Taa,

on okaritan an̂enîrî komo.

Pawru ow ha.

On warai mak ow ha,

Xesus Kristu nantomatho xa ow,

tooto nantomatho pînî ro mak ha.

Kaan marha oyantomekn̂e,

Kîîm kom ha,

Xesus yenpakan̂enho ha.

2 Tan marha naxe yaake kakno komo.

Moxamu mtapotarî meero tan ow mewresî ahyakan komo.

Kaan xîkrî komo amyamro Karasia pono komo,

mîn hak pono kom ha.

An̂enîrî komo tan mewresî okaritan.

3 On wara cokorî ka wîîkes awya so,

Kîîm komo Kaan ya awakronoma xe so wasî.

Ahwokan me marha awiri xe so wasî yîwya.

Kporin komo Xesus Kristu ya marha ero wa awiri xe so wasî.

4 Noro rma n̂etwaikapekn̂e kpoyero so,

kicicme kehtopo komo poyero.

Kîîm komo Kaan yanme mak n̂etwaikapekn̂e.

Kaan xîkrî pîn komo warahra tak kiitome so marha n̂etwaikapekn̂e.

Kicicme ro mak naxe Kaan xîkrî pîn komo okwe,

yîchew so awehtopo kom ha.

N̂examro warahra awir̂axe so.

5 Ero ke,

Kir̂wan̂he xa nasî Xesus Kristu,

kapore nasî miya roro yîtîtmamnî me ro mak.

Amen.

6 Taa,

on wara wîîkes awya so,

Keserepokesî ro mak apoko so okwe.

Kaan pona cma re ka meen̂atken̂e.

Ahce kacho Noro yai metowce hara?

Yohno rma metowce okwe.

Noro cma re awan̂ikyatken̂e so.

Kristu yakrono me awahsîyatken̂e awakronomachome so.

Anarmen pona tko tî metowyatken̂e hara okwe.

Awakir̂wamacho komo tî re n̂ekatîmyaxe anarî komo.

Ero ke ero yipu pona takî tî metowyatken̂e okwe.

7 Awakir̂wamacho komo pînî rma mîn yîn̂ekatîmrî komo.

Awewkukmexe so mak kica.

Kristu ya kakir̂wamacho komo yaknama xe tî natu anarme hara okwe.

8 Kristu ya kakir̂wamacho amna n̂ekatîmyakn̂e awya so.

Anarî men yekatîmn̂e tko na mokye acheka so kakir̂wamacho yekatîmn̂e ha tî re.

Amna n̂ekatîmtho yaw rorono pînî tko na n̂ekatîmya.

Ero yipu yekatîmn̂e exitaw Kaan nîwîrîmarî me men cekanpore nasî.

Amna meero ero yipu yekatîmn̂e me exitaw,

Kaan nîwîrîmarî mîkro ha,

kapore nasî amna poko hara.

Ancu meero ero wa exitaw anarimaw kahyai yîhtoxapu,

Kaan nîwîrîmarî mîkro ha,

kapore nasî noro poko meero.

9 Ero wara rma amna kekn̂e awya so pahxa rma.

Ero ke ero wa xa marha wîîkesî xa hara awya so.

Anarmen yekatîmn̂e na mokya acheka so awakir̂wamacho yekatîmn̂e ha tî re.

An̂ewetîthîrî komo warai pîn makî tko na mîn n̂ekatîmya.

Ero yipu yekatîmyataw Kaan nîwîrîmarî me men cekanpore nasî ero yipu yekatîmn̂e,

wîîkesî xa hara awya so.

10 Tooto komo mtapotarî ponaro makî katî wai awya so,

Kir̂wan amoro okre,

kacho ponaro ha?

Kaanî mtapotarî ponaro xa katî wai,

Kir̂wan amoro,

kacho ponaro?

Tooto mtapotarî ponaro mak oyexitaw Kristu yanton mera tak was okwe.

11-12 Taa,

on wara marha wîîkes awya so oyakno komo,

tooto mtapotarî pînî ro mak mîn wekatîmyakn̂e awya so,

Kristu ya kakir̂wamacho pokono ha.

Opanatanmekîra xatken̂e tooto komo ero poko.

Xesus Kristu mtapotarî mak wencekn̂e ekatîmtome tak owya.

13 On wara wîxakn̂e pahxa,

oyehtoponho rma na mencetu.

Kaan xîkrî komo yemetanmekn̂enho rma ow kica.

Iyopo so ro mak wemetanmekyakn̂e okwe.

Kaan xîkrî komo waihkatîka xe ro mak wîxakn̂e.

14 Xutew komo mtapotachonho mak wewehcakn̂e.

Ero yewetîn̂e me marha xatken̂e opoyino kom ha re,

oyecenarî por̂mamxapu kom ha.

N̂examro yopo rma tko wewehcakn̂e owî reha.

Oporin pen komo mtapotachonho yewetî xe ro mak wîxakn̂e cerewre ro mak.

Ero warainhîrî ow ha.

15 Kaanî rma tko oyan̂ikyakn̂e yememe pen ropotai oyewrunokan̂enho rma.

Owakrekn̂e mak oyan̂itopo ke.

16 Yumumuru tak xakn̂e oropotaw,

Noro yenpon̂e me oyexi xe xakn̂e.

Xenciu komo ya ekatîmn̂e me oyexi xe xakn̂e.

Ero ke yohno tohra ka wîxakn̂e tooto yaka epanatanmekposo.

17 Xerusaren pona marha tohra ka wîxakn̂e Kristu nantomatho komo yaka.

Pahxa rma re n̂examro xatken̂e Kristu nantomatho me,

ero warai pîn me ka oyexitaw.

Tohra rma tko ka wîxakn̂e yîmtapotarî komo yentaxi.

Arabia pona xa matko kîwcekn̂e yohno rma.

En̂exanînhîrî tak ketîramekn̂e hara Tamasku pona hara.

Ero wa ka wîxakn̂e Xesus pona enîn̂enhîrî ha ka.

18 Amn̂e mak osorwaw cimn̂ipu yenatîche mak tak kîwcekn̂e Xerusaren pona Petru yenso.

Iito kenmayakn̂e noro yaw 15 kaamo mak.

19 Anarî komo yenîhra rma wîxakn̂e Xesus nantomatho komo.

Ciaku mak ween̂akn̂e Kporin komo yakno ha.

20 Ero warainhîrî ow ha.

Yaarono tan mewresî oyehtoponho an̂enîrî komo me.

Cemarontara tan wasî.

Kaan xa ohtînoyasî yaarono me.

21 Xerusaren pononho tak kîwcekn̂e hara Siria pona hara.

Sirisia pona tak kîwcekn̂e.

Ero wa toxapunhîrî owî.

22 Xuteia pono komo rma ka oyenîra xatken̂e Kaan xîkrî komo,

Kristu yakrono ro me cehsom kom ha.

23 Oyekaci makî tî n̂encetken̂e iitono komo.

On wara kacho tî n̂encetken̂e,

Anarme tak nai Pawru okre kemetanmekn̂enhîrî komo rma.

Xesus pona encoko,

kesî tak hara Xesus ponarono komo waihkatîka xatînhîrî ha,

kacho tî n̂encetken̂e opoko.

24 Ero ke,

Kir̂wanhe xa Kaan nai ham okre,

ketken̂e ero wa oyehtopo yentache.