warai komo naxe oroto.

Pahxaro tak kah yaw kexitaw so kayaritomo komo naxe hara twerî cetacisom komo rma hara.

Twerî cetacisom me xa tko nasî Kristu ero warai komo yopono me.

Kaan yanme rma ero wa nasî.

22 On wara marha Kristu n̂iir̂akn̂e Kaan,

ahnoro tînakîtothîrî yosom me tak n̂iir̂akn̂e,

miyan komo yosom me rma.

Tîmxîkrî komo tîpîrî me marha n̂iir̂akn̂e,

Noro yanmen me mak kehtome so.

Ero warai me Kristu n̂iir̂akn̂e Kaan.

23 Kristu punu rma kîwyam Kaan xîkrî komo,

tuhn̂e Noro yenpon̂e ha.

Porinî Mîkî Kristu,

miyan komo yuhnaren̂e rma.

Noro yipu xa Mîk ha Kristu.