Kaan Xîkrî Me Re Tak Taxe Xutew Komo, Xenciu Kom Ha
3
Taa,
ero wa tak maxe,
Kaan mîn me tak ha.
Ero wa awexirî ke so apoko so kîmtapowasî Kaan yakro.
Pawru ow ha kahrutopo yawno.
Xesus Kristu nahrupotho ow ha.
Cehtopo yekatîmn̂e me oriye Xesus Xenciu komo ya,
awya so ha.
Noro yehtopo yekatîmrî poyero wa oyahruce.
2 Awarai komo ya ekatîmn̂e me oriyakn̂e Kaan.
On wara kekn̂e owya,
On wara kacho yekatîmn̂e me esko Xenciu komo ya,
Awakren̂e komo me tak nasî Kaan okre,
kacho,
kekn̂e owya.
Ero warai me oritoponho rma na mencet ham.
3-5 Ero warai me oritoponho poko rma tko wîmewrew hara an̂enîrî komo.
Kawno pîn mak wîmewrew.
Ero yipu yenîche tak awya so on wara mîîkexe,
Kaan yanme Pawru n̂ekatîmya ham kîwya so.
Kaan xîkrî me tak maxe amyamro Xenciu komo,
kesî kîwya so,
mîîkexe.
Yaaro mîîkexe.
Ero yekatîmra ka xakn̂e Kaan kporin pen komo ya.
Oroto mak tak ero wa awitopo komo nîhtînomexpesî amna ya Cekatî ke rma.
Kristu nantomatho xa amna.
Weronomano rin̂e marha amna.
Ero warai amna ero yekatîmn̂e.
6 On pokono mîn Kaan Yekatî nîhtînomexpotho,
Xesus yehtopo ponarono me cexitaw so Xenciu komo Kaan xîkrî me tak naxe Xutew komo wa xa marha.
Kristu yawno me marha naxe Xutew komo yakro rma,
kacho mîn Kaan nîhtînomexpotho amna ya.
7 Ero yekatîmn̂e me oriyakn̂e Kaan Xenciu komo ya.
Owakrekn̂e mak Kaan ero pokono me oritopo ke.
Kar̂pe cexirî ke mak ero yekatîmn̂e me oriyakn̂e.
8 Anarî komo yopono pînî ro mak ow.
Anarî komo xawyakan me mak wasî,
Kaan xîkrî komo xawyakan me.
Anarî komo xawyakan me cehsom komo xawyakan xa tak owî.
Noro yipu rma owakrekn̂e Kaan.
Tîmtapotarî yekatîmn̂e me oriyakn̂e ham.
On warai yekatîmn̂e me oriyakn̂e,
Cemyawnoyem xa Mîkî Kristu yukuknomarî yopono ke,
kacho yekatîmn̂e me oriyakn̂e ham.
9 Miyan komo ya rma tîmtapotarî yekatîmn̂e me oriyakn̂e ham.
Kir̂wan̂he xa ekatîm xe wasî yîwya so kir̂wan̂he xa entachome yîwya so.
Ekatîmnînhîrî wekatîmyasî yîwya so.
Pahxa rma ero nîhtînoyakn̂e Kaan.
Miyan yakîhton̂enho rma Mîk Kaan ahnoro.
Noro makî ka ero yipu nîhtînoyakn̂e tooto ya ekatîmra ka.
10 Oroto tak tînîhtînoputhîrî n̂ekatîmpesî Kaan tîmxîkrî komo ya.
Takîhso yîhtînon̂e me cehtopo yenpo xe tak nasî kah yawno komo ya.
Kayaritomo komo ya,
yukurumîkno komo ya meero,
noro yipu komo ya enpo xe nasî takîhso cehtopo.
Ero ke etîme re mak tak kahsîyaxe so tîmxîkrî me re.
Xutew Yana komo nahsîyasî,
Xenciyu komo marha nahsîyasî.
Ero wa nahsîyasî.
Ero wa ahsîrî ke takîhso cehtopo n̂enpesî Kaan.
11 Pahxa rma etîme re ciino ritopo nîhtînoyakn̂e Kaan roowo exihra ka exitaw.
On wara kekn̂e kpoko so,
Kporin komo yawno me tak Xenciu komo wiir̂as amn̂e Xesus Kristu yawno me Xutew komo wa xa marha.
Ero wa wiir̂asî etîme re tak ehtome so,
kekn̂e kpoko so.
12 Ero ke Xesus yakrono ro me kexirî ke so Kaan yakro tak tîmtapowaxe erasîn me ro mak.
Oyence ma re Kaan,
kahra ro mak tîmtapowaxe.
Xesus pona enîrî ke mak ero wa taxe.
13 Ero ke ero warai mak ow ha,
Xenciu komo ya ekatîmn̂e ha.
Ero ke ahwokara ro mak awexi xe so wasî kahrutopo yaw oyexirî poko.
On wara mak kacoko,
Cemetanmetopo nukurunkesî Pawru kanme so mak okwe.
Yiixe xa Kaan yehtopo xa kîwyam ham,
kacoko mak.
Ero wa mak kacoko.
Pawru Nîmtapowasî Xa Hara Epesu Pono Komo Yakro
14 Taa,
Kaanî nwakrerî me awexirî ke so kîmtapowasî Noro yakro apoko so.
Kporin komo Xesus Kristu Yîîm yakro kîmtapowasî.
Noro mamaka kutupenwasî oyosokmuru po.
15 Noro xîkrî me re taxe kîwyam Xesus yahsîn̂enho kom ahnoro.
Kah yawno komo,
roowo pono komo marha,
ero wara naxe Kaan xîkrî komo.
Noro yipu komo Yîîm yakro kîmtapowas apoko so.
16 On wara wîîkesî yîwya,
Apa kah yawno,
wîîkesî,
karitî ro mak Amoro.
Kir̂wanî ro marha Amoro.
Ero ke n̂examro karihtoko yîropotaw so.
Awekatî ke rma karihtoko kar̂pe xa cehso ro.
Ero wa cirko,
wîîkes apoko so.
17-18 Ero wara awexi xe so wasî cekenkem me xa ehtome Kristu aropotaw so.
Noro pona een̂ataw awya so cekenkem me nasî iito.
Yuhnaka cimiciyem wara awexi xe so wasî etîxe Kristu yehtopo yaka,
emacakan me ro mak awehtome so.
On wara kan̂e me awexi xe so wasî,
Takwekem xa mîn okre etîxe Kristu yehtopo.
Ehyatkawno marha mîn ha,
cecenî imo yopono,
tuuna yepu yopono.
Weyun marha mîn tuuna imo yopono.
Kawno marha mîn îîpî yopono,
kawno yopono ha,
kan̂e me.
Ero wara kan̂e me awexi xe so wasî etîxe Kristu yehtopo poko.
19 Ero wa kîîxatî me so xa Kristu yenîn̂e me awexi xe so wasî.
Entatîkarî yopono rma tko mîn kîîxe so Kristu yehtopo.
Ahnoro Kaan yehtopo ke tîropotawnoyem me awexi xe so wasî.
20-21 Taa,
kir̂wan̂he xa Kaan nai ham okre,
tîtkacerî miya roro,
yîtîhkan me ro mak.
Ehn̂anî ro mak Mîk Kaan.
Ero xe wasî,
tîtkexe cik yîwya.
Miyanî rma re tîhtînoyaxe anarimaw yîîxe kehtopo komo.
Ero yopo tîmn̂e ro mak Mîk ha,
kîmtapotacho yopo,
kesehtînotopo yopo marha.
Karitî ro mak Mîk kropotarî komo karihton̂e.
Noro yipu ya kapore nasî,
Kir̂wan̂he xa mai ham okre,
kapore nasî.
Ero wa ka xe wasî Kaan xîkrî komo ya.
Yaaro tan wîîkes awya so.
Ero wa wîîkes awya so.