Taa,

ero yinhîrî tak n̂enmayakn̂e yihcirî kaamo.

Ero yimaw tak wooxam komo tî cetken̂e Xesus yahrutopo yaka.

Enmarî yakro ro rma tî cetken̂e.

Okoputhîrî kapetopo tî naar̂atken̂e tîn̂irithîrî kom ha.

2 Tîhmamaxi tî toopu n̂een̂atken̂e okyo ahrutopo potai.

3 Ero ke n̂ewomyatken̂e takî tî.

Kporin komo Xesus yokoputho yenîhra rma tî xatken̂e.

4 Ero ke n̂eserepoketken̂e takî tî.

Ero wa exitaw so rma,

tîtîk,

kîrkomo takî tî n̂esenpetken̂e yîwya so asakî.

N̂ecececetken̂e tî yîmîtwo.

Anarme tî xakn̂e n̂examro ponon,

tîroromutwe ro makî tî xakn̂e oco.

5 Ero ke n̂eraswatken̂e takî tî wooxam komo n̂examro pona.

Ero ke tî roowo pona n̂esewnapetken̂e.

Ero wa exitaw so on wara takî tî ketken̂e esenpoxapu komo yîwya so,

Ahce kacho karitî mepor̂atu waixa pen komo chew hara?

6-7 Exihra nasî tan.

Paka tak ha.

On wara kekn̂e re Xesus awya so Karireia po cexitaw ha ka,

Tooto me Ewruxapu n̂ekanîyaxe amn̂e kicicitho komo nahsîrî me.

Namowopexe marha tak en̂ekan̂enhîrî komo,

waihkachome.

Osorwaw ro enmapuche takî tko pakes hara,

kekn̂e tî awya so,

ketken̂e tî esenpoxapu komo.

8 Kuu,

yaaro mîîkexe,

ketken̂e takî tî wooxam komo.

Xesusu mtapotachonho takî tî nîhtînoyatken̂e hara.

9 Ero yinhîrî tak cetken̂e hara tî wooxam komo okopu yahrutoponho yenîn̂enho.

Tîn̂enîthîrî komo takî tî n̂ekatîmyatken̂e 11 komo ya.

N̂ekatîmtîketken̂e ahnoro.

Anarî komo ya marha tî n̂ekatîmyatken̂e.

10 Taixa tî xatken̂e wooxam komo tîn̂enîthîrî yekatîmn̂e komo,

Maria Matarena,

Xoana,

Maria anarî hara,

Ciaku yon ha.

Anarî komo marha tî xatken̂e wooxam kom hara n̂examro yakrono komo.

Noro yipu komo tî n̂ekatîmyatken̂e 11 komo ya.

11 Tohnawno wara ro makî tko tî n̂examro n̂encetken̂e wooxam komo mtapotarî.

Okre,

yaaro xa ma re mîîket ha?

ketken̂e makî tî yîwya so.

12 Petru tko tî cekn̂e Xesus yahrutoponho yaka.

Kar̂pe tî cekn̂e.

Ewtarî potaw cexitaw nutupenwakn̂e takî tî entome.

Okopu womtho tî n̂een̂akn̂e riin̂u kahxapu.

Cewyaro so tî n̂een̂akn̂e.

Ero yipu yenîche cekn̂e tîmîn yaka hara.

N̂eserepokekn̂e xa tî.

Ero wa tî xakn̂e Petru.

13 Taa,

ero yinhîrî tak ero kaamo po rma takî tî esama yaw cetken̂e yînpanatanmekîthîrî komo asakî.

Emaus pona tî cetken̂e.

Ewtoci mîn Emaus.

Xerusaren poi kîwcetaw 11 kirometru wicakî tîhcesî Emaus pona.

14 Tîcetaw so n̂examro tî nîmtapowatken̂e Xesus poko,

amowotoponhîrî poko,

okoputhîrî yehcamnotopo poko marha.

Ero yipu poko tî nîmtapowatken̂e.

15 Ero wa tîmtapowataw on wara tî ketken̂e,

Ahce wa exirî ke ero wa xakn̂e Noro pen ha?

ketken̂e tî.

Ero wa ketaw rma yîwya so Xesusu tî mokyakn̂e yîhyaka so.

Akro so tî cekn̂e.

16 Anarme tko tî xakn̂e n̂examro yewru.

Xesus Moso ham,

kahra tî xatken̂e,

yîhtînopîra tî xatken̂e.

17 Ero yinhîrî Xesus takî tî on wara kekn̂e yîwya so.

Ahce poko kyam wa mîmtapowatu oyakno komo?

Ahwon wara keen̂axe so okwe,

kekn̂e tî Xesus yîwya so.

18 Ero ke on wara tî kekn̂e anarî Xesus ya,

Pawana ma Amoro Xerusaren pona mohxapu ha?

Ahnoro cma re n̂encexe Noro pen yehtoponho.

Kokon̂oro waihkano n̂iir̂atken̂e iitono komo.

Amoro ma entara mai?

kekn̂e tî yîwya.

Kreopasî tî mîk ero wa kekn̂e yîwya.

19 Ahce wa xakn̂e?

kekn̂e tî Xesus yîwya.

On wara xakn̂e,

kekn̂e tî yîwya,

Weronomano rin̂e xakn̂e mînto Xerusaren po.

Xesus Mîk xakn̂e Noro yosotî.

Nasare pono tî Mîk xakn̂e.

Kerepokan̂e me panatanmekno n̂iir̂akn̂e okre.

Cirihnî marha n̂iir̂akn̂e ahnoro tooto komo wero ro.

Kaan yanme ero wa ciino n̂iir̂akn̂e.

20 Noro yipu rma tko nahsîyatken̂e amna yenîn̂e komo,

tîmsom pokono yenîn̂e komo marha.

Twaihkaxmu me kr̂a n̂ekanîyatken̂e okwe.

Noro pen tak namowopoce okwe.

Ero wa xakn̂e Noro pen okwe.

21 Osorwaw ro tak n̂enmai noro pen waihkachonho.

Ixaw Yana komo yown̂e Mîkro okre,

kekn̂e cma re ka amna Noro pen poko.

22 Taa,

oroto tak amna n̂eserepoka wooxam komo mtapotarî poko.

Amna yakro cesenmesom komo mîkyam.

Pahxaxaro tî tocow Noro yahrutoponho yaka.

23 Okoputhîrî tî enîhra rma n̂ehcow hara kopi.

Ero ke mohcow hara.

Ancu komo mak amna n̂enwo kopi.

Kar̂pe tak nai hara Xesus,

kacow ancu komo amna ya,

kacow woxam komo amna ya.

24 Ero ke amna yakrono komo tak tocow xa hara okopu yahrutoponho yenso xa hara.

Wooxam komo mtapotarî yaw roro rma tî n̂encow okyo.

Xesus pen tî enîhra rma n̂ehcow kopi,

kekn̂e tî yîwya.

Ero wa tî kekn̂e Kreopas Xesus ya.

25 Ero yinhîrî on wara tî kekn̂e Xesus yîwya so hara,

Wara mak cesehtînosom komo ro mak amyamro.

Yamoro mak weronomano rin̂enho pen komo mtapotarî mewehcaxe okwe anarme exirî ke aropotarî komo.

26 Esemetanmekîn me ma re xakn̂e Kristu awya so kir̂wanî ro me cesenpotome tak amn̂e?

kekn̂e tî Xesus yîwya so.

27 Ero yinhîrî Kaan Karitan poko takî tî n̂examro panatanmekyakn̂e Xesus.

Ahnoro makî tî n̂ekatîmyakn̂e yîwya so.

Moises pen nmewretho poko ka kekn̂e.

Ahnoro weronomano rin̂enho pen komo nmewretho poko marha kekn̂e.

Tpokono rma tî mîn n̂ekatîmyakn̂e yîwya so.

Ero wa tî Kreopas komo panatanmekyakn̂e.

28 Ero yinhîrî ewto pahnoke takî tî xatken̂e,

pona tîtotopo komo pahnoke.

Miya tîtosom wara tî n̂esenpekn̂e Xesus.

29 Noro tko tî porohketken̂e Kreopas komo.

Amna yaw cma re ka menmayasî.

Mîk ha meye thakwa kaamo okwe,

ketken̂e tî yîwya.

Ero ke akro so rma tî cekn̂e Xesus yîmîn komo yaka.

30 Iito exitaw so tak Xesus takî tî n̂eseresmekn̂e n̂examro yakro.

Noro rma tî cuure nanîmyakn̂e.

Noro marha tî nîmtapowakn̂e Kaan yakro ceseresmacho komo poko.

Noro marha tî poikekn̂e,

n̂ekamyakn̂e marha tî iyuru komo.

31 Ero yimaw xa tak tîtîk,

pakaxapu wara takî tî xatken̂e Kreopas komo.

Xesusu rma Moso ham,

ketken̂e takî tî.

Ero yimaw marha tî,

poku,

n̂ehcamnoyakn̂e mak takî tî Xesus.

32 Kopi,

ketken̂e takî tî n̂examro.

Xesus xa Mîk n̂ex ham kopi.

Ceserepokekn̂e rma re mînto esama yaw Kaan Karitan yekatîmyataw kîwya.

Ahce kacho camkî cenwo hara kopi?

ketken̂e tî.

33 Ero ke ero yimaw rma takî tî sai,

nawomyatken̂e hara tî.

Cetken̂e tak hara tî.

Xerusaren pona tî n̂etîrametken̂e hara.

Iina cepatakache so 11 komo takî tî n̂een̂atken̂e.

Anarî komo marha tî xatken̂e iito 11 komo yakro.

34 On wara tî ketken̂e 11 komo,

Paka rma ham okre Kporin komo.

Simaw tî n̂een̂akn̂e,

ketken̂e tî.

35 Ero yinhîrî Kreopas komo makîrha tî n̂ekatîmyatken̂e Xesus yentoponho tîwya so hara.

On wara tî ketken̂e,

Emaus yesamarî yaw amna cetaw Xesusu rma tak mokyakn̂e amna yakro.

Kaan Karitan n̂ekatmo amna ya tpokono mko rma.

Ero yinhîrî tak amna n̂erema eseresmachome Noro yakro.

Cuure yekamyataw tak amna nîhtînopu.

Xesusu rma Moso ham,

kekn̂e amna,

ketken̂e tî yîwya so.

Ero wa tî ketken̂e.

36 Taa,

ero wa ketaw rma yîwya so Xesusu rma takî tî xakn̂e iito piiri,

yîchew so okyo.

Erasîra ehcoko,

kekn̂e tî Noro yîwya so.

37 N̂esekatketken̂e ro makî tî n̂examro.

N̂eraswatken̂e marha tî.

Tooto yekatînho wara tî Xesus n̂een̂atken̂e.

38 Ahce kacho meraswat hara?

kekn̂e takî tî Xesus yîwya so.

Ahce kacho oyanwekn̂e wara mat hara okwe?

39 Encoko xe ka oyamorî ha,

ohtarî marha.

Noro rma Ow ha.

Opun ka apecoko.

Tuhn̂e Ow meen̂axe,

tîyochokem marha.

Ero wa exihra ro mak nasî ekatînhîrî reha,

kekn̂e tî yîwya so.

40 Ero wa kache tamorî takî tî n̂enpekn̂e yîwya so,

tîhtarî marha.

41 Apohana,

Xesus xa ma re Moso ha?

ketken̂e rma tko tawake cehtîkarî komo ke.

N̂eserepoketken̂e ro makî tî.

Ero yimaw takî tî on wara tî kekn̂e Xesus,

Oyotî xe cma re wasî.

Nai ha na ahyaw so?

kekn̂e tî yîwya so.

42 Ero ke kan̂porexapu takî tî nîmyatken̂e yîwya ootî pun.

Weenu marha nîmyatken̂e yîwya.

43 Non̂ekn̂e takî tî Xesus n̂examro wero ro rma.

44 Ero yinhîrî on wara tî kekn̂e Noro yîwya so,

Pahxa rma ahyaw so ka oyexitaw on wara wîîkekn̂e awya so,

apanatanmetopo komo mewrekn̂e Moises pen.

Opokono rma mîn mewrekn̂e.

Weronomano rin̂e pen komo marha mewretken̂e opokono hara.

Opokono me marha nai Waano kacho hara.

Ero wa nasî Kaan Karitan opokono.

Ero wara kacho mko yaw roro rma was amn̂e watohra ro mak,

wîîkekn̂e pahxa awya so.

Ero ke ero yipu yaw roro rma was oroto,

kekn̂e tî yîwya so.

45 Ero wa kache yuhnari yîhtînon̂e me takî tî n̂examro n̂iir̂akn̂e Xesus.

Ero wa tî n̂iir̂akn̂e Kaan Karitan yentachome camkîra tak ha.

46 Ero wara ciriche on wara takî tî kekn̂e xa hara Xesus yîwya so,

On wara kesî Kaan Karitan opoko,

Kristu n̂esemetanmekyasî,

waihyasî marha.

Pakes hara tko osorwaw ro enmapuche,

kesî.

47 On wara marha kesî Kaan Karitan,

Mîk hak rowon pono komo tak nasî tpanatanmekpore miyan komo rma ahnoro mak.

Xerusaren pono komo ka tpanatanmekpore nasî.

Amn̂e anarî komo tpanatanmekpore nas hara.

Kicicme awehtoponhîrî komo tak poxunkacoko awehtoponhîrî komo yîhcamnotome Kaan ya.

Kristu pona enîche mak awya so nîhcamnoyasî,

kapore nasî yîwya so.

Ero wa cekatîmpore nasî miyan komo ya rma.

48 Oyehtoponho yenîn̂enho komo rma amyamro.

49 Pahxa on wara Apapa kekn̂e,

Oyekatî tak wîmyas amn̂e awya so,

kekn̂e.

Ero ke Noro rma tak wen̂epes amn̂e aropotaka so.

Ero ke Noro ka momohcoko tanî rma ka Xerusaren po.

Noro tak akaricexe so aropotaw so.

Kah yaino ke akaricexe so,

kekn̂e tî.

Ero wa tî kekn̂e Xesus 11 komo ya.

50 Ero yinhîrî n̂examro takî tî naar̂akn̂e Xesus Betania pona.

Iito cexitaw tak napockanwakn̂e takî tî Xesus ececoka.

Kir̂wan̂he moxam akronomak amn̂e Apa,

kekn̂e takî tî Kaan ya.

51 Ero wa ketaw rma yîhyai so takî tî cekn̂e Xesus.

Kah yaka tî n̂etanîmyakn̂e.

52 Ero Noro poko tî nahwowatken̂e akrononhîrî komo.

Oporinî ro xa Amoro,

ketken̂e yîwya.

Ero yinhîrî Xerusaren pona takî tî n̂etîrametken̂e hara.

Tahwore xa tî cetken̂e.

53 Ero yinhîrî takî Kaan mîn yaw tî xatken̂e roro,

Kir̂wan̂he xa Kaan nai ham okre,

karî poko tî xatken̂e iito.

Nahwowatken̂e ro mak.

Ero wa tî xatken̂e.

Amen.