Ero yinhîrî on wara takî tî kekn̂e Akripa hara,

Pawru ya tî kekn̂e,

Taa,

esekatîmko tak amoro.

Awanme ro mak kasko,

kekn̂e tî.

Ero ke Pawru takî tî n̂etapoyankekn̂e.

N̂esekatîmyakn̂e tak tanmero.

2 On wara tî kekn̂e,

Kayaritomo Akripa,

on wara wîîkes awya,

tawake xa wasî oyesekatîmrî ke tak awya.

Anarmerpan poko oyen̂ekexe Xutew komo.

Ero ke yîmtaka so tak weyukyasî an̂entarî me.

3 Xutew komo yenîn̂e xa amoro.

Yîmtapotarî komo mencesî ahce na pokono.

Eseseyutopo komo marha mencesî.

Ero ke tawake xa kesekatîmyasî oroto awya.

Pokahra cma re masî omtapotarî yencetaw.

4 Owerono mîkyam Xutew komo.

Mehxa ro omrenai ro rma oyehtopo n̂een̂atken̂e.

Opoyino komo chew kpor̂mamyakn̂e Xerusaren po rma.

5 Amna panatanmetopo yewetîtîkan̂e xa ow Parisewnhirî me oyexirî ke.

Ero wa oyehtoponho n̂een̂atken̂e Xutew komo omrenai ro.

Ero wara rma n̂ekatîmyatu Xutew komo ekatîm xe cexitaw so ketaw ha re.

6-7 Kaan xa tî nîmtapowakn̂e pahxa amna porin pen komo yakro.

Kir̂wan̂he men kiir̂axe so amn̂e,

kekn̂e tî yîwya so.

Ero wa kachonho ponaro rma naxe amna tribun komo,

12 kom ha.

Ero ke Kaan poko roro naxe katpanaw,

kosope marha.

Ero wa naxe takronomachome so n̂he yîwya.

Ero wa kachonho ponaro oyexirî ke mak oyen̂ekexe Xutew komo okwe.

8 Ahce warai me katî Kaan mîhtînoya amoro,

cehn̂axmu me katî mîhtînoya Noro waixapu pen yenpakacho poko?

9 N̂examro wa xa marha wîxakn̂e.

Kicicitho Mîk xakn̂e Xesus Nasare pononho,

wîîkekn̂e ha ka n̂examro wa xa marha.

Noro yosotî ponarono komo yemetanmekn̂e me kr̂a wîxakn̂e okwe.

10 Xerusaren po oyexitaw marha kir̂wan komo wemetanmekyakn̂e kica.

Tîmsom pokono yenîn̂e komo mtapotarî yanme ahruno wiir̂akn̂e.

Noro yipu pen komo waihkacho poko esencetaw yîwya so,

Etapacoko kr̂a,

wîîkekn̂e ow marha okwe.

11 Emapona roro kîwcekn̂e esenmetopo komo yaka noro yipu komo yemetanmeso.

Kicicme ro mak nasî Xesus kica,

kacoko ha men wîîkekn̂e yîwya so.

Xesus ponarono komo poko kîrwonîmtîkai ro mak okwe.

Anarî yana komo yewton pona so meero kîwcekn̂e noro yipu komo yemetanmeso.

12 Taa,

ero yipu poko rma oyexitaw kîwcekn̂e hara Tamasku pona.

Xesus ponarono komo wece kîwcekn̂e iina.

Tîmsom pokono yenîn̂e komo karitan waar̂akn̂e.

Xesus ponarono komo yahsîn̂e moso yarî nîîce.

Ero ke noro yipu komo nahsîpe,

kacho mîn waar̂akn̂e kica.

13 Ero yimaw tak esama yaw rma oyexitaw weeyu imo tak ween̂e okyo.

Kamarakataw rma ween̂akn̂e.

Kah yai amna weipekn̂e.

Kaamo yopono xa mîn amna weipekn̂e oco.

Oyakrono komo marha weipekn̂e.

14 Ero yanme thakwa amna n̂epîrkekn̂e ahnoro roowo pona.

Ero wa oyexitaw tak tapota wencekn̂e.

Ebrew mtapotarî yaro kekn̂e.

On wara kekn̂e,

Sawru,

Sawru,

ahce poyero Ow memetanmekya kica?

Tpotkem po cikihciki ketawno wa mak mas oko.

Merewasî rma oko,

kekn̂e owya.

15 Ero wa kacho yentache tak on wara weyukyakn̂e,

Onoke Amoro Apa?

wîîkekn̂e yîwya.

Xesus Ow ha,

an̂emetanmekrî rma ha,

kekn̂e owya.

16 On wara marha kekn̂e,

Awomko tak piiri.

Ahtarî po ececetoko.

Oroto kesenpes awya oyanton me tak awitome.

An̂enîthîrî yekatîmn̂e me kiir̂asî.

Amn̂e tak miyanî rma wenpes hara awya.

Ero yipu yekatîmn̂e me marha mas amn̂e.

17 Kukurunpesî awaikara ehtome so apoyino komo rma.

Xenciu komo meero awaikara naxe akurunperî ke owya.

Xenciu komo ya omtapotarî yekatîmn̂e me tak ken̂epesî oroto.

18 N̂examro cheka ken̂epesî ewtanîren̂e me,

awarpanawnonhîrî komo katparen̂e me marha.

Satanas nahsîthonho komo miir̂asî Kaan yanton me hara.

Ero wa exitaw so tak kicicme ehtoponhîrî komo tak wîhcamnoyasî,

oyanan me tak ahsîtome.

Owyanî ro me ciixapu komo yakrono me tak naxe n̂examro hara opona enîrî ke,

kekn̂e owya Xesus.

19-20 Ero wa kan̂e xa ween̂akn̂e Apa,

kah yawno Mîk ween̂akn̂e okyo.

Ero ke yîmtapotarî yanwekîra ro mak wîxakn̂e.

Yihcirî me Tamasku pono komo ya rma wekatîmyakn̂e Kaanî mtapotarî.

Ero yinhîrî Xerusaren pono komo ya wekatîmyakn̂e hara.

Xuteia rowon pono komo ya marha wekatîmyakn̂e miyan komo ya rma.

Ero yinhîrî Xenciu komo ya makîrha wekatîmyakn̂e hara.

On wara wîîkekn̂e yîwya so,

Kicicme awehtoponhîrî komo tak poxunkacoko.

Kaan pona tak encoko.

Kir̂wan̂he marha ehcoko awehtoponhîrî komo poxunkan̂enho me tak awesenpotome so hara,

wîîkekn̂e yîwya so.

Ero wa mak wîîkekn̂e yîwya so.

21 Ero wa kacho poyero mak owya oyahsîyatken̂e Xutew komo Kaan mîn yaw.

Oyetapetken̂e marha owaikachome thakwa ha re.

22 Kaanî rma tko okurunpekn̂e.

Okurunpesî rma oroto.

Ero ke waipîra rma ka ow meen̂asî.

Kaanî mtapotarî yekatîmrî poko rma wasî.

Cemyawnoyem komo ya wekatîmyasî,

emyanomnî pîn komo ya marha.

Pahxa tî Moises pen n̂ekatîmyakn̂e.

Kweronoman̂e pen komo marha tî n̂ekatîmyatken̂e.

Ero warai xa marha wekatîmyas ow hara.

23 On wara ketken̂e n̂examro pen,

Kristu tak n̂emetanmekyaxe amn̂e,

waihkexe marha.

Ero yinhîrî pakes hara waixa pen komo chei.

Poturme pakaxapu me tak nasî Noro.

Xutew komo weipotopo yekatîmn̂e me tak nas amn̂e,

Xenciu komo weipotopo yekatîmn̂e me marha nasî,

ketken̂e n̂examro pen.

Ero wa xa marha wekatîmyas ow hara,

anarme kahra ro mak wasî,

kekn̂e tî Pawru yîwya.

24 Ero wa ketaw rma Pawru ya Pestu takî tî nîmtapowakn̂e hara.

On wara tî kekn̂e,

Mîmtawaimamya mak na Pawru.

Karita poko mak na mîxakn̂e ayopo xa.

Ero yanme tak mîmtawaimamyasî,

kekn̂e tî Pestu Pawru ya.

25 Pîra ro mak Apa,

kekn̂e tî Pawru.

Yîmtawaimamra ro mak tan wasî.

Takîhso mak tan kîmtapowasî.

Yaarono mak tan wekatîmyas awya so.

26 Xesus yehtoponho wekatîmyasî erasîra ro mak,

ero yipu entan̂e rma moso kayaritomo.

N̂encekn̂e rma owya.

En̂epa me mak etarira ro mak xakn̂e Xesus,

kekn̂e tî Pawru Pestu ya.

27 Ero yinhîrî Akripa ya takî tî kekn̂e hara,

Kayaritomo Akripa,

on wara wîîkes awya hara,

kweronoman̂e komo mtapotarî yewetîn̂e ha na amoro?

Ewetîn̂e me rma kîhtînoyasî,

kekn̂e tî Pawru yîwya.

28 On wara tî n̂eyukyakn̂e Akripa,

Kristu yewetîn̂e me xa tak re ow miir̂asî.

Ewetporo tak wasî,

kekn̂e tî Akripa yîwya.

29 Ai ha,

kekn̂e takî tî Pawru yîwya,

ewetporono me mak awexi xera wasî.

Owarai me xa awexi xe wasî.

Cemeknumiso makî tko awexi xera wasî.

Ero wa xa marha moxam yexi xe was hara ahnoro oyentan̂e komo owarai me xa marha exi xe so wasî,

kekn̂e tî.

Ero wa tî kekn̂e Pawru Akripa ya.

30 Ero wa kacho yentache takî Akripa takî tî nawomyakn̂e,

kopenato marha,

Berenise marha.

N̂examro yakrono komo marha tî nawomyatken̂e.

31 Anana takî tî cetken̂e.

Tîtoche so tak Pawru poko takî tî n̂esencetken̂e.

On wara tî ketken̂e,

Kicicitho me exihra ro mak nasî mîkro.

Twaihkaxmu mera nasî,

tahrusom mera marha nasî,

ketken̂e tî.

32 On wara tî kekn̂e Akripa Pestu ya,

Sesa yaka men owto xe wasî esekatîmso,

kahra exitaw ketaw ha re mahrunkes ha re,

kekn̂e tî.

Ero wa tî kekn̂e Akripa.