On okaritan an̂enîrî komo.

Pawru ow ha.

Xesus Kristu nantomatho ow.

Kaan mak oyantomekn̂e.

Ero ke an̂enîrî komo tan mewresî karita.

Sostenes yakro amna mewresî.

Kakno komo rma moso Sostenes.

2 Korintu pono komo amyamro Kaan xîkrî kom ha.

Kaan nakir̂wamatho komo amyamro.

Kristu Xesus yakrono ro me awexirî ke so awakir̂wametken̂e so.

Onakir̂wamarî me ehcoko,

kekn̂e Kaan awya so.

Ero ke an̂enîrî komo tan amna mewresî.

Anarî komo n̂enîrî marha tan amna mewresî,

miyan komo n̂enîrî rma.

Kporin komo Xesus Kristu yanan me cexirî ke so Kaan poko n̂ehsamexe.

Kporin komo me nasî Xesus,

n̂examro Porin me marha nasî.

Noro ponarono komo n̂enîrî tan amna mewresî.

3 Taa,

on wara wîîkes awya so,

awakronoma xe so wasî Kaan ya,

Kîîm komo ya ha.

Cereporem me awiri xe so wasî.

Ero wa xa marha awiri xe so wasî Kporin komo Xesus Kristu ya hara.

Ero wa awiri xe so wasî yîwya so.

4 On wara wîîkesî roro Kaan ya apoko so,

Kir̂wan̂he mai ham Apa.

Korintu pono komo makronome ham okre Xesus Kristu yakrono ro me exirî ke so,

wîîkesî.

Ero wa wîîkesî roro apoko so.

5 On warai ke awakretken̂e so ham Kaan.

Tîmtapotarî yekatîmn̂e me awir̂atken̂e so ham okre.

Miyanî rma mekatîmyat ham Kaanî mtapotarî ahnoro.

Ahcamhoketken̂e so marha Noro miyan poko rma.

Ero warai me xa awir̂atken̂e so ham Kaan awakretopo komo me mak.

6 On wara kiin̂e Mîkî Kristu,

wîîkekn̂e awya so achew so oyexitaw.

Yaaro kekn̂e ham,

mîîketken̂e tak ero yipu poko.

7 Ero ke tak mîn hak pokono me awir̂atken̂e so Kaan.

Ero yipu pokono exihra nas okwe kakrono komo,

kacho mera awehtome so ero wa awir̂atken̂e so okre.

Ero ke ero warai pokono me so ka maxe Kporin komo Xesus Kristu momokrî poko ha kapu.

8 Kaanî rma awececexe so.

Tponarono me xa awir̂axe so miya roro.

Ero wa awir̂axe so,

Kicicme maxe kica,

kacho pîn me ro mak tak awehtome so amn̂e Kporin komo Xesus Kristu mohtopo po.

Ero warai me awir̂axe so Kaan okre.

9 Kemîknon̂e pînî ro mak Mîkî Kaan.

Omumuru yakrono ro me kiir̂axe so,

kekn̂e awya so.

Ero ke ero wa awiraxe so,

tîmtapotachonhîrî yaw roro rma.

Kporin komo rma Mîk yumumuru,

Xesus Kristu.

Noro yakrono ro me kiiratken̂e so.

10 Taa,

ero warai kîwyam oyakno komo,

Kporin komo Xesus Kristu yosotî ponarono me taxe.

Ero ke on wara tak wîîkes awya so,

ahce na poko awesencetaw so iito re tîmtapotaxmu me awexi xe wasî.

Cetanwesom me awexi xera so wasî.

Iito re cesehtînosom me xa matko awexi xe so wasî.

11 Ero warahra tko wences okwe awehtopo komo,

oyakno komo.

Metanwekyatu makî tî okwe awesencetaw so.

Kroe yanan komo n̂ekatîmyatken̂e owya ero wa awehtopo komo.

12 On wara tî mîîketu,

Pawru npanatanmekîtho xa owî,

ketu tî anarî komo.

Aporu npanatanmekîtho mak owî,

ketu tî anarî kom hara.

Sepasî npanatanmekîtho reha owî,

ketu tî anarî kom hara.

Owî reha n̂e ro Kristu npanatanmekîtho xa,

ketu tî anarî kom hara.

Ero wa tî metanwekyatu okwe.

13 Ahce kacho ero wa mîmtapowat okwe?

Cetîraconkaxi katî nai Kristu awya so.

Owî xa katî ketamowopekn̂e awepethîrî komo me awya so?

Pawru yakrono xa tak owî,

kacho me katî memihcatken̂e awya so?

Pîra ro mak okwe.

14 Kemicinoyatken̂e rma re iito oyexitaw,

asak makî tko wemicinoyakn̂e.

Krixpu,

Kaiu,

ero wa mak wemicinoyakn̂e.

Ero ka,

Kir̂wan̂he mai ham Apa,

anarî komo emicinopora mehxe ham owya,

wîîkesî Kaan ya.

15 Yaake emicinoyataw ketaw ha re owya,

Tpona enîn̂e me ehtome so mak emicinono n̂iir̂asî Pawru,

mîîkacerî ha na re kica opoko.

16 Estepanas marha tko wemicinoyakn̂e iyanan komo yakro rma.

Exihra wîhtînoyasî anarî komo on̂emicinoputho kom ha.

17 Emicinono ciita,

kahra xakn̂e Kristu owya.

Akirwamano n̂iir̂asî Kaan,

kacho ekatîmta,

kekn̂e mak owya.

On wara kahra marha xakn̂e owya,

Yaana komo mtapotarî men men̂ekakî kir̂wan̂he ekatîmtome awya,

kahra xakn̂e.

Yaana komo mtapotarî me mak ekatîmyataw ketaw ha re owya Kristu yamowotoponho ponarora rma mehcerî ha re okwe.

18 Kristu yamowotoponho ponarora rma tko naxe anarî komo.

Ero pîntho wara kyam makî tî n̂encet okwe.

Cehcamnosom komo makî mîkyam ero wa entan̂e komo.

Ero warahra reha cencexe kîwyam kir̂wan me ciisom kom reha.

Kristu yamowotoponho yanme rma karitî ro me xa Kaan n̂esenpesî kakir̂wamacho komo poko,

tîtkexe kîwyamu reha.

19 Ero yipu poko rma kesî Kaan Karitan.

On wara kesî,

Takîhsom me cesenposomînhîrî komo tak camkîno me tak wenpes hara.

Mîn hak poko ehcamhokaxapu komo marha camkîno me wenpesî,

kesî Kaan,

kesî Kaan Karitan.

20 Ahto nat ha re yaana me cesenposom kom ha?

Ahto nat ha re karita mewren̂e ro kom ha?

Ahto nat ha re mîn hak poko ceseseyusom kom ha?

Noro yipu komo mtapotarî tak Kaan n̂enpesî akpînî mtapotarî wara ro mak.

Ero wa ciino n̂iir̂asî Kaan.

21 On wara xatken̂e mîn hak poko ehcamhokaxapu komo,

camkî rma xatken̂e Kaan poko.

On wara xa tko nîhtînoyakn̂e Kaan takîhsom me xa cexirî ke.

Ero pîntho warai yekatîmtopo ke rma akir̂wamano wiir̂asî,

kekn̂e.

Ero ke ero wa tpona enîn̂e komo nakirwamexe.

Ero yipu ke mak akirwamano ciri xe xakn̂e.

Ero wa xakn̂e Kaan.

22 On wara mak naxe Xutew komo reha,

cirihnî ciitopo yenî xe mak naxe okwe.

Yaana komo mtapotarî yenta xe mak naxe Kreku komo reha.

23 Amna reha n̂ekatîmyasî Kristu pokono mak,

amowoxapunhîrî pokono ha.

Centaporera ro mak amna mtapotarî n̂encexe Xutew komo reha.

Ero pîntho wara kyam mak n̂encexe Kreku kom hara.

Ero wa Xesus yehtoponho n̂encexe okwe.

24 Tpoxwe rma tko amna mtapotarî n̂encexe Kaan nan̂ikîtho komo reha.

Ero wa n̂encexe Xutew poyino komo,

Kreku komo poyino komo marha.

On wara kexe noro yipu komo,

karitî ro me xa Kaan yenpon̂e Mîk ham Kristu okre,

Takîhsom me xa enpon̂e ham,

kexe.

Ero wa kexe Kaan nan̂ikîtho komo amna n̂ekatîmrî yencetaw.

25 Akpîn wara mak Kaan n̂een̂axe anarî komo.

Takîhso rma tko nasî Noro tooto komo yopo xa.

Kar̂pen wara mak Kaan n̂een̂axe anarî komo.

Kar̂pe rma tko nasî Noro tooto komo yopo ro mak.

26 Ero wara rma maxe amyamro hara,

oyakno komo.

Kaan nmen̂ekatho komo amyamro.

Ero ke on wara wîîkes awya so,

On warai komo xa amyamro,

Kaan nmen̂ekatho kom ha.

Asakî mak maxe amyamro yaana me cehsom me xa.

Asak mak marha maxe karitî me cehsom hara.

Asak mak marha maxe antomano rin̂e me cehsom hara.

Kayaritomo me cehsom marha asak mak maxe hara.

Noro yipu komo rma tko awan̂ikyatken̂e so Kaan.

27 On warai komo men̂ekan̂e me nasî Kaan,

camkînotho wa mak keen̂axe so tooto komo.

Noro yipu rma kmen̂eketken̂e so Kaan camkîno me ciitome yaana me cehsomînhîrî komo rma.

Kar̂pen wa marha keen̂axe so tooto komo.

Ero warai rma kmen̂eketken̂e so Kaan karitî komo yopono me kiitome so hara.

28 Noro pîntho mak kîwyam,

tooto komo nîwîrîyakarî mak.

Noro yipu rma kmen̂eketken̂e so Kaan.

Exihnî wara cehsom komo marha kîwyam.

Noro yipu rma kmen̂eketken̂e so,

kyopononhîrî komo exihnî wara ciitome hara yîwya.

Ero wa kmen̂eketken̂e so Kaan.

29 Ero warai komo mak kmen̂eketken̂e so Kaan ehcoyoponkara ro mak kehtome so.

Kir̂wan xa ow ham Apa,

kan̂e yenta xera ro mak nasî Kaan.

30 Kaan yanme mak kir̂wan̂he maxe.

Noro mak awir̂atken̂e so Kristu yakrono ro me.

Takîhsom ro Mîkî Kristu,

ero ke Noro yakrono ro me kexirî ke so takîhsom me marha taxe kîwyam hara.

Kaanî rma Mîkî takîhso kiin̂e.

Takîhso Kristu yehtopo rma Noro n̂iir̂asî kropotaka so takîhso kehtome so.

Ero wa xa marha kir̂wan me Kristu yehtopo n̂iir̂asî kropotaka so.

Ero ke kir̂wan me taxe kîwyam hara kir̂wan me Noro yehtopo ke rma.

Kaan ponarono ro Mîkî Kristu,

ero ke ero wa Noro yehtopo marha Kaan n̂iir̂asî kropotaka so.

Kepeman̂enhîrî marha Mîkî Kristu,

ero ke ero wa Noro yehtopo marha Kaan n̂iir̂asî kropotaka so epemaxapu me kehtome so hara.

Ero wa Kaan kiir̂axe so.

31 Ero yipu poko rma kesî Kaan Karitan.

On wara kesî,

kir̂wan̂he awexitaw so mahwowatu rma ha re.

On wara kahra mak ehcoko,

Kir̂wan̂he wai ham okre oyanme ro mak,

kahra.

Kporin komo mak kir̂wan̂he oriyasî,

kacoko xa matko.

Ero wa xa kacoko.