Taa,

kmokyasî tak awenso so.

Omokuche tak osorwaw ro tak nasî ahyaka so omohtopo.

On wara kacho mencexe,

Kicicme tooto yehtopo yekatîmn̂e exitaw,

cewn̂e mak,

yîmtapotarî ponarora ehcoko.

2 exitaw entacoko tak,

3 exitaw marha entacoko,

kacho mencexe.

2 On wara wîîkes awya so,

ahyaka so omokuche amn̂e on wara kahra wasî,

Tanme ro so kyam mak n̂ehcowpe kicicme ehxapu komo,

kahra ro mak wasî.

Ero wa kicicme ehxapu komo weronomekn̂e pahxa.

Pahxa wîîkekn̂e awya so miyan komo ya rma.

Oroto tak kweronomexe so xa hara.

Karita yaka mak tan wîîkes awya so mooxe oyexirî ke.

3 On wara na mîîketu owya,

Kristu nîmtapowasî omtari,

mîîkes ha re amna ya,

Ero ke karitî ro me Kristu yehtopo ika enpoko,

Yaaro ham,

kachome tak amna ya,

mîîketu na owya.

Ero ke kicicme ehxapu komo men panaresî,

wîîkesî.

Kar̂pen me exihra ro mak nasî Kristu.

Karitî xa Mîk ha.

Enko xe,

kar̂pe cehtopo n̂enpekn̂e awya so iito oyexitaw,

wîîkesî tak awya so.

4 Pahxa kar̂pen wara rma re n̂esenpekn̂e Kristu.

Ero wa cexirî ke n̂etamowopekn̂e okwe tîîxatî pîn komo ya.

Oroto tak kar̂pen me exihra ro mak tak nasî.

Kaan xa nasî Noro karihton̂e me waipîn me ro mak tak ehtome hara.

Ero ke kar̂pen wa xa marha nas amna hara Noro yakrono ro me rma amna exirî ke.

Noro yakro rma amna karihcesî Kaan.

Ero wa amna karihcesî awakîren̂e komo me amna yehtome.

5 On wara wîîkes awya so,

esehtînocoko tak men.

On wara kacoko,

Xesus pona enîn̂e na ow ha.

Noro pona enîn̂e pîn katî ow?

kacoko ha.

Xesus Kristu pona enîn̂e me awexitaw so yaaro aropotaw so nasî Noro.

Noro pona enîn̂e wara mak awexitaw so Xesus exihra rma nas okwe aropotaw so.

6 Amna hara,

ahce wa na amna meen̂at ha?

Kristu yanmen pîn mîkyam kica Pawru komo,

kan̂e pîn me cma re kîhtînoyaxe so.

7 Kîmtapowasî tko Kaan yakro apoko so.

Kicicitho pokohra cma re n̂examro miir̂as Apa,

wîîkesî apoko so.

Ahce kacho ero wara awexi xe so wai?

Kirwanhe amna yesenpotome makî katî?

Pîra rma.

Kir̂wanhe mak awexi xe so wasî cehn̂axmu wara rma amna yeen̂ataw anarî komo ya.

8 Yaarono towhra ro mak nas amna anarmen pona.

Ero yipu yekatîmn̂e me xa matko amna n̂iire Kaan,

anarmen yekatîmn̂e mera ro makî.

9 Tawake nas amna apoko so kar̂pe awexitaw so.

Ero wa nas amna apoko so kar̂pera amna exitaw rma.

On wara marha amna kesî Kaan ya,

Apa kah yawno,

Korintu pono komo cma re mîîr̂asî etîtîkaxapu me tak ha,

kes amna.

10 Ero wa mak wîîkes awya so.

Mooxe oyexirî ke thakwa karita mak mewresî an̂enîrî komo.

Ahyaka so omokuche amn̂e awein̂e komo warahra oyexi xe wasî.

Awahwokan̂e komo me orihra ro mak xakn̂e Kporin komo.

Awakîren̂e komo me xa matko oriyakn̂e.

Ero ke awakîretopo komo mak tan mewresî.

Ero wa mewresî.

11 Taa,

ero wa mak wîîkes awya so oyakno komo.

Etîtîkaxapu warai me tak awexi xe so wasî.

Tahwore marha awexi xe so wasî.

Iito re cesehtînosom me marha awexi xe so wasî.

Tawake awexi xe so marha wasî etpoko.

Ero wa awexitaw so Kaan tak nasî awakronoman̂e komo me.

Etîxatî me kiin̂e Mîk Kaan.

Ahwokan me kiin̂e marha Mîk ha.

Noro yipu Mîk awakronoman̂e kom ha.

12 Aweseporîche so tak esewcokacoko Kaan yanme mak.

13 Kir̂wan̂he mat iito?

ka xe tî natu awya so ahnoro Kaan xîkrî komo.

14 Kporin komo Xesus Kristu ya awakronoma xe so wasî.

Kîîxe so xa cehtopo yenpon̂e me exi xe marha wasî Kaan awya so okre.

Kir̂wanî ro Yekatî mtapotarî yentan̂e me roro awexi xe so marha wasî.

Ero wa awexi xe so was ahnoro.

Ero wa mak wîîkes awya so.

Amen.