Taa,

amna yawomche tak ciwya yosotî amna n̂encekn̂e.

Mawta on ha ciwya,

kacho amna n̂encekn̂e.

2 Tawake xatken̂e iitono komo amna poko,

amna nakronometken̂e okre.

Amna wehtorî n̂iriyatken̂e.

Tuuna mokyakn̂e ero yimaw.

Twotme xakn̂e.

Ero ke amna wehtorî n̂iriyatken̂e.

Ero wa amna nakronometken̂e iitono komo.

3 On wara tko xakn̂e Pawru wehto yiriyataw yîwya so,

noro meero kamerî namekyakn̂e.

Okoyi tko xakn̂e oko kamerî chew.

Wehto kamehcetaw n̂epatakekn̂e tak okoyi wehto yanme.

Noro tak Pawru yamorî n̂eskekn̂e oko.

4 Okoyi yenîche tak Pawru yamorî poko,

noro poko tak nîmtapowatken̂e iitono komo.

Kica,

ketken̂e,

waapatho moso ham kica.

Tuuna imo kwaw waihîrî ha re.

Yukwaw cma waipîra n̂ehxe.

Waihyasî rma thakwa waihkano ritoponho yepetho me ham,

ketken̂e Pawru poko.

5 Ero wa ketaw rma yîwya so okoyi tak nar̂mekn̂e Pawru wehto ywaka.

Erewra rma tî xakn̂e noro yamorî.

6 Pawru yamorî yupurutarî ponaro tî xatken̂e iitono komo.

Yohno rma na waihya,

ketken̂e.

Pahkî Pawru n̂een̂atken̂e.

Kir̂wan̂he rma tko xakn̂e okyo.

Ero ke n̂eserepoketken̂e xa tak noro poko.

Ponaro cehtopo komo warai me takî tî nîhtînoyatken̂e hara.

Ero wa Pawru nîhtînoyatken̂e.

7 Taa,

iito xakn̂e ewto hara.

Ciwya pono komo kayaritomon yewton tî mîn xakn̂e.

Pubriu tî mîk xakn̂e kayaritomo yosotî.

Noro tak amna naar̂akn̂e cewton pona.

Iito tak amna n̂enmayakn̂e yîhyaw 3 kaamo mak.

Amna wakrekn̂e kir̂wan̂he okre.

8 Ero yimaw Pubriu yîîm namotoyakn̂e,

kama po xakn̂e.

Ocoro tî xakn̂e,

yîropotarî marha tî n̂erewakn̂e.

Ero ke noro yenso tak cekn̂e Pawru.

Enîche tak Kaan yakro nîmtapowakn̂e noro yepoi.

Kaan yakro tîmtapotache tak meretîyasîyakn̂e.

Ero wa exiche kir̂wan̂he tak xakn̂e hara Pubriu yîîm.

9 Taa,

karihtoxapu yenîche tak anarî komo tak mokyatken̂e Pawru yaka tamotosom kom ha.

Mokuche so n̂examro marha tak nakir̂wamekn̂e Pawru.

Ero wa xakn̂e Pawru.

10 Ero ke amna ponaro xa xatken̂e iitono komo.

Anarmerpan ke amna ponaro cehtopo komo n̂enpekn̂e.

Ero yinhîrî ciwya poi amna cetaw hara yiixe amna yehtopo marha nîmyatken̂e amna ya.

Ero wa amna wakretken̂e.

11 Taa,

iito xakn̂e amna ciwya po.

3 nuun̂i xakn̂e amna iito.

Ero yinhîrî tak amna cekn̂e hara anarî komo kanawarî yaw hara.

Cwotu yenatkan̂enho komo marha tî mîkyam xatken̂e iito kapu.

Arexancia pono komo mîkyam xatken̂e.

N̂examro kanawarî potwo xakn̂e tooto warai ciixapu.

Asakno kuknon xakn̂e ero potwono me.

Ero yipu yaw tak amna cekn̂e tuuna imo kwaw xa hara.

12 Taa,

Sirakusa pona tak amna nawomyakn̂e hara.

Iito amna n̂enmayakn̂e 3 kaamo mak.

13 Ero yinhîrî tak amna cekn̂e hara Hexiu pona hara.

Enmapuche hara kir̂wan̂he tak nocowonakn̂e suu n̂ixa.

Ero wa exirî ke amna cekn̂e hara.

Enmapuche xa hara amna nawomyakn̂e Puteori pona hara.

14 Iito Kaan xîkrî komo n̂een̂akn̂e amna.

Amna tak porohketken̂e n̂examro.

Tanî n̂he ka awexi xe so nasî amna 7 kaamo mak,

ketken̂e amna ya.

Ero ke iito ka xakn̂e amna yîhyaw so kapu.

Ero yinhîrî tak amna cekn̂e hara Homa yesamarî yaw tak.

15 Ero yimaw tak amna yekaci tî n̂encetken̂e Homa pono komo,

Kaan xîkrî komo.

Ero ke amna potpona mokyatken̂e.

Apiu Roron pona mokyatken̂e.

Iito xakn̂e 3 mîîmo mko.

Uupa yukun yeetopo ro tî mîn xakn̂e mîîmo mko.

Iina mokyatken̂e Kaan xîkrî komo amna potpona.

N̂examro yenîche,

Kir̂wan̂he Kaan nai ham okre,

kekn̂e Pawru.

Tahwore n̂he tak xakn̂e.

Ero wa xakn̂e.

16 Ero yinhîrî tak Homa pona tak n̂epatakekn̂e amna.

Iito tak ahsîxapu komo naar̂akn̂e sowtatu yantoman̂e porisia yenîn̂e yaka.

On wara tko kekn̂e noro Pawru ya,

Amînî ro yaw tak esko yiixe awexitaw,

ketken̂e yîwya.

Ero wa karî ke tak cewyaro xakn̂e Pawru tîmînî ro yaw.

Tahruso rma tko tî xakn̂e iito.

Sowtatu xakn̂e enîn̂e me roro.

Ero wa xakn̂e Pawru.

17 Taa,

ero yinhîrî tak osorwaw enmapuche Xutew yenîn̂e komo tak nan̂ikpekn̂e Pawru.

On wara kekn̂e yîywa so,

Oyakno komo,

awakro so kîmtapowasî.

Kesekatîmyasî cma re awya so.

On wara wîxakn̂e pahxa Xerusaren po,

oyahsîyatken̂e thakwa iitono komo.

Oyahsîche Homanu komo ya tak oyahsîpekn̂e hara.

Kpoyino komo yîwîrîman̂e pînî ro mak ow.

Kporin pen komo yehtopo yîwîrîyakan̂e pîn marha ow.

Wara rma tko oyahruyatken̂e.

18 On wara tko ketken̂e Homanu komo oyen̂ekan̂e komo yentache,

Tahrunkapore nasî moso.

Kicicme xa exihra nai ham.

Twaihkaxmu mera nasî kîwya so,

ketken̂e opoko.

19 On wara tko ketken̂e Xutew komo,

Pîra ro mak kica,

ahsîpinkara ro mak cexpore nasî,

ketken̂e.

Ero wa karî ke yîwya so Sesa yaka owtotopo tak wetahcakn̂e.

Ero ke kmokye oona.

Xutew komo yen̂ekapo xera ro mak wasî Sesa ya.

Yîhyaka mak kmokye.

20 Ero ke kan̂ikpocow so kesentachome so.

Cemeknumiso thakwa wasî tan.

Ixaw Yana komo yakir̂waman̂e yehtopo yekatîmrî poyero mak cemeknumiso wasî,

kekn̂e Pawru.

Ero wa kekn̂e Xutew komo ya.

21 Ai okwe,

ketken̂e tak Xutew komo,

apohana,

Xuteia pono komo karitan yenîhra ro mak nas amna apokono.

En̂exa mohxapu komo marha awekatîmra xatken̂e amna yakno komo.

Kicicme nasî Pawru kica,

kahra ro mak xatken̂e amna ya.

22 Kaan poko awesehtînotopo yenta xe rma tko nas amna.

Awarai komo yehtopo rma n̂esencesî miya rma.

Kicicitho warai me rma tko n̂esencesî kica,

ketken̂e hara yîwya.

Ero wa ketken̂e.

23 Ero ke Pawru yaka tmohtopo komo xa hara nukuknometken̂e.

Ero ke tukuknomathîrî komo po tak mokyatken̂e hara yaake tak ha.

N̂examro tak nîhcamhokekn̂e Pawru Kaan maywen me kehtopo komo poko.

Xesus poko marha nîmtapowakn̂e yaaro xa.

On wara kekn̂e,

Xesus mohtopo rma n̂ekatîmyakn̂e Moises pen.

Kweronoman̂e pen komo marha n̂ekatîmyatken̂e Noro mohtopo,

kekn̂e.

Pahkî nîmtapowakn̂e ero yipu poko.

Pahxaxa ro rma n̂ihciyakn̂e,

kokon̂i cehso ro kekn̂e.

Ero wa nîmtapowakn̂e Pawru.

24 Ero yipu yentache tak anarî komo n̂ewehcatken̂e Pawru mtapotarî.

Anarî komo reha ewetîra xatken̂e okwe.

25-26 Ero ke n̂eseseyukyatken̂e tak n̂examro re Pawru mtapotarî poko.

Anarmerpa so n̂esehtînoyatken̂e okwe.

Ero yinhîrî cetken̂e hara.

Cewn̂e ro xa hara tko Pawru nîmtapowakn̂e akro so cetaw so.

On wara kekn̂e yîwya so,

Yaaro kekn̂e ham Kir̂wanî ro Yekatî aporin pen komo ya.

Isaias pen ya tî kekn̂e yîn̂ekatîmrî me hara yîwya so.

On wara tî kekn̂e yîwya,

N̂examro yaka etoko.

On wara kasko yîwya so,

Omtapotarî yentan̂e cma re amyamro.

Entan̂e pîn me rma tko maxe okwe.

Oyehtopo yenîn̂e marha cma re amyamro.

Enîn̂e pîn me rma tko maxe hara okwe,

kasko yîwya so.

27 Takîhso entan̂e pîn me tak nasî yîropotarî komo.

Takîhso entara ro mak naxe tpanakemu rma ha re.

Cesewyahrusom wara marha naxe enîhra ro mak cehtome so.

Takîhso xa enta xera marha naxe okwe.

Ero wa naxe takîhso entara ro mak cehtome so.

Cetaknama xera ro mak naxe.

Onakir̂wamarî me cexi xera ro mak naxe okwe,

kekn̂e Kir̂wanî ro Yekatî owya,

kekn̂e Isaias pen pahxa.

Yaaro xa kekn̂e ham.

28 Ero ke on wara men yîhtînocoko,

Xenciu komo yaka makîrha tak ekatîmn̂e komo n̂en̂epekn̂e Kaan,

kakir̂wamacho komo yekatîmn̂e komo n̂en̂epekn̂e ha.

N̂examro takî reha n̂encexe amn̂e,

kekn̂e Pawru yîwya so.

Ero wa kekn̂e Pawru Xutew komo ya.

29 Ero wa kacho yentache tak Xutew komo cetken̂e hara.

Tîtoche so tak n̂eseseyukyatken̂e ro makî tî Pawru mtapotarî poko.

Ero wa tî xatken̂e.

30-31 Ero wa xakn̂e Pawru Homa po cexitaw.

Iitono mîn yaw mak xakn̂e.

Ero yipu n̂epemekn̂e yaw cehtome.

Iito exitaw yaake mokyatken̂e tooto komo Pawru yenso.

Taa,

amohcoko ha,

kekn̂e noro tîhyaka moku xatî komo ya.

Mokuche so n̂examro tak weronomekn̂e roro Pawru Kaan maywen me kehtopo komo poko.

Kporin komo Xesusu Kristu yehtopo marha n̂ekatîmyakn̂e yîwya so.

Erasîra ro mak n̂ekatîmyakn̂e.

Ero yipu ekatîmra ro mak esko,

kan̂e exihra ro mak xakn̂e.

Pahkî xakn̂e iito ero yipu yekatîmrî poko,

2 cimn̂ipu.

Ero wa xakn̂e Pawru Homa po.

Iina mak nai ekatîmtopo.