Taa,

ero wa tî n̂esencetken̂e Pawru poko.

Ero ke Itar̂a pona amna yen̂epetopo takî tî nîhtînoyatken̂e.

Ero ke Pawru takî tî narpetken̂e sowtatu yantoman̂e ya.

Ahruyemînhîrî komo marha narpetken̂e yîwya.

Xur̂u tî mîk xakn̂e aan̂e yosotî.

Aukustu kurun me ehxapunhîrî rma tî mîk xakn̂e.

2 Nakwataw xakn̂e Aramicinu pono komo kanawarî.

Ero yaan̂e komo tîto xe so xatken̂e Asia rowon yecihtaw roro.

N̂examro yaka tak amna n̂esenkayakn̂e.

Aristaku marha mokyakn̂e amna yakro.

Maseton̂a rowon pono mîk xakn̂e,

Tesaronika pono.

Ero wa amna cekn̂e.

3 Enmapuche hara Siton nakwarî yaro amna nawomyakn̂e.

Iito amna exitaw Pawru pînîn yaw xakn̂e Xur̂u.

Ero ke on wara kekn̂e yîwya,

Etoko ka yiixe awexitaw tantono komo yenso,

awakrononhîrî komo yenso,

kekn̂e yîwya.

Ero wa karî ke Pawru tak nawomyakn̂e yîhyaka so.

Ero ke yiixe noro yehtopo nîmyatken̂e iitono komo yîwya.

4-5 Ero yinhîrî tak amna cekn̂e hara Xipre yawxari amna yemtaka mokrî ke ocowo.

Ero yinhîrî tak tuuna imo rakataka n̂he amna cekn̂e Sirisia rowon yecentono kwaw,

Panpir̂a rowon yecentono kwaw marha.

Ero yinhîrî tak Miha pona amna nawomyakn̂e.

Risia rowon pono rma mîn Miha.

6 Iito exitaw amna kanawa xa hara n̂een̂akn̂e sowtatu yantoman̂e.

Arexancia pono komo kanawarî tî mîn xakn̂e.

Itar̂a pona tîto xe tî xatken̂e ero yaan̂e komo.

Ero ke n̂examro yaka tak amna n̂enkayakn̂e hara noro.

Ero yaw tak amna cekn̂e hara.

7 Ero yimaw yamoro amna cekn̂e okwe.

Yaake kaamo amna cekn̂e.

Amna yemtaka mak ocowo mokyakn̂e kica.

Cehn̂axi mak amna cekn̂e Kinitu mîtkoso.

Ero yinhîrî amna cekn̂e rma Kreta yawxari hara,

Sarmoni yecento.

8 Cehn̂axi mak amna cekn̂e.

Toche n̂he tak yukuhya tak amna n̂een̂akn̂e hara.

Tînakwaporem,

kacho tî mîn yukuhya yosotî.

Iina ka amna nîtîtmamyakn̂e.

Ewto nakwarî rma mîn xakn̂e yukuhya,

Raxeia nakwarî ha.

9 Amna thakwa n̂ecmamtîkekn̂e okwe.

Pahxa rma xakn̂e eseresmara Xutew komo yehtoponho.

Tuuna imo kwaw totopo mera tak xakn̂e.

Enorirî yaro amna xakn̂e kopi cecmamrî ke okwe.

10 Ero yinhîrî tak on wara kekn̂e Pawru kanawa yosom komo ya,

Ai oyakno komo,

kicicme ro mak tak men wîhtînoyasî kîwtotopo komo oroto.

Kîwcetaw rma kanawa men n̂etakuhr̂apes okwe.

Anarîrî komo marha n̂enor̂asî okwe.

Kîwyam marha cenor̂axe okwe,

kekn̂e.

Ero wa kekn̂e Pawru yîwya so.

11 Anarme tko kekn̂e kanawa yosom,

kanawa kor̂man̂e marha.

Ero ke n̂examro mtapotarî n̂ewehcakn̂e sowtatu yantoman̂e.

Pawru mtapotarî yewetîra xakn̂e.

12 Ero wa xa marha ketken̂e akrono kom hara yaake tak,

kanawa yosom wa xa marha tî ketken̂e.

Wahra mak nas okwe on nakwa,

ketken̂e.

Ero ke kaikatko hara miya Penise pona hara.

Nakwa xa nai iito cwotu yenatkacho xa,

ketken̂e.

Kreta rowon pono yecihtawno mîn Penise.

Ececoka nasî iitono yaka kîwtotopo.

Ero ke ero kwaka tîto xe tî xatken̂e n̂examro cwotu yenatkaxi.

13 Ero yimaw tak suu n̂ixa napepenakn̂e yamoro mak okre.

Ero wa exirî ke tuuna imo rakataka n̂he tak kanawa naar̂atken̂e.

Kir̂wan̂he kaar̂atu so ocowo okre,

ketken̂e cma ha tî re kapu.

14 Pahkîra makî tko kir̂wan̂he napepenakn̂e.

Amn̂e emtaka hara nocowonakn̂e hara kar̂pe xa tak okwe.

Ewro-Akiraw tî mîn xakn̂e ero yipu yosotî,

ocowo imo yosotî.

15 Ocowo yemtaka tko kanawa yarî xe tî re xatken̂e.

Pîra ham okwe.

Kanawa potkor̂mekn̂e xa matko okwe ocowo pataw arîrî yarohra thakwa.

Ero ke ocowo mak amna naar̂e okwe.

16 Ero yinhîrî tak ciwya yawxari xa hara amna cekn̂e.

Krawta tî mîn xakn̂e ciwya yosotî.

Iito tak amna nanîmyakn̂e kanawaci amna mapitaka yimixapunhîrî.

Cehn̂axi mak amna nanîmyakn̂e.

17 Ero yanmîche tak amna kanawarî tak nawrutamiyatken̂e etîrakara ehtome.

Ero yimaw marha axawa pona n̂eraswatken̂e hara.

Moro to tak men nai kîrîhnonmekn̂e komo kopi Sihte yaxawan ha,

ketken̂e.

Ero ke roona namomiyatken̂e ocowo yahsîra tak ehtome.

Ocowo rma tko amna naar̂akn̂e roona ken̂ehra rma.

18-19 Enmapuche hara yîtîtmamra rma xakn̂e ocowo.

Amna n̂ewsîyakn̂e ro mak kopi.

Ero yanme tînarîrî komo nar̂metken̂e kr̂a kanawa yaan̂e komo.

Yukwaka nar̂metken̂e taponukye n̂he tak totohme kanawa.

Enmapuche xa hara kanawa micitho nar̂metken̂e hara.

Ero wa nar̂metken̂e.

20 Yaake ro n̂enmayakn̂e ocowo imo me rma okwe.

Kaamo yesenpora ro mak xakn̂e,

xir̂ko marha.

Cenor̂axe tak okwe,

ketken̂e mak tak kanawa yaan̂e komo.

Ero wa ketken̂e.

21 Yaake kaamo eseresmara xatken̂e okwe kanawa yaan̂e komo.

Pahkî exiche tak Pawru nawomyakn̂e piiri.

On wara kekn̂e yîwya so,

Ai oyakno komo,

on wara wîîkes awya so.

Omtapotarî xa re mewetîcerî.

Kreta poi mokuhra ro makî re cehcerî okwe.

Enko xe,

cesemetanmekyaxe tak okwe.

Cepethîkemînhîrî n̂etkurei marha okwe anarîthîrî komo.

22 Tahwore rma tko cehcerî.

Waipîra ro makî tî tatu.

Cewn̂e n̂hema waipîra ro makî tî tatu.

Kanawa pen makî reha tî n̂ewakroke.

23-24 Kaan yancunu tko wenwo kosope.

Oyantoman̂e yanton mîk n̂eexi.

Noro yantoman̂e yanton me xa marha was ow hara.

Omîtkoso n̂ececeto noro.

On wara nîîka owya,

Pawru,

erasîra ro mak esko.

Sesa yaka rma kaar̂asî.

Ero ke awanme rma tak awakrono komo meero nukurunpesî Kaan.

Waipîra xa marha naxe n̂examro hara,

nîîka.

Ero wa nîîka ancu owya.

25 Ero ke tahwore rma cehcerî oyakno komo.

Kaanî mtapotarî ponaro xa wasî.

Ancu n̂ekatmo owya ero yaw roro rma wa taxe amn̂e,

wîîkes ow ha.

26 Ciwya pona tko tî nîrîhya kanawa pen,

kekn̂e Pawru.

Ero wa kekn̂e Pawru kanawa yaan̂e komo ya.

27 Ero yimaw tak,

14 kaamo tak xakn̂e ocowo me enmachonhîrî tuuna imo rakataw rma amna yehtoponho okwe.

Atriaciku tî mîn xakn̂e tuuna imo yosotî,

iitono yosotî.

Kosope amna xakn̂e iito.

Ero yimaw tak rakatawro tuuna yekahximarî tî n̂encetken̂e kanawa yaan̂e komo.

Moro to takî nai mî echîrî,

ketken̂e tak n̂examro.

28 Ero ke weyun yukuknomacho tak nar̂metken̂e yukwaka.

Anmîche hara n̂een̂atken̂e.

36 metru xakn̂e weyun kuknomacho.

Ero yinhîrî meye n̂he nukuknometken̂e xa hara.

27 metru mak tak xakn̂e weyun kuknomacho iito hara.

Panape n̂he tak xakn̂e ha re okwe.

29 Ero wa exirî ke tak n̂eraswatken̂e ro makî tî kanawa yaan̂e komo.

Okwe,

ketken̂e,

toh po men wa tîhcexe,

ketken̂e.

Ero ke tak kanawa yecehtotopo nar̂metken̂e yukwaka kanawa yecehton̂e,

4.

Kanawa mapitai nar̂metken̂e.

Ero mko takî kanawa n̂ecehcekn̂e.

Tohra tak xakn̂e.

Yohno enmapu xe xa tî xatken̂e.

30 Ero yimaw tak cesen̂epanmekî xe so tî xatken̂e kanawa yaan̂e komo.

Ero ke kanawaci takî n̂enîhcetken̂e yukwaka.

Kanawa yecehton̂e xa hara amna nar̂mesî poturu n̂ixa hara,

ketken̂e mak kica.

31 On wara tko kekn̂e Pawru sowtatu yantoman̂e ya,

sowtatu komo ya marha,

Tan kanawa yaw exihra exitaw n̂examro mîwaiyaxe rma men okwe,

kekn̂e yîwya so.

32 Ero yentache sowtatu komo tak nawocetken̂e kanawaci micitho.

Ero ke kanawaci pen tak cekn̂e anana aan̂e ken̂ehra rma.

33-34 Ero yimaw tak enmarî yakro ro Pawru tak nîmtapowakn̂e xa hara akro so.

Ai oyakno komo,

on wara wîîkes awya so,

yaake kaamo eseresmara maxe,

14 kaamo rma okwe.

Ero ke eseresmacoko n̂he tak waipîra awehtome so.

Kir̂wan̂he tak maxe amn̂e.

Ahpoci komo meero ehcamnopîra nasî cewn̂e rma ciki,

kekn̂e Pawru yîwya so.

35 Ero wa kache tak tuuru nanîmyakn̂e Pawru.

Kaan yakro ka nîmtapowakn̂e.

Kir̂wan̂he on anmîthîrî Apa amna yuru,

kekn̂e.

Ero yinhîrî tak poikekn̂e,

nokyakn̂e marha.

36-37 Ero ke tak nahwowatken̂e hara ahnoro,

n̂eseresmetken̂e marha Pawru yakro.

Yaake amna xakn̂e kanawa yawno komo,

276 tooto ha.

38 Ero yinhîrî tak ceseresmatîkache so puruma meero nar̂metken̂e yukwaka taponukye n̂he tak totohme kanawa.

39 Enmapuche tak roowo amna n̂een̂akn̂e.

Camkî tko tî n̂een̂atken̂e kanawa yaan̂e komo.

Ahtono na mîn roowo,

ketken̂e mak.

Tuuna yaporî marha n̂een̂atken̂e iito.

Axawa xakn̂e aporî kentaw.

Ero ke on wara ketken̂e.

Mîîna kaikatko axawa pona.

Tîtkukmacerî ika,

ketken̂e.

40 Ero ke tak kanawa yecehton̂enho micitho nawocetken̂e.

Iito rma kr̂a nînomyatken̂e ecehton̂enhîrî mko yukwaw rma.

Kanawa kor̂macho micitho marha nîmhoketken̂e hara.

Roona tak namomhoketken̂e hara ocowo yahsîn̂e kanawa totohme hara.

Ero ke tak axawa wece amna cekn̂e.

41 Ero yinhîrî meyehra amna toche kanawa tak nîrîhyakn̂e axawa pona.

Ero ke cikihciki kekn̂e tak tuuna yewcokocokon kanawa mapirî poko.

Ero yanme thakwa kanawa mapitho pen n̂ewakrokekn̂e okwe.

42 Ero yinhîrî tak kahrutopo yaka taasom komo waihkacho tî nîhtînoyatken̂e sowtatu komo.

Twaihkapore men nasî ero yaka taasom.

Miya ro mak perenatu men okwe.

Ahsîra men wa taxe hara amn̂e,

ketken̂e tî.

43-44 Anarî me tko tî kekn̂e sowtatu yantoman̂e,

Apohana okwe.

Waihkara rma ehcoko,

kekn̂e tî.

Ero wa tî kekn̂e Pawru pînîn yaw cexirî ke.

On wara mak kekn̂e noro amna ya,

Tperen̂em me awexitaw so aperenîmcoko ecihtaka,

kekn̂e.

Ero ke ero wara amna xakn̂e.

Anarî komo reha n̂etahsîyatken̂e sahsamaxapu kotonho poko mak,

kanawa me ciixapunhîrî poko ha.

Ero ke ero wa cekn̂e amna ahnoro ecihtaka.

Waipîra rma amna cekn̂e.

Ero wa amna xakn̂e.