Taa,

on wara wîîkes hara awya so,

on wara ka mîxatken̂e pahxa,

waixapu me makî ka mîxatken̂e okwe.

Kicicitho pokono me mîxatken̂e,

Kaan yanwekn̂e me marha mîxatken̂e.

Ero wa awexirî ke so waixapu me mîxatken̂e.

2 Roowo pono ro komo yehtopo yaw roro mak mîxatken̂e kica.

Satanasî mtapotarî yewetîn̂e me marha mîxatken̂e kica.

On warai mîk Satanas kica,

ocowo chere cetarisom komo kayaritomon mîk ha,

yukurumîkno komo kayaritomon ha.

Ekatî me cehsom mak mîk ha.

Kaan yanwekn̂e ro komo yantoman̂e me nasî kica.

Noro yewetîn̂e me ka mîxatken̂e amyamro.

3 Ero wa xa marha tîxatken̂e kîwyam ahnoro.

Cesewakometken̂e mak kica.

Kanme ro so cesehtînosom me mak tîxatken̂e okwe.

Ero warai me kexirî ke so,

Kaan nîrwonakn̂e kpoko so.

Ero wa xa marha naxe anarî kom hara.

4-5 Kîpînîn yawno xa tko Mîkî Kaan,

kîîxe so ro mak xakn̂e.

Ero ke kenpaketken̂e so waixapunhîrî.

Twaihso tîxatken̂e Kaan yanwekn̂e me kexirî ke so.

Wara rma kenpaketken̂e so tko Kristu yakro rma.

Tanme ro mak kenpaketken̂e so,

kwakretken̂e so marha.

6 Kenpakache so Xesus Kristu yakro ro rma kaar̂atken̂e so kah yaka hara.

Iina tak keremanmekyatken̂e so Xesus yakrono me.

7 Tîn̂enporî me kiri xe so nasî Kaan,

miya roro kenpo xe nasî.

Kir̂wanî ro mak Mîk ham Kaan okre,

Kristu Xesus yakrono ro komo wakren̂e ro mak okre,

kacho yenpon̂e me kexi xe so nasî.

Ero ke ero wa kwakretken̂e so.

8-9 Kaan mak awakir̂wametken̂e so awakretopo ke.

Xesus pona enîrî ke mak awya so awakir̂wametken̂e so.

Kir̂wan̂he awehtopo komo yanmera ro mak awakir̂wametken̂e so.

Ero yanme mak awakir̂wametaw so ketaw ha re,

Ow xa kir̂wan,

mîîkacerî ha re kica.

10 Kaan n̂enporirî mak kîwyam.

Pahxa rma kîhtînoyatken̂e so tîn̂enporirî me.

Ero ke Xesus Kristu yawno me kiir̂atken̂e so kenporitome so.

Ero wa kenpor̂axe so kir̂wan̂he kehtome so tooto komo poko.

Ero wa kehtome so kenpor̂iaxe so Kaan.

11 Taa,

on wara marha wîîkes awya so,

Xenciu me ewruxapu thakwa amyamro.

Anpikantho mîkyam kica,

kacho thakwa amyamro Xutew komo ya.

Anpikaxapu reha kîwyam okre,

kexe reha n̂examro tpoko so rma.

Yupun komo makî tko nasî ero wa ciiso,

tooto yamorî ke mak.

12 On wara ka mîxatken̂e pahxa,

Kristu ponarora ro makî ka mîxatken̂e Ixaw Yana pîn me thakwa awexirî ke so.

Oyanan komo amyamro,

ero ke onwakrerî me maxe,

kahra ro makî ka xakn̂e Kaan awya so.

Kir̂wan̂he men kiir̂axe so amn̂e,

kahra.

Amyamro hara,

on wara kahra mîxatken̂e,

Kah yaka na kîwce amn̂e,

kahra mîxatken̂e okwe.

Ow akronomak Apa,

kahra marha mîxatken̂e.

Ero wa ka mîxatken̂e pahxa.

Ero wa awehtoponhîrî komo tak yîhtînocoko.

13 Ero warahra tak maxe oroto.

Xesus Kristu yakrono ro me tak maxe okre.

Ero ke Kaan mîtwono me tak maxe mooxenonhîrî.

Kicicme awehtoponhîrî komo n̂epemekn̂e Kristu tkamxukuthîrî ke rma.

Ero yanme mak awekyatken̂e so Kaan tîmîtkoso tak.

14 Noro re me tak kiir̂atken̂e so Xutew komo,

Xenciu komo yakro etwîrîyakan me.

Xesus yakrono ro me re kexirî ke so ero wa kiir̂atken̂e so.

Waaca warai ka xakn̂e kyotaw so kakpan̂e komo me okwe.

Ero yixkan̂e me tak xakn̂e Kristu noro re me tak kehtome so.

15 Moises pen nmewretho rma mîn xakn̂e kwacan komo wara.

Kakpan̂enhîrî komo me xakn̂e okwe.

Ero wa xakn̂e kpanatanmetopo komo,

kîtwermacho kom ha.

Noro re me tak kiri xe so nasî Kaan,

Xutew komo,

Xenciu komo yakro.

Ero ke tupun me tak kiir̂atken̂e so Kristu.

Ero ke etwîrîyakara tak cexpore nasî Noro pun me re kexirî ke so tak.

16 Kaan xatî me marha tak kiir̂atken̂e so Kristu tpanaxkem po twaihîrî ke.

Ero wa kiir̂atken̂e so Xutew komo,

Xenciu komo marha.

Kristu pun me re kiir̂atken̂e so.

Ero ke etîxatî me tak taxe etîxatî pînînhîrî.

Ero wa kiir̂atken̂e so twaihîrî ke.

17 Kah yai mokyakn̂e Kristu oona kîcheka so.

On wara kaxi mokyakn̂e,

Tîhyaka tmoku xatî komo porohkan̂e pîn me tak nasî Kaan okre,

kaxi ha.

Ero wa kekn̂e awya so,

meyeno komo ya,

meyeno pîn komo ya marha.

18 Kristu yakrono ro me kexirî ke so tak kencexe so Kîîm komo takro kîmtapowataw so.

Xutew komo n̂encesî,

amyamro marha awencexe so,

Xenciu kom ha.

Noro rma nasî kropotaw so,

Kir̂wanî ro Yekatî mak.

Noro yanme kîmtapowataw so kencexe so Kaan.

Ero wa kîmtapowataw so kencexe so Kaan.

19 Ero ke Xenciu komo yakrono mera ro mak ehcoko anarî yana me exirî ke so,

kahra tak nasî Kaan Xutew komo ya.

On wara xa matko kesî,

Oyanan me tak naxe Xenciu komo,

oyanan komo yakrono ro me tak ha,

kesî tak Kaan apoko so.

20 Kaan mîn me tak maxe amyamro.

Amna tak nasî Kaan mîn mapatan warai me.

Kristu nantomatho amna.

Kweronoman̂e me so naxe anarî kom hara.

Ero wara nas amna Kaan mîn mapatan warai me reha.

Xesus Kristu reha nasî yîretîrî me hara.

21 Anarmerpan me taxe yîmîn me ciisom kom ha.

Anarî n̂iir̂asî tîmîn poci warai me,

anarî n̂iir̂asî kamru warai me hara,

anarî n̂iir̂asî yipixkon warai me hara.

Ero warai me taxe Kaan mîn me ciisom kom ha.

Ero ciitîkarî poko rma ka nasî Noro.

Kporin komo yakrono mak kiir̂axe so ero warai me yîmînî ro me ha.

22 Amyamro meero tak awir̂axe so tîmîn me Xutew komo yakro rma.

Kaanî rma nasî achew so tîmîyem ha.

Noro Yekatî nasî aropotaw so yîmîn me awin̂e komo.

Ero warai kîwyam,

Kaan mîn warai ha.