Xesus Yehtoponho Xuaw Nmewretho
XUAW
Kaanî Mtapotarî Me Cehsom Yehtoponho
1
Taa,
Xesus yehtoponho tan wekatîmyas awya so.
On warai tî Mîk xakn̂e Xesus,
Kaanî mtapotarî me cehsom xa tî Mîk xakn̂e.
Pahxanî rma tî Mîk xakn̂e,
yihcirî me xa.
Kaan yakro rma tî xakn̂e Noro,
Kaanî mtapotarî me cehsom ha.
Kaanî rma tî Mîk xakn̂e Noro.
2 Ero wa tî xakn̂e.
Kaan yakro rma tî xakn̂e pahxa ro mak yihcirî me xa.
A Palavra (João 1:1-18)
3 Noro rma tî nakîhcekn̂e miyan komo rma ahnoro.
Yînakîtothîrî pîn exihra ro mak nasî.
4 On wara marha tî xakn̂e Noro,
waipîn me ro makî tî xakn̂e,
Noro ro mak.
Ero wa cexirî ke kweyuru komo me xakn̂e.
5 Awarpanawno komo weipon̂e me nasî Noro.
Noro weyuru yahrun̂e me exihra mak nasî awarpan.
Ero ke kweipon̂e ro me nasî Noro.
Ero wa nasî.
6 Taa,
tooto tak xakn̂e kîchew so hara.
Kaan nantomatho tî mîk xakn̂e,
Xuaw tî osotî.
7 Kweyuru me cehsom yekatîmn̂e me tî noro mokyakn̂e.
Noro Mîk ha kweyuru kom ha,
kan̂e me tî xakn̂e.
Ero wa kan̂e me tî xakn̂e Noro pona entome tak tooto komo ya ahnoro,
kweyuru komo pona ha.
Ero poko tî Xuaw nantomekn̂e Kaan.
8 Kweyuru komo pînî rma mîk xakn̂e Xuaw.
Kweyuru yekatîmn̂e me mak xakn̂e.
9 Kweyuru xa tak Mîk Xuaw n̂ekatîmîtho.
Noro yipu tak mokyakn̂e roowo pona.
Miyan komo weipon̂e rma Mîk Noro,
roowo pona ewruxapu komo weipon̂e ha.
Ero wa nasî kweipon̂e komo.
10 Tan ka xakn̂e Noro roowo pono komo chew,
tînakîtothîrî komo chew rma.
Takîhton̂enhîrî me tko Noro yîhtînopîra xatken̂e okwe.
11 Tînakîtothîrî pona rma re mokyakn̂e Noro tpoyino komo cheka rma.
Ahsîra tko xatken̂e n̂examro okwe.
12 Nahsîyatken̂e rma tko anarî komo mak,
Noro yosotî ponarono komo mak ha.
Noro yipu komo tak Kaan n̂iir̂akn̂e tîmxîkrî me ahnoro rma.
13 Onoke yanme xa n̂examro n̂ewruyatken̂e Kaan xîkrî me ha?
Tporin pen komo yanme katî?
Pîra ro mak.
Tanme ro so mak katî n̂ewruyatken̂e?
Pîra marha.
Kîîrî yanme katî n̂ewruyatken̂e?
Pîra marha.
Kaan yanme mak n̂ewruyatken̂e Noro xîkrî me ha.
Ero wa xatken̂e Noro yahsîn̂enho komo.
Xuaw Mtapotachonho
14 Taa,
on wara marha xakn̂e Noro,
Kaanî mtapotarî me cehsom,
n̂etpuncekn̂e tak kîchew so ehtome tan roowo po.
Kîchew so ka n̂enmayakn̂e.
Kir̂wanî ro me Noro n̂een̂akn̂e amna,
Kaan Mumuru ro me xa.
Kwakren̂e ro me xa Noro yehtopo n̂een̂akn̂e amna,
yaarono me ehtopo marha.
Ero wa Noro n̂een̂akn̂e amna.
15 Taa,
Noro yehtopo n̂ekatîmyakn̂e Xuaw.
On wara kekn̂e,
Noro Mîk ha.
Anarî tak mokyasî amn̂e oyekenho yaka,
wîîkekn̂e,
Noro rma Mîk ha,
kekn̂e.
Oyopono xa Mîk ha,
pahxan kaxi thakwa,
oyexinawnonho kax ha.
16 Kwakren̂e ro xa Mîk ha.
Kwakreche so kwakretken̂e so xa hara okre.
17 Ero warahra reha xakn̂e Moises pen.
On wara men ehcoko,
kacho yekatîmn̂e me makî tî xakn̂e noro penî reha.
Xesus Kristu takî reha xakn̂e kwakrecho yekatîmn̂e me reha okre.
Yaarono yekatîmn̂e me marha xakn̂e Noro.
Ero warai yekatîmn̂e me xakn̂e Xesus Kristu.
18 Kaan yenîn̂enho exihra ro mak nasî tooto.
Yumumuru rma tko Noro n̂enpesî kîwya so.
Cewn̂anî ro Mîk Yumumuru.
Tîîm panawno me nasî,
Noro rma kir̂wan̂he Kaan yehtopo n̂ekatîmyasî kîwya so,
kekn̂e Xuaw.
19 Taa,
Xuaw yehtoponho rma wekatîmyasî.
Amn̂e tak tî Cerusaren pono komo mokyatken̂e noro yentaxi.
Tîmsom pokono komo mokyatken̂e Repita komo yakro.
Xutew komo yanme mohxapu komo tî mîkyam xatken̂e.
On wara tî ketken̂e yîwya,
Onoke xa amoro?
ketken̂e yîwya.
João batiza Jesus (João 1:19-34)
20 On wara tak n̂eyukyakn̂e noro,
Kristu pînî rma ow,
kekn̂e mak yîwya so.
Kristu ow ha,
kahra ro mak xakn̂e.
Ero wa xakn̂e.
21 Ero yinhîrî ketken̂e xa hara yîwya,
Onoke xa amoro ke?
Erias katî amoro?
ketken̂e yîwya.
Pîra,
noro pîn marha ow,
kekn̂e hara Xuaw yîwya so.
Kweronoman̂e ro xa tak mokyas amn̂e,
kachonho katî Amoro?
ketken̂e hara.
Pîra marha,
kekn̂e hara Xuaw.
22 Onoke xa amoro ke kopi?
ketîketken̂e tak yîwya.
Esekatîmko ka amna ya,
Noro xa tî mîk ha,
kachome tak amna cen̂epen̂enhîrî komo ya hara,
ketken̂e yîwya.
23 On wara Xuaw n̂eyukyakn̂e,
On warai mak ow,
kweronoman̂e pen n̂ekatîmtho mak ow ha,
Isaias pen n̂ekatîmtho.
On wara kekn̂e noro pen,
Pohnîntaw cenmaxmu mtapotarî tak mencexe amn̂e.
On wara kesî noro tîhyaka mohxapu komo ya,
Kir̂wan̂he ka yînankacoko Kporin komo yesamarî Noro mohtopo tak ha,
kesî,
kekn̂e Isaias pen.
Noro rma ow yîn̂ekatîmthîrî ha,
kekn̂e Xuaw yîwya so.
24 Parisew komo n̂en̂epetho tî mîkyam xatken̂e Xuaw yaka mohxapu komo.
25 On wara ketken̂e hara n̂examro yîwya,
Kristu pîn ham amoro,
Erias pîn marha mî amoro.
Kweronoman̂e ro xa tak mokyas amn̂e,
kachonho pîn marha mî amoro.
Ero ke ahce kacho emicinono miir̂a ha ke?
ketken̂e.
26 On wara Xuaw n̂eyukyakn̂e,
Yukwaka rma re emicinono wiir̂as ow.
Tanî rma tko nasî anarî hara achew so rma,
Kristu Mîk ham,
kacho pîn awya so.
27 Noro rma Mîk,
Anarî mokyas amn̂e oyekenho yakan,
kachonho owya.
Oyopono ro mak Noro.
Yîhtarî mici meero yîmhokara wasî yîxawyakanî ro me oyexirî ke thakwa,
kekn̂e Xuaw yîwya so.
Ero wa kekn̂e Parisew n̂en̂epetho komo ya.
28 Betan̂i po xakn̂e Xuaw ero yimaw,
Xotaw yeco po.
Emicinono rirî poko xakn̂e iito.
Ero wa xakn̂e.
29 Taa,
enmapuche hara Xesus takî tî n̂een̂akn̂e Xuaw.
Noro wece rma tî mokyakn̂e.
Ero ke on wara kekn̂e Xuaw Noro poko,
Mîkro ha oper̂a xîkrî,
Kaan nîmrî.
Kicicme roowo poko hakno komo yehtoponho yîhcamnon̂e Mîk ha,
kekn̂e.
30 Noro poko rma wa wîîkai,
Anarî tak mokyas amn̂e oyekenho yakan hara.
Oyopono me xa nasî Noro pahxan kaxi,
oyexinawnonho kax ha,
wîîkai awya so.
Noro rma Mîkro.
31 Ow meero marha Noro yenîhra ka wîxakn̂e.
On wara kacho mak wencekn̂e,
Noro tak n̂esenpesî Ixaw Yana komo ya,
kacho wencekn̂e.
Ero ke oona kmokyakn̂e emicinono riso,
kekn̂e Xuaw.
Ero wa kekn̂e.
32 On wara tak n̂esekatîmyakn̂e Xuaw,
Noro pona Kaan Yekatî nîhtoi owero ro.
Potkuku me nîhtoi kah yai,
Puu tai,
pona tak n̂etahsîy.
33 Ero ke anarî mokyas amn̂e,
kachonho Mîkro ham,
wîîkai.
Oyanme ro makî tko ero wa kahra wasî.
Tuuna kwaka emicinono rirî poko oyantoman̂enho on wara kekn̂e owya,
Oyekatî nîhcesî amn̂e awero ro an̂emicinothîrî pona,
Noro poko marha n̂etahsîyasî.
Noro rma Mîk ham,
Kir̂wanî ro Yekatî ke emicinono rin̂e,
kasko tak Noro poko,
kekn̂e owya.
34 Ero wara rma tak ween̂e yîmtapotachonhîrî yaw roro rma.
Ero ke wekatîmyas awya so.
Kaan Mumuru ro xa Mîkro ham,
wîîkes awya so,
kekn̂e Xuaw.
Ero wa kekn̂e.
Antre Komo Nan̂ikyasî Xesus
35 Taa,
enmapuche hara iito rma xakn̂e Xuaw Betan̂i po rma.
Tînpanatanmekrî komo yakro xakn̂e iito,
2 yakro mak.
Os discípulos seguem Jesus (João 1:35-51)
36 Ero yimaw yîhyari so cekn̂e Xesus.
Noro tak n̂een̂akn̂e Xuaw,
Ero ke Noro poko kekn̂e xa hara,
Mîkro ha,
oper̂a xîkrî,
Kaan yoku warai,
kekn̂e.
37 Ero wa kacho n̂encetken̂e Xuaw npanatanmekrî komo,
2 kom ha.
Ero ke n̂examro tak cetken̂e Xesus wenari.
38 Ero yinhîrî tak Xesus n̂esewkor̂mekn̂e.
N̂examro yenîche on wara kekn̂e,
Ahce xe wa mat ha?
kekn̂e Xesus yîwya so.
Habi,
ahto wa mai?
ketken̂e yîwya.
Kpanatanmekn̂e,
kacho rma tî mîn,
Habi,
kacho.
39 Amohcoko ika enso,
kekn̂e Xesus yîwya so.
Ero ke Noro yakro tak cetken̂e,
n̂een̂atken̂e tak yîwîntopo.
4 to xakn̂e kaamo ero yimaw kokon̂i tak.
Ero ke iito kokmamyatken̂e Xesus yaw.
Ero wa xatken̂e Xesusu npanatanmekrî komo.
40 Xuaw mtapotarî tî n̂encetken̂e n̂examro 2 rma.
Xesus wenari marha tî cetken̂e.
Antre tî mîk xakn̂e anarî yosotî,
Simaw Petru yakno tî mîk xakn̂e.
41 Noro tî ka cekn̂e cokorî takno yenso,
Simaw yenso.
On wara takî tî kekn̂e yîwya,
Mesias xa tak amna n̂enwo,
kekn̂e tî.
Kristu,
kacho rma tî mîn,
Mesias,
kacho.
42 Ero yinhîrî takî tî takno naar̂akn̂e Xesus yenso.
Ero yimaw tak noro wece n̂een̂akn̂e Xesus.
On wara kekn̂e yîwya,
Simaw amoro Xuaw mumuru ha.
Oroto tak anarme tak kosohcesî,
Sepas tak amoro,
wîîkes awya,
kekn̂e yîwya.
Toopu,
kacho rma tî mîn,
Sepas,
kacho.
Ero wara kekn̂e Xesus.
Piripe Komo Tak Naxe Xesus Yakrono Me Hara
43 Taa,
enmapuche hara Karireia pona tîto xe xakn̂e Xesus.
Iina tîtoche tak Piripe makîrha n̂een̂akn̂e.
On wara kekn̂e yîwya hara,
Oyakro amok ha,
kekn̂e.
44 Becsaita pono tî mîk xakn̂e Piripe.
Antre komo marha tî xatken̂e ero pono me,
Petru kom ha.
Ero re pono tî mîkyam xatken̂e n̂examro.
45 Ero yinhîrî anarî yenso takî tî cekn̂e hara Piripe,
Natanaew yenso ha tî.
On wara tî kekn̂e yîwya,
Xesus amna n̂enwo,
Kir̂an mokyas amn̂e,
kacho mewrekn̂e Moises pen.
Kweronoman̂enhîrî pen komo marha ero wa kacho mewretken̂e.
Noro rma tak amna n̂enwo.
Xesus Mîk,
Nasare pono,
Xose mumuru ha tî,
kekn̂e tî Piripe Natanaew ya.
46 Okre,
kekn̂e takî tî Natanaew hara.
Kir̂wan komo ma re mîkyam Nasare pono komo awya?
kekn̂e tî.
Amoko xe ka enso,
kekn̂e hara tî Piripe yîwya.
Ero wa tî kekn̂e.
47 Ero ke tak Xesus yenso cekn̂e Natanaew.
Cetaw rma noro n̂een̂akn̂e Xesus.
On wara tak kekn̂e noro poko,
Ixaw Yana xa mîkro,
cemarontanî ro,
kekn̂e.
Ero wa kekn̂e Xesus Natanaew poko.
48 Ahce wa xa ero warai me ow mîhtînopu kopi?
kekn̂e tak noro Xesus ya.
On wara Xesus n̂eyukyakn̂e,
Awan̂ikîra rma ka exitaw Piripe kenwo ha.
Mînto awexitaw ka,
piiku yepu yapomyaw kenwo rma,
kekn̂e Xesus yîwya.
49 Ai ha,
kekn̂e Natanaew yîwya.
On wara wîîkes awya Apa,
Kaan Mumuru ro xa Amoro ham.
Ixaw Yana komo kayaritomon xa Amoro ham,
kekn̂e Xesus ya.
50 On wara tak kekn̂e Xesus yîwya,
Piiku yepu yapomyaw awexitaw kenwo,
wîîka awya,
ero ke opona meena?
Amn̂e tak aweserepokacho xa tak meen̂as hara.
51 Yaaro tan wîîkes awya,
on warai men meen̂as amn̂e,
kaapu yetahrunkacho meen̂asî,
Kaan yancun komo marha meen̂asî.
Tooto me Ewruxapu pore nîhcexe,
n̂etanîmyaxe marha.
Ero yipu tak meen̂as amn̂e,
kekn̂e Xesus yîwya.
Ero wa kekn̂e Natanaew ya.