On okaritan an̂enîrî komo.

Pawru ow ha,

Xesus Kristu yanton ha.

Kaan ya kakir̂wamacho komo yekatîmrî poko oyantomekn̂e,

ero poko mak anarî pokohra.

2 Pahxa rma ero yipu Kaan n̂ekatîmyakn̂e kweronoman̂enhîrî pen komo ya.

Ow xa akir̂wamano wiir̂as amn̂e,

kekn̂e yîwya so.

Ero ke takî yîmtapotarî mewretken̂e n̂examro Kaan Karitan ha.

3 Kaan Mumuru pokono mîn Kaan ya kakir̂wamacho komo.

Xesus Kristu mîk Noro,

Kporin komo rma.

Tapi pen yepamtho me ewruxapu tî Mîk xakn̂e.

Yupun makî tko ero wa xakn̂e.

4 On wara xakn̂e Noro,

pakai hara waihxapunhîrî rma.

Kir̂wanî ro Yekatî yanme pakekn̂e.

Ero ke,

Kaan Mumuru xa Mîk ham,

karitî ro xa,

tîtkexe Noro poko.

5 Taa,

Noro yanme amna wakrekn̂e Kaan.

Kristu yantonî ro me amna n̂iir̂akn̂e amna wakrecho me.

Ero ke Kristu pona tak encoko,

kes amna mîk hak rowon pono komo ya.

Miyan komo ya rma ero wa kes amna ero wa kacho yewetîn̂e me tak ehtome so n̂examro hara.

6 N̂examro wara xa marha maxe amyamro hara.

Amen̂eketken̂e so Xesus Kristu takrono me awehtome so okre.

Ero wa awir̂atken̂e so.

7 Homa pono komo amyamro.

On okaritan mewresî an̂enîrî komo.

Aaxe so xa nasî Kaan.

Onakir̂wamarî me ehcoko,

kekn̂e awya so.

Ahwokan me awiri xe so wasî yîwya,

Kporin komo Xesus Kristu ya marha ero wa awiri xe so wasî.

8 Taa,

on wara wîîkes awya so,

Kaan ponaro awehtopo komo n̂ekaiwasî miya ro mak.

Roowo poko hakno komo n̂encexe ero wa awehtopo komo.

Ero ke on wara wîîkesî Kaan ya apoko so,

Kir̂wan̂he n̂examro miir̂a ham okre Apa Xesus Kristu yakrono me exirî ke so,

wîîkes apoko so.

Ero wa wîîkesî Kaan yakro omtapowataw.

9 Kaan yakro omtapowataw anarî komo poko apoko so meero marha kîmtapowasî.

Yaaro tan wîîkesî,

Noro rma on wara kesî opoko,

Yaaro ha,

n̂examro poko tîmtapotaxmu roro mîk ha,

kesî opoko.

Tahwore xa ketantomapesî yîwya yumumuru ya kakir̂wamacho yekatîmrî poko,

Noro rma ero wa kesî.

Ero wa wasî,

emapona roro apoko so kîmtapowasî Kaan yakro.

10 On wara wîîkesî yîwya,

Apa,

owto xe cma re was Homa pono komo yenso,

wîîkesî.

Pahxa rma omoku xe wîxakn̂e awenso so.

Ero ke ehn̂an me tak omoku xe wasî ahyaka so omoku xe exitaw Kaan.

11 Awenî xe so ro mak wasî cerewre.

Kar̂pe n̂he awekatî komo ciri xe wasî emacakan me tak awehtome so.

12 Tahwore xa tak cehtîkexe kesenîrî ke so,

wîîkesî.

Iito oyexitaw tak tahwore wasî Kaan ponaro awehtopo komo yenîrî ke owya.

Tahwore marha maxe opoko hara Kaan ponaro oyehtopo yenîrî ke hara awya so.

Ero wa tahwore taxe kesenîrî ke so.

Ero wa kahtome so omoku xe wasî ahyaka so.

13 Oyakno komo,

ahyaka so omoku xe oyehtopo yentara na mîxatken̂e.

Emapona roro cma re omoku xe wîxakn̂e ahyaka so.

Kehn̂ekn̂e mak ha tko okwe.

Mîn hak pono komo naxe oyeperîrî wara.

Ero wa xa marha cepetaxmu me oyexi xe wasî apoyino komo poko hara.

14-15 Ahnoro tooto komo ya cekatîmpore nasî Kaanî mtapotarî,

Awakir̂waman̂e komo mîk Kristu okre,

kacho.

Kreku komo ya cekatîmpore nasî,

warai makno komo ya marha,

ehcamhokaxapu komo ya,

ehcamhokanî ro komo ya marha.

Ekatîmra oyexitaw epethîkano rin̂e wara was okwe.

Ero ke awya so kakir̂wamacho komo yekatîm xe wasî awya so hara Homa pono komo ya.

16 Kaanî mtapotarî wekatîmyasî yîhyapamra ro mak,

Kristu xa Mîk awakirwaman̂e kom okre,

kacho.

Ero wa kacho ke rma Kaan n̂ekaricesî kakir̂wamacho komo poko.

Ewetîn̂e komo nakir̂wamesî,

Yaaro ham,

kan̂e komo ahnoro.

Xutew komo cokorî ka nakir̂wamesî,

Kreku komo marha.

17 Kir̂wanî ro me Kaan yehtopo n̂esenpesî akir̂wamano riyataw Kristu ya.

Ero wa noro yehtopo n̂esenpesî kîwya so Kristu pona een̂ataw kîwya so.

Amn̂e tak noro pona enîn̂e me xa tak cehtîkexe hara,

ero ke tak miya xe n̂he tak n̂esenpesî kîwya so.

Ero yipu poko rma kesî Kaan Karitan.

On wara naxe kir̂wan me ciixapu komo,

Kaan pona enîn̂e me roro naxe kir̂wan me roro cehtome so,

kesî.

Ero wa kesî Kaan Karitan.

18 On wara tko naxe tooto komo mer̂pono pîn komo,

Kaan ponarora ro mak naxe okwe.

Kicicme cexi so mak naxe kica,

ero ke yaarono yenta xera ro mak naxe okwe,

Kaanî mtapotarî ha.

Ekatîmra ro mak ehcoko kica,

kexe marha.

Kah yai rma Kaan n̂een̂asî ero wa ehtopo komo.

Ero ke tak noro yipu komo poko tîrwon̂em me ro mak n̂esenpesî.

19 Kaan yehtopo cma re n̂esenpesî yîwya so.

Cehtopo n̂enpesî Kaan yîwya so.

20 Enîhnî ro mak Mîkî Kaan.

Kir̂wantawno me rma tko n̂esenpesî tînakîtothîrî ke cma ha re.

Ero yipu yenîrî ke,

Karitî xa Mîk Kaan ham ekar̂kanî ro mak,

kapore cma re nasî.

Noro mak Mîkî Kaan ham,

kapore marha cma re nasî.

Mehxa ro rma ero wa ehtopo n̂esenpekn̂e,

roowo yakîhtotoponho n̂ixa ro.

Ero ke pahxan pen komo meero ero yipu n̂een̂atken̂e.

Ero ke,

camkîno thakwa mîkyam ham okwe,

kacho mera ro mak naxe.

21 On wara tî xatken̂e pahxan pen komo,

Kaanî re ka nîhtînoyatken̂e pahxa mak ha kapu.

Kaan xa mîk ham,

Noro mak kirwanî ro okre,

kahra tko tî xatken̂e.

Kir̂wan̂he xa mai ham Apa,

amna makronome ham okre,

kahra marha tî xatken̂e okwe.

Ero pîntho ponaro xa matko tî n̂ehtîketken̂e kica.

Wara kyam mak cesehtînosom me takî tî n̂ehtîketken̂e,

awarpantaxapu wara tak xakn̂e yîropotarî komo okwe.

22 Ehcamhokaxapu xa amna okre,

ketken̂e rma cma tî re noro yipu komo.

Camkî xa matko n̂ehtîketken̂e ero wa kan̂e komo rma okwe.

23 Kaan poko meero camkî tak n̂ehtîketken̂e okwe.

Kir̂wanî ro mak Mîk Kaan waipînî ro mak ha.

Noro yipu tak nahsîpînketken̂e okwe.

Anarî mak takî tî n̂iir̂atken̂e ponaro cehtopo komo.

Tooto warai makî tî n̂iir̂atken̂e twaihsomtho warai kica.

Tarin̂em komo warai marha tî n̂iir̂atken̂e,

paaka warai marha,

kamara warai marha,

sehrere me tîtosom komo warai marha.

Ero warai komo makî tî n̂iir̂atken̂e ponaro cehtopo komo me kica.

24 Ero ke Kaan makîrha tak xakn̂e noro yipu komo yahsîpînkan̂e wara hara.

Kicicitho poko tak ehtîkacoko awanme ro so,

kekn̂e makî tî Noro yîwya so.

Ero ke kicicitho poko takî tî n̂epohketken̂e kica.

N̂etwîrîmetken̂e ro mak okwe,

anarme tupun komo poko cexirî ke so kica.

25 Cemaronwatken̂e marha Kaan poko kica.

Yaarono nahsîpînketken̂e okwe Kaanî mtapotarî ha.

On wara xa matko nasî Kaan ha,

ketken̂e tî tohnaw ro mak kica.

Kaan nakîhtotho mak takî tî nîhtînoyatken̂e ponaro cehtopo komo me.

Ero yipu komo yanton me marha takî tî xatken̂e kica.

Takîhton̂enhîrî komo tak yîhtînopîra ro mak xatken̂e ponaro cehtopo komo me okwe.

Ewetîra marha xatken̂e.

Kahwotacho xa tak Mîk Kaan okre,

miya rorono me.

Noro yipu ponarora tak xatken̂e okwe.

Ero wa tî xatken̂e kica.

26 Ero ke noro yipu komo yahsîpînkan̂e wa takî tî xakn̂e Kaan hara.

Kicicitho poko cepohkatîkaxmu me xa tak ehcoko,

kekn̂e tî Kaan yîwya so.

Ero ke kîîrî pici me cexi xera so takî tî xatken̂e wooxam komo.

Etpoko makî takî tî xatken̂e woosî re rma kica.

27 N̂examro kîrîn marha takî tî xatken̂e anarme hara.

Wooxam xera takî tî xatken̂e cipici me so.

Etpoko takî tî n̂epohketken̂e kîîrî re rma hara kica.

Ero ke tak ero yipu yepetho me cerewîmsom me xa tak Kaan n̂iir̂akn̂e.

Yaaro rma ero wa ciino n̂iir̂akn̂e.

28 Kaan ponaro cexi xera ro makî tî xatken̂e kica.

Ero ke on wara takî tî kekn̂e Kaan yîwya so,

Taa,

kicicitho ponaro rma ehtîkacoko,

kekn̂e tî yîwya so.

Ero ke cetwîrîmacho komo poko thakwa xatken̂e okwe noro yipu komo.

29 Kir̂wan pîn pokono me ro makî takî tî n̂ehtîketken̂e kica.

Cipici pîn komo poko n̂ehtîketken̂e,

kicicitho pokono me marha,

cemyawno komo poko cepohkaxmu me,

emetanmekno ritopo ponarono me,

ero wara ro makî takî tî n̂ehtîketken̂e kica.

Tîyopono komo xatî pîn me marha xatken̂e,

waihkano ritopo ponarono me,

ceseseyusom me,

cesemîknosom me,

etîxatî pîn me,

etpoko tîmtapotaxmu me,

ero warai me tî n̂ehtîketken̂e kica.

30 Kîmtayeyukn̂e me marha tî n̂ehtîketken̂e,

Kaan xatî pîn me marha,

kanwekn̂e ro me,

anarî komo yopo cesehtînosom me,

Oyanme ro mak wehsî,

kan̂e me,

kicicitho poko cesehtînosom me,

tîîm komo yanwekn̂e me,

tînocwan komo yanwekn̂e me marha.

31 Yuhnari yîhtînon̂e pîn me marha tak n̂ehtîketken̂e,

cesemîknosom me,

etîxatî pîn me,

cemetanmetoponhîrî komo yîhcamnon̂e pîn me,

etpînîn yawno pîn me marha,

ero warai me roro mak takî tî n̂ehtîketken̂e tooto komo kica.

32 Kaanî mtapotarî cma re n̂encetken̂e,

Twaihkapore men naxe okwe ero warai komo,

kacho.

Panahnî wara rma tko tî xatken̂e kica.

Ero ke ero warai me rma tî xatken̂e.

Tpoyino komo meero marha tî wakpamnoyatken̂e kica ero yipu poko.

Kacoko rma kapu,

ketken̂e kicicitho pokono komo ya kica.

Ero wa tî n̂ehtîketken̂e Kaan ponarono pîn komo.

Ero ke wa Kaan nîrwonasî poko so.

Ero wa nasî Kaan.